ගුරු විදුහල්පති වැටුප් විෂමතාව ඉවත් කිරීම සඳහා ලබන අයවැයෙන් අමතර රුපියල් මිලියන 30,000ක් වැය කරන බවත් ඒ අනුව ඉතිහාසයේ පළමු වතාවට මෙරට අධ්‍යාපන සඳහා වැය කරන මුදල සමස්ත අයවැයෙන් 7.51%ක් වනු ඇතැයි මුදල් අමාත්‍ය බැසිල් රාජපක්ෂ මහතා ගුරු-විදුහල්පති වෘත්තිය සමිති නියෝජිතයන්ට අද දැනුම් දී තිබේ.

විසි පස් වසරකට ආසන්නව පවතින වැටුප් විෂමතාව ඉවත් කිරීම දැනුම් දීම සඳහා අද (10) දින පාර්ලිමේන්තුවේ කමිටු ශාලා 01 හි පැවති හමුවේ දී අග්‍රාමාත්‍ය මහින්ද රාජපක්ෂ මහතා ඇතුළු රජයට ගුරු- විදුහල්පති වෘත්තීය සමිති නියෝජිතයෝ සිය ප්‍රණාමය පුද කළහ. ඒ අනුව වෘත්තිය සමිති ඉල්ලීම ඉටු කිරීමට ගැන මුදල් අමාත්‍ය බැසිල් රාජපක්ෂ මහතාට මෙහි දී අග්‍රාමාත්‍ය මහින්ද රාජපක්ෂ මහතා ස්තුති කළේය.

මෙම හමුවේ දී මුදල් අමාත්‍ය බැසිල් රාජපක්ෂ මහතා මෙසේ පැවසීය.

“අපි මේ පිළිබඳව මුලින්ම සාකච්ඡා කළේ ජූලි මාසේ 26 වැනිදා අමාත්‍ය මණ්ඩල රැස්වීමේ දීයි. එහි දී මහාචාර්ය ජී.එල් පීරිස් මැතිතුමත්, ගාමිණී ලොකුගේ මැතිතුමා, ආචාර්ය බන්දුල ගුණවර්ධන මැතිතුමත්,විමල් වීරවංශ මැතිතුමත්, උදය ගම්මන්පිල මැතිතුමත්, රමේෂ් පතිරණ මැතිතුමත්, ලසන්ත අලගියවන්න මැතිතුමත් ඇතුළත් කමිටුවක් පත් කළා. ඒක පසුව 4 දෙනෙකුට සීමා වුණා. එහි නිර්දේශයක් ඉදිරිපත් කළා. මුදල් අමාත්‍යවරයා හැටියට මගේ නිරීක්ෂණය ඉදිරිපත් කළේ මූලිකව මෙම ඉල්ලීම් සියල්ල වැටුප් වැඩිවීමක් නෙමෙයි කියලා. මේක අවුරුදු විස්සක් විසි පහක් පවතින ගුරුවරුන්ගේ සහ විදුහල්පතිවරුන්ගේ වැටුප් විෂමතාවයක්. මෙය නිවැරදි කරන්න කියලා තමයි ඉල්ලීම ඉදිරිපත් කරලා තිබුණෙ. අපේ නිර්දේශය වුණේ සමස්ත රාජ්‍ය සේවය තුළ වැටුප් සම්බන්ධ අසමමිතිකතාවක් ඇති නොවන පරිදි ඉදිරි අය-වැය තුළින් සළකා බැලීම සුදුසුය කියලා.

