අ.පො.ස.(සා.පෙළ) විභාගය සඳහා 2021 (2022) වර්ෂයේ දී පළමුවරට පෙනී සිට විභාගය සමත්ව 2024 වර්ෂයේ දී අ.පො.ස (උ.පෙළ) විභාගයට පෙනී සිටීමට නියමිත, ආර්ථික දුෂ්කරතා ඇති සිසුන්ට ජනාධිපති අරමුදල මගින් ශිෂ්‍යත්ව පිරිනැමීමේ වැඩසටහන ආරම්භ කර තිබේ.

ඊට අනුව ශිෂ්‍යත්ව සුදුසුකම් ලැබීමට අයදුම්කරුවන්ගේ පවුලේ මාසික ආදායම රු. 75,000/- නොඉක්මවිය යුතු අතර රජයේ පාසලක හෝ ගාස්තු අය නොකරන පෞද්ගලික පාසලක හෝ ඉගෙනුම ලබන ශිෂ්‍යයෙක් විය යුතුය.

අයදුම්කරු 2021 (2022) වර්ෂයේදී පවත්වන ලද අ.පො.ස (සා.පෙළ) විභාගයට පළමුවරට පෙනී සිට 2024 වර්ෂයේ දී අ.පො.ස (උ.පෙළ) හැදෑරීම සඳහා සම්පූර්ණ සුදුසුකම් ලැබ සිටිය යුතුය.

එක් අධ්‍යාපන කලාපයකට හිමිවන ශිෂ්‍යත්ව ප්‍රමාණය 30ක් වන අතර, එලෙස ‍තෝරා ගන්නා ශිෂ්‍යත්වලාභීන්ට අ.පො.ස (උ.පෙළ) විභාගයට පෙනී සිටින තෙක් මසකට රු. 5,000.00 බැගින් මාස 24ක උපරිම කාලසීමාවක් සඳහා ශිෂ්‍යාධාරය පිරිනමනු ලැබේ.

මීට අදාළ අයදුම්පත්‍ර අධ්‍යාපන අමාත්‍යාංශය මගින් දැනටමත් විදුහල්පතිවරුන් වෙත යොමු කර ඇත. ශිෂ්‍යත්ව අපේක්ෂකයන් අදාළ අයදුම්පත්‍ර විදුහල්පති මගින් ලබාගෙන ආදායම් තත්ත්වය පිළිබඳ ග්‍රාම නිලධාරීගේ අදාළ නිර්දේශය සහිතව 2022-12-23 වන දිනට පෙර විදුහල්පති වෙත භාරදීමට කටයුතු කළ යුතුය. එම අයදුම්පත්‍ර විදුහල්පතිවරු විසින් කලාප අධ්‍යාපන අධ්‍යක්ෂ වෙත යොමු කළයුතුය.

කලාප අධ්‍යාපන කාර්යාල වෙත විදුහල්පතිවරුන් විසින් ලබා දෙන අයදුම්පත්‍ර කලාප අධ්‍යාපන අධ්‍යක්ෂකගේ සභාපතිත්වයෙන් යුත් කමිටුවක් මගින් තෝරාගත යුතු අතර, ඉහළම සුදුසුකම්ලාභීන් 30 දෙනා තෝරාගෙන අයදුම්කරුගේ ජාතික හැඳුනුම්පතේ පිටපතක් සහ බැංකු ගිණුමේ පිටපතක් හා ඊට අදාළ අනෙකුත් විස්තර සම්පූර්ණ කර කලාප අධ්‍යාපන අධ්‍යක්ෂ විසින් පළාත් අධ්‍යාපන අධ්‍යක්ෂ මඟින් අධ්‍යාපන අමාත්‍යාංශය වෙත 2023-02-03 දිනට පෙර ලබාදීමට කටයුතු කළයුතුය. ප්‍රමාද වී ලැබෙන අයදුම්පත්‍ර ප්‍රතික්ෂේප කරනු ලැබේ.

මීට අදාළ පුවත්පත් දැන්වීම ජනාධිපති අරමුදල මගින් 2022-12-05 දින “දිනමිණ” සහ “තිනකරන්” යන ජාතික පුවත්පත්වල පළ කර ඇති අතර අදාළ අයදුම්පත්‍රය හා උපදෙස් පත්‍රිකාව ජනාධිපති අරමුදලේ http://www.presidentsfund.gov.lk වෙබ් අඩවියට පිවිසීමෙන් ද ලබාගත හැකිය.

ජනාධිපති රනිල් වික්‍රමසිංහ මහතාගේ උපදෙස් පරිදි වැඩසටහන ක්‍රියාවට නැංවේ.

සුදුසුකම් සපුරා ඇති ශිෂ්‍ය ශිෂ්‍යාවන්ගෙන් අයදුම්පත් කැඳවීම ආරම්භ කරන ලෙස ජනාධිපති ලේකම් සමන් ඒකනායක මහතා විසින් පසුගියදා (30) අධ්‍යාපන අමාත්‍යාංශයේ ලේකම්වරයා වෙත ලිපියක් යොමු කර තිබේ.

