මේ වනවිට මෙරට මුහුදු තීර⁣යේ නැංගුරම් ලා තිබෙන මතභේදාත්මක චීන කාබනික පොහොර නැවේ අඩංගු පොහොර සාම්පල නැවත පරීක්ෂා කිරීමක් සිදු නොකරන බව කෘෂිකර්ම අධ්‍යක්ෂ ජනරාල් ආචාර්ය අජන්ත ද සිල්වා මහතා පවසයි.

නැවේ ඇති පොහොර සාම්පල තුන්වන පාර්ශ්වයකට ලබා දී නැවත පරීක්ෂා කිරීමට ඉල්ලිම් ඉදිරිපත්ව තිබුණ ද එවැන්නක් කිරීමට අවශ්‍යතාවක් නොමැති බවද ඔහු පැවසීය.

මෙරට ශාඛ නිරෝධායන ආයතනය කරන ලද කාබනික පොහොර සාම්පල පරික්ෂා කිරීම් පිළිබඳව සෑහිමකට පත්වන බැවින් තෙවන පාර්ශවයකට ලබාදී පොහොර පරික්ෂා කිරීමේ අවශ්‍යතාවයක් නැතැයිද ඔහු ප්‍රකාශ කළේය.

ශ්‍රී ලංකා පොලිස් ඉතිහාසයේ ප්‍රථම වතාවට පොලිස් වෛද්‍ය සේවා අංශයේ ප්‍රධානියා ලෙස වෛද්‍යවරයෙක් පත්කර තිබේ.

උප සේවා ජ්‍යෙෂ්ඨ පොලිස් අධිකාරී වෛද්‍ය ඩබ්ලිව්.සී. රණසිංහ මහතා එසේ වෛද්‍ය සේවා අංශයේ ප්‍රධානියා ලෙස පත්කර ඇත. වසර 20 ක පමණ කාලයක් ඔහු පොලිස් වෛද්‍ය අංශයේ සේවයේ නිතරව සිටින අතර ඉකුත් පෙබරවාරියේ සිට ඔහු ප්‍රධාන වෛද්‍ය නිලධාරියා ලෙස පොලිස් රෝහලේ කටයුතු කරනු ලැබීය.

ශ්‍රී ලංකා පොලිස් වෛද්‍ය අංශයේ සේවයට බදවා ගනු ලබන්නේ රජයේ වෛද්‍යවරුන්ය. සෞඛ්‍ය අමාත්‍යාංශයේ අනුමැතියෙන් වසර 05 කොන්ත්‍රාත් කාලයකට එම වෛද්‍යවරුන් බදවා ගනු ලබන අතර ඔවුන්ට සහකාර පොලිස් අධිකාරී තනතුර ඇතුළු පහසුකම් රැසක් පොලිස් දෙපාර්තමේන්තුවෙන් ලබාදෙයි. සේවා අවශ්‍යතා මත වසර 05 න් 05 ට සේවා දීර්ඝ කිරීම් සිදුවන අතර මෙතෙක් පොලිස් වෛද්‍ය සේවා අංශයේ ප්‍රධානියා ලෙස සේවයේ නිරතවූයේ පොලිස් සේවයේ ස්ථිර නිලධාරියෙකි.

ඉකුත් පෙබරවාරියේදී නව ප්‍රධානියා ලෙස පත්කල රණසිංහ මහතාගේ සේවය අවසන් කිරීමට පොලිස් දෙපාර්තමේන්තුව පියවර ගත්තද පසුව මහජන ආරක්ෂක අමාත්‍යාංශයේ මැදිහත්වීම මත සේවය අවසන්කර දින 14 ක් වැනි කෙටි කාලයක් තුළ නැවත සේවයට පැමිණි බවත් පසුව ප්‍රධාන වෛද්‍ය නිලධාරියා ලෙසද පත්වීම් ලැබුණු බවත් පොලිස් දෙපාර්තමේන්තු තොරතුරු අනාවරණය කළේය.

