බදුල්ල සිට කොළඹ බලා ධාවනය වෙමින් තිබුණු උඩරට මැණිකේ දුම්රියේ ගැටී එකම පවුලේ තිදෙනෙක් ජීවිතක්ෂයට පත්ව තිබේ.

රොසැල්ල සහ වටවල දුම්රිය ස්ථාන දෙක අතරදී මෙම අනතුර සිදුව ඇත්තේ 103 1/2 සැතපුම් කණුව ආසන්නයේදීය.

මව (65) , පියා (75) සහ පුතා (41) මෙලෙස ජීවිතක්ෂයට පත්ව තිබේ.

මොවුන් තිදෙනාම මස්කෙළිය ප්‍රදේශයේ පදිංචිකරුවන් බව වටවල පොලිසිය සඳහන් කරයි.

උඩරට මැණිකේ දුම්රිය රොසැල්ල දුම්රිය ස්ථානය වෙත ළඟාවීමට ප්‍රථම එම පුද්ගලයින් දුම්රිය ධාවනය වන වේලාව අසා වටවල දුම්රිය ස්ථානය දෙසට ගමන් කළ බව දුම්රිය සේවකයෙක් පොලීසියට පවසා තිබේ. ඒ අනුව මොවුන් තිදෙනා සියදිවි හානිකර ගත්තේදැයි සැකයක් මතුව ඇති බැවින් ඒ සම්බන්ධයෙන් පොලීසිය පරීක්ෂණ පවත්වයි.

වන අලීන් බහුලව ගම්වදින ප්‍රදේශවල දැනට ස්ථාපිත විදුලි වැට සඳහා දෙවැනි බාධකයක් ඉදිකිරිමට පියවර ගෙන ඇතැයි වනජීවි දෙපාර්තමේන්තුවේ අධ්‍යක්ෂ ජනරාල් චන්දන සූරියබණ්ඩාර මහතා සදහන් කරයි.

ඒ අනුව දැනට පවතින විදුලි වැටට අමතරව අගල් කැපීම ,එල්ලෙන විදුලි වැට ඉදි කිරීම හෝ ජෛව වැටක් ඉදිකිරීම වැනි විකල්ප ක්‍රමවලින් එකක් ස්ථාපිත කිරීම කෙරෙහි අවධානය යොමුකර ඇතැයිද ඔහු සඳහන් කළේය.

පසුගිය කාලයේ කළ අධ්‍යයන අනුව දෙවැනි බාධකයක් ඉදිකිරීම මගින් වන අලි ඒ හරහා ගම් වැදීම පාලනය වන බව තහවුරු වු බවද අධ්‍යක්ෂ ජනරාල්වරයා පැවසීය.

ඒ අනුව හඳුනා ගත් ප්‍රදේශවල කිලෝමීටර් 300 ක විදුලි වැටට අමතරව දෙවැනි බාධකයක් ඉදිකිරීම මේ වනවිට ආරම්භ කර තිබේ.

කිලෝමීටර් 4500 ක දුරක් දැනට විදුලි වැට ස්ථාපිත කර ඇති අතර ලබන වසරේදි තවත් කිලෝමීටර් 1500 ක් අලුතින් විදුලි වැට ඉදි කිරීමට සැලසුම් කර ඇත.

පේරාදෙණිය උද්භිත උද්‍යානයට වසර 200 ක් පිරීම නිමිත්තෙන් ජාතික ශාක කෞතුකාගාරයක් ඉදිකිරීමට රජය තීරණය කර තිබේ.

පේරාදෙණිය ජාතික උද්භිද උද්‍යානය තුළ මෙම ශාක කෞතුකාගාරය පිහිටුවීමට නියමිතව ඇත.

මෙරටට ආවේණික ශාක, මල් සහ ඒ ආශ්‍රිත නිෂ්පාදන මෙම ශාක කෞතුකාගාරයට ඇතුළත් කිරීමට නියමිත බව සඳහන්ය.

සංචාරකයින්ගේ තවත් එක් ගමනාන්තයක් වන පේරාදෙණිය උද්භිත උද්‍යානය ජාතික ශාක කෞතුකාගාරයෙන් තවදුරටත් ලොව ප්‍රකට ශාකාගාරයක් බවට පත් කිරීම රජයේ අරමුණ වී තිබේ.

අමාත්‍ය ධුර සම්බන්ධයෙන් සති දෙකක් ඇතුළත ඊට අදාළ වාර්තාවක් ඉදිරිපත් කරන ලෙස ශ්‍රේෂ්ඨාධිකරණය විසින් නීතිපතිවරයා වෙත නියෝග කර තිබේ.

වර්තමානයේ පවතින සහ මේ වන විට අහෝසි වී ඇති අමාත්‍ය ධුර සම්බන්ධයෙන් එම වාර්තාව කැඳවා ඇත.