පොලිස් නිලධාරීන් ලෙස පෙනී සිටිමින් මහමඟ ගමන්කරන කාන්තාවන්ගේ ගෙල බැදි රන් මාල සහ පිරිමින්ගේ මුදල් පසුම්බි කොල්ලකෑම්වල නිරතව සිටි කාන්තාවන් දෙදෙනෙකුගෙන් සමන්විත කොල්ලකල්ලියක 06 දෙනෙක් පිළියන්දල පොලීසියේ නිලධාරීන් විසින් ඊයේ අත්අඩංගුවට ගෙන තිබේ.

කොල්ලකෑම්වල නිරත රන් භාණ්ඩ උකස් මධ්‍යස්ථානවලට ගොස් අලෙවි කරනුයේද කාන්තාවන් දෙදෙනා බවත් ඇතැම් අවස්ථාවලදි ඔවුන්ද කොල්ලකෑම්වලට සම්බන්ධව ඇති බවත් විමර්ශන වලින් හෙළිවී ඇත.

කැස්බෑව, හොරණ, කහතුඩුව, මොරගෙහහේන, මහරගම, බොරලැස්ගමුව යන ප්‍රදේශවල කොල්ලකෑම් 15ක් මෙම කොල්ල කල්ලිය විසින් කර ඇති බව අනාවරණය වී තිබේ.

මෙම කල්ලිය විසින් යතුරු පැදිලිවල ගමන්කරන අතර තුර කාන්තාවන්ගේ ගෙල බැදි රන් මාලවලට අමතරව අත් බෑග්ද කොල්ලකා ඇතැයි පොලීසිය කියයි.

අත්අඩංගුවටගත් සැකකරුවන් අවුරුදු 26ත් 46ත් අතර වයස්වල පසුවන්නන්ය.

මොරගොල්ල ජල විදුලි බලාගාර ව්‍යාපෘතියේ වැඩ බිමකින් පුපුරණ ද්‍රව්‍ය කිලෝ 25ක් අතුරුදන්ව ඇති බවට පැමිණිල්ලක් ගම්පොල පොලිස් ස්ථානයට ලැබී තිබේ.

එම ජල විදුලි බලාගාර ව්‍යාපෘතියේ ආරක්ෂක නිලධාරියෙකු විසින් පොලීසියට කර ඇති පැමිණිල්ලෙහි සඳහන් වන්නේ ඇමෝනියා නයිට්‍රේට් තොගයක් මෙසේ අතුරුදන්ව ඇති බවය. මෙම පුපුරණ ද්‍රව්‍ය තොගය කිසියම් අයෙක් විසින් සොරාගෙන ගොස් ඇති බව පොලීසිය සැකකරයි.

කිලිනොච්චිය ප්‍රදේශයේදී අතිසුඛෝපභෝගී බස් රථයක් අද(05) අලුයම අනතුරට ලක්වීමෙන් එහි සිටි 23 දෙනෙකු තුවාල ලබා රෝහල්ගත කර තිබේ.

කොළඹ සිට යාපනය බලා ධාවනය වූ මෙම බසය 155 වැනි කිලෝමීටර කණුව අසලදී මාර්ගයේ ගමන් කරමින් සිටි ගවයෙකු ගැටීමෙන් බස් රථය පෙරළී ගොස් මෙම අනතුර සිදුව ඇති බව වාර්තා වේ.

සිද්ධියෙන් තුවාල ලැබූවන් කිලිනොච්චිය මහ රෝහලට ඇතුළත් කර ඇත.

ඔවුන්ගේ තත්ත්වය බරපතළ නොවන බව ද සඳහන් ය.

අද(05) දිනයේත් රටපුරා පැය 2යි විනාඩි 20ක විදුලි කප්පාදුවක් සැලසුම් කර තිබේ.

ඒ අනුව මහජන උපයෝගීතා කොමිසම විසින් නිකුත් කර ඇති අද විදුලි කප්පාදු කාලසටහන පහත දැක්වේ.

ආනයනික ලොකු ළූණු සහ ටින් මාළු සඳහා පනවා තිබු විශේෂ වෙළෙඳ භාණ්ඩ බද්ද සංශෝධනය කිරීමට රජය පියවර ගෙන තිබේ.

ඒ අනුව ලොකුළුණු කිලෝග්‍රෑම් 1ක් සඳහා පනවා තිබු රුපියල් 50ක විශේෂ වෙළෙඳ භාණ්ඩ බද්ද රුපියල් 10ක් දක්වා අඩුකර තිබේ.

ටින් මාළු කිලෝග්‍රෑම්යක් සඳහා අය කළ රුපියල් 100ක විශේෂ වෙළෙඳ භාණ්ඩ බද්ද රුපියල් 200 දක්වා ඉහළ දමා ඇත.

