මෙවර අයවැය මගින් රාජ්‍ය සේවකයින්ගේ වැටුප් වැඩි වීම් හා දීමනා ලබා නොදීම සම්බන්ධයෙන් මුදල් අමාත්‍ය බැසිල් රාජපක්ෂ මහතා සමඟ හෙට (16) දින අමාත්‍යාංශයේ පැවැත්වෙන සාකච්ඡා අසාර්ථක වුවහොත් ලබන (22) වැනිදා වෘත්තිය ක්‍රියාමාර්ගයකට එළඹීමේ තීරණයක් ගන්නා බව ලංකා බැංකු සේවක සංගමය අවධාරණය කරයි.

මෙම සාකච්ඡාව සඳහා රාජ්‍ය බැංකු හතක නියෝජිතයන් සහභාගීවන බවඑම සංගමයේ ප්‍රධාන ලේකම් රංජිත් සේනානායක මහතා පැවසීය.

කෙසේ වෙතත් හෙට දිනයේ මුදල් අමාත්‍යවරයා සමඟ පැවැත්වෙන සාකච්ඡාවෙන් පසුව වෘත්තීය ක්‍රියාමාර්ගය සම්බන්ධයෙන් අවසන් තීරණයක් ගන්නා බවද ඔහු පැවසුවේය.

පානදුර කුඩු සලිදුගේ හෙරෙයින් කිලෝ 40 ක් අත්අඩංගුවට ගැනීමට කළුතර කොට්ඨාශ අපරාධ විමර්ශන ඒකකයට ඔත්තුවක් ලබාදුන්නේ යැයි කියා පුද්ගලයින් දෙදෙනෙකුගේ දෑත් කපා දමා සැඟවී සිටි බණ්ඩාරගම පොඩි චතූ නැමැත්තා ගංජා කිලෝ 05 ක් සමඟ කතරගම පොලීසියේ අත්අඩංගුවට පත්ව රක්ෂිත බන්ධනාගාරගතවී ඇතැයි පොලිස් තොරතුරු සදහන් කළේය.

එම අත්අඩංගුවට ගැනීම සැබෑ ලෙසම සිදුවූවක්ද එසේත් නොමැති නම් සැළසුම් සහගතව සිදුවූවක්ද යන්න පිළිබදව දකුණු පළාත් භාර ජ්‍යෙයෂ්ඨ නියෝජ්‍ය පොලිස්පතිවරයාගේ මෙහෙයැවීමෙන් විමර්ශනයක්ද ආරම්භකර තිබේ.

පොඩි චතූ නැමැති එම අපරාධකරු ඉකුත් ඔක්තෝම්බර් 17 වෙනිදා මහා දවාලයේ බණ්ඩාරගමදී පුද්ගලයින් දෙදෙනකුගේ දෙයත් කපන්නේ දොනෝ දහක් බලා සිටියදීය. මත්කුඩු නඩුවකට බන්ධනාගාරගතව සිට ඊට දින 04 ට පෙර ඇප ලබා නිදහස් වූ එම පුද්ගලයා අත්අඩංගුවට ගැනීමට කොළඹ අපරාධ කොට්ඨාශයේ නිලධාරීන් මෙහෙයුමක් දියත්කරන විට ඔහු නීතීඥයෙක් මාර්ගයෙන් පානදුර අධිකරණයට භාරවීමට සූදානම් විය. අධිකරණය විසින් ඔහුව භාර නොගැනීම හේතුවෙන් නීතීඥවරයාගේ රැකවරණය ලබමින් දින කිහිපයක් සැඟවී සිටි ඔහු මෙසේ හිටි හැටියේම කතරගම පොලීසියට ගංජා සමග හසුවීම ගැටළු සහගත බව පොලිස් දෙපාර්තමේන්තුව තුළ දැඩි සැකයක් මතුව තිබේ.

උසස් පොලිස් නිලධාරියෙක් සදහන් කරනු ලැබුවේ චතූ නැමැති මෙම සැකකරු අත්අඩංගුවට ගැනීමෙන් පසු අඩුම තරමින් ඔහු ගැන අපරාධ ලේඛනාගාරයටවත් තොරතුරු දැනුම් දී පරීක්ෂාවක් කර තිබේදැයි මේ වන විට සොයා බලමින් සිටින බවකි.

මේ අතර පොලීසියට මත්කුඩු ජාවාරමක් සම්බන්ධයෙන් තොරතුරු දුන්නේ යැයි කියන තවත් පුද්ගලයෙක්ගේ දෑත්ද ඉකුත් 13 වෙනිදා කැස්බෑවේදීද කපාදමා ඇත. දකුණු අත මැණික් කටුව අසලින් වෙන්වන්නට කපා ඇතැයි පොලීසිය සදහන් කරයි.

ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා විසින් මහ මගදී පුද්ගලයෙකුට පහරදීමක් සම්බන්ධයෙන් සමාජ මාධ්‍ය ඔස්සේ හුවමාරුවූ වීඩියෝව සහ තමාට පහරදී කිරිඇල්ල පොලිස් ස්ථානයට රැගෙනගොස් නිරුවත්කර හිංසනය කළ බවට එම පුද්ගලයා විසින් නීතී සමාගමක් මගින් කළ පැමිණිල්ල සම්බන්ධයෙන් පොලිස් විශේෂ විමර්ශන ඒකකය පුළුල් විමර්ශනයක් ආරම්භකර තිබේ.

කිරිඇල්ලට ගොස් මේ වන විටත් ඇසින් දුටු සාක්ෂි සහ පර්යේෂණාත්මක සාක්ෂි රැසක්ම විශේෂ විමර්ශන ඒකකයේ නිලධාරීන් විසින් රැස්කරගෙන ඇත.

රන්මල් කොඩිතුවක්කු මහතාගෙන් පහරකෑමට ලක්වූ පුද්ගලයා බීමතින් සිටි බවට චෝදනාවක් රන්මල් කොඩිතුවක්කු මහතාගේ පාර්ශවයෙන් එල්ලවූවත් මූලික විමර්ශනවලින් පැහැදිලිවී ඇත්තේ එම පුද්ගලයා බීමතින් සිට නැති බවය.

එහෙත් එම පහරදීම බදුවන අවස්ථාවේදී රන්මල් කොඩිතුවක්කු මහතා බීමතින් සිටි බවට චෝදනාවක් පහරකෑමට ලක්වුණු පුද්ගලයාගෙන් මෙන්ම එම පහරදීම ඇසින් දුටු පුද්ගලයින්ගෙන් එල්ලවන බව පොලිස් මූලස්ථානයේ උසස් නිලධාරියෙක් සදහන් කළේය. ඒ සම්බන්ධයෙන්ද විශේෂ අවධානයක් යොමුකර ඇති බවද එම නිලධාරියා කීය.

රන්මල් කොඩිතුවක්කු මහතාගෙන් පැහැරකෑ පුද්ගලයා බීමතින් සිටි බව සනාථ කිරීමට කිරිඇල්ල පොලීසියේදී බීමත් රියදුරන් සම්බන්ධයෙන් කෙරන පරීක්ෂණයක්ද පවත්වා තිබේ. එම පරීක්ෂණයට අනුව ඔහු බීමත් බව සනාතවී තිබේ. එම පරීක්ෂණය සිදුවූයේ කෙසේද? සැබෑ ලෙසම එම පරීක්ෂණ කට්ටලවලට ස්වසනය ඇතුළු කළේ අදාල පුද්ගලයාමද නැතිනම් වෙනත් බීමත් පුද්ගලයෙක්ද ආදී කරුණු සම්බන්ධයෙන් දීර්ඝ විමර්ශනයක් කෙරෙන බවද එම නිලධාරියා වැඩිදුරටත් පැවැසීය.

ආරක්ෂක අංශ යටතේ පැවැති යාපනය වලිකාමම් උතුරු ප්‍රදේශයේ ඉඩම් අක්කර 3000ක් පමණ ඒවායේ මුල් හිමිකරුවන්ටම ලබාදීමට රජය තීරණය කර ඇතැයි ධීවර අමාත්‍ය ඩග්ලස් දේවානන්ද මහතා සඳහන් කළේය

යුධ සමයේදී ආරක්ෂක අංශ යටතට පත්වූ ඉඩම් ඒවායේ මුල් හිමිකරුවන්ටම ලබාදීම සම්බන්ධයෙන් තමා පසුගියදා ජනාධිපතිවරයා සමඟ සාකච්ඡා කළ බවද ඔහු පැවසීය.

ඒ අනුව මේවනවිට ආරක්ෂක අංශ යටතේ තිබෙන උතුරු පළාතේ ඉඩම් ක්‍රමයෙන් ඒවායේ මුල් හිමිකරුවන්ටම ලබාදීමට රජය කටයුතු කරන බවද අමාත්‍යවරයා වැඩිදුරටත් සඳහන් කළේය.

කිරි දෙනුන් 2,500 ක් කඩිනමින් ආනයනය කරන බව පශු සම්පත් රාජ්‍ය අමාත්‍ය ඩි.බී. හේරත් මහතා පවසයි.

ඔහු වැඩිදුරටත් සඳහන් කරසිටියේ දේශීය කිරි නිෂ්පාදනය වැඩිකිරීමේ අරමුණින් මෙම තිරණය ගත් බවයි.