වත්මන් අමාත්‍ය මණ්ඩලය පත් කර ඇති ආකාරය නීති විරෝධී යැයි තීන්දු කොට එහි ක්‍රියාකාරීත්වය අත්හිටුවීමේ තහනම් නියෝගයක් නිකුත් කරන ලෙසට ඉල්ලමින් ගොනු කර ඇති පෙත්සම අද කැඳවූ අවස්ථාවේදී මෙම නියෝගය ලබා දී තිබේ.

වෘත්තිකයින්ගේ ජාතික පෙරමුණේ ලේකම් ඉංජිනේරු කපිල රේණුක පෙරේරා මහතා විසින් ගොනුකර තිබෙන මෙම පෙත්සම තුළින් සඳහන් කර ඇත්තේ ජනාධිපතිවරයා විසින් වත්මන් අමාත්‍ය මණ්ඩලය හා රාජ්‍ය අමාත්‍යවරු පත් කර තිබෙන ආකාරය ආණ්ඩුක්‍රම ව්‍යවස්ථාවේ 47 (1) (අ) සහ(ආ) ව්‍යවස්ථාවට පටහැනි බවය.

ව්‍යවස්ථාවේ සීමාව ඉක්මවා කැබිනට් අමාත්‍යවරු දෙදෙනෙකු සහ රාජ්‍ය අමාත්‍යවරුන් 4 දෙනෙකු ජනාධිපතිවරයා විසින් අතිරේකව පත්කර ඇති බවත් ඒ අනුව ඉකුත් ජුනි මස 07 වන දායින් පසුව මෙරට අමාත්‍ය මණ්ඩලයේ ක්‍රියාකාරීත්වය මුළුමනින්ම ව්‍යවස්ථාවට පටහැනි බවත් පෙත්සම්කරු පෙන්වා දී තිබේ.

ආණ්ඩුක්‍රම ව්‍යවස්ථාව ප්‍රකාරව මෙවැනි අමාත්‍ය මණ්ඩලයකට සිය නිල කටයුතු ඉටු කිරීමට නිත්‍යානුකුල හැකියාවක් නොමැති බව පෙන්වා දෙන පෙත්සම්කරු මේ තුළින් ඔවුන් ජනතාවගේ මූලික අයිතිවාසිකම් උල්ලංඝනය කරමින් සිටින බවට චෝදනා කරයි.

එමෙන්ම වත්මන් අමාත්‍ය මණ්ඩලයේ ක්‍රියාකාරිත්වය අත්හිටුවීමේ තහනම් නියෝගයක් නිකුත් කරන ලෙසද පෙත්සම්කරු අධිකරණයෙන් ඉල්ලා සිට ඇත.

ඊට අමතරව ව්‍යවස්ථානුකූල සීමාවන් අභිබවා රාජ්‍ය අමාත්‍යවරු වශයෙන් පත්කොට තිබෙන චමල් රාජපක්ෂ, දිළුම් අමුණුගම, නාමල් රාජපක්ෂ සහ සුදර්ශණී ප්‍රනාන්දු පුල්ලේ යන අයගේ කටයුතු අත්හිටුවීමේ අතුරු නියෝගයක් නිකුත් කරන ලෙසද ඔහු අධිකරණයෙන් ඉල්ලා ඇත.

අදාළ පෙත්සම අද විජිත් මළල්ගොඩ, යසන්ත කෝදාගොඩ සහ මහින්ද සමයවර්ධන යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.

එහිදී මෑතකදී පත් කරන ලද ඇතැම් අමාත්‍ය ධුර අහෝසි වී ඇති බවට තමන්ට තොරතුරු දැනගන්නට ලැබී ඇති අතර ඒ සම්බන්ධයෙන් වාර්තාවක් ඉදිරිපත් කිරීම සඳහා කාලය ලබා දෙන ලෙසට නීතිපතිවරයා වෙනුවෙන් පෙනී සිටි සොලිස්ටර් ජෙනරාල් ඉන්දිකා දේවමුනි ද සිල්වා මහත්මිය අධිකරණයෙන් ඉල්ලා ඇත.

ඒ අනුව අදාළ නියෝගය ලබාදුන් අධිකරණය අදාළ පෙත්සම කරුණු තහවුරු කිරීම සදහා ජනවාරි මස 27 වනදා කැඳවීමට නියම කර තිබේ.

ජනපති වෙනුවෙන් නීතිපතිවරයා, අග්‍රාමාත්‍ය මහින්ද රාජපක්ෂ මහතා ඇතුළු අමාත්‍ය මණ්ඩල සාමාජිකයින්, සියලුම රාජ්‍ය අමාත්‍යවරු, ජනාධිපති ලේකම්, මුදල් අමාත්‍යාංශ ලේකම් ඇතුළු 82 දෙනෙකු නම් වගඋත්තරකරුවන් ලෙස නම් කර ඇත.

පාරිභෝගික කටයුතු පිළිබඳ අධිකාරිය ලිට්‍රෝ ගෑස් සමාගමට නියෝගයක් කර තිබේ.

ඒ දෙසැම්බර් 04 වැනිදාට පෙර නිකුත් කරන ලද සියලුම මුද්‍රා තැබූ (නිල් වර්ණ මුද්‍රා) ගෑස් සිලින්ඩර් නැවත කැඳවන ලෙස ය.

