පළාත්වල පස පිළිබඳ පූර්ණ පරීක්ෂණයක් පවත්වා පසේ සංයුතිය අනුව යල කන්නයේ සිට වගාවන් සදහා ගොවීන්ට පොහොර ලබාදෙන බව කෘෂිකාර්ම අමාත්‍ය මහින්දානන්ද අලුත්ගමගේ මහතා පවසනවා.
අමාත්‍යවරයා වැඩිදුරටත් සදහන් කර සිටියා එසේ කිරීමෙන් අනවශ්‍ය ආකාරයට කෙරෙන රසායනික පොහොර ආනයනය සීමා කළ හැකිවනු ඇති බවයි.
කෘෂිකර්ම අමාත්‍යාංශයට 2022 වර්ෂය සඳහා අය – වැයෙන් වෙන්කර දී ඇති මුදල් වියදම් කරන ආකාරය පිළිබඳව අමාත්‍යවරයාගේ ප්‍රධානත්වයෙන් පැවැති සාකච්ඡාවකදී අමාත්‍යවරයා මේ බව සඳහන් කළා.
පස පරීක්ෂා කිරීම සඳහා අවශ්‍ය උපකරණ ගොවිජන සංවර්ධන ප්‍රාදේශීය මධ්‍යස්ථාන 362කට ලබා දී තිබෙන බවත් තවත් මධ්‍යස්ථාන 200කට ලබන වසර තුළ පස පරීක්ෂා කිරීමේ උපකරණ ලබා දෙන බවත් අමාත්‍යවරයා එහිදී වැඩිදුරටත් පැවසුවා.
පස පරික්ෂා කිරීම මගින් මෙරට සෑම ප්‍රදේශයකම පසේ සංයුතිය අවබෝධ කර ගත හැකි බව කී අමාත්‍යවරයා එමඟින් ඒ ඒ ප්‍රදේශවල පසට අවශ්‍ය පොහොර වර්ගය හා ප්‍රමාණය තීරණය කර ගන්න පුළුවන් යැයිද සදහන් කළා.