ඒ වන විට පොලිස් වෛද්‍ය සැපයුම් අංශයේ ප්‍රධානියා ලෙස සේවයේ නිරතව සිටියේ ජ්‍යෙෂ්ඨ පොලිස් අධිකාරීවරියක් වන මදාරා ආරියසේන මහත්මියයි. වෛද්‍ය සේවා අංශයේ සිදුවූ අක්‍රමිකතා රැසක් හෙළිකර ගනිමින් ඇය ඒවාට නැවත ඉඩ නොතබමින් පොලිස් වෛද්‍ය අංශය ඉහළ තලයකට ගෙන ඒමට කැපවීමකින් ක්‍රියාකල බව පොලිස් තොරතුරු සදහන් කළේය. එහෙත් හිටි හැටියේම මෙයට මාස දෙකකට පමණ පෙර ඇය වෛද්‍ය සේවා අංශයේ ප්‍රධානී තනතුර වන අධ්‍යක්ෂධූරයෙන් ඉවත්කර පොලිස් විභාග අංශයට මාරුකරනු ලැබීය. අනතුරුව එහි අධ්‍යක්ෂ ලෙස වෛද්‍ය අංශයේ නියෝජ්‍ය අධ්‍යක්ෂ ලෙස සේවයේ නිරතව සිටි ජ්‍යෙෂ්ඨ පොලිස් අධිකාරී පී.කේ. සේරසිංහ මහතාව පත්කරනු ලැබීය.

එම පත්වීමෙන් මාස දෙකක් ඉක්ම යන්නට මත්තෙන් පොලිස් වෛද්‍ය සේවා අංශයේ පරිපාලනය කොටස් දෙකකට වෙන්කර මෙතෙක් එහි අධ්‍යක්ෂධූරය දැරූ සේරසිංහ මහතා සිවිල් නිලධාරීන්ගේ පරිපාලන අධ්‍යක්ෂ ලෙසත් ප්‍රධාන වෛද්‍ය නිලධාරී වෛද්‍ය රණසිංහ මහතා වෛද්‍ය සේවා අංශයේ නිලධාරීන්ගේ පරිපාලන අධ්‍යක්ෂ ලෙසත් පත්කර තිබේ.

මෙයට සති දෙකකට පරෙ පොලිස් රෝහල් වෛද්‍ය කමිටුවේ රැස්වීමක් අවසානයේදී පොලිස් රෝහලේ සේවයේ නිරතව සිටි විශේෂඥ වෛද්‍යවරුන් මෙම පත්කිරීමට විරෝධයක් පවා දක්වා ඇතැයි පොලිස් තොරතුරු සදහන් කළේය. ඊට මුල්වී ඇත්තේ වෛද්‍යවරුන්ගේ පරිපාලන අධ්‍යක්ෂ ලෙස පත්කල රණසිංහ මහතා විශේෂඥ වෛද්‍යවරයෙක් නොවන බැවින් විශේෂඥ වෛද්‍යවරුන් සිය පරිපාලනය ඔහු විසින් සිදු කිරීමට එතරම් කැමැත්තක් නොදැක්වීමය.

එසේ තිබියදීත් මෙම පත්කිරීම මේ වන විට සිදුව ඇති අතර මෙතෙක් එම පත්කිරීමට විරෝධයක් එල්ලවී නැති බව පොලිස් රෝහල් තොරතුරු සදහන් කළේය. මේ සම්බන්ධයෙන් තොරතුරු දැන ගැනීමට නව රෝහල් අධ්‍යකෂ වෛද්‍ය රණසිංහ මහතාව සම්බන්ධකර ගැනීමට උත්සහගත්තද එය ව්‍යර්ථ විය.

රාජ්‍ය සේවයට වසරක් යනතුරු කිසිදු ආකාරයකින් මහජන මුදල් වැයකිරීමේ හැකියාවක් නැතැයි මුදල් අමාත්‍ය බැසිල් රාජපක්ෂ මහතා පවසයි.

රාජ්‍ය සේවය බරක් වී ඇති බවත් රාජ්‍ය සේවකයන්ට තවදුරටත් ලොසිජර දෙන්න අවශ්‍යතාවක් නොමැති බව අයවැය පිළිබඳ කරුණු පැහැදිලි කිරීම වෙනුවෙන් අද පැවැති මාධ්‍ය හමුවේදී මුදල් ඇමතිවරයා කීය.

රාජ්‍ය සේවයේ, විශ්‍රාමිකයින් සඳහා වැටුප් වැඩිකිරීමට මෙවර අයවැයෙන් මුදලක් වෙන් නොවීම පිළිබඳ මාධ්‍යවේදියකු නැඟු ප්‍රශ්නයට මුදල් අමාත්‍යවරයා මෙලෙස ප්‍රතිචාර දැක්වීය.