දැන් අය-වැය එනවා. අදාළ නිර්දේශ සම්බන්ධයෙන් කැබිනට් මණ්ඩලය එකඟත්වය පළ කරලා තියෙනවා. මේ පිළිබඳව මල්-වතු අස්ගිරි මහ නායක ස්වාමීන් වහන්සේලා ඇතුළු සියලු දේශපාලන පක්ෂත්, මා හමුවුණ අවස්ථාවලදිත් පැවසුවේ මේ ගුරු-විදුහල්පති ප්‍රශ්නය මෙවර අය-වැය තුළින් විසඳන්න කියලා. ගරු අගමැතිතුමත් විශේෂයෙන්ම ජනාධිපතිතුමත් අධ්‍යාපන ඇමතිතුමත් නිර්දේශ කරලා තියෙනවා අනිවාර්යයෙන්ම මේක විසඳන්න කියලා. වෘත්තිය සමිති පැත්තෙන් විශාල සහයෝගයක් මේ වෙලාවේ අපට ලැබිලා තියෙනවා. අපට ඕන වුණ එකම දේ අධ්‍යාපනය ළමයින්ට ලබා දෙන්න. මේ වෙනකොට සියලුම පාසල් විවෘත කරලා සෞඛ්‍ය නිර්දේශ අනුව පාසල් කටයුතු සිදුවෙනවා. ඒ නිසා අපි බොහොම අමාරුවෙන් වුණත් නිර්දේශිත මේ මුදල වෙන් කරන්න බලාපොරොත්තු වෙනවා.

මේක විෂමතාවක් ඉවත් කිරීමක් මිස වැටුප් වැඩිවීමක් නෙමෙයි. මෙතන සිටින මහා සංඝරත්නය ඇතුළු වෘත්තිය සමිතිවලින් මම ඉල්ලා සිටිනවා අවුරුදු විසි ගණනක් විසඳන්න බැරිව තිබුණ වැටුප් විෂමතාවක් සාධාරණ මට්ටමෙන් විසඳීමක් විධියට දකින්න කියලා. කැබිනට් මණ්ඩලයේ අනුමැතිය අනුව දැනට වෙන් කරලා තියෙන මුදලට අමතරව රු. මිලියන 30000ක් අපි ලබන අය වැයෙන් ගුරු හා විදුහල්පති වැටුප් විෂමතාව ඉවත් කිරීම සඳහා වෙන් කරනවා. අය-වැයටත්, කැබිනට් මණ්ඩලයටත් ඉස්සරවෙලා ඔබතුමාලට කිව්ව එකම රහස ඒක.

අනිත් ඇමතිවරු දොස් කියන එකක් නැහැ. විපක්ෂයේ මන්ත්‍රීවරු කිහිප දෙනෙකුත් මෙතන නොහිටියත් මේක විසඳන්න කියලා ඉල්ලුවා. එයත් සිහිපත් කරනවා. දරුවන්ගේ අනාගතය රටේ අනාගතය වෙනුවෙන් මෙය විසඳන්න අපි තීරණය කළේ. මහින්ද රාජපක්ෂ ජනාධිපතිතුමාගේ කාලේ අධ්‍යාපනයට සියයට 6ක් වෙන් කරන්න කියලා සමහරු උද්ඝෝෂණය කළා. අවසානයේ ඔවුන්ගෙ වැටුප් සියල්ල වැඩි කළා. හැබැයි ඊට පස්සේ සියයට 6 අමතක කළා.

හැබැයි අපි මේ පාර අය වැය ලේඛනයෙන් අපේ සම්පූර්ණ වියදමෙන් සියයට 7.51ක් අධ්‍යාපනය වෙනුවෙන් වෙන් කරනවා. ඒ මේ රටේ අනාගතය වෙනුවෙන් එය වෙන්කරන්නෙ. ජනාධිපතිතුමත්,අගමැතිතුමත් විශේෂයෙන් අධ්‍යාපන ඇමතිතුමත් අපෙන් ඉල්ලුව මේක කරන්න කියලා. මේ ඉතිහාසයේ පළමුවැනි වතාවට අධ්‍යාපනය සඳහා සමස්ත අය වැයෙන් සියයට 6 ඉක්මවන්නෙ.