කිරි ගවයන් ගෙන්වීම සඳහා සමාගම් 04 ක් සඳහා එම සතුන් ගෙන්වීමට අවසර ලබාදී ඇති බවද අමාත්‍යවරයා පැවසීය.

රාජ්‍ය අමාත්‍යවරයා සඳහන් කළේ මෙහිදී රජය පහසුකම් සැපයිම පමණක් සිදුකරන බවයි.

මේ වන විට මහත් ආන්දෝනයට තුඩුදී ඇති චීන පොහොර නැව තුන්වැනි පාර්ශවයක් මගින් යළි පරීක්ෂා කිරීමට ශ්‍රී ලංකාව එකඟවී ඇතැයි චීන තානාපති චී ෂෙන්ග් හොන්ග් මහතා සදහන් කරයි.

සියම් මහා නිකායේ අස්ගිරි පාර්ශවයේ මහනායක වරකාගොඩ ශ්‍රී ඥානරතන මහනාහිමියන් බැහැ දැකීමට අද පෙරවරුවේ පැමිණි චීන තානාපතිවරයා අනතුරුව මාධ්‍ය හමුවේ ඒ බව සදහන් කරනු ලැබීය.

"මට අවබෝධවෙලා තියෙනවා පොහොර අර්බුදය පිළිබඳව දැඩි අවධානයක් යොමුවෙලා තියෙනවා කියලා. මගේ පුද්ගලික මතය තමයි කාබනික පොහොර අර්බුදය වාණිජමය ගැටලුවක්. මම කනගාටුවට පත්වෙනවා. ඇතැම් ශ්‍රී ලාංකික පිරිස් මේ ගැටලුව ව්‍යාකූල කිරීමට මෙය දේශපාලනීකරණයට ලක්කිරීමට තැත් කිරීම පිළිබඳව. මට දැනගන්න ලැබිලා තියෙනවා චීන සමාගම සහ ශ්‍රී ලංකාව ගිවිසුමකට එළඹිලා තියෙනවා නිෂ්පාදනයේ තත්ත්වය පරීක්ෂා කිරීමට තුන්වන පාර්ශ්වයක පරීක්ෂණයක් සිදුකරන්න." යැයි තානාපතිවරයා මාධ්‍ය හමුවේ එසේ සදහන් කරනු ලැබීය.

මෙම ගැටළුව රාජ්‍ය තාන්ත්‍රික ගැටලුවක් බවට එය පත්කර ගතයුතු නැති බවත්, එය වාණිජ වශයෙන් විසඳා ගතයුතු බවත් එහිදී චීන තානාපතිවරයා අවධාරණය කළේය.

රාජ්‍ය සේවකයන්ට වැටුප් වැඩිකිරීමක් හෝ දීමනාවක් ලබා නොදීම සම්බන්ධයෙන් අවධානය යොමුකර කඩිනමින් විසඳුම් ලබාදීමට රජය කටයුතු නොකරන්නේ නම් පූර්ව දැනුම්දීමකින් තොරව වෘත්තීය ක්‍රියාමාර්ග වලට යොමුවන බව රාජ්‍ය නිළධාරි සමිති සම්මේලනය
ජනාධිපති ගෝඨාභය රාජපක්ෂ මහතාට ලිඛිතව දැනුම් දී තිබේ.

එම ලිපියේ වැඩිදුරටත් සඳහන් වන්නේ මෙවර අයවැය මගින් මිලියන 1.5ක් වූ රාජ්‍ය සේවකයන්ට වැටුප් වැඩිකිරීමක් හෝ දීමනාවක් ලබානොදීම හේතුවෙන් ඔවුන්ගෙන් යැපෙන මිලියන 6 ට ආසන්න ජනතාවක් ජීවත්වීම පිළිබඳ ගැටලුවකට මුහුණ දී සිටින බවයි.

එබැවින් රජය කඩිනමින් මේ පිළිබඳ අවධානය යොමු කර විසඳුම් දීමට ක්‍රියා කළයුතු බව රාජ්‍ය නිලධාරී සමිති සම්මේලනයේ ජාතික සංවිධායක බී.ඒ.පී බස්නායක මහතාගේ අත්සනින් යුතුව ජනාධිපතිවරයා වෙත යවා ඇති ලිපියේ සඳහන් වේ.

දිස්ත්‍රික් 7කට හෙට පස්වරු 4 දක්වා නායයාමේ අවදානම් පිළිබඳ අනතුරු අඟවා තිබේ.

