අද (02) දිනයේ දිවයින පුරා ගෘහස්ථ LP ගෑස් සිලින්ඩර් බෙදා හැරීමේ ලැයිස්තුව ලිට්‍රෝ සමාගම විසින් නිකුත් කර තිබේ.

එම ලැයිස්තුව පහත දැක්වේ.

අද (02) දිවයින පුරා පැය 2ක විදුලි කප්පාදුවක් සිදුකිරීමට සැලසුම් කර ඇති බව මහජන උපයෝගීතා කොමිසම පවසයි.

අද හෙට සහ අනිද්දා (04) විදුලි කප්පාදු කාලසටහන පහත දැක්වේ.

ගත වූ තෙදින තුළ සමස්ත විදුලි උත්පාදනයෙන් 80%ක් ජල සහ සුළං බලයෙන් ජාතික විදුලිබල පද්ධතියට සැපයූ බවට හෙළිවී තිබේ.

ඒ වාරිමාර්ග ක්ෂේත්‍රය මුහුණ දෙන අභියෝග සහ විසඳුම් පිළිබඳ අද (01) පස්වරුවේ කොළඹ, කොටුව ජනාධිපති මන්දිරයේ දී ජනාධිපතිවරයා සමඟ පැවති සාකච්ඡාවේදී මේ බව අනාවරණය වී ඇත.

ජලය මත පාවෙන සූර්ය පැනල ව්‍යාපෘති ඉහළ නැංවීමට හා වහලය මත සවි කරන සූර්ය පැනල සඳහා ලබා දෙන ප්‍රතිලාභ වැඩි කර, පාරිභෝගිකයන් දිරිගැන්වීමට පියවර ගත යුතු බව ජනාධිපතිවරයා එහිදී පැවසීය.

රටේ පවතින ඩොලර් අර්බුදය, ඉන්ධන හිඟය හේතුවෙන් ඉන්ධන දහනය කිරීමෙන් විදුලිය නිපදවීම ගැටලු සහගත වී ඇති බැවින් මේ වනවිට දිනපතා විදුලි කප්පාදුවීම් ද සිදුවේ.

කෙසේවෙතත් මේ දිනවල පවතින අධික වැසි තත්ත්වය ජල විදුලිය නිපදවීම සඳහා විශාල පිටිවහලක් වී ඇත.

එමෙන්ම මේ වනවිට පවතින අර්බුද හමුවේ පුනර්ජනනීය බලශක්ති වෙත යොමුවීම කඩිනම් කිරීමට රජය පියවර ගෙන ඇති අතර එහි එක් පියවරක් ලෙස රජයේ ආයතනවල වහල මත සූර්ය පැනල සවිකිරීමේ මෙහෙයුම අද ආරම්භ වූ බවට ද වාර්තා විය.

යල කන්නය සඳහා අවශ්‍ය පොහොර කඩිනමින් ලබා දීමට ඉන්දීය අග්‍රාමාත්‍ය නරේන්ද්‍ර මෝදි මහතා එකඟතාව පළ කළ බව ජනාධිපති ගෝඨාභය රාජපක්ෂ මහතා පවසයි.

ඉන්දීය ණය ආධාර යටතේ මෙම පොහොර තොගය සැපයෙන අතර මෙරටට ලැබී දින 20ක් ඇතුළත බෙදාහැරීමට සැලසුම් කර තිබේ.

වාරිමාර්ග ක්ෂේත්‍රය මුහුණ දෙන අභියෝග සහ විසඳුම් පිළිබඳ අද (01) පස්වරුවේ කොළඹ, කොටුව ජනාධිපති මන්දිරයේ දී පැවති සාකච්ඡාවේදී ජනාධිපතිවරයා මේ බව සඳහන් කළේය.

උමාඔය සහ මොරගහකන්ද ව්‍යාපෘති මේ වසර නිම වීමට පෙර අවසන් කර, මහ කන්නය සඳහා ප්‍රතිලාභ ලබා දිය හැකි බව සාකච්ඡාවේදී අනාවරණය කෙරිණ. මොරාණ, මහගල්ගමුව පෝෂිත ඇළ, මහගෝණ වැව, විලකණ්ඩිය වැව සහ ගොඩිගමුව වැව ව්‍යාපෘති මීට සමගාමීව වැඩ නිම වීමට නියමිත ය.

විදේශීය අරමුදල් යටතේ අරඹා ඇති ව්‍යාපෘති අපේක්ෂිත කාලසීමාවේදී අවසන් කිරීමට පියවර ගන්නා ලෙස ජනාධිපතිවරයා උපදෙස් දෙනු ලැබී ය.

යල කන්නයේ වගා කටයුතු පිළිබඳ විශේෂ අවධානය යොමු කෙරුණු අතර වාරිමාර්ග දෙපාර්තමේන්තුව සහ මහවැලි අධිකාරිය යටතේ ජලය සැපයෙන ඉඩම්වලින් 50%ක් මේ වන විටත් වපුරා තිබේ.