එදා උද්ඝෝෂණ කළ අයට අමතක වුණාට, මහින්ද ජනාධිපතිතුමා ඇතුළු අපේ රජයට එය අමතකු වුණේ නැහැ. අපි පිළිගන්නවා අධ්‍යාපනය මේ රටේ ලොකුම ආයෝජනය කියලා. සෞඛ්‍ය හා අධ්‍යාපනය ගත්තම අපි ලෝකයේ ඇතැම් දියුණු රටවලට සමාන මට්ටමේ ඉන්නවා. දකුණු ආසියාවේ අපි ඉහළම තැනක ඉන්නවා. අයෝජනය වගේම ඵලදායීතාවත් වැඩි කරන්න කියලා අපි මේ හැම වෘත්තිය සමිති නියෝජිතයෙකුගෙන්ම ඉල්ලනවා. අධ්‍යාපනය දියුණු කරන්න ඔබ සියලු දෙනාගේ සහයෝගය අධ්‍යාපන අමාත්‍යාංශයට, රජයට දෙන්න කියලා ඉල්ලනවා. ඊට එහා යන ඉල්ලීම් ගැන මුදල් ඇමතිවරයා හැටියට අපිට කතා කරන්න පුළුවන්” යැයි අමාත්‍ය බැසිල් රාජපක්ෂ මහතා පැවසීය.

අමාත්‍යවරුන්වන බැසිල් රාජපක්ෂ,දිනේෂ් ගුණවර්ධන මහත්වරු ඇතුළු මැති ඇමතිවරුන්, අධ්‍යාපන අමාත්‍යාංශයේ ලේකම් මහාචාර්ය කපිල පෙරේරා, අග්‍රාමාත්‍ය අතිරේක ලේකම් නීතිඥ චමින්ද කුලරත්න,වෘත්තිය සමිති අධ්‍යක්ෂ ජනරාල් සුමිත් විජේසිංහ, ශ්‍රී ලංකා පොදුජන අධ්‍යාපන සේවා සංගමයේ සභාපතිනි වසන්තා හඳපාන්ගොඩ, ලංකා ගුරු සංගමයේ ලේකම් ජෝශප් ස්ටාලිං,ලංකා ගුරු සේවා සංගමයේ ප්‍රධාන ලේකම් මහින්ද ජයසිංහ,ශ්‍රී ලංකා වෘත්තියවේදී විදුහල්පතිවරුන්ගේ සංගමයේ සභාපති සුගීශ්වර විමලරත්න, ශ්‍රී ලංකා ජාතික විදුහල්පති සංගමයේ මොහාන් වීරසිංහ මහත්ම මහත්මීහු ඇතුළු ගුරු-විදුහල්පති වෘත්තිය සමිති නියෝජිතයෝ මෙම අවස්ථාවට එක්ව සිටියහ.

කොළඹ විශ්ව විද්‍යාල නව කුලපතිවරයාගේ පත්කිරීම පිළිබඳව කණස්සල්ලට පත්වන බව කොළඹ විශ්වවිද්‍යාලයේ වෛද්‍ය පීඨ ආචාර්යවරුන්ගේ සංගමය සඳහන් කරයි.

කොළඹ විශ්ව විද්‍යාවිද්‍යාලයේ කුලපතිවරයාගේ පත්කිරීම සම්බන්ධයෙන් නැවත සලකා බලන්නැයි ජනාධිපතිවරයාගෙන් ඉල්ලා සිටින බව වෛද්‍ය පීඨ ආචාර්ය සංගමය සභාපති මහාචාර්ය සුදර්ශනී වාසල තන්ත්‍රී මහත්මියගේ අත්සනින් යුතුව නිකුත් කර ඇති නිවේදනයක සඳහන් වේ.

විශ්වවිද්‍යාලයක කුලපතිවරයා යනු එම විශ්ව විද්‍යාලයේ ගෞරවණීයත්වයේ සංකේතයක් හා මූර්තියක් බඳු යැයි ද කොළඹ විශ්ව විද්‍යාලය ශ්‍රී ලංකාවේ පැරණිතම සහ ගෞරවයට පාත්‍ර වූ විශ්ව විද්‍යාලයක් බවද එම නිවේදනය වැඩිදුරටත් සඳහන් කර ඇත.

කොළඹ විශ්වවිද්‍යාලයේ කුලපතිවරයාගේ පත්කිරීම සම්බන්ධයෙන් තම සංගමය කනස්සල්ලට පත්වන බවද එහි වැඩිදුරටත් සඳහන් කර ඇත.

පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව ඇතුළු පස් දෙනෙක් අත්අඩංගුවට ගැනීමට කඩුවෙල අධිකරණය අද වරෙන්තු නිකුත් කළේය.