“රජයට දරාගන්න බැරි තරම් රාජ්‍ය සේවය පුළුල් වෙලා තියෙනවා. තවදුරටත් අපි ලොසින්ජර දෙන්න අවශ්‍ය නෑ. අපි අවංකව පිළිගන්න ඕන මේ රාජ්‍ය සේවය අපේ රටට බරක්. යම්කිසි ආකාරයක රාජ්‍ය සේවකයින්ට සහනයක් දෙනවා කියන්නේ ජනතාවගෙන් ඒ සඳහා මුදල් එකතු කරගන්න ඕන. රජයකට මුදල් ලබාගන්න ක්‍රමය තමයි මහජනතාවගෙන් ඒක ලබාගෙන තවත් පාර්ශවයකට දෙන එක. මම පැහැදිලිව කියන්න ඕන වර්ෂයක් යනකම් මොන ආකාරයකින්වත් රාජ්‍ය සේවය වෙනුවෙන් තවත් මහජන මුදල් වැය කරන්න හැකියාවක් නෑ.

එනමුත් රාජ්‍ය සේවකයින්ගේ ප්‍රධාන වශයෙන් මුල්‍යමය ප්‍රතිපාදන වෙන් නොකළත් යම් ආකාරයේ සහන දෙනවා. විශේෂයෙන්ම අපි දන්නවා සමහර රාජ්‍ය සේවකයින් අවුරුදු 45ට වගේ කාලයක් තමයි රාජ්‍ය සේවයට දෙන්නේ. ඔවුන් අවුරුදු 55න් විශ්‍රාම යන කොට අවුරුදු දහයක් විශාම වැටුප් ලැබුණත් අපේ රටේ දැන් තියෙන සෞඛ්‍යමය පැත්තෙන් ඇතිවෙලා තියන කරුණු මත අපේ පරමායුෂ කාලය වැඩි වෙලා තියනවා. ඒ නිසා අපි අවුරුදු 10කින් රාජ්‍ය සේවකයෙකුගේ විශ්‍රාම කාලය දික් කරලා තියෙනවා. මෙතනදී ගණන් හදලා බලන්න මොනතරම් ලාභයක් කෙනෙකුට ලැබෙනවද කියලා. පළපුරුද්ද සහිත රාජ්‍ය සේවකයින්ගේ අත්‍යවශ්‍ය තත්ත්වයක් අපේ රාජ්‍ය සේවයේ තිබුණා. ඒ නිසා තවත් ක්‍රමවේද කිහිපයකින් රාජ සේවකයින් සහන සැලසීමට ක්‍රියා කරලා තියෙනවා නැවත වාරයක් වගකීමකින් කියනවා මේ රාජ්‍ය සේවකයින්ගේ සංඛ්‍යාව පුළුල් කරන්න අපිට පුලුවන් කමක් නැහැ. නමුත් විශ්‍රාම යන සංඛ්‍යාව අනුව වාර්ෂිකව සේවක සංඛ්‍යාව තරුණ පිරිස ඇතුළු කර ගැනීමට කටයුතු කරනවා. දැනට අනුමත රාජ්‍ය සේවකයින් 1401890ක් 1423116 ක් ඉන්නවා.

නිදහස ලැබෙන කොට මේ රටේ ජනතාවට 113 දෙනෙකුට එක රාජ්‍ය සේවකයෙක් බැගින් හිටියේ. නමුත් අද වෙනකොට 13 දෙනෙකුට එක් අයෙක් බැගින් ඉන්නවා. එතරම් රාජ්‍ය සේවය පුළුල් වෙලා තියෙනවා. මේ අය වැයේදී අපි ඔවුන්ට පඩියකින් වැඩි කිරීමට නොහැකි වුනත් යම් යම් සහන සලසලා තියෙනවා. අපි ආඩම්බර වෙනවා විනයගරුක රාජ්‍ය සේවකයින් විශාල පිරිසක් අපට ඉන්න රටක්. විශේෂයෙන්ම ආපදා වස්ථාව ලදී ක්‍රියා කරපු ආකාරය ගැන අපි සතුටු වෙනවා. හැකි පළවෙනි අවස්ථාවේදී රාජ්‍ය සේවකයින්ට ඒ කළ යුතු කටයුතු සිදු කරන්න රජයට පුළුවන් බව කියනවා. ඒ වගේම පෞද්ගලික අංශයේ සේවකයන් ගැනත් අපි දීර්ඝ වශයෙන් කල්පනා කරලා තියෙනවා.” යැයි ද මුදල් ඇමතිවරයා කීය.