දෙසැම්බර් මස පළවන දින සිට ක්‍රියාත්මක වන පරිදි අදාළ බදු සංශෝධනයන් සිදුකර ඇති බව මුදල් ආර්ථික ස්ථායිකරණ සහ ජාතික ප්‍රතිපත්ති අමාත්‍යංශය සඳහන් කළේය.

අධ්‍යයන පොදු සහතික පත්‍ර උසස් පෙළ 2021 විභාගයේ නැවත සමීක්ෂණ ප්‍රතිඵල නිකුත් කළ පසුව ප්‍රතිඵල ඉහළ යාම මත යම් සිසුන් පිරිසකගේ කඩයිම් ලකුණු ඉහළ ගියහොත් අනෙක් සිසුන්ගේ කඩඉම් ලකුණු පහළ යාමක් සිදු නොවන බව විශ්ව විද්‍යාල ප්‍රතිපාදන කොමිෂන් සභාව කියයි.

ප්‍රතිඵල වෙනස් වීම මත සිසුන්ගේ කඩඉම් ලකුණු ඉහල පහල යාම සාමාන්‍ය පරිදි සිදුවන නමුත් කඩයිම් ලකුණු ඉහළ නැංවීම මිස තවත් පිරිසකගේ කඩයිම් කඩයිම් ලකුණු පහළ නොදැමීමට කැබිනට් මණ්ඩලය තීන්දුවක් ගෙන තිබෙන බව එම කොමිෂන් සභාව කියයි.

එමනිසා නැවත සමීක්ෂණ ප්‍රතිඵල හේතුවෙන් කිසිදු දරුවකුගේ කඩයිම් ලකුණු පහළ නොයන බව ද විශ්ව විද්‍යාල ප්‍රතිපාදන කොමිෂන් සභාව කියයි.

මේ මස පළමුවැනිදා සිට සංචාරක කලාපවල විදුලිය කප්පාදු නොකරන බවට ප්‍රකාශ කළ ද ගාල්ල කොටුව ප්‍රදේශයේ සාමාන්‍ය පරිදි දිනපතා විදුලිය කපා හරින බවට එහි ව්‍යාපාරිකයෝ චෝදනා කරති.

ගාල්ල කොටුව ප්‍රදේශයට ඉකුත් දින කීපයේදීම සාමාන්‍ය පරිදි දහවල් සහ රාත්‍රී කාලයේදී විදුලිය කපා හැරි බව ද එම නිසා ව්‍යාපාරිකයින් සහ සංචාරකයින් බලවත් අසරණතාවයකට පත්වූ බවද ඔවුහු පවසති.

මේ දිනවල ගාල්ල ප්‍රදේශයේ සංචාරකයින් බහුලව ගැවසෙන අතර විදුලිය කපා හැර ඇති අවස්ථාවලදී ඔවුන් වෙළඳසැල් වෙත නොපැමිණෙන බවද ව්‍යාපාරිකයෝ පවසති.

මේ මස පළමුවෙනි දින සිට රුහුණේ සහ ඇල්ල ප්‍රදේශයේ සංචාරක කලාපවලට විදුලිය විසන්ධි නොකරන බව විදුලිබල හා බලශක්ති අමාත්‍යාංශය ඉකුත්දා නිවේදනය කළේය.

පළාත් පාලන මැතිවරණය ප්‍රකාශයට පත්කිරීමට මැතිවරණ කොමිෂන් සභාවට කිසිදු නීතිමය බාධාවක් නැති හෙයින් මේ සතිය තුල එම මැතිවරණය ප්‍රකාශයට පත් කරනු ඇතැයි අපේක්ෂා කරන බව නිදහස් හා සාධාරණ මැතිවරණයක් සඳහා ජනතා ක්‍රියාකාරීත්වය හෙවත් පැෆරල් සංවිධානය මැතිවරණ කොමිෂන් සභාවේ සභාපතිවරයා වෙත ලිපියක් යවමින් සඳහන් කර තිබේ.

දැනට පවතින වාතාවරණය තුළ මැතිවරණය ප්‍රකාශයට පත් නොකර කල්මරමින් සිට යම් හෙයකින් ආණ්ඩුව මැතිවරණය කල් දැමීම සඳහා නීතිමය බාධාවක් ඇති කළහොත් එහි වගකීම මැතිවරණ කොමිසම භාරගත යුතු බව ද එම ලිපියේ සඳහන් කර ඇත.

ආණ්ඩුක්‍රම ව්‍යවස්ථාවේ විසි එක් වැනි සංශෝධනය සම්මත කිරීම නිසාත් නව මැතිවරණ කොමිසමක් ස්ථාපිත කර නැති නිසාත් මැතිවරණයක් පැවැත්වීමට බාධාවක් නොවන බව ද ඒ පිළිබඳ නීතිපතිවරයාගෙන් විමසීමට අවශ්‍ය නැති බවද පැෆරල් සංවිධානයෙන් මැතිවරණ කොමිසම වෙත යවා ඇති ලිපියේ සඳහන් වෙයි.