අලෙවි නියෝජිතයන් ළඟ සහ නිවෙස් තුළ ඇති සියලුම ලීට්‍රෝ ගෑස් සිලින්ඩර මෙලෙස කැඳවන ලෙස දැනුම් දී ඇත.

පාර්ලිමේන්තු මන්ත්‍රීවරුන් සභා ගර්භය තුළදී පසුගිය දිනවල කලහකාරී ලෙස හැසිරීම සම්බන්ධයෙන් වාර්තාවක් ඉදිරිපත් කිරීම සඳහා කමිටුවක් පත් කළ බව කථානායක මහින්ද යාපා අබේවර්ධන මහතා අද (08) නිවේදනය කර තිබේ.

නියෝජ්‍ය කථානායක රංජිත් සියඹලාපිටිය මහතාගේ ප්‍රධානත්වයෙන් 11 දෙනෙකුගෙන් එම කමිටුව සමන්විත ය.

මේ අතර බන්දුල ගුණවර්ධන, චමල් රාජපක්ෂ, වාසුදේව නානායක්කාර යන අමාත්‍යවරුන්, රාජ්‍ය අමාත්‍ය සුසිල් ප්‍රේමජයන්ත සහ පාර්ලිමේන්තු මන්ත්‍රීවරුන් වන ගයන්ත කරුණාතිලක, රවුෆ් හකීම්, අනුර ප්‍රියදර්ශන යාපා, විජිත හේරත්, රංජිත් මද්දුම බණ්ඩාර සහ එම්.ඒ.සුමන්තිරන් එහි සාමාජිකයින් ලෙස කටයුතු කරනු ඇත.

පාර්ලිමේන්තු සැසිවාරය ඇමතීමට සමගි ජන බලවේගයේ පාර්ලිමේන්තු මන්ත්‍රී මනූෂ නානායක්කාර මහතාට විනාඩි පහක් ලබා නොදුන් බවට දෙසැම්බර් 03 සහ 04 යන දිනවල සභාවේ උණුසුම් වාද විවාද ඇති විය.

ආණ්ඩු පක්ෂයේ මන්ත්‍රීවරුන් නානායක්කාර මන්ත්‍රීවරයා වෙත පැමිණ අවස්ථා දෙකකදී පහරදීමට උත්සාහ කළ බවට විපක්ෂය චෝදනා කළේය.

සූරියවැව ක්‍රිකට් ක්‍රීඩාංගනයේ සේවකයින් දෙදෙනෙක් වන අලි ප්‍රහාරයකට ලක්ව මිය ගොස් තිබේ.

ක්‍රීඩාංගනයේ ඊයේ රාත්‍රියේ රැදී සිටි ඔවුන් දෙදෙනාගේ සිරුරු ක්‍රීඩාංගනයට ආසන්න අතුරු මාර්ගයක තිබී හමුවී ඇත්තේ අද උදෑසනය.

පොලීසිය සඳහන් කරන්නේ ඔවුන් දෙදෙනාගේ සිරුරු ආසන්න ස්ථාන දෙකක තිබුණු බවය.

ක්‍රීඩාංගනයේ රැදී සිටි ඔවුන් රාත්‍රී කාලයේ පිටතට යාම නිසා මෙසේ වන අලි ප්‍රහාරයට ලක්ව ඇති බවද පොලීසිය කියයි.

ඇළහැර ප්‍රදේශයේ මැණික් බලපත්‍ර ලබාදීමේ ක්‍රමවේදයක් ඇති කිරීමෙන් සාමාන්‍ය ජනතාවටද මැණික් ගැරීමේ ව්‍යාපාරයට සම්බන්ධ වීමටත් ලබන ජනවාරියේ සිට බලපත්‍ර නිකුත් කිරීම සිදුකරන බවත් රාජ්‍ය අමාත්‍ය ලොහාන් රත්වත්තේ මහතා පවසයි.

කර්මාන්ත කටයුතු පිළිබඳ අමාත්‍යාංශයීය උපදේශක කාරක සභාවේ දී හෙතෙම මේ බව කීය.

රත්නපුර ‘වේ ගඟ’ ආශ්‍රිතව මැණික් ගැරීම සදහා දියත් කළ ව්‍යාපෘතිය, ඇති වූ විරෝධයක් හේතුවෙන් දැනට නතර වීම පිළිබඳව ද මෙහිදී සාකච්ඡා විය.

මේ අනුව විශේෂ සංවර්ධන කමිටු රැස්වීමකදී මේ පිළිබඳව සාකච්ඡා කොට රටටත් විශාල ආදායමක් හිමිවන මෙම වැඩපිළිවෙළ ක්‍රියාත්මක කිරීමේ අවශ්‍යතාව රාජ්‍ය අමාත්‍ය ලොහාන් රත්වත්තේ මහතා පෙන්වා දුන්නේය.

