කාඩ් හිඟයක් – තාවකාලික රියදුරු බලපත්‍රයක් එයි

කල් ඉකුත්වන රියදුරු බලපත්‍රවල කාලය යළි දීර්ඝ කිරීමට සහ වසරක් සඳහා තාවකාලික රියදුරු බලපත්‍රයක් නිකුත් කිරීමට මෝටර් රථ ප්‍රවාහන දෙපාර්තමේන්තුව පියවර ගෙන තිබේ.

රට තුළ පැවති COVID-19 වසංගත තත්ත්වය හේතුවෙන්, මෝටර් රථ ප්‍රවාහන දෙපාර්තමේන්තුව වසා තැබීම නිසා රියදුරු බලපත්‍රවල කල් ඉකුත් වීමේ දිනය අවස්ථා කිහිපයකදීම දීර්ඝ කිරීමට සිදු විය.

ඒ හේතුවෙන්, රියදුරු බලපත්‍ර විශාල සංඛ්‍යාවක අලුත් කිරීම එකවර සිදු කිරීමට කටයුතු කළ යුතුව ඇත.

එබැවින්, දෙපාර්තමේන්තුවට දැරිය නොහැකි ප්‍රමාණයක විශාල රියදුරු බලපත්‍ර සංඛ්‍යාවක් වර්තමානයේ දී නිකුත් කිරීමට සිදු වී ඇත.

මෙම තත්ත්වය තුළ, පහත සඳහන් පරිදි කල් ඉකුත්වන දිනයේ සිට රියදුරු බලපත්‍රවල කාලය දීර්ඝ කිරීමට තීරණය කර ඇත.

ඒ සඳහා වන ගැසට් නිවේදනය යථකාලයේදී නිකුත් කරනු ලබන බව ද මෝටරථ ප්‍රවාහන දෙපාර්තමේන්තුව නිවේදනය කරයි.

• 2022 අප්‍රේල් 01 සිට 2022 ජුනි 30 දක්වා කල් ඉකුත් වන රියදුරු බලපත්‍ර – කල් ඉකුත්වන දිනයේ සිට මාස 06 කින් දීර්ඝ කිරීමට,

• 2022 ජූලි 01 සිට 2022 සැප්තැම්බර් 30 දක්වා කල් ඉකුත් වන රියදුරු බලපත්‍ර –

කල් ඉකුත්වන දිනයේ සිට මාස 03 කින් දීර්ඝ කිරීමට, (මින් පෙර දින දීර්ඝ කිරිම් තුළින් ලබා දී ඇති සහන කාලය අනුව එම දිනවලදී අවලංගු වෙන රියදුරු බලපත්‍ර ද ඇතුලත් වේ.)

අවසන් වරට මෙම දින දීර්ඝ කිරීම සිදු කරන බැවින් සහන කාලය තුළ රියදුරු බලපත්‍ර අලුත් කර ගන්නා කලස අවධාරණය කරයි.

තවද, රටේ පවතින විදේශ විනිමය හිඟය හේතුවෙන් රියදුරු බලපත්‍ර මුද්‍රණයට යොදා ගන්නා කාඩ්පත් හිඟයකට ද වත්මනෙහි මෝටර් රථ ප්‍රවාහන දෙපාර්තමේන්තුව මුහුණ දී සිටියි.

ඒ සඳහා තාවකාලික පිළියමක් ලෙස, රියදුරු බලපත්‍ර කාඩ්පත වෙනුවට වසරක් සඳහා තාවකාලික රියදුරු බලපත්‍රයක් නිකුත් කිරීමට තීරණය කර ඈත.

එම තාවකාලික රියදුරු බලපත්‍රය සඳහා ආරක්ෂිත ක්‍රමවේද සහිත පරිගණක යෙදවුමක් පොලිස් දෙපාර්තමේන්තුවට හඳුන්වාදීමට ද කටයුතු සම්පාදනය කරමින් සිටී.

එමෙන්ම, දැනට නිකුත් කර ඇති තාවකාලික රියදුරු බලපත්‍ර සඳහා වසරක වලංගු කාලයක් සහිත නව තාවකාලික රියදුරු බලපත්‍රයක් තැපැල් මගින් බලපත්‍රලාභියාට ලබා දෙනු ලැබේ.

රට යථා තත්ත්වයට පත්වීමෙන් පසුව අදාළ කාඩ්පත් මුද්‍රණය කර ඉල්ලුම්කරුවන්ගේ නිවසටම රියදුරු බලපත්‍රය ලැබීමට සලස්වන බැව්ද මෝටර් රථ ප්‍රවාහන දෙපාර්තමේන්තුව දන්වා සිටි.