ඒ ඊයේ අධිකරණය ඉදිරිපිට පැවති උද්ඝෝෂණයක් අතරතුර කලහකාරී ලෙස හැසිරෙමින් අධිකරණයේ දේපළ වලට හානි කිරීමත් සම්බන්ධයෙන් කඩුවෙල අධිකරණ රෙජිස්ටාර් විසින් පොලිසියට කළ පැමිණිල්ලකට අනුව කළ කරුණු දැක්වීමට මෙම වරෙන්තු නිකුතුව සිදුවිය.

කොතලාවල පනතට එරෙහිවපාර්ලිමේන්තු මාර්ගයේ ආසන්නයේ කළ උද්ඝෝෂණයක් අතරතුර පොලිස් නිලධාරියෙකුට තුවාල ගෙන දෙමින් කලහාකාරි ලෙස හැසිරීමත් සම්බන්ධයෙන් රක්ෂිත බන්ධනාගාරගතකර සිටින පෙරටුගාමී සමාජවාදී පක්ෂයේ සහ අන්තර් විශ්වවිද්‍යාල ශිෂ්‍ය බල මණ්ඩල සාමාජිකයන්ට ඇප ලබාදෙන ලෙස සඳහන් කරමින් එම උත්ඝෝෂණය පවත්වා තිබුණ.

ගුරුවරුන්ගේ හා විදුහල්පති වරුන්ගේ වැටුප් ගැටළුවට විසඳුම් ලබාදීමට අග්‍රාමාත්‍ය මහින්ද රාජපක්ෂ මහතා අද පෙරවරුවේ එකඟ වූ බව ගුරු සංගම් නියෝජිතයෝ පවසති .

අග්‍රාමාත්‍යවරයා සමඟ පාර්ලිමේන්තු සංකීර්ණයේ අද පෙරවරුවේ පැවති සාකච්ඡාවේදී එම දී එම තීරණය ගත් බවද ලංකා ගුරු සංගමයේ ලේකම් ජෝසප් ස්ටාලින් මහතා පැවසීය .

ගුරුවරුන්ගේ වැටුප් ගැටලුව විසඳීම සඳහා අමාත්‍ය අනුකමිටුව කළ යෝජනාව වැටුප් වැඩිවීම එකවර ලබා දීමට අග්‍රාමාත්‍යවරයා එහිදී පොරොන්දු වූ බව ද ස්ටාලින් මහතා කීය.

ඒඅනුව ගුරුවරුන්ගේ සහ විදුහල්පතිවරුන්ගේ වැටුප් වැඩිවීම මෙවර අයවැයෙන් පසුව ලබාදෙනු ඇතැයි ද ජෝසප් ස්ටාලින් මහතා පැවසීය.

ගුරු සංගම් හා විදුහල්පති සංගම් ඉල්ලා සිටි ප්‍රධාන යෝජනාව ඒ මගින් ඉටුවන බව ද මගින් ඉටු වන බවද එහෙත් සමස්ථ වැටුප් වැඩිවීම දිනා ගැනීම සඳහා ඉදිරියේදී අවශ්‍ය වුවහොත් තවදුරටත් සටන් කරන බවද ස්ටාලින් මහතා පැවසීය.

මෙම කන්නය වගා කිරීමට අවශ්‍ය පොහොර කඩිනමින් ගොවීන්ට ලබාදීමට රජය කටයුතු නොකරන්නේ නම් 26 වැනිදා ගොවීන් සමඟ එක්ව පාර්ලිමේන්තුව වටකරන බව සමඟි ජනබලවෙිගය පක්ෂයේ කුරුණෑගල දිස්ත්‍රික් පාර්ලිමේන්තු මන්ත්‍රී නලීන් බණ්ඩාර මහතා පවසයි.

කෘෂිකාර්ම හා වාරිමාර්ග අමාත්‍යාංශයවල අය වැය කාරක සභා විවාදය 26 වැනිදා පැවැත්වෙන බවද මන්ත්‍රීවරයා සදහන් කළේය.

ඔහු වැඩිදුරටත් සඳහන් කර සිටියේ මෙම කන්නය වගාකිරීමට අවශ්‍ය පොහොර ගොවීන්ට ලබාදීමට රජය තවමත් කටයුතු කර නැති බවය.