වටිනාකම ඇ.ඩො. 3000 දක්වා වන මැණික් අලෙවි කිරීමේ ඇනවුම්, මාර්ගගත (ඔන්ලයින්) ක්‍රමවේදයට සිදුකිරීමට අදාළ ගැසට් පත්‍රයට කර්මාන්ත කටයුතු පිළිබඳ අමාත්‍යාංශයීය උපදේශක කාරක සභාවේ අනුමැතිය පෙරේදා (06) හිමිවිය.

පවතින කොවිඩ් තත්ත්වය මත සංචරණ කටයුතු සීමා වීම නිසා මැණික් හා ස්වර්ණාභරණ ක්ෂේත්‍රයේ ප්‍රවර්ධනය සදහා මෙම පියවර ගෙන ඇති බව මෙහිදී අනාවරණය විය. එසේම මැණික් හා ස්වර්ණාභරණ අධිකාරිය මගින් අයකරනු ලැබූ සියයට 0.5 ක ගාස්තුව සියයට 0.25 දක්වා අඩු කිරීමද මෙම ගැසට් පත්‍රය මගින් සිදුවී ඇත.

1993 අංක 50 දරන ජාතික මැණික් හා ස්වර්ණාභරණ අධිකාරිය පනත යටතේ කර්මාන්ත අමාත්‍යවරයා විසින් සාදන ලද නියෝග ඇතුළත් අංක 2165/2 දරන ගැසට් පත්‍රයට මෙලෙස කාරක සභාවේ අනුමැතිය හිමිවිය.

කර්මාන්ත කටයුතු අමාත්‍ය විමල් වීරවංශ, මැණික් හා ස්වර්ණාභරණ ආශ්‍රිත කර්මාන්ත රාජ්‍ය අමාත්‍ය ලොහාන් රත්වත්තේ සහ බතික්, අත්යන්ත්‍ර රෙදි හා දේශීය ඇඟළුම් නිෂ්පාදන රාජ්‍ය අමාත්‍ය දයාසිරි ජයසේකර යන මහත්වරුන්ගේ ප්‍රධානත්වයෙන් එදින (06) පැවති කාරක සභා රැස්වීමට කර්මාන්ත අමාත්‍යාංශයේ ලේකම් විශ්‍රාමික ජනරාල් දයා රත්නායක මහතා ඇතුළු නිලධාරිහු සහභාගී වූහ.

දිවයිනේ විවිධ කර්මාන්තපුරයන් සහ කර්මාන්තයන් ආශ්‍රිතව ඇති ගැටලු පිළිබඳවද පාර්ලිමේන්තු මන්ත්‍රීවරු කමිටුවේ අවධානය යොමු කළහ. අදාළ නිලධාරීන්ගේ සම්බන්ධීකරණයෙන් ඒවාට කඩිනම් විසදුම් ලබා දීමට කටයුතු කරන ලෙසත් නොඑසේ නම් ඒ පිළිබඳව ඉදිරි කාරක සභාවට අදාළ සවිස්තරාත්මක වාර්තාවන් ඉදිරිපත් කරන ලෙසත් අමාත්‍යවරයා අදාළ නිලධාරීන්ට මෙහිදී උපදෙස් ලබා දුන්නේය.

සමගි ජන බලවේගයේ මන්ත්‍රීවරුන් හෙට (08) සිට යළි පාර්ලිමේන්තු රැස්වීමට පැමිණීමට තීරණය කර තිබේ.

ඒ අද පස්වරුවේ කථානායකවරයා සමඟ පැවති සාකච්ඡාවකින් අනතුරුව ය.

තම මන්ත්‍රීවරුන්ට පාර්ලිමේන්තුව තුළ ආරක්ෂාව නැතැයි පවසමින් සමගි ජන බලවේගයේ මන්ත්‍රීවරුන් දින කිහිපයක් තිස්සේ පාර්ලිමේන්තුව කටයුතු සඳහා සහභාගී වූයේ නැත.

ඒ වෙනුවට ඔවුන් පාර්ලිමේන්තුවෙන් පිටත විරෝධතාවක නිරත විය.

රාජ්‍ය සේවකයින්ගේ වැටුප රුපියල් 10,000 කින් වැඩි කර දෙන ලෙස ඉල්ලා රාජ්‍ය සේවකයින් පිරිසක් හෙට ලෙඩ නිවාඩු දමා සේවයට නොපැමිණ සිටීමේ වෘත්තිය සමිති ක්‍රියාමාර්ගයක නිරත වෙති.

සංවර්ධන නිලධාරීන්, ග්‍රාම නිලධාරීන් කෘෂි කෘෂි පර්යේෂණ නිලධාරීන්, තැපැල් සේවකයින් ඇතුළු වෘත්තීන් ගණනාවකට අයත් රාජ්‍ය සේවකයෝ එම වෘත්තිය සමිති ක්‍රියාමාර්ගයේ නිරත වන බව, වැටුප් වැඩි කර ගැනීමේ වෘත්තීය සමිතියෙ කමිටු සාමාජික ධම්මික මුණසිංහ මහතා පැවසීය.