මෙවැනි අන්තර්කාලීන තත්වයන් යටතේ හිටපු මැතිවරණ කොමසාරිස්වරුන් වන දයානන්ද දිසානායක සහ මහින්ද දේශප්‍රිය යන මහත්වරුන් ඡන්ද විමසීම් ගණනාවක් පැවැත් වූ බව ද පැෆරල් සංවිධානය මැතිවරණ කොමිසම වෙත යවා ඇති ලිපියේ සඳහන් කර තිබේ .

රජයේ පාසල්වල 2022 වසරේ තුන්වැනි වාරය හෙට (05) සිට ආරම්භ කෙරෙන බව අධ්‍යාපන අමාත්‍යාංශය සඳහන් කරයි.

ඒ අනුව තුන්වැනි වාරය හෙට සිට 2023 වසරේ මාර්තු මස 24 වැනි දින දක්වා පැවැත්වෙන බවද අධ්‍යාපන අමාත්‍යාංශය කියයි.

තෙවන වාරය තුළ එනම් ජනවාරි මාසයේදී අධ්‍යයන පොදු අධ්යයන පොදු සහතික පත්‍ර උසස් පෙළ විභාගය පැවැත්වෙන බැවින් එම කාලය තුළ සිසුන්ට අතරමැද නිවාඩුවක් හිමිවන බවද අධ්‍යාපන අමාත්‍යංශය කියයි.

මේ අතර අධ්‍යාපන අමාත්‍යාංශය සඳහන් කරන්නේ 2022 වසරේ අපොස සා පෙළ ප්‍රතිපල මත උසස්පෙළ හැදෑරීම සඳහා අයදුම් කිරීමේ දී උසස් පෙළ විෂය ධාරාව නොමැති පාසල්වල සිසුන් විසින් විෂය ධාරාව ඇති පාසල් සඳහා ඉල්ලුම්පත්‍ර අදාල පාසලට යොමු කිරීම සිදුකළ යුතු බව ය.

අධ්‍යාපන අමාත්‍යාංශය වෙත යොමු කරන අයදුම්පත් බාර නොගන්නා බවද එම අමාත්‍යාංශය කියයි.

රාජ්‍ය ආයතන ප්‍රතිව්‍යුහගත කිරීම යනු පෞද්ගලීකරණය කිරීම නොවන බව මුදල් රාජ්‍ය අමාත්‍ය ආචාර්ය රංජිත් සියඹලාපිටිය මහතා පවසයි.

ආයතනයෙන් ආයතනය විද්වත් කමිටුවක් මගින් විශේෂ විශ්ලේෂණයකට භාජනය කොට, අවශ්‍ය වෙනස්කම් සිදුකිරීම එමගින් සිදුවන බව අමාත්‍යවරයා ප්‍රකාශ කළේ රුවන්වැල්ලේ පැවති වැඩසටහනකින් අනතුරුව මාධ්‍යවේදීන් විසින් යොමුකරන ලද ප්‍රශ්නයකට පිළිතුරු ලබා දෙමිනි.

මෙහිදී තවදුරටත් අදහස් දැක්වූ අමාත්‍යවරයා විවිධ ආයතන ප්‍රතිව්‍යුහගත කිරීමේදී විවිධ කොටස් ඇති බවත්, එය ආයතනයෙන් ආයතනයට විවිධාකාරයෙන් ක්‍රියාත්මක විය හැකි බවත් විස්තර කරමින් පැවසීය.

එමෙන්ම අමාත්‍යවරයා එහිදී පැවසූයේ ප්‍රතිව්‍යුහගතකරණයට ලක් කෙරෙන ආයතන සියල්ලම පාහේ මූලික ප්‍රාග්ධන හා කාරක ප්‍රාග්ධන ඌනතාවයකින් පෙලෙන බවත්, එයට ශක්තිය ලබාදීම මෙහි එක් අරමුණක් බවයි.

එමෙන්ම ලෝකයේ ඇති නවීන තාක්ෂණය පිළිබඳ ගැටළු, වඩාත් හොඳ කළමණාකරණයක් ලබාදීම, ඒ තුළින් නිෂ්පාදන වියදම අඩුකර ගැනීම ඇතුළු කරුණු රැසක් ඉටුකරගැනීමට බලාපොරොත්තු වන බවද අමාත්‍යවරයා පැවසීය.

කලක් තිස්සේ පාඩු ලබන මෙරට ප්‍රධාන පෙළේ රාජ්‍ය ආයතන ගණනාවක් කඩිනමින් ප්‍රතිව්‍යුහගත කිරීමට රජය තීරණය කර තිබේ.

අද (04) දිනයේදී බස්නාහිර, වයඹ,සබරගමුව සහ මධ්‍යම පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථාන වලට මි.මී 100 ට වැඩි තද වැසි ඇතිවිය හැකි බව කාලගුණ විද්‍යා දෙපාර්තමේන්තුව පවසයි.

උතුරු, නැගෙනහිර සහ උතුරු-මැද පළාත්වල වැසි වාර කීපයක් ඇතිවේ.