මේ නිසා ගොවි ජනතාව දැඩි අපහසුතාවයට පත්ව සිටින බව කී මන්ත්‍රීවරයා ර⁣ටේ සමස්ත ගොවි ජනතාව සමඟ එක්ව 26 වැනිදා පාර්ලිමේන්තුව වටකර රජයට දැනෙන පාඩමක් උගන්වන බවද සඳහන් කළේය.

සිය අනියම් බිරියගේ සැමියාට ගිනි අවියක් එල්ලකර තර්ජනය කළේ යැයි කියනු ලබන ජෝතිෂ්‍යවේදියෙක් සහ තවත් අයෙක් ගිනි අවි රැසක් සමඟ පොලිස් විශේෂ කාර්ය බලකායේ ගෝනහේන කදවුරේ නිලධාරීන් විසින් ඊයේ අත්අඩංගුවට ගෙන ඇත.

එම ගිනි අවි අතර 0.22 වර්ගයේ පතොරම් යෙදිය හැකි රිවෝල්වරයක්, මයික්‍රෝවර්ගයේ අවියකට සමාන ඉතාලියේ නිෂ්පාදිත පුහුණු පිස්තෝලයක්, බෝර 12 වර්ගයේ ගිනි අවියක් සහ විවිධ වර්ගයේ පතොරම් රැසක් මෙම වැටලීමේදී විශේෂ කාර්ය බලකා නිලධාරීන් විසින් සොයාගෙන තිබේ.

ජෝතිෂ්‍යවේදියා අනියම් සම්බන්ධය ඇතිකරගෙන සිටින කටානේ කාන්තාවගේ විවහාක සැමියා ඉතාලියේ රැකියාවක නිරතව සිටින්නෙකි. මෙම ජෝතිෂ්‍යවේදියාගෙන් වේලපත්කල බලා ගැනීමට ගිය අවස්ථාවකදී ඇතිවූ දැන හදුනා ගැනීමක් මෙසේ අනියම් සම්බන්ධයක් දක්වා දුරදිග ගොස් ඇති බව විමර්ශන වලින් පෙනී ගොස් ඇත. මෙම සම්බන්ධය නතරකරන ලෙසට විවහාක සැමියා සිය බිරිඳට නිතර දැනුම් දෙන බවත් ඒ සම්බන්ධයෙන් උරණ වූ ජෝතිෂ්‍යවේදියා මෑතකදී විවාහක සැමියා ඉතාලියේ සිට පැමිණි අවස්ථාවේදී ගිනි අවියක් එල්ලකරමින් ඔහුට තර්ජනයකර ඇති බවත් විශේෂ කාර්ය බලකාය සදහන් කරයි.

ඒ සම්බන්ධයෙන් පොලීසියට විවාහක සැමියා පැමිණිල්ලක් කර ඇතත් ගිනි අවිය සොයා ගැනීමට හැකියාවක් ලැබී නැත. මේ ගැන පොලිස්පති සී.ඩී. වික්‍රමරත්න මහතාට ලද තොරතුරකට අනුව විමර්ශන කටයුතු විශේෂ කාර්ය බලකායට පවරා තිබේ.

ඒ අනුව විශේෂ කාර්ය බලකාය අණදෙන නිලධාරී නියෝජ්ය පොලිස්පති නීතිඥ වරුණ ජයසුන්දර මහතාගේ සෘජු අධීක්ෂණය යටතේ බස්නාහිර උතුර භාරව කටයුතු කරන ජ්‍යෙෂ්ඨ පොලිස් අධිකාරි පි.ජේ. සිල්වෙස්ටර් විජේසිංහ මහතායටතේ ක්‍රියාත්මක ගෝනහේන කඳවුරේ පොලිස් පරික්ෂක එස්.පි. ගුණතිළක ඇතුළු නිලධාරීන් කණ්ඩායමකට මෙම විමර්ශන කටයුත්ත පැවරී ඇත.

