තමන් මින් ඉදිරියට ස්වාධීන මන්ත්‍රීවරයෙකු ලෙස කටයුතු කරන බව ආණමඩුව ප්‍රාදේශීය සභාවේ පොදුජන පෙරමුණ මන්ත්‍රී ප්‍රදීප් චන්දන මහතා පැවසීය.
ආණමඩුව ප්‍රාදේශීය සභාවේ සභාපති ප්‍රියන්ත රාජකරුණා මහතාගේ ප්‍රධානත්වයෙන් එම සභාවේ මාසික රැස්වීම 10 වැනිදා ආණමඩුවේදී පැවැත්වුණි.
සභාව ආරම්භයේදී විශේෂ ප්‍රකාශයක් කළ ආණමඩුව ප්‍රාදේශීය සභාවේ පොදු ජන පෙරමුණ මන්ත්‍රී ප්‍රදීප් චන්දන මහතා මෙසේ පැවසීය.
“වර්තමානයේ අපිට පාරේ ඇදුමක් ඇදගෙන යන්න පුළුවන් වාතාවරණයක් නැති තත්ත්වයකට පත් වෙලා ඉන්නේ.ඒකට ප්‍රධානතම හේතුව වී ඇත්තේ පොදු ජන පෙරමුණ පක්ෂයේ පුත්තලම දිස්ත්‍රික් නායකයා බව කියන නියෝජ්‍ය ඇමතිවරයායි.
මේ රටට විශාල සේවාවක් කළ එක්සත් ජාතික පක්ෂයේ නායකයාට මෙවර පාර්ලිමේන්තුවට යන්න සිද්ධ වුනේ ජාතික ලැයිස්තුවෙන්.එහෙම නම් අපේ පක්ෂය ගැන කවර කථාද?මේ ආකාරයට ගියොත් වැඩි දවසක් යන්න කලින් පොහොට්ටුව පර වෙලා යන්න ඉඩ තියනවා.ඒ සම්බන්ධයෙන් නායකයින් හොදට හිතලා බලලා කටයුතු කළ යුතුයි”
අනතුරුව මන්ත්‍රීවරයා විපක්ෂ මන්ත්‍රී කණ්ඩායම වෙත ගොස් අසුන් ගත්තේය.එක්සත් ජාතික පක්ෂ ප්‍රාදේශීය සභා මන්ත්‍රී ධර්මශ්‍රී බණ්ඩාර මහතා හෙතෙම පිළි ගනිමින් කථාවක්ද පවත්වන ලදි.
එළඹෙන සභා වාරය වර්ජණය කළ යුතු යැයි සභික ඔට්ටුක්කුලමේ පුංඤ්ඤානන්ද හිමියන් යෝජනාවක් ගෙන එන ලදි.එම යෝජනාව සභාව නියෝජනය කරන පොදු ජලන පෙරමුණ සභිකයින් විසින් ස්ථීර කරන ලදි.