දිවයිනේ සෙසු ප්‍රදේශවල සවස් කාලයේදී හෝ රාත්‍රී කාලයේදී වැසි හෝ ගිගුරුම් සහිත වැසි ඇතිවන බව කාලගුණවිද්‍යා දෙපාර්තමේන්තුව නිවේදනය කරයි.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස එම දෙපාර්තමේන්තුව ජනතාවගෙන් ඉල්ලා සිටී.

අද(04) දිනයේත් පැය 2 යි විනාඩි 20ක විදුලි කප්පාදුවක් සැලසුම් කර තිබේ.

මහජන උපයෝගීතා කොමිසම විසින් නිකුත් කර ඇති අද විදුලි කප්පාදු කාලසටහන පහත දැක්වේ.

රාජ්‍ය සේවයේ නියුතු නිලධාරීන්ගේ නිල කාර්යයන් සඳහා ලබාදී ඇති රජයේ වාහන ඔවුන් විශ්‍රාම යාමේදී පැවරීම සම්බන්ධයෙන් මුදල් අමාත්‍යාංශය විසින් තීන්දුවක් ගෙන තිබේ.

ඒ අනුව රාජ්‍ය නිලධාරීන් සඳහා එලෙස ලබාදී ඇති වාහන ඔවුන් විශ්‍රාම ගැනීමේදී ඔවුන්ට පවරාගැනීමේ හැකියාව වහාම ක්‍රියාත්මකවන පරිදි අත්හිටුවීමට රජය පියවර ගෙන ඇත.

සංචාරක කර්මාන්තය ප්‍රවර්ධනය කිරීමේදී මෙරටට පැමිණෙන සංචාරකයින්ගේ ආරක්ෂාව වෙනුවෙන් නව ජංගම යෙදවුමක් (App) හඳුන්වා දීමට කටයුතු කරන බව සංචාරක හා ඉඩම් අමාත්‍ය හරීන් ප්‍රනාන්දු මහතා පැවසීය.

අමාත්‍යවරයා මේ බව පැවසුවේ සංචාරක හා ඉඩම් කටයුතු පිළිබඳ අමාත්‍යාංශයීය උපදේශක කාරක සභාව ඒ මහතාගේ සභාපතිත්වයෙන් පසුගිය දා පාර්ලිමේන්තුවේදී රැස් වූ අවස්ථාවේදීය.

ජනවාරි මාසයේදී මෙම ජංගම යෙදවුම භාවිතයට ගැනීමට බලාපොරොත්තු වන බව ද ඔහු වැඩිදුරටත් පැවසීය.

එසේම මෙම යෙදවුම මගින් සංචාරකයන් කැමති නම් ඔවුන් සිටිනා ස්ථානය පිරික්සීමට අවසර ලබාදීම, ඒ තුළින් ඔවුන් අතරමංවුවහොත් හෝ යම් ආරක්ෂිත පියවරයක් ගැනීමට අවශ්‍ය වුවහොත් ඒ වෙනුවෙන් පියවර ගැනීමට හැකි බව ද අමාත්‍යවරයා වැඩිදුරටත් පැහැදිලි කළේය.

තවද සංචාරකයින්ගේ ආරක්ෂාව වෙනුවෙන් සංචාරක පොලිස් කණ්ඩායමක් සංචාරක ආකර්ෂණය සහිත සෑම මුහුදු තීරයකම ස්ථානගතකිරීමට කටයුතු කරන බවද අමාත්‍යවරයා පැවසීය.

විශේෂයෙන්ම 2023 වර්ෂයේදී සංචාරකයින් ලක්ෂ 15 මෙරටට ගෙන්වා ගැනීමට සැලසුම් කොට ඇති බවද හරීන් ප්‍රනාන්දු මහතා මෙහිදී සඳහන් කළේය.

අවිස්සාවේල්ල තල්දූව නගරයේදී අයිස් මත්ද්‍රව්‍ය ග්‍රෑම් 10ක් සහ හෙරොයින් මිලි ග්‍රෑම් 2100ක් සමඟ අත්අඩංගුවටගත් මත්ද්‍රව්‍ය ජාවාරම්කරුවෙක් අධිකරණයට ඉදිරිපත් නොකිරීමට රුපියල් 25,000ක මුදලක් අල්ලස් වශයෙන් පොලිස් නිලධාරීන්ට ලබාදීමට සූදානම් වූ පුද්ගලයෙකුව අල්ලස් හෝ දූෂණ විමර්ශන කොමිසමේ නිලධාරීන් විසින් අද අත්අඩංගුවට ගනු ලැබීය.

ඒ සීතාවක කොට්ඨාශයභාර ජ්‍යෙෂ්ඨ පොලිස් අධිකාරී චන්දන කොඩිතුවක්කු මහතා විසින් අල්ලස් හෝ දූෂණ විමර්ශන කොමිසමට කළ දැනුම්දීමකට අනුවය.