බස්නාහිර, සබරගමුව, මධ්‍යම සහ වයඹ පළාත්වල සහ ගාල්ල සහ මාතර දිස්ත්‍රික්කවල ඇතැම් ස්ථානවලට මිලිමීටර් 75ක පමණ තරමක තද වැසි අපේක්ෂා කළ හැකි බව කාලගුණ විද්‍යා දෙප‍ාර්තමේන්තුව පවසයි.

වැසි තත්ත්වය හේතුවෙන් පහත දිස්ත්‍රික්කවලට අයත් ප්‍රදේශවල ජනතාවට අවධානයෙන් සිටිය යුතු බවට නිවේදනය කර තිබේ.

රාජ්‍ය සේවය රටට බරක් බව පවසමින් කළ අපහාසය පිලිකුලෙන් යුතුව හෙලා දකින බව විපක්ෂ නායක සජිත් ප්‍රේමදාස මහතා පැවසීය.

නිවේදනයක් නිකුත් කරමින් ඔහු දෙන්නේ ආණ්ඩුව නියමින් හෝ අනියමින් සූදානම් වන්නේ මෙරට රාජ්‍ය සේවය දියකර හරින්නට බව ය.

විපක්ෂ නායකවරයා නිකුත් කළ නිවේදනයේ වැඩිදුරටත් මේ බව සඳහන් වේ.

“රාජ්‍ය සේවය රටට උසුලන්නට දරන්න බැරි තරම් පුළුල් වී ඇති බවත් එය රටට බරක් බවත් මුදල් අමාත්‍යවරයා පවසා තිබේ. එය ආණ්ඩුවේද ස්ථාවරය බවද අප විශ්වාස කරන අතර එම ප්‍රකාශය අපි පිළිකුලෙන් යුතුව හෙලා දකිමු.

• ආණ්ඩුව නියමින් හෝ අනියමින් සූදානම් වන්නේ මෙරට රාජ්‍ය සේවය දියකර හරින්නට බව පැහැදිලිය. රාජ්‍ය සේවයේ විශ්‍රාම යාමේ වයස අවුරුදු 60 සිට 65 දක්වා ඉහළ නංවන බවට ජනප්‍රිය යෝජනාවක් අයවැයට ඉදිරිපත් කරන අමාත්‍යවරයා, ඊට පසුදා ම පවසා සිටින්නේ මෙරට රාජ්‍ය සේවය රටට බරක් බව ය. තමන් විසින්ම ඉදිරිපත් කරන මතය ඊට පසු දින තමන් විසින්ම උල්ලංඝනය කරන අමාත්‍යවරයා ස්වකීය විහිලු සහගත අයවැය යෝජනාවලියටම උචිත ලෙස කටයුතු කරමින් සිටී.

මැතිවරණයන් අවස්ථාවලදී කූඨප්‍රාප්තියට නංවා පූජාසනයක හිඳුවන රාජ්‍ය සේවකයින්ට, ස්වකීය අරමුණ ඉටු කර ගැනීමෙන් පසු ආණ්ඩුව විසින් මෙලෙස සැලකීම පිළිබඳව අප විමතියට පත් නොවන්නේ, එය මේ කලගුණ නොදත් ආණ්ඩුවේ ස්වරූපයම නිසාය.

• කොරෝනා ඇතුලු ව්‍යසනකාරී තත්ත්වයන් තුළදී රාජ්‍ය සේවයේ ප්‍රශංසනාත්මක සහ අනභිභවනීය මැදිහත් වීම, ව්‍යසනය අවසන්වන් වන්නටත් පෙර අමතක කළ ආණ්ඩුව අද ඔවුන් රටට බරක් සේ සැලකීම ආණ්ඩුවේ අවස්ථාවාදී බව මොනවට පසක් කරයි.

• කොරෝනා වෛරසය අබියස රාජ්‍ය පරිපාලන අංශ ප්‍රධානීන් මෙන්ම සෞඛ්‍ය, ආරක්ෂක, ප්‍රවාහන, තැපැල්, සතොස, සමෘද්ධි, ග්‍රාම නිලධාරී, මහජන සෞඛ්‍ය පරීක්ෂක, පවුල් සෞඛ්‍ය, පාරිභෝගික සේවා ඇතුළු අංශ ගණනාවක රාජ්‍ය සේවකයින් තම යුතුකම් කොටස රට වෙනුවෙන් ඉටු නොකරන්නට අද රට විශාල අර්බුදයකට මුහුණ දෙනු නොඅනුමානය.

කෙසේ වෙතත්, කිසිදු සැලසුම් සහගත වැඩපිළිවෙළක් නොමැතිව හිතු මනාපයට රාජ්‍ය ආයතනවලට බඳවා ගැනීම් සිදු කළේ කවුරුන්ද යන්න රටම දනී.