දීර්ඝ විමර්ශනයකින් අනතුරුව කටානේ කොන්දගම්මුල්ල , දෙමන්හංදියේ පදිංචිව සිටින 51 වියැති ජෝතිෂ්‍යවේදියා සැකපිට අත්අඩංගුවට ගෙන ප්‍රශ්න කර තිබේ. එහිදී ඔහු තමාට ගිනි අවිය ලබාදුන් අයෙක් ගැන තොරතුරු හෙළිකර ඇත. ඒ අනුව විශේස කාර්ය බලකායේ නිලධාරීන් කොටුගොඩ ගනේපොල පදිංචිව සිටින 55 වන වියේ පසුවන පුද්ගලයෙක්ව අත්අඩංගුවට ගෙන ඇත. ගිනි අවි හමුවී ඇත්තේ ඔහු සන්තකයේ තිබියදීය.

විදේශයකින් එම ගිනි අවි තමා රැගෙන පැමිණී බව ප්‍රශ්න කිරීම් හමුවේ එම සැකකරු විශේෂ කාර්ය බලකා නිලධාරීන්ට පවසා තිබේ. බෝර 12 ගිනි අවියට ඔහුට බලපත්‍ර ඇතත් එම අවියට යොදන පතොරම් ප්‍රමාණය සන්තකයේ තබා ගැනීමට අවසරය ඇති ප්‍රමාණයට වඩා තිබුුණු බව විශේෂ කාර්ය බලකාය පවසයි.

වැඩිදුර විමර්ශන කටයුතු සදහා අත්අඩංගුවටගත් සැකකරුවන් ගිනි අවි සහ පතොරම්ද සමග කටාන පොලිස් ස්ථානයට භාරදී තිබේ.

ගුරු සහ දෙමාපිය උද්ඝෝෂණයක් පැවති ස්ථානයකට වඩා වැදී උද්ඝෝෂණයේ නිරතව සිටි පිරිසට බැණ තර්ජනය කිරීමක් සම්බන්ධයෙන් චෝදනා එල්ලවුණු මාවනැල්ල ප්‍රාදේශීය සභාවේ උප සභාපති කේ.ජී. පියතිස්ස මහතා සහ ප්‍රාදේශීය සභාවේ මන්ත්‍රීවරු දෙදෙනෙක් අද අත්අඩංගුවට ගත්බව පොලිස් මාධ්‍ය ප්‍රකාශක කාර්යාලය සදහන් කරයි.

මෙම ගුරු- දෙමාපිය උද්ඝෝෂණය පැවැත්වෙන්නේ ඉකුත් 03 වෙනිදාය. මාවනැල්ල ප්‍රාදේශිය සභාවේ උප සභාපති ඇතුළු පිරිස කළ තර්ජනය කිරීම් සම්බන්ධයෙන් මාවනැල්ල පොලිස් ස්ථානයට උද්ඝෝෂකයන් විසින් පැමිණිල්ලක්ද කර තිබුණි.

ඒ අනුව සැකකරුවන්ට එරෙහිව පොලීසිය නිසි ක්‍රියාමාර්ග නොගත් බවට චෝදනා කරමින් ගුරුවරුන් අවස්ථා කිහිපයකදීම මාවනැල්ල පොලිස් ස්ථානය ඉදිරිපිට උද්ඝෝෂණයේද නිරත විය.

පොලිස් මාධ්‍ය ප්‍රකාශක කාර්යාලය සදහන් කරනු ලැබුවේ සැකකරුවන් අද අධිකරණයට ඉදිරිපත්කරන බවය.

දිස්ත්‍රික් 11කට අයත් ප්‍රදේශ ගණනාවකට හෙට දිනය දක්වා නායයාම් පිළිබඳ අනතුරු අඟවා තිබේ.

බදුල්ල, කොළඹ, ගාල්ල, ගම්පහ, කළුතර, මහනුවර, කෑගල්ල, කුරුණෑගල, මාතලේ, නුවරඑළිය, රත්නපුර යන දිස්ත්‍රික්කවලට මෙලෙස නායයාමේ අවදානම් ඇති බවට අනතුරු අඟවා ඇත.

අවදානම් සහිත ප්‍රදේශ ලැයිස්තුව පහත දැක්වේ.

කොවිඩ් වසංගත තත්ත්වය හමුවේ රථවාහන වැරදි සම්බන්ධයෙන් වූ දඩ ගෙවීමට රියදුරන්ට ලබාදුන් සහන කාලය ලබන 14 වෙනිදායින් අවසන් කිරීමට තැපැල් දෙපාර්තමේන්තුව තීරණයකර ඇත.