අවිස්සාවේල්ල පොලීසියේ නිලධාරීන් කණ්ඩායමක් විසින් මත්කුඩු සමඟ හෂන් නිලූෂ ප්‍රේමලාල් නැමැති ජාවාරම්කරුව අත්අඩංගුවට ගෙන ඇත්තේ ඊයේ රාත්‍රී කාලයේදීය.

එම අවස්ථාවේදී එම ජාවාරම්කරුට සම්බන්ධ තවත් ජාවාරම්කරුවෙක් පොලිස් නිලධාරීන් මුණ ගැසී 50,000 මුදලක් ලබාදීමට කථාබහකරගෙන ඇති බවත් ඒ බව එම නිලධාරීන් ජ්‍යෙෂ්ඨ පොලිස් අධිකාරීවරයාව දැනුවත්කර ඇති බවත් පොලිස් තොරතුරු අනාවරණය කළේය.

මත්කුඩු සමඟ අත්අඩංගුවට ගත් සැකකරු අධිකරණයට අද ඉදිරිපත් කිරීමට සූදානම්ව සිටින අවස්ථාවේදී පොලිස් ස්ථානයට පැමිණි අමිතිරිගල පදිංචි අමිල සඳරුවන් නැමැති අය විසින් පොලිස් නිලධාරීන්ට රුපියල් 25,000ක මුදලක් ලබාදෙන අවස්ථාවේදිම අත්අඩංගුවට ගෙන ඇත.

නයිජීරියානු මුහුදට ඇතුළු වීම හේතුවෙන් එරට බලධාරීන් විසින් රඳවා ගත් යාත්‍රාවේ ශ්‍රී ලංකා කාර්ය මණ්ඩලයේ සාමාජිකයන් යහපත් සෞඛ්‍ය තත්වයෙන් පසුවන බව කෙන්යාවේ ශ්‍රී ලංකා මහ කොමසාරිස් වේලුපිල්ලේ කනනාදන් මහතා තහවුරු කර තිබේ.

ඒ එම යාත්‍රාවේ සිටින ශ්‍රී ලාංකිකයන් පිළිබඳ සොයාබැලීම සඳහා මහකොමසාරිස්වරයා එහි ගිය අවස්ථාවේදී ය.

ඉන්දියාවේ, පෝලන්තයේ සහ පිලිපීනයේ මහ කොමසාරිස්වරු රාජ්‍යතාන්ත්‍රික නිලධාරීන් සමඟ එක්ව ශ්‍රී ලංකා මහකොමසාරිස්වරයා එම්/ටී හෙරොයික් ඉදුන් (MIT Heroic IDUN) නමැති මෙම යාත්‍රාවට ගොස් තිබුණි.

ආහාර, වෛද්‍ය පහසුකම්, විනෝදාස්වාද පහසුකම් ඇතුළුව ප්‍රමාණවත් ආරක්ෂාවක් මෙන්ම සියලු ආකාරයේ සහය නයිජීරියානු නාවික හමුදාව විසින් ඔවුන් වෙත සලසනු ලබන බව මහකොමසාරිස්වරයා පවසයි.

මෙම නෞකාව පසුගිය අගෝස්තු මාසයේදී රඳවා ගැනුණි. ඊට අදාළ මීළඟ නඩු විභාගය ලබන ජනවාරි 11 වැනි දිනට නියමිත ය.

විදේශ කටයුතු අමාත්‍යාංශය සහ මහ කොමසාරිස් කාර්යාලය මෙම තත්ත්වය තවදුරටත් නිරීක්ෂණය කරනු ඇත.

යාල ජාතික වනෝද්‍යානයේ සංචාරය කිරීමට නැරඹීමට පැමිණි විශාලතම විදේශීය සංචාරකයින් පිරිස පසුගියදා (30) යාල වනෝද්‍යානයට පැමිණි අවස්ථාව පහත ඡායාරූපවලින් දැක්වේ.

මෙවැනි විශාල සංඛ්‍යාවක විදේශිකයන් පිරිසක් යාල සිරි නැරඹීමට පැමිණියේ වසර දෙක හමාරකට පසු ය.

ගෝලීය කොවිඩ් වසංගතයේ බලපෑම නිසා ඇතිවූ රට අගුලු දැමීම්, මෑතදී රට තුළ පැවති අරගල තත්ත්වයන් හේතුවෙන් මෙරට සංචාරක කර්මාන්තය බිඳවැටී තිබූ අතර මේ වනවිට එම තත්ත්වයන් සමනය වෙමින් පවතී.

එබැවින් රට තුළ සංචාරක කර්මාන්තයේ නව පිබිදීමක් දක්නට තිබේ.