• සෞභාග්‍යයේ දැක්මෙහි ප්‍රධාන පොරොන්දුවක් මත, රාජ්‍ය සේවයට අලුතින් ලක්ෂයක් බදවා ගත්තේය. ඊට අමතරව උපාධිදාරීන් 50,000ක් බදවා ගනු ලැබීය. මෙයින් සිදුවූයේ එතෙක් රාජ්‍ය බදු ආදායමෙන් 47%ක් රාජ්‍ය සේවක වැටුප් හා විශ්‍රාම වැටුප් ලෙස කලමනාකරණය කොට තිබූ වැය ප්‍රතිශතය 86%ක් වීමය. රටේ තරුණ පරම්පරාවට රැකියා ලබාදීම පිළිබඳව අප එක පයින් එකඟ නමුත්, ඊට මුවාවී අන්තනෝමතික ලෙස, සැලසුමකින් තොරව, දේශපාලන බල න්‍යාය පත්‍රය සකස් කර ගැනීම උදෙසා රාජ්‍ය සේවයේ ඔළුගෙඩි පිරවීමේ ආදීනව අද රටට අත් විදින්නට සිදුව තිබේ.

• අයවැය යෝජනා ප්‍රකාරව විශ්‍රාම යාමේ වයස අවුරුදු 65 දක්වා වර්ධනය කිරීමෙන් එය තවත් ඉහළ නැංවෙනු ඇත.

මේ සියල්ල ආණ්ඩුව විසින් කරනු ලැබූ අත්තනෝමතික, අවස්ථාවාදී කටයුතු විනා, සැලසුම් සහගත ක්‍රියාමාර්ග නොවේ.

එකිනෙකට නොගැලපෙන විකාර සහගත ප්‍රතිපත්ති හේතුකොටගෙන රාජ්‍ය සේවය බරක් බවට පත් කොට ඇත්තේ ආණ්ඩුව මිස අන් කිසිවෙක් නොවේ.

ආණ්ඩුව වහාම කළ යුත්තේ කුමක්ද?

• රාජ්‍ය සේවයේ ප්‍රතිසංස්කරණ පිළිබඳ අනුකාරක සභාවේ වාර්තාව ප්‍රකාරව සිදු කළ යුත්තේ, ඵලදායීතාවයෙන් යුක්ත රාජ්‍ය ආයතන ශක්තිමත් කිරීම.

ඵලදායී බව වර්ධනය කිරීම සඳහා රාජ්‍ය පරිපාලනමය මූලධර්මය හා ව්‍යුහය වෙනස්කිරීම.

• ප්‍රතිපත්ති සහ වැඩසටහන් ඵලදායි අන්දමින් සම්පාදනය කිරීම සහ ඇගයීම් සිදුකරන බවට සහතික කරන රාජ්‍ය පරිපාලන පද්ධතියක් නිර්මාණය කිරීම සහ, නූතනත්වයට ගැලපෙන පරිදි, රාජ්‍ය ආයතනවල ක්‍රියාකාරීත්වය තාක්ෂණික සහ සැලසුම් සහගත ලෙස ප්‍රතිනිර්මාණය කිරීම ය.

• මේ කිසිවක් පිළිබඳව මායිම් නොකොට, තමන් වෙතින් සිදුවූ වරද මෙරට රාජ්‍ය සේවකයින්ගේ පිට පටවා අත සෝදා ගැනීමට ආණ්ඩුව ගනු ලබන නිර්ලජ්ජිත උත්සාහය පිළිබඳව අප බලවත් විරෝධය ආණ්ඩුවට පල කරන අතර, වර්තමාන ආණ්ඩුව බිහි කිරීම වෙනුවෙන් සක්‍රීයව මැදිහත් වී ප්‍රමුඛතම කාර්යභාරයක් ඉටුකළ මේ රටේ අති බහුතරයක් වූ රාජ්‍ය සේවකයින්ට ද එම ප්‍රකාශය හරහා එල්ල කරනු ලැබුවේ බලවත් අතුල් පහරක් සේ අපි දකිමු.

සජිත් ප්‍රේමදාස
විපක්ෂ නායක

විදේශ අමාත්‍ය ජී.එල්. පීරිස් මහතා ඩකා නුවර පැවැත්වෙන ඉන්දියානු සාගර වටද්දර සංගමයේ (IORA) 21 වැනි අමාත්‍ය මණ්ඩල රැස්වීමට සහභාගී වෙයි.
 
ඒ අනුව ඔහු ලබන 15-18 යන දිනවල බංග්ලාදේශයේ ඩකා නුවර නිල සංචාරයක නිරත වනු ඇත.

