ජංගම හා ස්ථාවර දුරකතන සේවා සමාගම් විසින් සිය දුරකතන ජාල උපයෝගී කරගනිමින් රක්ෂණ ඔප්පු අලෙවිය නවතා දැමේ.

ශ්‍රී ලංකා රක්ෂණ නියාමන කොමිෂන් සභාව මෙම තීරණය ගෙන ඇත.

ශ්‍රී ලංකා රක්ෂණ නියාමන කොමිෂන් සභාව විසින් මහජනතාවගෙන් ලද පැමිණිලි සලකා බැලීමෙන් අනතුරුව මෙම පියවර ගෙන තිබේ.

2021 සැප්තැම්බර් 06 වැනිදා සිට බලාත්මක වන පරිදි, ජංගම හා ස්ථාවර දුරකතන ජාල විසින් රක්ෂණ ඔප්පු අලෙවිය නවත්වන ලෙස සියලුම රක්ෂණ සමාගම් වෙත දැනුම් දී ඇත.

ඒ අනුව මහජනතාවගේ සුරක්ෂිතභාවය තහවුරු කිරීම උදෙසා ශ්‍රී ලංකා රක්ෂණ නියාමන කොමිෂන් සභාව කරුණු කිහිපයක් අවධාරණය කර සිටී.

එනම්,

1. තවදුරටත් ජංගම හා ස්ථාවර දුරකතන ජාල උපයෝගී කරගනිමින් රක්ෂණාවරණ මිල දී ගැනීමෙන් වැළකී සිටින්න.

2. ඔබ දැනටමත් ජංගම හා ස්ථාවර දුරකතන ජාල මගින් රක්ෂණාවරණ මිල දී ගෙන ඇත්නම්, ඊට අදාළ රක්ෂණ සමාගම සමඟ සෘජුව සම්බන්ධ වී, එම රක්ෂණාවරණයට අදාළ රක්ෂණ ඔප්පුව පිළිබඳව තහවුරු කරගනිමින් එය පවත්වාගෙන යාමට අවශ්‍ය කටයුතු සිදුකරන්න.

3. ජංගම හා ස්ථාවර දුරකතන ජාල උපයෝගී කරගනිමින් රක්ෂණ ඔප්පු අලෙවි කළ රක්ෂණ සමාගම්, එම රක්ෂණාවරණ ලබාගත් පාරිභෝගිකයන් සඳහා සෘජුවම රක්ෂණ තැරැව්කරුවකු හෝ රක්සණ නියෝජිතයෙකු මගින් තවදුරටත් සේවාවන් ලබාදීමට බැඳී සිටී.

4. මේ සම්බන්ධ ඕනෑම කරුණක් පිළිබඳ පැහැදිලි කිරීමක් ලබාගැනීමට රක්ෂණාවරණය ලබාගත් සමාගමෙහි ක්ෂණික ඇමතුම් අංකය/ පාරිභෝගික සේවා අංකය ඇමතීම, රක්ෂණ හිමිකරු වන ඔබේ අයිතියකි.

බොරැල්ල කිතුල්වත්ත පාරේ නිවාස පහක ගින්නක් හටගෙන ඇතැයි වාර්තා වේ.

ගින්න මැඩපැවැත්වීම සඳහා ගිනි නිවන රථ හයක් පිටත් කර යවා ඇති බව කොළඹ ගිනි නිවන ඒකකය පවසයි.

පාස්කු ප්‍රහාර සිද්ධියට අදාළව අත්අඩංගුවට ගත් නීතිඥ හිජාස් හිස්බුල්ලා මහතාට ඇප ලබාදීමට එරෙහි නොවීමට නීතිපතිවරයා තීරණය කර ඇති බව නීතිපති දෙපාර්තමේන්තුව අභියාචනාධිකරණයට අද දැනුම් දී තිබේ.

ඒ ඔහු ඇප ඉල්ලා ඉදිරිපත් කළ පෙත්සමක් අද කැදවූ අවස්ථාවේදීය.