තැපැල් දෙපාර්තමේන්තුව සදහන් කරන්නේ ඔක්තෝම්බර් 31 වෙනිදායින් පසු නිකුත් කරන රථවාහන වැරදි සම්බන්ධයෙන් වූ දඩපත්‍රිකා සදහා කිසිදු සහනයක් නොලැබෙන බවය.

2021.11. 01 දින සිට කරන කරන ලද වැරදි සම්බන්ධයෙන් වූ රථවාහන දඩ පත්‍රිකා සාමාන්‍ය පරිදි දින 14 ගණනය කර දඩ මුදල් භාර ගැනීමත් , දින 28 ක් දක්වා රථවාහන දඩ පත්‍රිකා අතිරේක දඩ මුදල් අය කර භාර ගැනීමත් දින 28 ඉක්ම වූ රථවාහන දඩ පත්‍රිකා භාර නොගන්නා බවත් තැපැල් දෙපාර්තමේනතුව නිවේදනය කරයි.

කොළඹ කෙසෙල්වත්තේ මාටිස් පටුමගේ නිවසක පදිංචිව සිටි බාලවයස්කාරියන් තිදෙනෙක් අතුරුදන්වීමක් සම්බන්ධයෙන් කෙසෙල්වත්ත පොලීසිය පුළුල් විමර්ශනයක් ආරම්භකර තිබේ.

එකම පවුලේ සහෝදරියන් දෙදෙනෙක් සහ ගම්පොළ සිට එම නිවසට පැමිණ සිටි ඥාති සහෝදරියක් මෙසේ අතුරුදන්ව ඇත.

ෆාතිමා රක්ෂා (15) ඇගේ නැගණිය වන ෆාතිමා කදීරා (13) සහ ගම්පොළ සිට පැමිණි ඥාති දියණියක් වන ෆාතිමා වාර්යා යන දියණියන් තිදෙනා මෙසේ අතුරුදන්ව ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතීඥ නිහාල් තල්දූව මහතා සදහන් කළේය.

මෙම බාලවයස්කාරියන් තිදෙනා ඊයේ පෙරවරු 8.30 සිට පමණ නිවසින් පිටව ගොස් ඇත්තේ ගමන් මලුද කරේ එල්ලාගෙනය. ඔවුන් මාර්ගයේ ගමන්කරන අයුරු ආරක්ෂක කැමරා කිහිපයකම සටහන්ව තිබී ඇත. පොලීසිය සදහන් කරන්නේ ඔවුන් නිවැසියන්ට හොරා එසේ නිවාසවලින් පිටව ගොස් ඇති බවය.

මෙම දැරිවියන් නිවසින් පිටව යන විට මවගේ ජංගම දුරකතනයද රැගෙන ගොස් ඇති බව පොලීසිය සදහන් කරයි.

මෙම තිදෙනා අතුරුදන්වූ බවට පැමිණිල්ලක් කෙසෙල්වත්ත පොලිස් ස්ථානයට ලැබී ඇත්තේ අද අලුයම් කාලයේදී බව උසස් පොලිස් නිලධාරියෙක් සදහන් කළේය. මොවුන් තිදෙනා මෙසේ අතුරුදන්වූයේ ඇයි දැයි කිසිවක් මෙතෙක් හෙළිවී නැති අතර දෙමාපියන් පොලීසියට පවසා ඇති ආකාරයට අනුව ඔවුන්ට නිවාස අතහැර යන්නට තරම් ගැටළු ද තිබී නැත.

මේ සම්බන්ධයෙන් අද අධිකරණයට කරුණු වාර්තතා කිරීමටද පොලීසිය පියවර ගත් බවද එම නිලධාරියා සදහන් කළේය.

මෙම බාලවයස්කාරියන් ගාලුමුවදොර පිටියේ සැරිසරා ඇති බවට ලැබුණු තොරතුරු මත ඒ සම්බන්ධයෙන්ද සොයා බැලීමක් කල බවත් ඔවුන් එහි සැරිසැරූ බවට පැහැදිලි සාක්ෂියක් මෙතෙක් හමුවී නැති බවත් එම නිලධාරියා කීය.