ඉන්දියානු සාගර වටද්දර සංගමයේ (IORA) 21 වැනි අමාත්‍ය මණ්ඩල රැස්වීම (COM) සඳහා අමාත්‍යවරයා සහභාගී වීමට නියමිත අතර, මෙහිදී 2021-2023 යන කාල සීමාව සඳහා වන IORA හි උප සභාපති ධුරය ශ්‍රී ලංකාවට හිමි වනු ඇත.

ජ්‍යෙෂ්ඨ නිලධාරීන්ගේ කමිටු (CSO) රැස්වීමට පෙර අමාත්‍ය මණ්ඩල රැස්වීම පැවැත්වේ.

මෙම රැස්වීම අතරතුර දී ද්විපාර්ශ්වික වශයෙන් දෙරටටම වැදගත් වන කරුණු පිළිබඳව සාකච්ඡා කිරීමට අමාත්‍ය පීරිස් මහතා අපේක්ෂා කරයි.

ගුරු-විදුහල්පති වෘත්තීය සමිති ක්‍රියාමාර්ගය අත්හිටුවීමට වෘත්තීය සමිති තීරණය කරයි.

ඒ 2022 ජනවාරි 20 දක්වා ය.

පවතින අධික වැසි සහිත කාලගුණික තත්ත්වය හේතුවෙන් දුම්රිය මාර්ගයට හානි සිදුවීම නිසා ප්‍රධාන දුම්රිය මාර්ගයේ දුම්රිය ධාවනය පල්ලෙවෙලට සීමා විය.

“ඔච්චර විවේචනය කරන එකේ කයිවාරු ගහන එකේ ආර්ථිකය වැටිලා නම් ගොඩ ගන්න විදිය පැය 24ක් ඇතුළත ජනතාව වෙත ඉදිරිපත් කරන්න කියලා මම අභියෝගයක් කරනවා” යැයි ආණ්ඩු පක්ෂයේ ප්‍රධාන සංවිධායක, මාර්ග අමාත්‍ය ජොන්ස්ටන් ප්‍රනාන්දු මහතා පවසයි.

ඔහු මේ බව සඳහන් කළේ අද (14) දින මහාමාර්ග අමාත්‍යාංශයේ දී මාධ්‍යවේදීන් ඇසූ ප්‍රශ්නයකට පිළිතුරු ලබාදෙමිනි.

එහිදී වැඩිදුරටත් අදහස් දැක්වූ අමාත්‍යවරයා,

“අද වන විට මුළු ලෝකයම අර්බුදයට ලක් වෙච්චි අවස්ථාවක්. අපේ ලංකාව විතරක් නෙවෙයි ලෝකයේ හැම රටක්ම කොවිඩ් වසංගතය නිසා ආර්ථික වශයෙන් අර්බුදයට ලක්වෙලා. නමුත් අපේ ආණ්ඩුව එම අර්බුදය හොඳින් කළමනාකරණය කරමින් සිටිනවා.

මම දැක්කා විපක්ෂය කියනවා බඩු මිල අඩු කලේ නෑ කියලා. ඇමරිකා එක්සත් ජනපදය, එංගලන්තය, ප්‍රංශ විතරක් නෙවෙයි ලෝකයේ හැම රටක්ම පාහේ උද්ධමනය වැඩි වෙලා. මේ උද්ධමනය වැඩිවීම අපට විතරක් බලපාන දෙයක් නොවේ. අද තාක්ෂණය දියුණුයි. පොඩ්ඩක් අන්තර්ජාලය පරිහරණය කරලා බලන්න. බොරු වපුරන්න එපා, හරියට අපේ රටේ විතරයි ප්‍රශ්න තියෙන්නෙ කියලා. උද්ධමනය වැඩි අපේ රටේ විතරයි කියලා විපක්ෂය පෙන්නන්න හදන්නේ.

කොවිඩ් වසංගතය නිසා සෑම දෙයකම මිල ඉහළ ගිහින් තියෙන්නේ.ලෝකයේම නිෂ්පාදන පහලට වැටිලා. කර්මාන්ත ජාල ගෝලීය වශයෙන් බිඳවැටිලා. බහුපාර්ශ්වීය වගේම ද්විපාර්ශ්වීය උපකාර සීමා වෙලා. කොවිඩ් අර්බුදය හේතුවෙන් හැම රටකටම වගේ අනෙක් රටවල් උදව් කරන්න විදිහක් නෑ. මොකද හැම රටකටම තමුන්ගේ අභ්‍යන්තර ගැටලු විසඳා ගන්න වෙලා තියෙන්නෙ නිසා. ඉතින් මේ වගේ කරුණු නිසා ධනවත් රටවල් වලින් ණය ලබා ගැනීම, ආධාර ලබා ගැනීම යම් අපහසුතාවක් තිබෙනවා, ලෝකයේ හැම රටකටම.