නිධානයකින් ගොඩගත් බව කියන රත්තරන් තොගයක් පොලිස් වෙසින් කොල්ලකෑමේ සූදානමින් වෑන් රථයක නැගී බකමූණ බලා ගමන් කරමින් සිටි යුද හමුදාවෙන් ඉවත් කරන ලද සෙබලෙක් ඇතුළු 08 දෙනෙකුගේ කණ්ඩායමක් අත්විලංගු ජෝඩුවක් සහ සෙල්ලම් පිස්තෝල 02ක් සමඟ නාවුල පොලීසියේ නිලධාරීන් විසින් පෙරේදා (01) අත්අඩංගුවට ගෙන තිබේ.

ඇලහැර මාර්ගයේ ගමන්කරමින් තිබුණු මෙම පිරිස රැගත් වෑන් රථය පෙරේදා සවස නාවුල මාරාගමුවේදී ක්ෂණික පොලිස් මාර්ග බාධකයකදී පරීක්ෂාවට ලක්කිරීමේදී ඔවුන් සතුව තිබුණු සෙල්ලම් පිස්තෝග දෙක සහ අත්විලංගු ජෝඩුව හමුවීම හේතුවෙන් ඔවුන්ව අත්අඩංගුවට ගත් බව නාවුල පොලීසිය සඳහන් කළේය.

ප්‍රශ්න කිරීමේදී හෙළිවී ඇත්තේ යුද හමුදාවෙන් ඉවත්කර ඇති පුද්ගලයා මිනිස් ඝාතනයක් සම්බන්ධයෙන් බන්ධනාගාරගතව සිටියදී බන්ධනාගාරයේ ඇතිවුණු කැරැල්ලක් අතර තුර එම මාංචු කුට්ටම බන්ධනාගාරයෙන් සොරාගත් බවය. ගම්පහ අස්ගිරියේ සඳගිරිවත්තේ පදිංචිකරුවෙක් වන මෙම සැකකරු පිහියෙන් ඇන පුද්ගලයෙකුව ඝාතනය කිරීමක් සම්බන්ධයෙන් බන්ධනාගාරගතව සිට ඇප මත නිදහස ලබා ඇත්තේ පසුගිය වසරේ ජනවාරි මාසයේදීය. ඔහු පවසා ඇත්තේ තමා බන්ධනාගාරයෙන් එළියට එනවිට එම මාංචු කුට්ටම රැගෙන ආ බවය. පොලීසිය පවසනුයේ එසේ මාචු කුට්ටමක් සොරාගෙන සිරකරුවෙකුට පිටතට රැගෙන ඒම කිසිසේත්ම විශ්වාස කළ නොහැකි බවය. එබැවින් ඒ ගැන වැලිකඩ බන්ධනාගාරයෙන්ද කරුණු විමසා බලන බව නාවුල පොලිස් ස්ථානාධිපති ප්‍රධාන පොලිස් පරීක්ෂක සම්පත් හීන්කෙන්ද මහතා සඳහන් කළේය.

අත්අඩංගුවට ගත් සෙසු සැකකරුවන් පරගස්තොට,ගල්පාන, රඹුක්කන, ගම්පහ, නෑබඩ, මිල්ලෙනිය යන ප්‍රදේශවල පදිංචිකරුවන්ය. ඔවුන් අවුරුදු 47ත් 23ත් අතර පසුවන්නන් බව පොලීසිය සදහන් කළේය. මෙම සැකකරුවන් අතර වෘත්තියෙන් රියදුරන් කම්කරුවන් මෙන්ම ඇල්මේනියම් කාර්මිකයෙකු සහ කට්ටඩියෙකුද සිටින බව පොලීසිය කියයි.

බකමූණේ පුද්ගලයෙකු විසින් නිධානයකින් ගොඩගත් රත්තරන් තොගයක් අලෙවි කිරීමට සූදානම්කර ඇති බවත් එම රත්තරන් තොගය මිලදී ගැනීමට යන ගැණුම්කරුවන් ලෙස එහි ගොස් එම රන් තොගය පොලිස් වෙසින් කොල්ලකෑම සිය අදහස බව හමුදා සැකකරු පොලිස් ප්‍රශ්න කිරීම් හමුවේ පවසා තිබේ. එසේ පොලිස් වෙසින් කොල්ලකෑමක් සඳහා හෝ රන් මිලදී ගැනීමට මෙතරම් පිරිසක් රැගෙන යාම අසාමාන්‍ය බව පොලීසිය කියයි. කට්ටඩියෙකුත් මෙම කණ්ඩායමේ සිටින බැවින් පොලීසිය සැකරනුයේ නිධානයක් ගොඩ ගැනීමට මෙම පිරිස ගමන් කරමින් සිට ඇති බවය. ඒ ගැන වැඩිදුර තොරතුරු සොයා ගැනීම සදහා සැකකරුවන් රදවාගෙන දින තුනක් විමර්ශන පවත්වන බව පොලීසිය කියයි.

පන්නල මාකදුරේ පිහිටි උපකාරක පංතියක සිසුන් පිරිසක් විනෝද චාරිකාවක් ගොස් ලුණුවිල බොරලැස්සේ හෝටලයක පිහිණුම් තටාකයක දිය නාමින් සිටියදී එක් සිසුවෙක් දියේ ගිලී මිය ගොස් ඇත.