මහවැලි ගෙවතු දෙලක්ෂ විසිපන්දහසක අතිරේක භෝග වගා සඳහා සැලසුම් කර ඇති බව වාරිමාර්ග අමාත්‍ය රොෂාන් රණසිංහ මහතා සඳහන් කළ අතර මෙතෙක් වී වගා කර නොමැති ඉඩම් වෙනත් භෝග වගා සඳහා යොමු කර ඇති බව නිලධාරිහු පෙන්වා දුන්හ.

ජනාධිපති කාර්ය මණ්ඩල ප්‍රධානි අනුර දිසානායක, අමාත්‍යාංශ ලේකම් යූ.ඩී.සී. ජයලාල් යන මහත්වරු ඇතුළු අමාත්‍යාංශයට අයත් රේඛීය ආයතනවල නිලධාරීහු සාකච්ඡාවට එක් ව සිටියහ.

නිසි පරිදි ඩීසල් නොමැතිවීම හේතුවෙන් ලබන සදුදා (06) සිටි සියලුම පෞද්ගලික බස්රථ ධාවනයෙන් ඉවත්වන බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පවසයි.

අධ්‍යයන පොදු සහතිකපත්‍ර සාමාන්‍ය පෙළ විභාගය අවසන් වීම නිසා මෙම තීරණය ගනනා බවත් ඔහු සඳහන් කළේය.

ලංගම ඩිපෝ මගින් පෞද්ගලික බස් රථ සඳහා ඉන්ධන ලබා දෙන බව ප්‍රකාශ කළත් ඒ සඳහා ද විධිමත් වැඩපිළිවෙළක් ක්‍රියාත්මක නොවන බවත් හෙතෙම සඳහන් කළේය.

එබැවින් බස් රථ සඳහා ඩීසල් ලබා ගැනීමට දින ගණන් පෝලිම්වල රැදී සිටීමට සිදුවන බවත් ඔහු කීය.

එබැවින් මගී බස් රථ සඳහා මේ සතිය තුළ ඩීසල් ලබාදීමට ප්‍රමුඛත්වයක් ලබා නොදුනහොත් සදුදා සිට බස් රථ ධාවනයෙන් සම්පූර්ණයෙන්ම ඉවත් වන බවත් විජේරත්න මහතා වැඩිදුරටත් පැවසීය.

භාණ්ඩ කිහිපයක් මත පනවා ඇති විශේෂ වෙළෙඳ භාණ්ඩ බදු මිල අද සිට ඉහළ දමා තිබේ.

මුදල් අමාත්‍ය අග්‍රාමාත්‍ය රනිල් වික්‍රමසිංහ මහතා නිවේදනය කරන්නේ අද සිට මාස 6ක කාලයක් නව බදු මිල ක්‍රියාත්මක බවයි.

ඒ අනුව ආනයනික යෝගට්, බටර්, චීස්, මිදි, ඇපල්, දොඩම් ඇතුළු තවත් ආනයනික ආහාර වර්ග රැසක විශේෂ වෙළෙඳ භාණ්ඩ බද්ද සැලකිය යුතු ප්‍රමාණයකින් ඉහළ දමා ඇත්තේ පහත පරිදි ය.

ජාතික නිවාස සංවර්ධන අධිකාරියේ සභාපති හිටපු පාර්ලිමේන්තු මන්ත්‍රී දුමින්ද සිල්වා මහතාව අපරාධය පරීක්ෂණ දෙපාර්තමේන්තුවේ නිලධාරීන් විසින් අද සවස අත්අඩංගුවට ගත්තේය.

ශ්‍රී ජයවර්ධනපුර රෝහලේ දී මෙම අත්අඩංගුවට ගැනීම සිදුව ඇත.

මේ සම්බන්ධයෙන් ශ්‍රේෂ්ඨාධිකරණයට කරුණු දක්වන බව අපරාධය පරීක්ෂණ දෙපාර්තමේන්තුවේ උසස් නිලධාරියෙක් සදහන් කළේය.

කිරිඇල්ල ආපදා සහන නිලධාරී ලෙස කටයුතු කළ පුන්සිරි කරුණාරත්න මහතා රාජකාරී කටයුතුවල නිරතව සිටියදී අද(01) සැඩ පහරකට අසුව මියගොස් ඇත.

රත්නපුර ප්‍රදේශයේ ගංවතුර ආපදා තත්වය නිරීක්ෂනය කිරීමට ගොස් සිටියදී සැඩ පහරකට හසුව ගසාගෙනයාමෙන් ඔහු මරණයට පත්ව ඇතැයි ආපදා කළමනාකරණ මධ්‍යස්ථානය සඳහන් කරයි.

ආපදා සහනසේවා කටයුතුවල නිරතව සිට යළි නිවස බලා යමින් සිටියදී ඔහු මෙම අනතුරුට ලක්වී තිබේ. ජයවර්ධනපුර විශ්ව විදයාලයේ විද්‍යාර්ථයකු වූ පුන්සිරි කරුණාරත්න මහතා මියයන විට 41වැනි වියේ පසුවිය.