අපි නිෂ්පාදන ආර්ථිකයක් කරා යා යුතුව තිබෙනවා. හැමදාම කාගෙන්වත් යැපෙන්නේ බෑ කියන එක මේ කොවිඩ් වසංගතයක් එක්ක හැමෝම තේරුම් අරන් තිබෙනවා. ඒ වගේම සංවර්ධන කටයුතු අඛණ්ඩව කරගෙන යාම අත්‍යවශ්‍යයි. මොකද තව දුරටත් අපේ රට ආපස්සට ගෙන යන්න බෑ. මාර්ග ඇතුළු යටිතල පහසුකම් දියුණු වුණොත් තමයි රටක් දියුණු වෙන්නේ. විපක්ෂයේ අය අහනවා ඇයි පාරවල් හදන්නේ කියලා. හදන්නේ රට සංවර්ධනය කරන්න. මේවා ඉදිරි ආයෝජන. විපක්ෂයේ මන්ත්‍රීවරු අපෙන් ඉල්ලන්නේ පාරවල් ඔවුන් දන්නවා පාරක වටිනාකම.එහෙම ඉල්ලලා අහනවා පාරවල් සංවර්ධනය මොකටද කියලා.

ඒ වගේම මෙවර අයවැයෙන් සෑම ග්‍රාම සේවා වසමකටම මිලියන තුනක් වෙන් කරලා තියෙනවා. පක්ෂ විපක්ෂ මන්ත්‍රීවරුන්ට මිලියන 5ක් ලබා දීලා තියෙනවා. අපිට පක්ෂ නෙවෙයි වැදගත් වෙන්නේ, ජනතාවට සේවය කරන එකයි. සමෘද්ධිය ‍ ග්‍රාම සංවර්ධන ව්‍යාපාරයක් කරලා තියෙනවා.

අපි මන්ත්‍රී විශ්‍රාම වැටුප ලබා දෙන්න නම් අවුරුදු 10ක් ඉන්න ඕනි කියන එක මෙවර අය වැයෙන් අපි ඉදිරිපත් කරලා තියෙනවා. මන්ත්‍රීවරුන්ගේ, රාජ්‍ය නිලධාරීන්ගේ ඉන්ධන කප්පාදු කරලා තිබෙනවා. දුරකථන බිල්පත් වලින් 25% ක් අඩු කරලා තියෙනවා. මෙහෙම අපි ආදර්ශයක් දුන්නා රජයේ වියදම් අඩු කරලා.

අපි අනිවාර්යෙන් නිෂ්පාදන ආර්ථිකයක් කරා යා යුතුමයි.ලෝකෙ රටවල් මේ වනවිට කොවිඩ් වසංගතය නිසා විනාශ වෙච්ච ආර්ථිකය හදා ගන්න වෙර දරනවා. බඩුමිල වැඩි වීම තාවකාලිකයි.නිශ්පාදන අඩුවෙනකොට ඉල්ලුමට සරිලන සැපයුමක් නැති වෙනකොට භාණ්ඩ මිල ඉහල යනවා.නැවත් නිෂ්පාදන වෙනකොට භාණ්ඩ වෙලෙදපොලට එනකොට මිල ආයෙත් පහල යනවා.මේ ලෝකයටම අර්බුද තියෙන වෙලාවේ විපක්ෂය කරන්නේ කයිවාරු ගහන එකයි. විවේචනය කරන එකයි විතරයි. මම විපක්ෂයට අභියෝගයක් ලබා දෙනවා. ඔච්චර විවේචනය කරන එකේ කයිවාරු ගහන එකේ විපක්ෂය රටේ ආර්ථිකය ගොඩනගන්න ඔවුන් වැඩපිළිවෙළක් සකස් කරලා ඇති කියලා. ඒ හින්දා විපක්ෂයට කියනවා ආර්ථිකය වැටිලා නම් ගොඩ ගන්න විදිය පැය විසි හතරක් ඇතුළත ජනතාව වෙත ඉදිරිපත් කරන්න කියලා.ඇත්තම කතාව විපක්ෂයට වැඩ පිලිවෙලක් නෑ.”

මානව හිමිකම් නීතිඥවරයකු සහ දකුණු අප්‍රිකාවේ මානව හිමිකම් පදනමේ විධායක අධ්‍යක්ෂවරයා ද වන යස්මින් සූකා සහ වෙබ් අඩවි ක්‍රියාකරුවෙක් ඇතුළුව එක්සත් රාජධානියේ වෙසෙන තවත් වගඋත්තරකරුවන් දෙදෙනෙකුට එරෙහිව කොළඹ දිසා අධිකරණය විසින් 2022 පෙබරවාරි මාසයේදී අධිකරණයේ පෙනී සිටින ලෙසට යළි සිතාසි නිකුත් කර තිබේ.

