මෙරට සිටි වයස්ගතම කාන්තාව දිවියෙන් සමු ගනී

මෙරට ජීවත්වූ වයස්ගතම කාන්තාවක් ලෙස සැළකෙන ඉමදූව කනංකේවත්තේ පදිංචිව සිටි කංකානම් ගමගේ ඩිංගිහාමි මාතාව අද උදෑසන අභාවප්‍රාප්ත වූවාය.

ඇය සිය ජීවන ගමනට සමුදෙන්නේ වයස අවුරුදු 116 ක් ආයු වළදාය.

ඇය උපත ලබා ඇත්තේ 1906 වසරේ ජනවාරි මස 11 වෙනිදා අතුරලියේය.

එම්.ජී. ද නෝරිස් මහතා සමඟ විවහා වූ ඇය දරුවන් තිදෙනෙකුගේ මවකි.

ඉකුත් 2020 වසරේ දෙසැම්බර් 29 වෙනිදා මිය ගිය කළුතර දොඩම්ගොඩ ක්ලෝඩන් වත්තේ හෙදරලිය කොටසේ ජීවත්වූ වේලු පාප්පානි මාතාවද වයස අවුරුදු 117 ක් ආයු වළදූ තැනැත්තියකි. ඇය 1909 වසරේ මැයි 03 වෙනිදා උපත ලබා ඇත. ඒ වන විට මෙරට සිටි වයස්ගතම කාන්තාව වූයේ ඇයයි.

අරනායක ගෙවිලිපිටිය ග්‍රාමයේ ජීවත්වූ කිරි උක්කු මාතාවද 2017 වසරේ දෙසැම්බර් 02 දා මිය යන්නේ අවුරුදු 115 ක් ආයු වළදාය. ඇය 1902 වසරේ ජූනි 04 වෙනිදා උපන්නියකි. 2014 වසරේ ඇගේ වසය 112 ක්ව පැවතියදී ඇය ප්‍රවීනයන්ගේ මලල ක්‍රීඩා තරගයට සහභාගිවෙමින් හෙල්ල සහ යගුලිය විසිකිරීමේ තරග ඉසව්වලටද සහභාගි වූවාය.

එවකට මෙරට සිටි වයස්ගතම කාන්තාව වූයේ ඇයයි.