රාජ්‍ය සේවක වැටුප රුපියල් 10,000 කින් ඉහළ නැංවීම, විශ්‍රාම වයස අවුරුදු 65 කිරීමේ යෝජනාව හකුළා ගැනීම, රාජ්‍ය සේවකයා රටට බරක් ඇයි මුදල් ඇමතිවරයා ගැන ප්‍රකාශය ඉල්ලා අස්කර ගැනීම, රාජ්‍ය සේවකයින්ට අදහස් ප්‍රකාශ කිරීමේ අයිතිය ලබාදීම යන ඉල්ලීම් මුල්කර ගනිමින් එම ක්‍රියාමාර්ග ගන්නා බවද මුණසිංහ මහතා කීය.

මේ අතර රාජ්‍ය සේවකයන් විශාල පිරිසක් හෙට දවල් 12ට බත්තරමුල්ල පාර්ලිමේන්තු වටරවුම අසලට රැස් වී එහිදී දැවැන්ත විරෝධතාවක් නිරතවන බවද මුණසිංහ මහතා කීය.

යුගදනවි ගිවිසුම සම්බන්ධ තොරතුරු වසර දෙකක් යනතුරු පිටතට නොදෙන බවට වන වාර්තා රජය ප්‍රතික්ෂේප කරයි .

මේ පිළිබඳ කරුණු සහ ඊයේ ලංකා විදුලිබල මණ්ඩලයේ ඉංජිනේරු සංගමය ජනාධිපතිවරයා සමග පැවති සාකච්ඡාව පිළිබඳ මාධ්‍යවේදීන් ඇසූ ප්‍රශ්නවලට පිළිතුරු දෙමින් කැබිනට් සම-ප්‍රකාශක, රමේෂ් පතිරණ අමාත්‍යවරයා මෙසේ කීය.

අද පැවති කැබිනට් තීරණ දැනුම් දීමේ මාධ්‍ය හමුවේදී ඔහු මේ බව කීය.

තම පක්ෂයේ මන්ත්‍රීවරුන්ගේ ආරක්ෂාව තහවුරු කරන ලෙස ඉල්ලා අද(7) කථානායකවරයාට ලිපියක් භාරදෙන බව සමඟි ජන බලවේගයේ මහලේකම් රංජිත් මද්දුම බණ්ඩාර මහතා පවසයි.

ඔහු වැඩිදුරටත් සදහන් කර සිටියේ තම පක්ෂයේ පාර්ලිමේන්තු මන්ත්‍රීවරුන්ගේ ආරක්ෂාව තහවුරු කරන තෙක් පාර්ලිමේන්තුව වර්ජනය කරන බවය.

පාර්ලිමේන්තුව වර්ජනය කිරීමේ හේතු සදහන් කර කතානායකවරයාට අද ලිපියක් බාරදෙන බවද ඔහු සදහන් කළේය.

ඉන්පසුව කතානායකවරයා ගනු ලබන තීන්දුව දෙස බලා තම පක්ෂයේ ස්ථාවරය ප්‍රකාශයට පත්කරන බවද මහලේකම්වරයා පැවසීය.

පාර්ලිමේන්තුව තුළ විපක්ෂයේ මන්ත්‍රීවරුන්ට ආරක්ෂාව නොමැති බව කියමින් සමඟි ජන බල වේගය පක්ෂය මේ වනවිට පර්ලිමේන්තුවට සහභාගීවීම ප්‍රතික්ෂේප කර තිබේ.

ශ්‍රී ලංකා යුද්ධ හමුදාවේ 59 වන මාණ්ඩලික ප්‍රධානි ධූරයට මේජර් ජෙනරල් විකුම් ලියනගේ පත් කර තිබේ.

ආරක්‍ෂක මාණ්ඩලික ප්‍රධානී සහ යුද හමුදාපති ජෙනරාල් ශවේන්ද්‍ර සිල්වා මහතාගේ නිර්දේශ මත ජනාධිපති ගෝඨාභය රාජපක්‍ෂ මහතා විසින් මෙම පත්කිරීම කර ඇත්තේ අද (07) සිට ක්‍රියාත්මක වන ලෙසිණි.

ගජබා රෙජිමේන්තුවේ ජ්‍යෙෂ්ඨ නිලධාරියෙකු වන මේජර් ජෙනරල් විකුම් ලියනගේ මෙම ධූරයේ රාජකාරි භාර ගැනීමට පෙර ශ්‍රී ලංකා යුද්ධ හමුදා ස්වෙච්ඡා බල සේනාවේ සේනා විධායක ධූරය හෙබවීය.

58 වන යුද්ධ හමුදා මාණ්ඩලික ප්‍රධානී ලෙස රාජකාරි ඉටුකළ මේජර් ජෙනරල් ප්‍රියන්ත පෙරේරා යුද්ධ හමුදා දිවියෙන් විශ්‍රාම ගැනීමෙන් අනතුරුව මේජර් ජෙනරල් විකුම් ලියනගේ එම ධූරයට පත්කෙරිණ.