හිජාස් හිස්බුල්ලා පාස්කු ප්‍රහාරය සම්බන්ධයෙන් අත්අඩංගුවට ගෙන ත්‍රස්තවාදය වැළැක්වීමේ පනත යටතේ රක්ෂිත බන්ධනාගාරගත කොට සිටී.

දැවිතෙල් නිම වීම නිසා සපුගස්කන්ද බලාගාර දෙකේම විදුලි ජනන කටයුතු අද රාත්‍රියේ දී නතර වීමට වෙන බව ලංකා විදුලිබල මණ්ඩල ආරංචිමාර්ග සඳහන් කරයි.

සපුගස්කන්ද බලාගාර දෙක සඳහා දැවිතෙල් ඉතිරිව තිබෙන්නේ අද රාත්‍රී 8 පමණ වන තෙක් විදුලි ජනනය සඳහා පමණකැයි ද එම ආරංචි මාර්ග සඳහන් කරයි.

සපුගස්කන්ද බලාගාර දෙක නතර වුවහොත් ජාතික විදුලිබල පද්ධතියට මෙගාවොට් 100ක පමණ ධාරිතාවක් අහිමි වන බව ද ලංවිම ආරංචිමාර්ග සඳහන් කරයි.

මේ අතර නතර වී තිබූ කැලණිතිස්ස බලාගාර තුනේ විදුලි ජනන කටයුතු මේ වන විට ආරම්භ වී ඇතැයි ද ලංවිම ආරංචි මාර්ග කියයි.

අධ්‍යයන පොදු සහතික පත්‍ර උසස් පෙළ 2021 විභාගය තවත් මාස කීපයකින් කල් දමන්නැයි එම විභාගයට පෙනී සිටීමට නියමිත සිසුන් පිරිසක් ආණ්ඩුවෙන් ඉල්ලා තිබේ.

විභාගයට පෙනී සිටින සිසුන් පිරිසක් ජනාධිපතිවරයාට අගමැතිවරයාට සහ අධ්‍යාපන ඇමතිවරයාට ලිපි යවමින් එම ඉල්ලීම කර ඇත.

අධ්‍යයන පොදු සහතික පත්‍ර උසස් පෙළ විභාගයේ විෂය මාලාවන් සම්පූර්ණ කර ගැනීමට නොහැකි වීම හේතුවෙන් විභාගයට මුහුණ දීම ගැටලු සහගත බව ද එම නිසා තවත් මාස කීපයකින් විභාගය කල් දමන්නැයි ඉල්ලා සිටින බවද සිසුන් ජනාධිපතිවරයාට සහ සෙසු අයට යවා ඇති ලිපිවල සඳහන් වේ.

විෂයමාලා සම්පූර්ණ කිරීම සඳහා තවත් මාස තුන හතරක්වත් යනු ඇතැයි එම සිසුන් ලිපි මඟින් පෙන්වා දී ඇත.

විදේශිකයින්ට වීසා සැපයීමේ දී ඒ සඳහා කරන අය කිරීම් විදේශීය මුදල් ඒකකයකින් පමණක් සිදු කළ යුතු යැයි ශ්‍රී ලංකා මහ බැංකුව ලියාපදිංචි සංචාරක ආයතන වලට දැනුම් දී තිබේ.

ඒ අනුව මින් පසුව විදේශිකයින්ගෙන් රුපියල් අය කිරීම තහනම් වන අතර සපයන සේවාව වෙනුවෙන් ඩොලර් පවුම් හෝ වෙනත් මුදල් ඒකකයකින් අයකිරීම් සිදු කිරීමට ලියාපදිංචි සංචාරක ආයතනවලට සිදුවේ.

ශ්‍රී ලංකාවේ විදේශ විනිමය හිඟයට පිළියමක් ලෙස ශ්‍රී ලංකා මහ බැංකුව එම තීන්දුව ගෙන ඇත.

