ෆොසිල ඉන්ධනවල මිල අධික වීම සහ විදුලිය නිපදවීමට ගල් අඟුරු භාවිතයේදී වන අධික පරිසර හානිය නිසා වර්තමානයේදී පුනර්ජනනීය බලශක්ති ප්‍රභවයන් වෙත වඩාත් අවධානය යොමුවී ඇති බව නොරහසකි. සුලං මෝල්, සූර්ය පැනල භාවිතය, මේ අතර ප්‍රධාන තැනක් ගනී. පුනර්ජනනීය බලශක්ති ප්‍රභවයක් ලෙස සූළඟින් උපරිම දායකත්වයක් ලබාගැනීම සඳහා සරුංගල් භාවිතය පිළිබඳ ඉතා සිත්ගන්නාසුළු පුවතක් මෑතකදී විදෙස් මාධ්‍ය මගින් වාර්තා කොට තිබුණි.
2021 වසරේ දෙසැම්බර් මාසයේදී SkySails Power නම් ජර්මානු ආයතනයක් විසින් ලොව ප්‍රථම වරට මුරුසි දිවයිනේ මෙම සරුංගල් විදුලි බලාගාරය, පරීක්ෂණ මට්ටමින් ස්ථාපනය කරන ලදී. ඔවුන්ගේ වාර්තා පවසන පරිදි පසුගිය මාස දෙකක කාලය තුළ, එයින් අපේක්ෂිත කිලෝවොට් 100ට ඉතා ආසන්න විදුලි ප්‍රමාණයක් එමගින් ජනනය කර ඇත. මෙය සාමාන්‍යයෙන් නිවාස 50ක පමණ අවශ්‍යතාවය සපුරාලීම සඳහා ප්‍රමාණවත් බව ඔවුන් පවසයි.
සාම්ප්‍රදායික සුලං මෝල් භාවිතයේදී ඉතා දුෂ්කර ප්‍රදේශ, මුහුදේ ගැඹුරු ස්ථාන වැනි ප්‍රදේශවල ඒවා ස්ථාපනය කිරීම ඉතා දුෂ්කර බැවින්, සරුංගල් භාවිතා කිරීමෙන් විදුලිය නිපදවීම ඉතා පහසු සහ ලාභදායී ක්‍රමවේදයක් බව අවිවාදයෙන් පිළිගැනේ. සුළඟ වඩාත් වේගයෙන් හමායන තරම් උසකට සුළං මෝල් ප්‍රමණවත් තරම් උස් නොවන හෙයින්, එවැනි උසක පහසුවෙන් ක්‍රියාත්මක වීමට මෙම සරුංගල් වලට හැකි බව පැවසේ.
මේ සම්බන්ධයෙන් අදහස් දක්වමින්, Airborne Wind Europe ආයතනයේ අධ්‍යක්ෂක වරයෙකු වන, Polytechnic University of Milan විශ්ව විද්‍යාලයේ ඉංජිනේරු, ලොරෙන්සෝ ෆැජියානෝ විසින් පවසා ඇත්තේ සමහර රටවල සුලං මෝල් සඳහා සුදුසු භූමි ප්‍රමාණය ඉතා අල්ප බවත්, සුලං මෝල් සඳහා මෙගාවොට් එකක් නිපදවීමට අක්කර 71ක පමණ භූමි ප්‍රමාණයක්ද, ෆොසිල ඉන්ධන බලාගාරයක් සඳහා අක්කර 12ක පමණ භූමි ප්‍රමාණයක්ද අවශ්‍ය වන බවයි. උසින් වැඩිම සුලං මෝලක් උපරිම ලෙස මීටර් 200 – 300 ක් පමණ වන බව පැවසෙන අතර මෙම විදුලිය ජනනය කරන සරුංගලයක් සාමාන්‍යයෙන් මීටර 800ක පමණ ඉහළක රැඳවීමෙන් ඉතා වේගයෙන් හමායන උඩු සුළඟින් උපරිම ඵල නෙලාගත හැකි බව ඔහු විසින් වැඩි දුරටත් පවසා ඇත.
අවම පිරිවැයක් යටතේ, පරිසර හානි අවම කරමින්, බලශක්ති නිපදවිය හැකි මෙවැනි ප්‍රභවයන් කෙරෙහි නැඹුරු වීම, දියුණු වෙමින් පවතින, වර්තමානයේදී උග්‍ර බලශක්ති අර්බුදයකට මුහුණ පා සිටින, ශ්‍රී ලංකාව වැනි රටවලටද ඉතා හොඳ ආදර්ශයක් වනු නොඅනුමානය.
(මංජුල දීපාල් ද සිල්වා විසින් theplanetaroundus.com ෆේස්බුක් විද්‍යුත් සඟරාවෙහි පළකරන ලද ලිපියකි. තොරතුරු සහ ඡායාරූප අන්තර්ජාලයෙනි)
මෙම ලියුම්කරු විද්‍යාවේදී, ව්‍යාපාර පරිපාලන (විශේෂ) උපාධිය ශ්‍රී ජයවර්ධනපුර විශ්වවිද්‍යාලයෙන් ද, රාජ්‍ය පරිපාලන පශ්චාත් උපාධිය කොළඹ විශ්ව විද්‍යාලයෙන් ද ලබා ඇති අතර මනෝවිද්‍යාව පිළිබඳව ඩිප්ලෝමා ධාරියෙකි. ශ්‍රී ලංකා විද්වත් වෘත්තික උපදේශක ආයතනයේ සාමාජිකයකු ද වේ. බ්‍රිතාන්‍ය පරිඝණක සංගමයේ ද හිටපු සාමාජිකයෙකි.