පළාත්වල පස පිළිබඳ පූර්ණ පරීක්ෂණයක් පවත්වා පසේ සංයුතිය අනුව යල කන්නයේ සිට වගාවන් සදහා ගොවීන්ට පොහොර ලබාදෙන බව කෘෂිකාර්ම අමාත්‍ය මහින්දානන්ද අලුත්ගමගේ මහතා පවසනවා.

අමාත්‍යවරයා වැඩිදුරටත් සදහන් කර සිටියා එසේ කිරීමෙන් අනවශ්‍ය ආකාරයට කෙරෙන රසායනික පොහොර ආනයනය සීමා කළ හැකිවනු ඇති බවයි.

කෘෂිකර්ම අමාත්‍යාංශයට 2022 වර්ෂය සඳහා අය – වැයෙන් වෙන්කර දී ඇති මුදල් වියදම් කරන ආකාරය පිළිබඳව අමාත්‍යවරයාගේ ප්‍රධානත්වයෙන් පැවැති සාකච්ඡාවකදී අමාත්‍යවරයා මේ බව සඳහන් කළා.

පස පරීක්ෂා කිරීම සඳහා අවශ්‍ය උපකරණ ගොවිජන සංවර්ධන ප්‍රාදේශීය මධ්‍යස්ථාන 362කට ලබා දී තිබෙන බවත් තවත් මධ්‍යස්ථාන 200කට ලබන වසර තුළ පස පරීක්ෂා කිරීමේ උපකරණ ලබා දෙන බවත් අමාත්‍යවරයා එහිදී වැඩිදුරටත් පැවසුවා.

පස පරික්ෂා කිරීම මගින් මෙරට සෑම ප්‍රදේශයකම පසේ සංයුතිය අවබෝධ කර ගත හැකි බව කී අමාත්‍යවරයා එමඟින් ඒ ඒ ප්‍රදේශවල පසට අවශ්‍ය පොහොර වර්ගය හා ප්‍රමාණය තීරණය කර ගන්න පුළුවන් යැයිද සදහන් කළා.

තාක්ෂණ අමාත්‍යාංශය යටතේ ක්‍රියාත්මක තොරතුරු හා සන්නිවේදන තාක්ෂණ නියෝජිතායතනය මගින් ක්‍රියාත්මක කළ නැගෙනහිර කලාපීය තාක්ෂණ වැඩමුළුවේදි රාජ්‍ය නිලධාරීන් 1500කට අධික පිරිසකට තාක්ෂණ දැනුම ලබාදුන් බව එම ආයතනය කියයි.

එම වැඩසටහනේදී රාජ්‍ය ආයතන විදුලි සංදේශ හා තාක්ෂණ කර්මාන්ත නිලධාරීන්, කෘෂි කර්මාන්තයේ නියුතු සුළු හා මධ්‍ය පරිමාණ ආයතන, අධ්‍යාපන ක්ෂේත්‍ර නිලධාරීන් එම වැඩමුළුවට සහභාගිවූ අතර නව තාක්ෂණික පර්යේෂණ හා සංවර්ධන සදහා අවශ්‍ය යටිතල පහසුකම් ලබාදීම මෙන්ම විශේෂඥයන්ගේ සහයෝගයෙන් උසස් තාක්ෂණය හඳුන්වාදීමද සිදුකෙරිණි.

මහවැලිය සතු හෙක්ටයාර් 1750 ක ඉඩම් වාණීජ කෘෂිකාර්මික ව්‍යාපෘති සඳහා දීර්ඝ කාලීන බදු පදනමින් ආයෝජකයන්ට ලබාදීමට අමාත්‍ය මණ්ඩල අනුමැතිය හිමිව ඇත.

ජාතික ආහාර හා පෝෂණ සුරක්ෂිතතාව සහ අපනයනය ඉලක්කර ගනිමින් මෙම ව්‍යාපෘතිය ක්‍රියාවට නන්වයි.

ඒ සම්බන්දයෙන් අමාත්‍ය මණ්ඩල කාර්යාලය විසින් නිතුත් කළ නිවේදනය මෙසේය.

කොවිඩ් – 19 වසංගත තත්ත්වය හමුවේ ආහාර ආනයනය සඳහා විදේශ විනිමය පිටරටවලට ගලා යාම මඟින් මෙරට ආර්ථිකයට වන සෘණාත්මක බලපෑම අවම කිරිමේ අරමුණින් දේශීයව වගා කළ හැකි අත්‍යවශ්‍ය ආහාර බෝග වගා කිරීම සඳහා ආයෝජකයින් දිරි ගැන්වීමට සැලසුම් කර ඇත. එමෙන්ම, දේශීය කිරි නිෂ්පාදනය ඉහළ නැංවීම හා සත්ත්ව ආහාර දේශීය වශයෙන් නිෂ්පාදනය කර ගැනීම සෞභාග්‍යා ජාතික ආහාර නිෂ්පාදන ප්‍රවර්ධන ප්‍රතිපත්තියෙහි මූලික අරමුණක් වී තිබේ. ඒ අනුව, ජාතික ආහාර හා පෝෂණ සුරක්ෂිතතාව සහ අපනයනය ඉලක්ක කරගත් වාණිජ කෘෂිකාර්මික ව්‍යාපෘතීන් ක්‍රියාත්මක කිරීම සඳහා මහවැලි බල ප්‍රදේශවල පිහිටි ඉඩම් හෙක්ටයාර 1,750ක් පමණ විධිමත් ක්‍රමවේදය අනුගමනය කරමින් තෝරාගත් ආයෝජකයින් වෙත දීර්ඝකාලීන බදු පදනම මත ලබා දීම පිණිස වාරිමාර්ග අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.