අද පස්වරු 2.30 න් පසුව විදුලි කප්පාදුවක් සිදුවිය හැකි බවත් අද කිසිදු කප්පාදුවක් නොවන බවටත් වන පරස්පර විරෝධී අදහස් ලංකා විදුලි බල මණ්ඩලයෙන් මතුව තිබේ.

එහෙත් අද පස්වරු 1 ට පෙර ද ඇතැම් ප්‍රදේශවල විනාඩි 45 බැගින් වූ විදුලි බිඳවැටීම් වාර්තා විය.

ඩොලර් ලබාදීමත් සමගම ඊයේ දිනයේදී නැව් දෙකකින් තෙල් ගොඩබෑම සිදු කෙරුණි.

එයින් තෙල් මෙට්‍රික් ටොන් දස දහසක් විදුලිබල මණ්ඩලයට ලබාදීමට එම අවස්ථාවේදීම කටයුතු කළ බව අමාත්‍ය උදය ගම්මන්පිල මහතා ඊයේ පැවති මාධ්‍ය හමුවේදී සදහන් කළේය.

එහෙත් ඊයේ පස්වරුවේ සිටම කොට්ඨාස මට්ටමින් විවිධ පළාත්වල පැයකට අධික විදුලි කප්පාදු කිරීම් වාර්තා විය.

පස්වරුවේ පැවති මාධ්‍ය හමුවකදී විදුලි ඉංජිනේරුවරුන්ගේ සංගමය කියා සිටියේ ඊයේ දිනයේ සිට විදුලි කප්පාදුවක් සිදුවන බවයි.

දිවා කාලයේ විදුලි කප්පාදුවක් සිදු නොවුනත් පස්වරු 2.30 න් පසු යම් කාල සීමාවකට විදුලි කප්පාදුවක් සිදුවන බව අද දිනයේ ලංකා විදුලිබල මණ්ඩලයේ ප්‍රධාන ඉංජිනේරු පද්ධති පාලන එරංග කුඩාහේවා මහතා පවසා ඇත.

අර්ථාන්විත සාකච්ඡා වෙනුවෙන් ඕනෑම අවස්ථාවක සිය පක්ෂය ආණ්ඩුව සමඟ සාකච්ඡා කිරීමට සුදානම් බව දෙමළ ජාතික සන්ධානය පවසයි.

දෙමළ ජාතික සන්ධානයේ නායක ආර්. සම්පන්දන් මහතා පැවසුවේ ජනාධිපති ගෝඨාභය රාජපක්ෂ මහතා ධුරයට පත් වී මේ වන විට වසර දෙකක කාලයක් ගත වුවද සිය පක්ෂය හා නිල වශයෙන් සාකච්ඡාවක් මෙතෙක් පවත්වා නොමැති බවය.

පසුගිය වසරේදී සිය පක්ෂයට ජනාධිපතිවරයා විසින් සාකච්ඡාවක් සඳහා ආරාධනා කර තිබුණද එම සාකච්ඡාව දින නියමයක් නොමැතිව කල් දැමුණු බවයි ඔහු සඳහන් කළේය.

එබැවින් සාකච්ඡා නමින් තවදුරටත් කල්මැරීමට තම පක්ෂය අකමැත්තෙන් පසුවන බවද ආර්.සමිබන්ධන් මහතා වැඩිදුරටත් පැවසීය.

මිල්කෝ ආයතනයේ වත්මන් සභාපති ලසන්ත වික්‍රමසිංහ මහතා එම ධුරයෙන් ඉවත් කර ඒ වෙනුවට රේණුක පෙරේරා මහතා පත්කර ඇතැයි වාර්තාවේ.

කෙසේ වෙතත් අද පෙරවරුවේ මාධ්‍ය හමුවක් කැඳවමින් ලසන්ත වික්‍රමසිංහ මහතා පැවසුවේ තමන් සේවයෙන් ඉවත් කළ බවට මෙතෙක් දැනුම් දී නොමැති බවයි.