දිවයිනේ ප්‍රදේශ කිහිපයක 2022-03-31 සහ 2022-05-15 යන දින අතර කාලය තුළ කර ඇති ගිනි තැබීම්, මංකොල්ලකෑම්, පුද්ගල ඝාතන ඇතුළු සියලු ආකාරයේ දේපළ හානි හා ජීවිත හානි පිළිබඳව විමර්ශනය කර වාර්තා කිරීම සඳහා ජනාධිපති ගෝඨාභය රාජපක්ෂ මහතා විසින් පරීක්ෂණ කොමිෂන් සභාවක් පත් කර තිබේ.

ශ්‍රේෂ්ඨාධිකරණ විනිසුරු, ජනාධිපති නීතිඥ බී.පී. අලුවිහාරේ මහතාගේ සභාපතිත්වයෙන් කොමිෂන් සභාව පත් කර ඇත.

සෙසු සාමාජිකයන් ලෙස හිටපු ජ්‍යෙෂ්ඨ නියෝජ්‍ය පොලිස්පති එස්.එම්. වික්‍රමසිංහ, අතිරේක ප්‍රධාන තක්සේරුකරු එන්.ඒ.එස්. වසන්ත කුමාර යන මහත්වරුන් ඊට ඇතුළත් ය.

ජනාධිපති අතිරේක ලේකම් බුවනෙක හේරත් මහතා එහි ලේකම් ලෙස කටයුතු කරයි.

කොමිෂන් සභාවේ සාමාජිකයන් වෙත පත්වීම් ලිපි ප්‍රදානය අද (01) පස්වරුවේ කොළඹ, කොටුව ජනාධිපති මන්දිරයේ දී ජනාධිපතිතුමා අතින් සිදු කෙරුණි.

කොළඹ ගාලුමුවදොර සහ කොල්ලුපිටිය ප්‍රදේශයේ මැයි මස 09 වනදා ඇතිවූ සිද්ධීන්ට අදාළව පාර්ලිමේන්තු මන්ත්‍රී ජොන්ස්ටන් ප්‍රනාන්දු, මහින්ද කහඳගම සහ තවත් දෙදෙනෙක් සැකකරුවන් ලෙස නම් කිරිමට අපරාධ පරීක්ෂණ දෙපාර්තමේන්තුව තීරණය කර ඇත.

අද කොටුව මහේස්ත්‍රාත් අධිකරණය හමුවේ අදාළ නඩුව කැඳවූ අවස්ථාවේදී අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි අතිරේක සොලිසිටර් ජෙනරාල් අයේෂා ජිනසේන මහත්මිය අධිකරණය වෙත මේ බව දැනුම් දී ඇත.

බොදුබල සේනා සංවිධානයේ මහලේකම් පූජ්‍ය ගලගොඩඅත්තේ ඥානසාර හිමිගේ නායකත්වයෙන් යුත් එක රටක් එක නීතියක් සඳහා වූ ජනාධිපති කාර්‍ය සාධක බළකායේ වලංගු කාලය තවත් සති 3කින් දීර්ඝ කර තිබේ.

එහි වලංගු කාල සීමාව පසුගිය 27 වැනිදායින් අවසන් වීමට නියමිතව තිබිණි.

ඒ සඳහා වන ගැසට් නිවේදනය ජනාධිපතිවරයා විසින් නිකුත් කර ඇත.

අධ්‍යාපනය පෙරපාසලේ සිටම සම්පූර්ණයෙන් ප්‍රතිව්‍යුහගත විය යුතු බව අධ්‍යාපන අමාත්‍ය ආචාර්ය සුසිල් ප්‍රේමජයන්ත මහතා පවසයි.

අධ්‍යාපනය ලබන සිසුන්ගෙන් කොටසක් උසස් අධ්‍යාපන ක්ෂේත්‍රයටත් හැකියා සහ දක්ෂතා සහිත තවත් පිරිසක් වෘත්තීය අධ්‍යාපනයටත් බෙදී යන ලෙස අධ්‍යාපන පද්ධතිය ම වෙනස් විය බවයි ඔහු සඳහන් කරයි.

එබැවින් සිසුන් මෙම දෙඅංශයට යොමු කිරීමේ දී වෘත්තීය දක්ෂතා පෙන්වන සිසුන් 09 ශ්‍රේණියේ සිටම තෝරා වෘත්තීය අධ්‍යාපන ක්ෂේත්‍රයට ප්‍රවේශ කිරීමෙන් වඩාත් සාධනීය ප්‍රතිඵල අත්කරගත හැකි බව අමාත්‍යවරයා වැඩිදුරටත් පවසයි.

නිපුණතා සංවර්ධන, වෘත්තීය අධ්‍යාපන පර්යේෂණ හා නව නිපැයුම් රාජ්‍ය අමාත්‍යාංශයේ දී ඊයේ (31) පැවති රැස්වීමක් අමතමින් අමාත්‍යවරයා මේ බව සඳහන් කර තිබේ.

සාමාන්‍ය පෙළ විභාග මධ්‍යස්ථානයකදී සිසුවියක අපයෝජනයට තැත් කළ අනුරාධපුර, හිදෝගම, කළුවිලසේන විභාග මධ්‍යස්ථානයේ නිරීක්ෂණ රාජකාරි සිදුකළ ගුරුවරයාගේ සේවය අත්හිටවූ බව විභාග දෙපාර්තමේන්තුව නිවේදනය කරයි.