ශ්‍රී ලංකාවේ උපදින සෑම දරුවෙකුටම උපතේදීම අනන්‍යතා අංකයක් නිකුත් කිරීමට අමාත්‍ය මණ්ඩල අනුමැතිය ලැබී ඇත.

ඒ සම්බන්දයෙන් අමාත්‍ය මණ්ඩල කාර්යාලය විසින් නිතුත් කළ නිවේදනය මෙසේය.

පකිස්ථානයේ සියල්කොට් ප්‍රදේශයේදී මැර පිරිසක් විසින් ඝාතනය කරන ලද දියවඩනගේ ප්‍රියන්ත කුමාරගේ පවුලට රුපියල් ලක්ෂ 25ක මුදලක් ලබාදීමට කැබිනට් මණ්ඩලය තීරණය කර තිබේ

අමාත්‍ය නිමල් සිරිපාල ද සිල්වා මහතා විසින් මෙම යෝජනාව ඉදිරිපත් කළ බව කැබිනට් සම ප්‍රකාශක වෛද්‍ය රමේෂ් පතිරණ මහතා පැවසීය.

ශ්‍රී ලංකා විදේශ සේවා නියුක්ති කාර්යාංශය හරහා මුදල් ගෙවීමේ යෝජනාවට අමාත්‍ය මණ්ඩල අනුමැතිය හිමි වූ බව ඔහු පැවසීය.

ප්‍රියන්ත දියවඩන සියල්කොට්හි රාජ්කෝ ඉන්ඩස්ට්‍රීස් හි මෙහෙයුම් සාමාන්‍යාධිකාරීවරයා ලෙස සේවය කළේය.

ගෘහස්ත ගෑස් සිලින්ඩර් අනතුරකින් පිළිස්සුම් තුවාල ලබා සිටි මාතලේ උඩුපිහිල්ල ප්‍රදේශයේ පදිංචි කාන්තාවක් මියගොස් ඇත.

චන්ද්‍රා කුමාරි නම් වූ හැට නම වියැති එම කාන්තාව මිය ගොස් ඇත්තේ ඊයේ (06) ය.

ඉකුත් 19 වෙනිදා උදෑසන 5.30 ට පමණ තේ පිළියෙල කිරීමට ඇය ගෑස් ලිප දල්වන විට සිරුරට ගිනි ඇවිලී ඇති බව පොලීසිය සදහන් කරයි. ඇය මිය ගොස් ඇත්තේ රෝහල්ගතව ප්‍රතිකාර ලබා නිවසට පැමිණ දින දෙකකට පසුව නැවත රෝහල්ගත කිරීමෙන් අනතුරුවය.

වැලිකන්දේ නිවසකද ඉකුත් 12 වෙනිදා සිදුවූ බව කියන සිදුවීමකින් තරුණ කාන්තාවක් ගිනි ඇවිලීමකින් රෝහල් ගත කර සිටියදී 25 වෙනිදා මිය ගියේය. එම තරුණිය ගිනි ඇවිලීමෙන් පසු වැලිකන්ද රෝහල ඇතුලත් කිරීමෙන් පසු පොලොන්නරුව රෝහලටත් පසුව කොළඹ ජාතික රෝහලටත් මාරුකර යවා තිබුණි. ඇය මිය යන්නේ කොළඹ ජාතික රෝහලේ ප්‍රතිකාර ලබමින් සිටියදීය.