මිල්කෝ ආයතනයේ සභාපතිධුරයෙන් ඉවත් කිරීම සම්බන්ධයෙන් විමසීම සඳහා තමන් විෂයභාර අමාත්‍ය මහින්දානන්ද අලුත්ගමගේ මහතා හට දුරකතනයෙන් ඇමතුම් කිහිපයක් ලබා ගැනීමට උත්සහ කළ ද එය ව්‍යර්ථ වූ බව ලසන්ත වික්‍රමසිංහ මහතා සඳහන් කළේය.

කෙසේ වෙතත් තමන්ට ලැබුනු ආරංචි මාර්ග අනුව මිල්කෝ ආයතනයේ නව සභාපතිවරයා ලෙස රේණුක පෙරේරා මහතා හට ලිපියක් ද නිකුත් කර ඇති බවද ඔහු එහිදී පැවසීය.

නව පත්වීම ලබා සභාපතිවරයෙකු පැමිණෙන තෙක් තමන් සේවය සභාපති තනතුරේ කටයුතු කරන බවත් ඉන් පසුව තනතුරුවලින් ඉවත්ව යන බවද ලසන්ත වික්‍රමසිංහ මහතා වැඩිදුරටත් ප්‍රකාශ කළේය.

නව සභාපතිවරයා වශයෙන් පත්වීම් ලැබ සිටින රේණුක පෙරේරා මහතා ශ්‍රී ලංකා පොදුජන පෙරමුණේ පරිපාලන ලේකම්වරයා වශයෙන් කටයුතු කරයි.

කථානායක මහින්ද යාපා අබේවර්ධන මහතා විසින් නවවැනි පාර්ලිමේන්තුවේ දෙවැනි සභාවාරයේ තේරීම් කාරක සභාව පත් කර තිබේ.

පාර්ලිමේන්තු තේරීම් කාරක සභාවට, ආණ්ඩු පක්ෂයේ සහ විපක්ෂයේ මන්ත්‍රිවරුන් 12 දෙනෙකුගෙන් සමන්විත වේ.

දිනේෂ් ගුණවර්ධන, නිමල් සිරිපාල ද සිල්වා, ජොන්ස්ටන් ප්‍රනාන්දු, ඩලස් අලහප්පෙරුම, විමල් වීරවංශ, ඩග්ලස් දේවානන්ද සහ ප්‍රසන්න රණතුංග යන අමාත්‍යවරුන් ආණ්ඩු පක්ෂය නියෝජනය කරමින් පාර්ලිමේන්තු තේරීම් කාරක සභාවට පත්ව තිබේ.

එමෙන්ම ලක්ෂ්මන් කිරිඇල්ල, ගයන්ත කරුණාතිලක, රාවුෆ් හකීම්, විජිත හේරත් සහ සෙල්වම් අඩෙයික්කලනාදන් යන පාර්ලිමේන්තු මන්ත්‍රීවරුන් විපක්ෂය නියෝජනය කරමින් පාර්ලිමේන්තු තේරීම් කාරක සභාවට පත්ව ඇත.

මෙම තේරීම් කාරක සභාව මගින් පාර්ලිමේන්තුවේ අනෙකුත් කාරක සභා සඳහා සාමාජිකයින් පත් කිරීම සිදු කෙරෙනු ඇත.

පාර්ලිමේන්තු මන්ත්‍රීවරුන් 225 දෙනා විසින් පසුගිය වසර පුරා පාර්ලිමේන්තු පුස්තකාලයෙන් කියවීමට ලබාගත් පොත් ප්‍රමාණය පිළිබඳ කථානායකවරයා අද සිය කනගාටුව ප්‍රකාශ කර තිබේ.

පසුගිය වසර පුරාවටම මන්ත්‍රීවරුන් විසින් කියවීම සඳහා පොත් ගෙනගොස් ඇත්තේ 330 ක් බවට කථානායකවරයා පැවසීය.