විභාග කොමසාරිස් ජනරාල් එල් .එම්. ඩී. ධර්මසේන මහතා පැවසුවේ, එම මධ්‍යස්ථානයේ ශාලාධිපතිවරයා ද රාජකාරිවලින් ඉවත් කර ඇති බවයි.

වැඩ ආවරණය සඳහා සහකාර ශාලාධිපතිවරයා පත්කර ඇති බව ඔහු පැවසීය.

සියලුම මත්පැන් මිල ඉහල දැමීමට මත්පැන් සමාගම් තීරණය කර තිබේ.

වැට් බදු ඉහළ දැමීම සහ නිෂ්පාදන වියදම ඉහළ යාම හේතුවෙන් මෙම තීරණය ගත් බව එම සමාගම් පවසයි.

මේ සම්බන්ධයෙන් අදහස් දක්වමින් සුරාබදු කොමසාරිස් කපිල කුමාරසිංහ මහතා ප්‍රකාශ කළේ ඊට අදාළ මිල ගණන් සම්බන්ධයෙන් මේ වන විට සුරා බදු දෙපාර්තමේන්තුවට අදාළ සමාගම් විසින් දැනුම්දෙමින් සිටින බවයි.

කෙසේවෙතත් මත්පැන් යනු මිල සීමාවන්ට යටත් නොවන භාණ්ඩයක් බව ඔහු වැඩි දුරටත් සඳහන් කළේය.

ජාතික නිවාස සංවර්ධන අධිකාරීයේ සභාපති හිටපු පාර්ලිමේන්තු මන්ත්‍රී දුමින්ද සිල්වා මහතා අද පෙරවරුවේ ශ්‍රී ජයවර්ධනපුර රෝහලට ඇතුලත්ව ප්‍රතිකාර ලබන බව රෝහල් තොරතුරු සඳහන් කළේය.

භාරත ලක්ෂමන් ප්‍රේමචන්ද්‍ර ඝාතනයට නියම වූ මරණ දණ්ඩනයෙන් ජනාධිපති පොදු සමාවකින් දුමින්ද සිල්වා නිදහස ලැබීය.

එම පොදු සමාවට අභියෝගයට ලක්කරමින් භාරත ලක්ෂමන් ප්‍රේමචන්ද්‍ර මහාගේ දියණිය හිරුණිකා ප්‍රේමචන්ද්‍ර මහත්මියත් ඇගේ මවත් මානව හිමිකම් කොමිසමේ හිටපු කොමසාරිස්වරයෙක් වන නීතීඥ ගසාලි හුසේන් මහතාත් ශ්‍රේෂ්ඨාධිකරණය හමුවේ මූලික අයිතිවාසිකම් නඩුවක් ගොනු කරනු ලැබීය.

එම පෙත්සම සලකා බලමින් ශ්‍රේෂ්ඨාධිකරණය ඊයේ නියෝගකරනුයේ ජනාධිපතිවරයා විසින් දුමින්ද සිල්වා මහතාට ලබාදුන් පොදු සමාව අත්හිටුවීමටය.

ඒ අනුව අධිකරණය මෙන්ම නීතිපතිවරයාද පොලිස්පතිවරයාට සහ අපරාධ පරීක්ෂණ දෙපාර්තමේන්තුවට නියෝග කරනුයේ දුමින්ද සිල්වා මහතා අත්අඩංගුවට ගන්නා ලෙසය.

ඒ අනුව අපරාධ පරීක්ෂණ දෙපාර්තමේන්තුව දුමින්ද සිල්වා මහතා අත්අඩංගුවට ගැනීමට අවශ්‍ය මූලික පියවරයන් ගනිමින් සිටියදී අද පෙරවරුවේදී ඔහු රෝහල්ගතව ඇත්තේ අපස්මාර රෝග තත්ත්වයක් මත බව රෝහල් තොරතුරු සඳහන් කළේය.

මේ වන විට දුමින්ද සිල්වා මහතාව අත්අඩංගුවට ගැනීමට අපරාධ පරීක්ෂණ දෙපාර්තමේන්තුවේ විශේෂ පොලිස් කණ්ඩායමක් රෝහලට ගොස් තිබේ.

නීතිපතිවරයා ලබාදුන් උපදෙස් අනුව බස්නාහිර පළාත්භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාට ස්ථානමාරුවීක් ලබා නොදීමට හේතු දැක්වීම සඳහා පොලිස්පති සී.ඩී. වික්‍රමරත්න මහතා කොටුව මහේස්ත්‍රාත් අධිකරණය හමුවට පැමිණ ඇත.