අත්‍යාවශ්‍ය භාණ්ඩ සඳහා විශේෂ වෙළෙඳ භාණ්ඩ පැනවීමට සූදානමක් නොමැති බව මුදල් අමාත්‍ය බැසිල් රාජපක්ෂ මහතා පවසයි.

ළඟදීම එම බදු පැනවෙන භාණ්ඩ දැනගත හැකි වනු ඇති බව හෙතෙම කීය.

අයවැය යෝජනා සම්බන්ධයෙන් පැහැදිලි කිරීම සඳහා අද පැවැති මාධ්‍ය හමුවේදී ඔහු පෙන්වා දෙන්නේ අයවැයේ සඳහන් කරන ලද ලබන වසරේ් සිය අයකරන විශේෂ වෙළඳ භාණ්ඩ බද්ද අලුත් පියවරක් නොව පෙර වසරේ අයවැයේ යෝජනාව ක්‍රියාත්මක කිරීම පමණක් බවයි.

බදු ප්‍රතිපත්තිය ලොකු වෙනසක් නොකළ යුතු බවට තමාට ලද කොන්දේසියට අනුව මෙවර අයවැයේ බදු වෙනස්කම් විශාල ලෙස සිදුකොට නැතැයි හෙතෙම කීය.

“ගිය අවුරුද්දේ හඳුන්වාදුන් හඳුන්වා දුන් බදු ප්‍රතිපත්තිය ලොකු වෙනසක් නොකර එකේ ඉන්න ඕන කියලා මට මෙවර අයවැය හදද්දි මට ලැබුණු එක කොන්දේසියක්. විශේෂ වෙළෙඳ භාණ්ඩ බද්ද ගිය අයවැය යෝජනාවක්. එය නීති කෙටුම්පත් කරන්න ඒකට සියලු දෙවල් සූදානම් කර තිබෙනවා. එය ක්‍රියාත්මක කිරීම තමයි අපි 2022 ජනවාරි පළවෙනිදා සිට කරන්නේ. එක තුළින් අපි විටින් විට වෙනස් කරන්නේ නැතුව එකම ප්‍රතිපත්තියක රඳා පවතින බදු ක්‍රමයක්. මේක තුලදී අපි හඳුනාගෙන තිබෙනවා යම් යම් බදු අයකරගන්නා ජාති කීපයක්. එය දැන්ම එළියට දැම්මොත් ඒකෙන් අනිසි වාසි ගන්න ඉඩ තියෙනවා සමහර අය.

ඒ නිසා එයට මුදල් අමාත්‍යාංශ ලේකම්තුමා මටවත් කියන්නෙත් අඩුවෙන්, මොකද අපි දේශපාලනඥයෝ. මාධ්‍ය ඉස්සරහ නිතර නිතර යනව. ඒවායෙන් මොකක් හරි හෙළිදරව් වුනොත් ඒකෙන් එතනම අවාසි වෙන්න පුළුවන්. හොදම උදාහරණය තමයි මේ සිගරට් මිල ගැනත් යම් යම් මාධ්‍යවලින් ප්‍රචාරය වීම නිසා සමහර කොටස් කර එකතු කරලා තියෙනවා දැන්. මම දේශපාලකයෙක් හැටියට ඕකට උත්තර දෙන්න කැමති නමුත් මුදල් ඇමැතිවරයා හැටියට මට වගකීමක් තියෙනවා ඒ ඇතුළු කරන භාණ්ඩ කියන්න එපා කියලා මට උපදෙස් ලැබිලා තියෙනවා. හැකි ඉක්මනින් විශේෂ වෙළඳ භාණ්ඩ බද්ද බදු ඇතුලත් කරන සහ ඉවත් කරන භාණ්ඩ ගැන දැනගන්න පුලුවන්. ජනතාවගේ අත්‍යවශ්‍ය භාණ්ඩවලට හෝ වෙනත් අවශ්‍ය භාණ්ඩවලට ඒ බද්ද අය කරන්නේ නැහැ.”

අම්පාර ඕලුවිල් වරාය, වරාය අධිකාරියේ පාලනයෙන් ඉවත් කර ධීවර අමාත්‍යංශය යටතට පැවරීමට කැබිනට් අනුමැතිය හිමි වූ බව ධීවර රාජ්‍ය අමාත්‍ය කංචන විජේසේකර මහතා පවසයි.