ඉන් 122 ක් ප්‍රබන්ධ මාතෘකාව යටතේ ඇති පොත් වන අතර 94ක් දේශපාලන විද්‍යාව, 27ක් සමාජ විද්‍යාව, 11ක් ආර්ථික විද්‍යාව, 5ක් විද්‍යාව, 4ක් නීතිය, 3ක් තාක්ෂණය, 1 බැගින් අධ්‍යාපනය සහ සිංහල සාහිත්‍යය යන ග්‍රන්ථ වන බවද කථානායකවරයා පැවසීය.

පාර්ලිමේන්තු පුස්තකාලය කථානායකවරයාට ලබාදුන් තොරතුරුවලට අනුව 2021 වසරේදී මන්ත්‍රීවරුන් විසින් කියවීමට ගෙනගිය පොත් සම්බන්ධයෙන් මෙම ප්‍රකාශ කර ඇත.

කථනායකවරයා මෙහිදී පෙන්වා දී ඇත්තේ පාර්ලිමේන්තු විවාද අතරතුර සූදානමක් නොමැතිකම පෙනී යන බවත් සෑම පැත්තකින්ම අවලාද නැගීමට වැදගත් කාලය අපතේ යවන බවත්ය.

අසත්‍ය චෝදනා සහ පාර්ලිමේන්තු නොගැලපෙන භාෂාව රාජ්‍යයට මග පෙන්වීමට වඩා දේශපාලන වාසි තකා පාර්ලිමේන්තුවේ කෙරෙන කතා සහ ප්‍රකාශවල කොටසක් බව කථානායකවරයා පවසා ඇත.

“මෙය අවසානයේ නින්දිත පාර්ලිමේන්තු නොවන හැසිරීමක් දක්වා වර්ධනය වේ,” කථානායකවරයා පැවසීය.

පාර්ලිමේන්තු මන්ත්‍රීවරුන්ගේ වාද විවාදවල ගුණාත්මක භාවය සහ හැසිරීම් වැඩිදියුණු කිරීම සඳහා යෝජනාවක් තමන් විසින් කෙටුම්පත් කර ඇති බව මහින්ද යාපා අබේවර්ධන මහතා පවසා ඇත.

අද රාත්‍රියේ දිවයිනේ ප්‍රදේශ ගණනාවකට පැයක් හෝ පැය එකහමාරක පමණ කාලයක් විදුලිය කැපීමට සිදුවනු ඇතැයි ලංකා විදුලිබල මණ්ඩලයේ ජේෂ්ඨ ප්‍රකාශකයෙක් පැවසීය.

ඩීසල් නොමැතිකම නිසා මේ වන විට කැලණිතිස්ස බලාගාර දෙක හා සියැට් බලාගාරය නතර කර දමා ඇතැයි ද ඔහු සඳහන් කළේය.

විදුලිය ජනනයට අවශ්‍ය ඩීසල් තොගයක් අද දහවල් ලැබුණු බවද එහෙත් ඒවා බලාගාරවලට යෑමට තවත් පැය කිහිපයක් ගත වනු ඇතැයිද ඔහු සඳහන් කළේය.

එම නිසා අද විදුලි ඉල්ලුම අධික පැය කීපය ඇතුළත විදුලිය විසන්ධි කිරීමට සිදුවනු ඇතැයිද ඔහු සඳහන් කළේය.

පරිපාලන සේවයේ ජ්‍යෙෂ්ඨ නිලධාරියෙකු වන ගාමිණී සෙනරත් මහතා නව ජනාධිපති ලේකම්වරයා ලෙස පත් කෙරේ.

පත්වීම් ලිපිය, ජනාධිපතිවරයා විසින් අද (19) පෙරවරුවේ ජනාධිපති කාර්යාලයේ දී ගාමිණී සෙනරත් මහතා වෙත භාර දෙනු ලැබිණ.