ඉකුත් 09 වෙනිදා ගාලුමුවදොර අරගලකරුවන්ට පහරදීම සම්බන්ධයෙන් විදෙස් ගමන් තහනමකට ලක්ව සිටින දේශබන්දු තෙන්නකෝන් මහතා බස්නාහිර ජ්‍යෙෂ්ඨ නියෝජ්‍ය පොලිස්පතිධූරයෙන් මාරුකර යවන ලසෙ නීතිපතිවරයා පොලිස්පතිවරයාට දන්වා ඇත්තේ කෙරන විමර්ශන වලට අදාලව සාක්ෂිකරුවන් රැසක් සිටින්නේ බස්නාහිර පළාතුළ බැවින් ඒ සම්බන්ධයෙන් බලපෑමක් ඇති නොවීම සඳහා ඔහුට ස්ථානමාරුවීමක් ලබාදෙන ලෙසය. ඒ ගැන නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් අයේෂා ජිනසේන අධිකරණය හමුවේ ඉකුත් නඩු වාරයේදී සඳහන් කළාය.

එම උපදෙස අනුව ඒ වන විටත් දේශබන්දු තෙන්නකෝන් මහතාට ස්ථාන මාරුවක් ලබාදී නොතිබී තීබීම නිසා කොළඹ කොටුව ප්‍රධාන මහේස්ත්‍රාත් තිළිණ ගමගේ මහතා නියෝගකරනුයේ ඊළග නඩුවාරයේදී පොලිස්පතිවරයාට ඒ සම්බන්ධයෙන් හේතු දක්වන ලෙසය.

ඒ අනුව අද පොලිස්පතිවරයා අධිකරණය හමුවට පැමිණ ඇත්තේ පොලීසියේ නීතීඥයෙක් වන ජ්‍යෙෂ්ඨ පොලිස් අධිකාරී රුවන් ගුණසේකර මහතා සමඟිනි.

ජාතික ජන බලවේගය සහ පෙරටුගාමී සමාජවාදී පක්ෂය අතර හමුවක් ජනතා විමුක්ති පෙරමුණේ පැලවත්තේ පිහිටි ප්‍රධාන කාර්යාලයේදී පැවැත්විණි.

ජාතික ජන බලවේගයේ සහ පෙරටුගාමී සමාජවාදී පක්ෂයේ ක්‍රියාකාරිකයන් අතර ඊයේ පැවති මෙම හමුවේදී පවතින දේශපාලන සහ සමාජ ආර්ථික තත්ත්වයන් සම්බන්ධයෙන් දීර්ඝ ලෙස සාකච්ඡාවට ලක්ව තිබේ.

ඉකුත් 09 වෙනිදා ගාලුමුවදොර අරගලකරුවන්ට එල්ලවුණු ප්‍රහාරයෙන් පසු රටපුරා සිදුවූ සිදුවීම් මුල්කරගෙක මර්දනයක් ක්‍රියාත්මක වන බව මෙහිදී සාකච්ඡාවට ලක්ව තිබේ.

විධායක ජනාධිපති ක්‍රමය අහෝසි කිරීම, 21වන ආණ්ඩුක්‍රම ව්‍යවස්ථා සංශෝධනය ඇතතුළු දේශපාලන ප්‍රතිසංස්කරණයන් සම්බන්ධයෙන් මෙහිදී දෙපාර්ශවය අතර විශේෂයෙන් අදහස් හුවමාරුවී ඇත.

ගංවතුර තත්ත්වයෙන් පිඩාවට පත් ජනතාවට සහන සැලසීමට අග්‍රාමාත්‍ය රනිල් වික්‍රමසිංහ මහතා බලධාරීන්ට උපදෙස් දී තිබේ.

එ අනුව මුලික සාකච්ඡාවක් අග්‍රාමාත්‍ය ලේකම් සමන් එකනායක මහතා සහ දිස්ත්‍රික් ලේකම්වරුන් අතර සිදු වී ඇත.

කලුතර, ගම්පහ, ගාල්ල, රත්නපුර යන දිස්ත්‍රික් ලේකම්වරු සමග පැවති එම සාකච්ඡාවේ දි අග්‍රාමාත්‍ය ලේකම්වරයා සදහන් කර ඇත්තේ ගංවතුරින් ආපදාවලට පත් ජනතාවට සහන ලබාදීමට මහා භාණ්ඩාගාර මෙහයුම් දෙපාර්තමේන්තුවේ මුදල් වෙන් කර ඇති බවයි .

එමෙන්ම අග්‍රාමාත්‍ය රනිල් වික්‍රමසිංහ මහතා භාණ්ඩාගාරයට ද උපදෙස් දි ඇත්තේ දිස්ත්‍රික් ලේකම්වරුන් හරහා සහන මුදල් ලබා දිමට පියවරගන්නා ලෙසයි.

අධික ලෙස මත්ද්‍රව්‍ය හා මත්පැන් පානය කිරීමෙන් හටගත් රෝගී තත්ත්වයක් හේතුවෙන් මන්නාරම රෝහලට ඇතුලත්කළ සිව් දෙනෙකුගෙන් දෙදෙනෙක් මිය ගොස් ඇත.

මෝටර් රථයකින් ගමන් කරමින් සිටි ඔවුන් සිව් දෙනා රෝහල්ගතකර ඇත්තේ ඇතිවුණු සංකූලතාවක් හේතුවෙනි.