ඒ අනුව ඔලුවිල් වරාය නවීන පහසුකම් සහිත වරායක් ලෙස ප්‍රතිසංස්කරණය කිරීමට රජය තීරණය කර ඇතැයි හෙතම සඳහන් කළේය.

2014 වසරේ දී මෙම වරායේ ප්‍රතිසංස්කරණ කටයුතු අවසන් කර තිබුණ ද පසුගිය කාලයේ දී එම කටයුතු නවතා තිබූ බව රාජ්‍ය අමාත්‍යවරයා සඳහන් කළේය.

ඉඩම් නොමැති රණවිරුවන් වෙත ලබාදීම සඳහා ගල්කිස්ස ප්‍රදේශයේ පදිංචි පරිත්‍යාගශීලියකු වන එල්. කේ. කුසුමාවතී මහත්මිය විසින් තම මියගිය ස්වාමිපුරුෂයාට පිං පිණිස තෑගි ඔප්පුවකින් රණවිරු සේවා අධිකාරිය වෙත පරිත්‍යාග කරන ලද රූඩ් දෙකයි පර්චස් 38 ක ඉඩමෙන් පර්චස් 10 බැගින් වූ ඉඩම් කැබලි නමයක් ආබාධිත රණවිරුවන් 8 දෙනෙකුට සහ මියගිය රණවිරුවෙකුගේ මවකට ලබා දීම සඳහා ඔප්පු අත්සන් කිරීමේ මූලික වැඩසටහනක් රණවිරු සේවා අධිකාරියේ දී ඊයේ (12) සිදුකරන ලදී.

මෙහිදී සබරගමු පළාතට අයත් රත්නපුර දිස්ත්‍රික්කයේ, බලන්ගොඩ ප්‍රදේශයේ, මැදකොරලේ හෙල උඩපත්තුවේ, අංක 254, පහල මස්සැන්න බලංගොඩ ග්‍රාම සේවා වසම තුල පිහිටි අබේසිංහ හේන හෙවත් විලේගොඩ කෑල්ල ඉඩම ( රූඩ් දෙකයි පර්චස් 38 ක) තාවකාලිත බලපත්‍ර මගින් පදිංචිය සඳහා රණවිරු පවුල් නමයක් සඳහා ලබාදී තිබුණි.

මෙම ඉඩම් කැබලි සඳහා වන නිත්‍යානුකූල අයිතිය පැවරීම සඳහා රණවිරු සේවා අධිකාරියේ මැදිහත්වීම මත ශ්‍රී ලංකා යුද හමුදාවේ නීති සේවා අධ්‍යක්ෂක මණ්ඩලයේ සහාය ඇතිව පහත සඳහන් රණවිරු පවුල් 09 සඳහා සින්නක්කර ඔප්පු අත්සන් කිරීමෙන් අනතුරුව පවරා දීමේ කටයුතු නුදුරේදී සිදු කිරීමට නියමිතය.

රණවිරු සේවා අධිකාරියේ සභාපති, විශ්‍රාමික මේජර් ජෙනරල් නන්දන සේනාධීර විසින් මෙම ඔප්පු සදහා නිළ වශයෙන් අත්සන යොදා සහතික කරන ලදී.

රණවිරු සේවා අධිකාරියේ අධ්‍යක්ෂක තුමන් ඇතුළු කාර්ය මණ්ඩලයේ නිලධාරීන් සහ රණවිරු පවුල්වල සාමාජිකයන් කීප දෙනෙකු මෙම අවස්ථාව සදහා සහභාගී වන ලදී.

අයවැයෙන් යෝජිත බදු පැනවීමෙන් පසු මත්පැන් මිල සංශෝධනය වන ආකාරය රජය විසින් ප්‍රකාශයට පත්කර තිබේ.

ඒ අනුව,

විදේශීය මත්පැන් (මිලි ලීටර් 750) රුපියල් 126 කින්,
වයින් (මිලි ලීටර් 750) රුපියල් 14.40කින්
බියර් (මිලි ලීටර් 330 – 5% අඩු) රුපියල් 3කින් අය
බියර් (මිලි ලීටර් 330 – 5% වැඩි) රු. 14.96කින්
දේශීය මධ්‍යසාර 01 වර්ගය (මිලි ලීටර් 750) රුපියල් 96 කින්
වෙනත් දේශීය මධ්‍යසාර වර්ග 2ක් (මිලි ලීටර් 750) රු. 103ක් බැගින් ඉහළ යනු ඇති බව සුරාබදු දෙපාර්තමේන්තුව පවසයි.

