කුඩා දරුවෙක් මෝටර් රථයක ඉදිරිපස අසුනේ තබාගෙන කොළඹ සහ ඒ අවට තදාසන්න නගර ආශ්‍රිතව මත්ද්‍රව්‍ය බෙදාහැරී‍මේ ඡාවාරමක් පොලිස් මත්ද්‍රව්‍ය කාර්යාංශය විසින් අනාවරණයක‍රගෙන එම දරුවා සමඟ ඡාවාරම්කරුවෙකු අත්අඩංගුවට ගැනීමට සමත්ව ඇත.
කොට්ටාවේ පිහිටි පුද්ගලික බැංකුවක් ආසන්නයේදී අදාල මෝටර් රථය ඊයේ (06) රාත්‍රියේ නතරකර පරීක්ෂා කිරීමට සූදානම් වූ අවස්තාවේදී එම ඡාවාරම්කරු පොලිස් මත්ද්‍රව්‍ය කාර්යාංශයේ නිලධාරීන්ගේ වාහනයේ එම මෝටර් රථය ගැටීමට සලස්වා පළා ගොස් ගොස් තිබේ. එම අවස්ථාවේදී පළායන මෝටර් රථය දෙසට පොලිස් මත්ද්‍රව්‍ය කාර්යාංශයේ නිලධාරීන් වෙඩි තබා ඇත. එහෙත් මෝටර් රථය නොනවත්වා ධාවනය වී තිබේ. එහිදී පොලිස් මත්ද්‍රව්‍ය කාර්යාංශයේ නිලධාරීන් ද ඔවුන් පැමිණි මෝටර් රථයේ නැගී සැකකාරු ගමන්ගත් මෝටර් රථය හඹා යමින් එහි ටයර් වලට වෙඩි තබා ඇත. ටයර්වලට වෙඩි වැදීම හේතුවෙන් මෝටර් රථයට වැඩි දුරක් ගමන් කිරීමට නොහැකි වීම හේතුවෙන් කොළඹ අවිස්සාවේල මාර්ගයේ වාහනය දමා පළායාමට ඔහු සූදානම් වී තිබේ. එහෙත් ඊට පෙර පොලිස් මත්ද්‍රව්‍ය කාර්යාංශයේ නිලධාරීන් සැකකරුවන් අත්අඩංගුවට ගැනීමට සමත්ව ඇත.
පොලිස් මත්ද්‍රව්‍ය කාර්යංශය සදහන් කරනුයේ ඡාවාරම්කරු විසින් එම අවස්ථාවේදීත් අවුරුදු 08 ක් පමණ වයසැති දරුවෙක් මෝටර් රථයේ ඉදිරි අසුනේ තබාගෙන සිටි බවය. එම දරුවා සෙල්ලකතරගම පදිංචි යුවලකගේ බවද අනාවරණය වී තිබේ. අත්අඩංගුවටගත් ඡාවාරම්කරු මහරගම දුම්රිය පාර මාවතේ පදිංචිකරුවෙක් වන චමක ධනුෂ්මත් හේමන්ත නැමැති අයෙකි. ඔහු සන්තකයේ තිබී අයිස් නැමැති මත්ද්‍රව්‍ය ග්‍රෑම් 138 හා ගංජා ග්‍රෑම් 290 ක් හමුවූ බව පොලිස් මත්ද්‍රව්‍ය කාර්යාංශය පවසයි.
ඡාවාරම්කරුගෙන් කළ ප්‍රශ්න කිරීම්වලදී හෙළිවූ තොරතුරු මත පිළියන්දල මාවිත්තරදී ගාල්ල පිලානේ පදිංචිකරුවන් දෙදෙනෙක් අත්අඩංගුවට ගෙන තිබේ. ඔවුන් සතුව තිබියදීද අයිස් මත්ද්‍රව්‍ය සුළු ප්‍රමාණයක් හමුවී ඇතැයි පොලිස් මත්ද්‍රව්‍ය කාර්යාංශය සදහන් කරයි.
මේ වන විට මෙම මත්කුඩු ජාල‍යේ බොහෝ රහස් තොරතුරු හෙළිවී ඇති බවත් ඒ සම්බන්ධයෙන් විමර්ශන පැවැත්වෙන බවත් පොලිස් මත්ද්‍රව්‍ය කාර්යංශය සදහන් කරයි.