ඇය මිය යාමට පෙර මරදාන පොලීසියට ප්‍රකාශයක් දෙමින් සදහන් කර තිබුණේ මාළු ව්‍යාංජනය ලිපේ තබා ගෑස් ලිප දැල්වීමේදී සිරුරට ගිනි ඇවිළුණු බවය. පොලීසිය එම මරණය සම්බන්ධයෙන් ප්‍රකාශකරන්නට යෙදුනේ ඇය සිය දිවි හානිකරගෙන ඇති බවත් සැමියා සමග ඇති වූ ආරවුලක් ඊට මුල්වී ඇති බවත්ය. ඒ බව සනාථ කිරීමට පොලීසිය පවසා තිබුණේ සැමියා රැකියාව සදහා නිවසින් පිටත්ව ගිය පසු ඇය වට්ස්ඇප් වීඩියෝ ඇමතුමක් සැමියාට ගෙන භූමිතෙල් බෝතලය පෙන්වමින් ගිනි තබා ගන්නා බව පවසා ඇති බවය. ඒ අනුව සැමියා නිවසට පැමිණ බැලීමේදී බිරිද ගිනි තබාගෙන ඇති බව ද පොලීසිය සඳහන් කළේය. එහෙත් එම මරණය සම්බන්ධයෙන් කොළඹ හදිසි මරණ පරීක්ෂකවරයා ඉදිරියේ පැවති මරණ පරීක්ෂණයේදී සැමියා පවසා ඇත්තේ සිය දුරකතනය නිවසේ දමාගොස් තිබුණු බැවින් එය රැගෙන යාමට ආපසු එන විට බිරිද ගිනි ගැනීමකට ලක්ව සිටි බවය. ඒ අනුව මරණ පරීක්ෂකවරවයා පොලීසියට දැනුම් දී ඇත්තේ ගෑස් ටැංකිය ඇතුළු උපකරණ පරික්ෂණ කටයුතු සදහා රස පරීක්ෂකවරයා වෙත ඉදිරිපත්කරන ලෙසය. මරණයට හේතුව මරණ පරීක්ෂකවරයා සිය වාර්තාවේ සදහන් කර නැත. ඒ ඉදිරි විමර්ශනයක් පැවැත්වෙමින් තිබෙන බැවිණි.

ගෑස් සිලින්ඩරවල කාන්දුවීම් පරීක්ෂා කිරීම නොකරන ලෙසට ගෑස් සිලින්ඩර ආශ්‍රිත ගිනිගැනීම් හෝ පුපුරා යෑම පිළිබඳ විමර්ශනය කිරීම හා ඒ පිළිබඳ විසඳුම් සෙවීමේ කමිටුව ජනතාව වෙත දන්වා තිබේ.

එම කමිටුව නිවේදනයක් නිකුත් කරමින් ගෑස් පිපිරීම් පිළිබඳ සහ ඒ සඳහා දැනට ගෙන ඇති ක්‍රියාමාර්ග සම්බන්ධයෙන් පහත නිවේදනය නිකුත් කර ඇත.

ඩුබායිහි දී පැවැත්වෙන dubai expo-2021 ප්‍රදර්ශනය නැරඹීමට ජනාධිපති ගෝඨාභය රාජපක්ෂ එහි ගිය අවස්ථාවේදී ශ්‍රී ලංකාවට වෙන්කර තිබූ මැණික් හා ස්වර්ණාභරණ ප්‍රදර්ශන කුටි දෙකම හිස්ව තිබී ඇතැයි ඒ වන විට එය භාරගත් ප්‍රදර්ශකයින් එම රටට ගොස් නොසිටි බවත් වාර්තා වේ.

ජනාධිපතිවරයා ඊයේ එම වෙළෙඳ ප්‍රදර්ශනය නැරඹීමට ඩුබායි රටට ගිය අතරේ ශ්‍රී ලංකාවට වෙන්කර තිබූ මැණික් හා ස්වර්ණාභරණ කුටි හිස් ව තිබීම ගැන එහි සිටි නිලධාරීන්ගෙන් කරුණු විමසා ඇතැයිද වාර්තා වේ.

මැණික් හා ස්වර්ණාභරණ ප්‍රදර්ශකයින් දෙදෙනෙකුට එම කුටි භාර දී ඇතත් වීසා ලබා ගැනීමට නොහැකි වීම නිසා ඔවුන් ඩුබායි යෑම ප්‍රමාද වී ඇතැයිද ශ්‍රී ලංකා මැණික් හා ස්වර්ණාභරණ අධිකාරියේ අභ්‍යන්තර ආරංචි මාර්ග කියයි.

එම ප්‍රදර්ශක in දෙදෙනාට ඩුබායි යෑම සදහා සඳහා වීසා ලබා ගැනීමට මැණික් හා ස්වර්ණාභරණ මැනික් හා ස්වර්නාභරන අදිකාරියේ කලමනාකාර මැණික් හා ස්වර්ණාභරණ අධිකාරිය කළමනාකාරීත්වයෙන් සහ සංචාරක මණ්ඩලයෙන් නිසි සහායක් සහ සම්බන්ධීකරණයක් ලබාදීමක් සිදුව නැතැයි ද එම ආරංචිමාර්ග කියයි.

එක ප්‍රදර්ශකයකු අද (06) ඩුබායි ගොස් ඇතත් ඒ වන විට ජනාධිපතිවරයා ආපසු ලංකාවට පැමිණ සිටි බවද වාර්තාවේ.

මැණික් හා ස්වර්ණාභරණ අධිකාරියේ ඇතැම් නිලධාරීන්ගේ නොසැලකිල්ල හා අදක්ෂභාවය නිසා මැණික් හා ස්වර්ණාභරණ ප්‍රදර්ශකයින් මහත් අපහසුතාවයට පත්වන අතර රටට ලැබීමට තිබෙන ඩොලර් අහිමිවන බව ද එම කර්මාන්තයේ නියැළෙන්නෝ පෙන්වා දෙති.