ශ්‍රී ලංකා පරිපාලන සේවයේ විශේෂ ශ්‍රේණියේ නිලධාරියෙකු වන ගාමිණී සෙනරත් මහතා, මහින්ද රාජපක්ෂ මහතා ජනාධිපතිව සිටි සමයේ අතිරේක ලේකම් හා කාර්ය මණ්ඩල ප්‍රධානි වශයෙන් ද 2004 -2005, 2019 වසරවල සහ වත්මන් ආණ්ඩුවේ දී ද මහින්ද රාජපක්ෂ මහතා අග්‍රාමාත්‍ය ධුරයට පත්වීමෙන් පසු අග්‍රාමාත්‍ය ලේකම්වරයා වශයෙන් කටයුතු කළේය.

හක්මණ මෙතෝදිස්ත, මාතර රාහුල හා ගාල්ල රිච්මන්ඩ් විද්‍යාලවලින් මූලික හා ද්විතීයික අධ්‍යාපනය හදරා ඇති සෙනරත් මහතා කැලණිය විශ්වවිද්‍යාලයෙන් ප්‍රථම උපාධිය ලබා 1984 වර්ෂයේ දී ශ්‍රී ලංකා පරිපාලන සේවයට එක් විය. කොළඹ විශ්වවිද්‍යාලයෙන් පරිගණක තාක්ෂණය පිළිබඳ පශ්චාත් ඩිප්ලෝමාව හිමිකරගෙන ඇති ඒ මහතා එක්සත් රාජධානිය, ජපානය, සිංගප්පූරුව, පාකිස්ථානය, ජර්මනිය සහ ප්‍රංශය ඇතුළු රටවල් රැසක පුහුණු පාඨමාලා හදාරා ඇත.

මෝටර් රථ ප්‍රවාහන දෙපාර්තමේන්තුව, ආගමන විගමන දෙපාර්තමේන්තුව වැනි රාජ්‍ය ආයතන රැසක ඉහළ තනතුර හෙබවූ ඒ මහතා මහජන බැංකුව, ශ්‍රී ලංකා රක්ෂණ සංස්ථාව, ලිට්රෝ ගෑස් සමාගම ඇතුළු රාජ්‍ය ව්‍යවසායකත්ව රැසක සභාපතීත්වය උසුලා ඇත.

මේ අතර නව අග්‍රාමාත්‍ය ලේකම්වරයා ලෙස ඩී.එම්. අනුර දිසානායක මහතා පත් කළ අතර ජනාධිපතිවරයා විසින් ඊට අදාළ පත්වීම් ලිපිය ප්‍රදානය කරනු ලැබීය.

ශ්‍රී ලංකා පරිපාලන සේවයේ ජ්‍යෙෂ්ඨ නිලධාරියෙකු වන අනුර දිසානායක මහතා වාරිමාර්ග අමාත්‍යාංශයේ ලේකම්වරයා ලෙස කටයුතු කළේය. අමාත්‍යාංශ කිහිපයක ලේකම් ධුරය හොබවා ඇති ඒ මහතා රාජ්‍ය සේවයේ ඉහළ තනතුරු රැසක් හෙබවූ අත්දැකීම් බහුල රාජ්‍ය නිලධාරියෙකි.

අනුර දිසානායක මහතාගේ නව පත්වීමත් සමග පුරප්පාඩු වූ වාරිමාර්ග අමාත්‍යාංශයේ නව ලේකම්වරයා ලෙස කේ.ඩබ්. අයිවන් ද සිල්වා මහතා පත් කර ඇති අතර ජනාධිපතිවරයා විසින් ඊට අදාළ පත්වීම් ලිපිය ප්‍රදානය කරනු ලැබීය.

රටේ සෑම දෙයක්ම රාජ්‍ය සේවය මත රඳා පවතී. එම නිසා සියලුම අමාත්‍යාංශ ලේකම්වරු ඉදිරියේ දැවැන්ත වගකීම් කොටසක් පැවරී ඇති බව ජනාධිපතිවරයා සියලුම කැබිනට් ලේකම්වරුන් අමතමින් සඳහන් කළේය.

අද දින සේවයෙන් බැහැර වූ හිටපු ජනාධිපති ලේකම් පීබී ජයසුන්දර මහතා යළිත් සිය දායකත්වය ලබාදෙනු ඇතැයි අපේක්ෂාවෙන් බව මහබැංකු අධිපති අජිත් නිවාඩ් කබ්රාල් මහතා ප්‍රකාශ කර තිබේ.