මියගොස් ඇත්තේ අවුරුදු 26ක් සහ 34ක් වයසැති තලෙයිමන්නාරම හා පේසාලේ පදිංචිකරුවන් දෙදෙනෙකි.

මොවුන් ඊයේ සවස මත්ද්‍රව්‍ය සහ මත්පැන් භාවිතාකර මෝටර් රථයක නැගී ගමන් කරමින් සිටියදී අසනීප වී ඇත්තේ උයින්කුලම ප්‍රදේශයේදීය.

මිය යාමට හේතුව අධික ලෙස මත්ද්‍රව්‍ය සහ මත්පැන් පානය කිරීම බව අනාවරණය වී ඇත්තේ පශ්චාත් මරණ පරීක්ෂණයේදී බව මන්නාරම පොලීසිය සඳහන් කරයි.

මාතෘභූමිය මේ වනවිට දුෂ්කරම සහ අභියෝගාත්මක කාලපරිච්ඡේදයක් පසු කරමින් සිටින බැවින් ශ්‍රී ලංකා යුද්ධ හමුදාව රටෙහි වත්මන් අවශ්‍යතාවයන් සඳහා අවශ්‍ය මෙහෙවර ඉටුකරමින්, ‘ජාතියේ ආරක්‍ෂකයා’ යන ආදර්ශ පාඨය පෙරටුකර පුරවැසියන්ට සහයවීම සඳහා සිය උපරිම සහයෝගය ලබා දෙනු ඇති බව නව යුද හමුදාපති ලුතිනන් ජෙනරල් එච්.එල්.වී.එම්. ලියනගේ ආර්ඩබ්ලිව්පී ආර්එස්පී එන්ඩීයූ මහතා පවසයි.

සිය ධුරයේ වැඩභාර ගැනීමෙන් අනතුරුව නිවේදනයක් නිකුත් කරමින් යුද හමුදාපතිවරයා පවසන්නේ මෙම සියලු අභියෝග මධ්‍යයේ, ‘වෘත්තීයව නිපුණ හමුදාවක්’ බවට පරිවර්තනය වීම ප්‍රධාන වශයෙන්ම මනා ප්‍රමිතියෙන් යුතු පුහුණුව මත රඳාපවතින බැවින්, යුද්ධ හමුදාවේ පුහුණු කටයුතු කෙරෙහි තමාගේ පූර්ණ අවධානය යොමු කර ඇති බවයි.

මීට අමතරව යුද්ධයේදී ජීවිත පරිත්‍යාග කළ සහ තුවාල ලැබූ රණවිරුවන්ගේ පවුල් වෙත විශේෂ අවධානයක් යොමු කරමින් යුද්ධ හමුදාව විසින් දැනට ලබාදී ඇති සුබසාධන පහසුකම් තවදුරටත් ඉහළ නංවාලීමට අවශ්‍ය පියවර ගැනීමට තමා සැලසුම් කොට ඇති බව ද හෙතෙම කියාසිටී.

ශ්‍රී ලංකා යුද්ධ හමුදාවේ 24 වන යුද්ධ හමුදාධිපති ලුතිනන් ජෙනරල් විකුම් ලියනගේ මහතා විසින් නිකුත් කරන ලද නිවේදනය පහත දැක්වේ.

“මා කෙරෙහි විශ්වාසය තබමින් 2022 ජූනි මස 01 දින සිට ශ්‍රී ලංකා යුද්ධ හමුදාවේ 24 වන යුද්ධ හමුදාධිපති වශයෙන් මා පත්කිරීම සබැඳිව සන්නද්ධ හමුදා සේනාධිනායක, අතිගරු ජනාධිපතිතුමන් වෙත ප්‍රථමයෙන් ස්තූතිවන්ත වෙමි. එසේම, මෙම යුද්ධ හමුදාධිපති තනතුරට නිර්දේශ කිරිම සහ මා වෙත ලබාදුන් මාර්ගෝපදේශකත්වය වෙනුවෙන්ද අභිමානවත් ගජබා රෙජිමේන්තුවේ කීර්තිමත් රණවිරුවකු වන ආරක්‍ෂක ලේකම් ජෙනරල් කමල් ගුණරත්න (විශ්‍රාමික) වෙත ස්තුතිය ප්‍රකාශ කිරිමට මෙය අවස්ථාවක් කරගනිමි. එමෙන්ම, හිටපු යුද්ධ හමුදාධිපති මෙන්ම වත්මන් ආරක්‍ෂක මාණ්ඩලික ප්‍රධානි ජෙනරල් ශවේන්ද්‍ර සිල්වා මගේ වෘත්තීය ජීවිතය මුළුල්ලේ මට ලබාදුන් මඟපෙන්වීම් සහ සහයෝගය මෙන්ම යුද්ධ හමුදාවේ ඉදිරි අභිවෘද්ධිය සඳහා එතුමන් කළ සේවය ද ඇගයීමට හා ප්‍රශංසාවට ලක්කිරිමට කැමැත්තෙමි.