ඒ, රාජ්‍ය බුද්ධි ප්‍රධානී සුරේෂ් සලේ විසින් ගොනු කරන ලද සිවිල් අපහාස නඩුවක් අධිකරණය හමුවේ විභාගයට ගත් අවස්ථාවේදීය.

විත්තිකරුවන් අධිකරණයේ පෙනී නොසිටින බවට අවධානයට යොමු වූ අවස්ථාවේදී යළි සිතාසි නිකුත් කරන ලෙස අතිරේක දිසා විනිසුරු ඒ.ඩී.චතුරිකා ද සිල්වා මෙනවිය නියෝග කළාය.

මෙම නඩුවේදී, මේජර් ජෙනරාල් සලේ, ඔහුට එරෙහිව කරන ලද අසත්‍ය, ද්වේෂසහගත, අපහාසාත්මක ප්‍රකාශ වෙනුවෙන් මානව හිමිකම් නීතීඥ සහ ක්‍රියාකාරිනියක වන යස්මින් සූකා සහ ජාත්‍යන්තර සත්‍ය සහ යුක්තිය ව්‍යාපෘතිය (ITJP) සහ වෙබ් අඩවි ක්‍රියාකරුගෙන් රුපියල් බිලියන 1 ක වන්දි මුදලක් ඉල්ලා සිටී.

රජයේ වෛද්‍යවරයෙකුට වෛද්‍ය ප්‍රතිකාර ලබාදීම ප්‍රතික්ෂේප කරමින් අසත්‍ය සාක්‍ෂි ලබා දීමට සහ ඔහුට තර්ජනය කරමින් අත්අඩංගුවේ තබා ගැනීමට බල කළ බවට පැමිණිලිකරුට චෝදනා එල්ල විය.

දැනට ඇමරිකාවේ සිටින එම වෛද්‍යවරයා චෝදනා කර තිබුණේ පැමිණිලිකරු විසින් කරනු ලබන ප්‍රවෘත්ති සාකච්ඡාවකදී අසත්‍ය සාක්ෂි ලබා දෙන ලෙස තමාගෙන් ඉල්ලා සිටි බවටය.

පැමිණිල්ලේ දී සලේ මහතා ප්‍රකාශ කර ඇත්තේ, ඔහු දැනට මේජර් ජෙනරාල් නිලය දරණ කීර්තිමත් වෘත්තියක් සහිත (RWP, RSP, USP, NDC, PSC, MDEFS) ලද හමුදා නිලධාරියෙකු බවයි.

1987 වසරේ ශ්‍රී ලංකා යුද හමුදාවට බැඳුණු තමාට උසස්වීම් කිහිපයක් ලැබී ඇති බවද ඔහු පෙන්වා දී තිබේ. ඔහු රාජ්‍ය බුද්ධි සේවයේ අධ්‍යක්ෂවරයා ලෙස කටයුතු කර ඇත. මේජර් ජෙනරාල් සලේ ද Covid-19 තුරන් කිරීමේ කාර්ය සාධක බලකායේ සාමාජිකයෙකි.

පළමු විත්තිකාරිය වන සූකා විසින් තමා එල්ල කරමින් කරන ලද ප්‍රකාශය 2 වැනි විත්තිකරු විසින් ක්‍රියාත්මක කරන වෙබ් අඩවියේ සිංහල, ඉංග්‍රීසි සහ දෙමළ යන භාෂාවලින් 2020 ජූනි 01 වැනි දින පළ කර ඇති බවට ඔහු පැමිණිලි කරයි.

එමෙන්ම 2 වන සහ 3 වන විත්තිකරුවන් විසින් අසත්‍ය, ද්වේෂසහගත සහ අපහාසාත්මක ලෙස විස්තර කරන ලද එම ප්‍රකාශයන් වෙබ් අඩවියේ පළ කර ප්‍රසිද්ධ කළ බව ඔහු පවසයි.

මේජර් ජෙනරාල් ඒ අනුව තමාට සිදුවී ඇති අලාභය සම්බන්ධයෙන් රුපියල් බිලියනයක් හෝ ඊට සමාන ඇමරිකානු ඩොලර්වලින් ගෙවන ලෙසට ආයාචනයක් කර තිබේ.

නඩුව ලබන වසරේ පෙබරවාරි 22 වැනිදා යළි කැඳවීමට නියමිතය.