2005 වසරේ සිට ඔහු හා සමඟ එක්ව අභියෝග ජයගත් ආකාරය පිළිබඳ තමාට විශිෂ්ට මතකයන් ඇතැයි ද ඔහු සිහිපත් කරයි.

මෙතෙක් දැක්වූ දායකත්වයට ජයසුන්දර මහතාට තුති පුද කරමින් කබ්රාල් මහතා පෙන්වා දී ඇත්තේ පීබී ජයසුන්දර මහතාට තව බොහෝ දේ කළ හැකි බවත් ඔහුගේ ඉදිරි දායකත්වය තමා අපේක්ෂාවෙන් සිටින බවයි.

රටේ පවතින ඉන්ධන තොග සෑම මොහොතකම ඉහළ යමින් පවතින බවත් එක මොහොතක තොගය දෙස බලා කලබල වීම තේරුමක් නැති දෙයක් බව බලශක්ති අමාත්‍ය උදය ගම්මන්පිල මහතා පවසයි.

හෙතෙම කියාසිටියේ දින 5කට වරක් මෙරටට පෙට්‍රල් නැවක් ද දින 7කට වරක් ඩීසල් නැවක් ද සති 3කට වරක් ගුවන් යානා තෙල් නැවක් ද එන බව ඔහු කියාසිටියි.

එබැවින් එම තොග දෛනිකව පරිභෝජනයේදී අඩු වන බවත් නැවක් ආ විට යළි වැඩිවන බවත් මාස ගණනකට අවශ්‍ය තොග එකවර ගෙනැවිත් තබාගැනීමට නැව් ධාරිතාව නැති බවත් අමාත්‍යවරයා කීය.

එමෙන්ම තමාට හෝ ඇමති ගාමිණී ලොකුගේ මහතාට ජනතාවට පේන මත ගැටුමක්වත් අර්බුදයක්වත් මුකුත් නැති බවත් ‘එතුමටයි මටයි තියෙන්නේ එකම ප්‍රශ්නයයි ඒ ඩොලර් ප්‍රශ්නය’ යැයි ද අමාත්‍යවරයා අද කැබිනට් තීරණ දැනුම් දීමේ මාධ්‍ය හමුවේදී කීය.

ජනන යන්ත්‍ර සඳහා ඉන්ධන නොමැතිවීම හේතුවෙන් කැලණිතිස්ස විදුලි බලාගාරයේ විදුලි ජනන කටයුතු සම්පූර්ණයෙන් නවතා දමා තිබේ.

ලංකා විදුලිබල මණ්ඩලය පවසන්නේ එසේ වුවද අද (19) දිනයේදී විදුලිය කැපීමක් සිදුනොවන බවය.

අද සවස් වනවිට එම ජනන යන්ත්‍ර සඳහා අවශ්‍ය ඉන්ධන ලබාදීමට ලංකා ඛනිජ තෙල් නීතිගත සංස්ථාව කටයුතු කරනු ඇති බවද සඳහන් ය.

පරීත්‍යාගයක් ලෙස සහල් මෙට්‍රික් ටොන් ලක්ෂ 10 ක් මෙරටට ලබාදීමට චීනය එකඟ වී ඇති බව වෙළඳ අමාත්‍ය ආචාර්ය බන්දුල ගුණවර්ධන මහතා පවසයි.

අමාත්‍යවරයා සඳහන් කළේ චීනය හා මෙරට අතර ක්‍රියාත්මක වූ රබර් – සහල් ගිවිසුමේ 70 වැනි සංවත්සරය වෙනුවෙන් මෙම සහල් තොගය ලැබෙන බවය.

ඒ අනුව ලබන අප්‍රේල් මාසයට පෙර එම සහල් තොගය මෙරර ලැබෙන බව ද අමාත්‍ය බන්දුල ගුණවර්ධන මහතා සඳහන් කළේය.