දශක තුනක් පුරා පැවැති දීර්ඝ කාලීන කුරිරු ත්‍රස්තවාදය සාර්ථකව මුලිනුපුටා දැමූ ශ්‍රී ලංකා යුද්ධ හමුදාව, මහජනතාවට සාමකාමීව ජීවත්වීමට හැකිවන පරිදි අපේ මාතෘභූමියට සාමය සහ සහජීවනය උදාකර දෙනු ලැබූහ. තවද, රට තුළ විටින්විට ඇති වන ජාතික හදිසි අවස්ථා, ස්වභාවික ආපදා තත්ත්වයන් තුලදී මෙන්ම අනෙකුත් ව්‍යසන අවස්ථාවන්හිදී නිර්භීත යුද්ධ හමුදා සාමාජිකයින් වශයෙන් ඉදිරිපත් වීමට නිරන්තර සූදානමින් සිටින අතර, කොවිඩ් – 19 වසංගත කාල සීමාවේදී එම වසංගතය මර්ධනය කිරීම සඳහා රාජ්‍ය සහ සිවිල් සංවිධානයන් වෙත අවශ්‍ය සහයෝගය නොමසුරුව ලබාදීමෙන් අප වීරෝදාර භටපිරිස් දැක්වූ දායකත්වය තිරසාර කැපවීම සහ වෘත්තීය නිපුණත්වය පිළිබිඹු කරයි.

අප දන්නා පරිදි අපේ මාතෘභූමිය මේ වනවිට දුෂ්කරම සහ අභියෝගාත්මක කාලපරිච්ඡේදයක් පසු කරමින් සිටී. ශ්‍රී ලංකා යුද්ධ හමුදාව රටෙහි වත්මන් අවශ්‍යතාවයන් සඳහා අවැසි මෙහෙවර ඉටුකරමින්, ‘ජාතියේ ආරක්‍ෂකයා’ යන ආදර්ශ පාඨය පෙරටුකරගනිමින් පුරවැසියන්ට සහයවීම සඳහා සිය උපරිම සහයෝගය ලබා දෙනු ලබයි. තවද, ශ්‍රී ලංකා යුද්ධ හමුදාව විසින් ආරම්භ කර ඇති හරිත කෘෂිකාර්මික ව්‍යාපෘති සහ එක්සත් ජාතීන්ගේ සාම සාධක මෙහෙයුම් සඳහා භටපිරිස්වල දායකත්වය වැඩි කිරීම මෙම අවස්ථාවේදී රටට වාසිදායක ප්‍රතිඵල ගෙන දෙනු ඇත.

මෙම සියලු අභියෝග මධ්‍යයේ, ‘වෘත්තීයව නිපුණ හමුදාවක්’ බවට පරිවර්තනය වීම ප්‍රධාන වශයෙන්ම මනා ප්‍රමිතියෙන් යුතු පුහුණුව මත රඳාපවතින බැවින්, යුද්ධ හමුදාවේ පුහුණු කටයුතු කෙරෙහි මාගේ පූර්ණ අවධානය යොමු කරමි. දේශීය හා විදේශීය පුහුණු පාඨමාලා මගින් වෘත්තීය දැනුමේ නිම් වළලු පුළුල් කිරීමට අවශ්‍ය මඟ පෙන්වීම සහ නායකත්වය ලබාදීමට අපේක්‍ෂා කරනු ලබනවා. මීට අමතරව යුද්ධයේදී ජීවිත පරිත්‍යාග කළ සහ තුවාල ලැබූ රණවිරුවන්ගේ පවුල් වෙත විශේෂ අවධානයක් යොමු කරමින් යුද්ධ හමුදාව විසින් දැනට ලබාදී ඇති සුබසාධන පහසුකම් තවදුරටත් ඉහළ නංවාලීමට අවශ්‍ය පියවර ගැනීමට මා සැලසුම් කොට තිබෙනවා.

ශ්‍රී ලංකා යුද්ධ හමුදාව ‘ජාතියේ ආරක්‍ෂකයා’ ලෙස ප්‍රජාතන්ත්‍රවාදී රාමුව තුළ ආණ්ඩුක්‍රම ව්‍යවස්ථාව ආරක්‍ෂා කිරීමට බැඳී සිටින අතරම මාතෘභූමියේ ඒකීයභාවය, ස්වෛරීභාවය සහ භෞමික අඛණ්ඩතාව ආරක්‍ෂා කිරීමට දිවිහිමියෙන් කැපවී සිටින අතර ඉහළ වෘත්තීයභාවය, විනය සහ අඛණ්ඩතාවය තුලින් නිසි කටයුතු සිදුකරන බවට සඳහන් කිරීමට කැමැත්තෙමි.” යනුවෙන් එම නිවේද‍නයේ දැක්විණ.

හෙරොයින් තොගයක් රැගත් ශ්‍රී ලංකික ධීවර යාත්‍ර දෙකක් සමඟ ශ්‍රී ලංකිකයන් පිරිසක් ඉන්දියානු අත්අඩංගුවට පත්ව ඇතැයි එරටින් ලැබෙන තොරතුරුවල සඳහන්ය.