මෙම බාලවයස්කාරියන්ට නිවසින් පිටව යාමට කිසියම් අයෙකුගේ සහයක් ලැබී ඇතැයි පොලීසිය සැකකරයි.

මල්වතු ඔය ද්‍රෝණියේ පහළ ප්‍රදේශවල පිහිටි වෙන්ගලචෙඩ්ඩිකුලම්‌, මඩු, මුසාලෛ, නැනඞ්ඩාන්‌ යන ප්‍රාදේශීය ලේකම්‌ කොට්ඨාශවලට අයත්‌ මල්වතු ඔය ද්‍රෝණියේ ගංවතුර නිම්නයේ පහළ ප්‍රදේශවලට අද රාත්‍රියේ සහ හෙට දින ගංවතුර අවදානමක් ඇති බවට වාරිමාර්ග දෙපාර්තමේන්තුව අනතුරු අඟව‍ා තිබේ.

ඊයේ රාත්‍රී කාලයේ මල්වතු ඔය ද්‍රෝණියේ ඉහළ ප්‍රදේශවලට ඇදහැලුණු අධික වර්ෂා තත්ත්වය හේතුකොටගෙන මල්වතු ඔය පහලධාරා ප්‍රදේශයේ තන්තිරිමලේ සිට පහළ ප්‍රදේශවල ඔයෙහි ජල මට්ටම පිටාර මට්ටමට ආසන්නව පවතී.

කාලගුණ අංශවල අනතුරු ඇඟවීම්‌ අනුව මල්වතු ඔය පහළ ධාරා ප්‍රදේශවලට අධික වර්ෂාපතනයක්‌ අද රාත්‍රියේ ලැබීමේ ඉහල සම්භාවිතාවයක්‌ ඇති බවට බවට වාර්තා වී ඇත.

මේ තත්ත්වය මත ඉහත සඳහන් ප්‍රදේශවල පදිංචි ජනතාව මේ පිළිබඳ දැඩි සැලකිල්ලෙන්‌ කටයුතු කළ යුතු බවට වාරිමාර්ග දෙපාර්තමේන්තුව ඉල්ලා සිටී.

තවද මේ තත්ත්වය සම්බන්ධයෙන්‌ අවධානයෙන්‌ සිටින ලෙසත් අවශ්‍ය පියවර ගන්නා ලෙසත්‌ ආපදා කළමනාකරණ සහ දිස්ත්‍රික්‌ පරිපාලන අංශවලින්‌ වාරිමාර්ග දෙපාර්තමේන්තුව ඉල්ලා සිටී.

විශ්‍රාමිකයින් සඳහා යෝජිත අග්‍රහාර රක්‍ෂණ යෝජනා ක්‍රමය පිළිබඳ චක්‍රලේඛය නැවත දැනුම් දෙන තුරු අත්හිටුවා තිබේ.

රාජ්‍ය පරිපාලන අමාත්‍යාංශය මේ බව නිවේදනය කරයි.

මේ අයවැය මාසය බැවින් ඉන්ධන මිල පිළිබඳ තීරණයක් ගැනීම මුදල් අමාත්‍යවරයාට බාර වී ඇතැයි බලශක්ති අමාත්‍ය උදය ගම්මන්පිල මහතා පවසයි.

ඉදිරියේදී පාර්ලිමේන්තුවට ඉදිරිපත් කෙරෙන අයවැය කතාවේදී ඒ පිළිබඳ දැනගත හැකි වනු ඇති බව හෙතෙම කියා සිටී.

ගහෙන් වැටුණු මිනිහට මිනිහට ගොනා ඇන්නා වගේ වෙන නිසා පාඩුව දරාගනිමින් ඉන්ධන මිල ඉහළ දැමීම සිදු නොකළ බව අද පැවති මාධ්‍ය හමුවකදී ඔහු පෙන්වා දුන්නේ ය.

පවතින ගෑස් සහ ඉන්ධනවල තත්ත්වය හේතුවෙන් භූමිතෙල් පරිභෝජනය විශාල ලෙස ඉහළ ගොස් ඇති බවද ඔහු එහිදී කියා සිටියේය.