පාතාලයේ අපරාධකරුවෙක් වන තොටලඟ චානා නැමැත්තා රටින් පළායාමට පෙර ඔහුගේ ගෝලයෙකුට සඟවා තබා ගැනීමට දුන් ඉතාලියේ නිෂ්පාදිත රිවෝල්වරයක් සොයා ගැනීමට පොලිස් විශේෂ කාර්ය බලකාය සමත්ව ඇත.

දෙපානම පන්නිපිටියේදී විශේෂ කාර්ය බලකාය ඊයේ කළ වැටලීමකදී එම ගිනි අවිය සොයාගෙන ඇත්තේ චානාගේ ගෝලයාද සමඟිනි.

වයස අවුරුදු 46 ක් පමණ වන සැකකරු ගිනි අවියද සමඟ විමර්ශන කටයුතු සදහා මහරගම පොලීසියට භාරදී ඇත.

විශේෂ කාර්ය බලකාය අණදෙන නිලධාරී නියෝජ්‍ය පොලිස්පති නීතිඥ වරුණ ජයසුන්දර මහතාගේ සෘජු අධීක්ෂණය යටතේ නියෝජ්‍ය අධ්‍යක්‍ෂ (බුද්ධි/විශේෂ මෙහෙයුම්) සහකාර පොලිස් අධිකාරී ඩී.පී.යූ. කොඩිතුවක්කු මහතාගේ උපදෙස් මත විශේෂ කාර්ය බලකාය සංවිධානාත්මක අපරාධ මර්දන ඒකකය II හි නිලධාරීන්ට ලද තොරතුරකට අනුව එහි ස්ථානාධිපති පොලිස් පරීක්‍ෂක සී.ආර්. පාරමුල්ලගේ මහතා ඇතුළු නිලධාරීන් කණ්ඩායමක් විසින් වැටලීම කර තිබේ.

නව කැලණි පාලමේ ඉදිකිරීම් කටයුතු නිසා කොළඹ – කටුනායක අධිවේගී මාර්ගය ඉරිදා (14) පෙරවරු 6.00 සිට පැය 18 කාලයක් වසා තැබෙන බව මාර්ග සංවර්ධන අධිකාරිය නිවේදනය කරයි.

කොළඹ – කටුනායක අධිවේගී මාර්ගයේ (E 01) පෑලියගොඩ අන්තර් හුවමාරුව හා පවතින කැලණි පාලම අතර කොටස නොවැම්බර් 14 වන ඉරිදා උදෑසන 6.00 සිට මධ්‍යම රාත්‍රී 12.00 දක්වා⁣ මෙලෙස වසා තැබෙන බව එම අධිකාරිය පවසයි.

ඒ සඳහා විකල්ප මාර්ග ලෙස කොළඹ – නුවර මාර්ගයත් (A1), කොළඹ – මීගමුව මාර්ගයත් (A3) භාවිත කරන ලෙස මාර්ග සංවර්ධන අධිකාරිය දැනුම් දෙයි.

නැනෝ නයිට්‍රජන් දියර පොහොර උපරිමයෙන් මෙරටට ගෙන්වීමටත්, ගොවීන් සඳහා කාබනික පොහොර නොමිලයේ ලබාදීමටත් අද (12)⁣ පෙරවරුවේ පැවැති විශේෂ කැබිනට් මණ්ඩල රැස්වීමේදි අනුමැතිය හිමිවූ බව අමාත්‍ය එස්.එම් චන්ද්‍රසේන මහතා පවසයි.

යූරියා පොහොර ගෙන්වීම නුසුදුසු බැවින් අමාත්‍ය මණ්ඩලය ඉහත තීරණයට එළැඹි බව අමාත්‍යවරයා සඳහන් කරයි.

ඒ අනුව ගොවි ජනතාවට ඉදිරියේදි නැනෝ නයිට්‍රජන් දියර පොහොර උපරිමයෙන් ලැබෙනු ඇතැයි හෙතම සඳහන් කළේය.