ඉන්දියානුු වෙරළ ආරක්ෂක බලකාය සහ නාවික හමුදාව විසින් ඒකාබන්ධව මේ දිනවල ඉන්දියන් සාගර කලාපයේ කරනු ලබන විශේෂ මෙහෙයුමකට එම යාත්‍රා දෙක කොටුවී ඇතැයි සඳහන් වන්නේ මෙයට දින දෙකකට පමණ පෙරය.

මේ සම්බන්ධයෙන් ශ්‍රී ලංකා පොලිස් මත්ද්‍රව්‍ය කාර්යාංශය ද ඉන්දියාවෙන් තොරතුරු විමසා ඇති බව සඳහන්ය. මෙතක් නිල වශයෙනන් කිසිදු තොරතුරක් එරටින් වාර්තා වී නැත.

මත්ද්‍රව්‍ය ප්‍රවාහනය සම්බන්ධයෙන් මෙයට පෙර අවසනායට ශ්‍රී ලාංකිකයින් සමග බහුදින යාත්‍රාවක් ඉන්දියානු වෙරළ ආරක්ෂක බලකා සහ ඉන්දීය නාවික හමුදාව එක්ව කළ මෙහෙයුමකින් අත්අඩංගුවට ගෙන ඇත්තේ 2021 අප්‍රේල් 19 වෙනිදාය. ශ්‍රී ලාංකික සැකකරුවන් 05 දෙනෙක් එහිදී අත්අඩංගුවට පත්ව ඇත. එම යාත්‍රාවේ හෙරොයින් කිලෝ 337 ක් සඟවා තිබියදී සොයාගෙන තිබුණි.

එම වසරේම මාර්තු 24 වෙනිදාද ඉන්දියානු වෙරළ ආරක්ෂක බලකාය විසින් කළ වැටලීමකින් හෙරොයින් කිලෝ 300.6ක් සමඟ ශ්‍රී ලාංකිකයින් 06 දෙනෙක් අත්අඩංගුවට ගත්තේය. එම යාත්‍රාවේ සඟවා තිබී ඒ.කේ. 47 වර්ගයේ ගිනි අවි 0ක්ද පතොරම් 1000කට වැඩි ප්‍රමාණයක්ද සොයාගෙන තිබුණි.

ඊට දින 18කට පෙරද හෂිස් කිලෝ 100ක් සහ හෙරොයින් කිලෝ 150ක් ප්‍රවාහනය කරමින් තිබුණු බහුදින යාත්‍රාවක් ඉන්දියානු වෙරළ ආරක්ෂක බලකා අත්අඩංගුවට පත්වී තිබුණේ ද ශ්‍රී ලාංකිකයන් 06 දෙනෙක් සමඟිනි.

ඊට පෙර ශ්‍රී ලාංකිකයන් සමඟ මත්කුඩු ප්‍රවාහනය කරමින් තිබුණු බහුදින යාත්‍රාවක් ඉන්දියානු වෙරළ ආරක්ෂකයින් අත්අඩංගුවට ගෙන ඇත්තේ 2020 නොවැම්බර් 26 වෙනිදාය. එහි තිබී හෙරොයින් කිලෝ 98.8ක් සහ අයිස් කිලෝ 18ක් සමඟ ශ්‍රී ලාංකිකයන් 06 දෙනෙක් අත්අඩංගුවට ගෙන තිබුණි.

බලුකිස්තාන් කලාපයේ පාකිස්තානයේ සහ ඉරානයේ භූමි ප්‍රදේශවල පිහිටා ඇති මැක්‍රාන් වෙරළ තීරය ඔස්සේ ඇෆ්ගනිස්ථානයේ නිෂ්පාදනය කරන හෙරොයින් පකිස්තානු ජාවාරම්කරුවන් විසින් ලොවපුරා බෙදා හරින්නේ ඉන්දියන් සාගරය ඔස්සේය.

අද (01) දිනයේ දිවයින පුරා ගෘහස්ථ LP ගෑස් සිලින්ඩර් බෙදා හැරීමේ ලැයිස්තුව ලිට්‍රෝ සමාගම විසින් නිකුත් කර තිබේ.

එම ලැයිස්තුව පහත දැක්වේ.

රටතුළ පවතින ආර්ථික අර්බුදය සැළකිල්ලට ගෙන මෙවර හජ් වන්දනාව සඳහා මෙරටින් ඉස්ලාම් භක්තිකයන් සහභාගි නොකිරීමට මුස්ලිම් ආගමික හා සංස්කෘතික කටයුතු දෙපාර්තමේන්තුව තීරණය කර ඇත.

මෙම තීරණයට එළඹ ඇත්තේ ජාතික හජ් කමිටුව, හජ් සංචාරක සංවිධාන, මුස්ලිම් ආගමික හා සංස්කෘතික කටයුතු දෙපාර්තමේන්තුව ඇතුළු ඊට අදාල පාර්ශව අතර පැවති සාකච්ඡාවකින් අනතුරුවය.

මෙවර හජ් වන්දනාව සඳහා ඉස්ලාම් බැතිමතුන් 1585 දෙනෙකුට මෙරටින් සහභාගිවීමට අවස්ථාව හිමිව තිබුණි.