මෙම අවාසනාවන්ත මරණය සිදුව ඇත්තේ ඊයේ සවස් කාලයේදීය.

සදංකාව මහා විද්‍යාලයේ 10 ශ්‍රේණියේ අධ්‍යාපනය ලබමින් සිටි ඩී.අයේෂ් පෙරේරා නැමැති සිසුවා මෙසේ මියගොස් තිබේ.

බොරලැස්ස ලුණුවිල පදිංචි මෙම සිසුවා ඇතුළු 80 දෙනෙකුගේ කණ්ඩායමක් වෙන්නප්පුව පොලිස් වසමේ පිහිටි හෝටලයට පැමිණ ඇත්තේ ඊයේ උදෑසන කාලයේදීය.

සිසුන් කිහිප දෙනෙකු මෙහිදී පිහිණුම් තටාකයට බැස විනෝද වෙමින් සිටියදී මෙම අනතුර සිදුව ඇති බව පොලීසිය කියයි.

ජනාධිපතිවරයාගේ ලිපි ලේඛන රැගෙන යන ජාත්‍යන්තර ප්‍රමිතියෙන් යුතු බෑගයක් (Attaché Case) යුද හමුදාපති ලුතිනන් ජෙනරාල් විකුම් ලියනගේ මහතා විසින් අද (02) පෙරවරුවේ ජනාධිපති කාර්යාලයේදී ජනාධිපති රනිල් වික්‍රමසිංහ මහතා වෙත පිළිගැන්වීය.

මෙය ශ්‍රී ලංකා යුද හමුදාවේ විදුලි හා යාන්ත්‍රික ඉංජිනේරුවන් විසින් නිර්මාණය කරන ලද්දකි.

ලෝක නායකයන් සංචාරයන්හි නිරත වන විට වැදගත් හා රහසිගත ලිපි ලේඛන රැගෙන යාමට සුවිශේෂ බෑගයක්(Attaché Case) භාවිතා කිරීම සම්ප්‍රදායකි.

ජාත්‍යන්තර ප්‍රමිතීන්ට අනුකූලව බෑගයක් නිර්මාණය කිරීමේ කටයුත්ත ජනාධිපතිවරයා විසින් ශ්‍රී ලංකා යුද හමුදාවට පවරනු ලැබුවේ මෙම ලෝක සම්ප්‍රදාය ශ්‍රී ලංකාවට හඳුන්වා දෙමිනි.

ඒ අනුව ජනාධිපති රනිල් වික්‍රමසිංහ මහතාගේ විශේෂ මඟපෙන්වීම මත, යුද හමුදාපතිවරයාගේ සෘජු අධීක්ෂණය යටතේ, යුද හමුදා විදුලි හා යාන්ත්‍රික ඉංජිනේරු අධ්‍යක්ෂවරයාගේ ප්‍රධානත්වයෙන් යුත් ක්ෂේත්‍රයේ ප්‍රවීණයන් පිරිසක් විසින් ජනාධිපති ලේකම් කාර්යාලය විසින් ලබා දෙන ලද පිරිවිතරයන්ට අනුව මෙම බෑගය නිර්මාණය කර ඇත.

මෙය ජනාධිපතිවරයාගෙන් පසුව තවත් ජනාධිපතිවරයෙකුට භාවිතා කළ හැකි පරිදි කල් පවත්නා නිමැවුමක් විය යුතු බවට ජනාධිපති රනිල් වික්‍රමසිංහ මහතා උප‍දෙස් දී තිබූ අතර ඒ අනුව නිර්මාණය කළ මෙම බෑගය ආරක්ෂිතව සහ සැලසුම්සහගතව උසස් තත්ත්වයේ සම් භාවිතයෙන් නිමවා ඇත.

ජනාධිපතිවරයාගේ අත්සන ලබා ගැනීම සඳහා අමාත්‍යාංශ මගින් දෛනිකව ලිපිගොනු විශාල ප්‍රමාණයක් ජනාධිපති කාර්යාලයට යොමු කරන බවත්, එහිදී ලිපිලේඛන බහලුම් සඳහා වැයවන මුදල් අවම කර ගැනීමට සියලු අමාත්‍යාංශවලට මෙවැනි බෑගයක් භාවිතා කිරීමේ හැකියාව පෙන්වා දුන් ජනාධිපතිවරයා ඊට අවශ්‍ය බෑග් ද යුද හමුදාවට නිෂ්පාදනය කළ හැකි බවත් පැවසීය.

උසස් ප්‍රමිතියෙන් නිර්මාණය කරන ලද මෙම බෑගය බාර ගැනීමෙන් පසු එය පරික්ෂා කළ ජනාධිපති රනිල් වික්‍රමසිංහ මහතා ඊට නිර්මාණ දායකත්වය සැපයූ සියලු ශිල්පීන් ඇගයීමට ලක් කළේය.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක මහතා ද මෙම අවස්ථාවට සහභාගී විය.