කොරෝනා වයිරස ව්‍යාපෘතිය හේතුවෙන් පාසල් වසා දමා තිබූ කාලයේ මඟහැරැණ පාඩම් ඉගැන්වීම සඳහා ජාතික අධ්‍යාපන ආයතනය ක්‍රමවේදයක් සකස් කර තිබේ.

ඒ අනුව මෙම මාසයේ සිට ලබන වසරේ මාර්තු මාසය දක්වා සති 20 ක කාලයක් ඉගැන්වීම් කොටස්වලින් අත්‍යාවශ්‍යම කොටස් තෝරාගෙන සිසුන්ට ඉගැන්වීමට පියවර ගැනීමට නියමිතව ඇත.

බස්නාහිර පළාත ඇතුළුව අනෙකුත් පළාත්වල සිසුන්ගෙන් සියයට 45 ක පිරිසකට පාඩම් කටයුතු මගහැරී ගොස් ඇති බව ජාතික අධ්‍යාපන ආයතනය සඳහන් කරයි.

කෙසේ වෙතත් මෙම වසරේ දී අධ්‍යයන කටයුතු ඊට වඩා වැඩි වශයෙන් මගහැරී ගොස් ඇති බව ද ජාතික අධ්‍යාපන ආයතනය සඳහන් කරයි.

බදු හා දඩ මුදල් ගෙවීමට යටත්ව රේගුවේ සිරවී ඇති සියලුම වාහන නිදහස් කිරීමට අයවැය කතාවෙන් මුදල් අමාත්‍ය බැසිල් රාජපක්ෂ මහතා යෝජනා කරයි.

වරායවල වාහන 700ක් පමණ වසර 7ක් තිස්සේ දිරමින් පවතින බැවින් බදු හා දඩමුදල් ගෙවීමට යටත්ව මෙලෙස මුදාහරින ලෙස හෙතෙම දැන් පැවැත්වෙන අයවැය කතාවේදී කියාසිටී.

රජයේ නිලධාරීන්ට යතුරු පැදි ලබාදීම සඳහා රුපියල් මිලියන 500ක් මෙවර අයවැයෙන් වෙන් කෙරේ.

මුදල් අමාත්‍ය බැසිල් රාජපක්ෂ මහතා විසින් පාර්ලිමේන්තුවේදී දැන් ඉදිරිපත් කරන අයවැය කතාවේ මේ බව යෝජනා කර සිටී.

රජයේ සේවකයන් සඳහා යතුරුපැදි ලබාදීමේ ව්‍යාපෘතිය මේ අනුව යළි හඳුන්වාදීම මෙමගින් සිදුකෙරේ.

ගැබිනි කතුන්ට ලබාදෙන පෝෂණ මල්ල වසර 2ක් සඳහා ලබාදීමට අයවැයෙන් යෝ්ජනා කෙරේ.

ඒ සදහා තවත් මිලියන 1000ක් මෙවර අයවැයෙන් වෙන්කෙරෙන බව මුදල් අමාත්‍ය බැසිල් රාජපක්ෂ මහතා විසින් පාර්ලිමේන්තුවේදී දැන් ඉදිරිපත් කරන අයවැය කතාවේ මේ බව යෝජනා කර සිටී.

ඒ වාර්ෂිකව වෙන් කෙරන මිලියන 4000ට අමතරව ය .

බන්ධනාගාර රැඳවූවන්ගේ සනීපාරක්ෂක කටයුතු වැඩිදියුණු කිරීමට මිලියන 200ක් වෙන්කෙරේ.

“මේක හැමදාම විපක්ෂෙ ඉද්දී මතක් වෙනවා. ආණ්ඩුවට ආවම මේක අමතක වෙනවා.” යනුවෙන් පවසමින් මුදල් ඇමතිවරයා අයවැය කතාව ‍තුළ මෙම යෝජනාව ඉදිරිපත් කළේය.

මුදල් අමාත්‍ය බැසිල් රාජපක්ෂ මහතා විසින් පාර්ලිමේන්තුවේදී දැන් ඉදිරිපත් කරන අයවැය කතාවේ මේ බව යෝජනා කර සිටී.

කොවිඩ් සමයේ රට වසා තැබිම හේතුවෙන් ආදායම් අහිමි වූ පාසල් වෑන් රථ හා පාසල් බස් රථ සහන සැලසීමට රුපියල් මිලියන 400ක් වෙන් කරන බව මුදල් අමාත්‍ය බැසිල් රාජපක්ෂ මහතා විසින් පාර්ලිමේන්තුවේදී දැන් ඉදිරිපත් කරන අයවැය කතාව මගින් යෝජනා කර සිටී.

ආදායම අහිමි වූ ත්‍රිරෝද රථ හිමියන්ට සහන සැලසීමට රුපියල් මිලියන 700ක් වෙන් කෙරේ.

පුද්ගලික බස් රථ හිමියන් සඳහා සහන සැලසීමට රුපියල් මිලියන 1500ක් වෙන් කෙරේ.

මැතිසබය විනාඩි 10කට කල්තැබීය.

කුලී ත්‍රිරෝද රථ කර්මාන්තයට නියාමන අධිකාරියක් හඳුන්වා දෙනු ඇත දීමට මෙවර අයවැයෙන් යෝජනා කෙරේ.

ගාස්තු හා සේවා ප්‍රමිතිගත කිරීම කෙරෙහි අවධානය යොමු කරමින් මෙම පියවර ගන්නා බව මුදල් අමාත්‍ය බැසිල් රාජපක්ෂ මහතා විසින් පාර්ලිමේන්තුවේදී දැන් ඉදිරිපත් කරන අයවැය කතාවේ මගින් යෝජනා කර සිටී.

රාජ්‍ය සේවයේ විශ්‍රාම යන වයස් සීමාව ද අවුරුදු 65 දක්වා ඉහළ දැමීමට මුදල් අමාත්‍ය බැසිල් රාජපක්ෂ මහතා මෙවර අයවැයෙන් යෝජනා කරයි.

මුදල් අමාත්‍ය බැසිල් රාජපක්ෂ මහතා විසින් පාර්ලිමේන්තුවේදී දැන් ඉදිරිපත් කරන අයවැය කතාවේ මේ බව යෝජනා කර සිටී.

රාජ්‍ය නිලධාරීන් සඳහා ලබාදෙන ඉන්ධන සීමාව ලීටර් 5කින් අඩු කිරීමටත් රාජ්‍ය ආයතන හා නිලධාරීන් සඳහා දුරකතන දීමනාව 25%කින් කප්පාදු කිරීමට ලබන අයවැයෙන් යෝජනා වෙයි.

රාජ්‍ය ආයතනවල විදුලි බිල ද කප්පාදු කිරීමට අයවැයේ යෝජනා කර ඇත.

මුදල් අමාත්‍ය බැසිල් රාජපක්ෂ මහතා විසින් ඉදිරිපත් කරන අයවැය කතාවේ මේ බව යෝජනා කර සිටී.

මේ අතර විශේෂ අවශ්‍යතා සහිත පුරවැසියන් සඳහා සමාන අයිතිවාසිකම් වලංගු කිරීම සඳහා නව පනත් කෙටුම්පතක් ඉදිරිපත් කෙරේ.

මෙමගින් විශේෂ අවශ්‍යතා ඇති අය සඳහා සමාන අවස්ථා ලබා ගැනීමේ සංකල්පය රටට වැඩි සමානාත්මතාවය ගෙන ඒම තවදුරටත් තහවුරු වනු ඇත.

පාර්ලිමේන්තු මන්ත්‍රීවරුන්ට විශ්‍රාම වැටුප ලබාගැනීම සඳහා සම්පූර්ණ කළයුතු අඛණ්ඩ වසර ගණන 5කින් වැඩි කිරීමට මුදල් අමාත්‍ය බැසිල් රාජපක්ෂ මහතා අයවැය යෝජනාවක් කරයි.

මේ වනවිට ඔහු විසින් ඉදිරිපත් කරන අයවැය කතාවේ මේ බව සඳහන් කළේය.

ඒ අනුව දැනට වසර 5ක්ව පවතින එම කාලසීමාව වසර 10ක් දක්වා වැඩිකිරීමට අයවැයෙන් යෝජනා කර ඇත.

මෙය ජනාධිපතිවරයාට ද අදාළ වන පරිදි නීති සංශෝධන සැකසීමට ද යෝජනා කළ බව පවසන බැසිල් අමාත්‍යවරයා විපක්ෂයේ උසුළු විසුළු මධ්‍යයේ සිනාසෙමින් කියාසිටියේ ‘අපේ පක්ෂයේ දෙන්නෙකුටම තමා නැතිවෙන්නේ’ යනුවෙනි.