සිංහල හා හින්දු අලුත් අවුරුදු සමයේදී පොල්තෙල් හිඟයක් මවා පෑමට බහුජාතික සමාගම් කිහිපයක් කටයුතු කරමින් සිටින බව පාරම්පරික පොල්තෙල් නිෂ්පාදකයන්ගේ සංගමය සදහන් කරයි.

එම සංගමයේ කැඳවුම්කරු බුද්ධික ද සිල්වා මහතා සඳහන් කරන්නේ උත්සව සමය ඉලක්ක කරගනිමින් බහුජාතික සමාගම් දැනටමත් මිල ඉහළ දමමින් වෙළෙඳපොළ තුළ පොල්තෙල් හිඟයක් මවාපාමින් සිටින බවයි.

කෙසේවෙතත් මෙරට පොල්තෙල් ඉල්ලුම සපුරාලීමට දේශීය පොල්තෙල් නිෂ්පාදකයන්ට හැකියාව ඇතැයිද බුද්ධික ද සිල්වා මහතා වැඩිදුරටත් පැවසීය.

ඖෂධවල මිල ඉහළ නංවා ගැනීම පිළිබඳව රාජ්‍ය අමාත්‍ය මහාචාර්ය චන්න ජයසුමන මහතා ඖෂධ ආනයනකරුවන්ගේ සංසදයේ නියෝජිතයින් පිරිසක් අතර අද පස්වරුවේ විශේෂ සාකච්ඡාවක් පවත්වා තිබේ.

එහිදී එම සංසදයේ නියෝජිතයින්ට ඇමතිවරයා සඳහන් කර ඇත්තේ ඖෂධ මිල ඉහළ දැමීම පිළිබඳව හෙට දිනයේ දී පිළිතුරක් ලබාදෙන බවය.

ඖෂධ නියාමන අධිකාරිය සමඟ සාකච්ඡා කර ඖෂධවල යම් මිල ඉහළ දැමීමක් කෙරෙහි අවධානය යොමුකරන බවද රාජ්‍ය ඇමතිවරයා ඖෂධ සංසදයේ නියෝජිතයින්ට පොරොන්දු වී තිබේ.

ලබන සදුදා හෝ අඟහරුවාදා වනවිට විදුලිය හා ඛණිජ තෙල්වලින් සැපයීම අතින් රට යථාතත්ත්වයට පත්කිරීමට හැකියාව ලැබෙනු ඇතැයි තමා විශ්වාස කරන බව අමාත්‍ය ගාමිණී ලොකුගේ මහතා පවසයි.

ලබන සෙනසුරාදා වනවිට පෝලිම් නොමැතිව පිරවුම්හල්වලින් තෙල් ලබා ගැනීමට ජනතාවට හැකි වනු ඇතැයි තමා විශ්වාස කරන බව අමාත්‍යවරයා අවධාරණය කළේ ය.

ඉදිරියේදී මෙරටට ගෙන්වන ලද තෙල් නැව් සම්බන්ධයෙන් අද අමාත්‍යවරයා වැඩිදුරටත් කරුණු දක්වා සිටියේය.

“මේ මොහොත වන විට අපි ගාව තෙල් ටොන් 20,000 ක් අපේ ගබඩාවල්වල තියෙනවා. තවත් තෙල් ටොන් 32000ක නැවක් අද බාන්න පටන් ගන්නවා. ඒ නිසා තෙල් බෙදාහැරීම ගිය සෙනසුරාදා අපි පටන් ගත්තා ඉරිදත් තෙල් බෙදාහැරීම කලා. මේ මොහොත වෙනකොට සෑම නගරයකම බෙදුම්හල් වලට පෙට්‍රල් ඩීසල් ලබල දීලා තියනවා. පෙට්‍රල් නම් හුඟාක් ෂෙඩ්වල තියනවා. ඩීසල් පිළිබඳ පොඩි පෝලිමක් තියෙනවා. දැන් මං එනකොටත් මේ අහල පහල ෂෙඩ්වල බලන් ආවේ දිග පෝලිමක් නෑ. වාහන තුනහතරක පෝලිමක් තියෙනවා.

මං විශ්වාස කරනවා අපි මේ යන වැඩපිළිවෙළ සාර්ථක උනාම ලබන සෙනසුරාදා වෙනකොට අපේ පිරහුම්හල්වල පෝලිමක් නැතුව තෙල් ගන්න පුලුවන් තත්වයට පත් කරන්න පුළුවන් කියලා. ඒ එකම විදුලිබල අමාත්‍යාංශයටත් ඒ තාපාගාර පවත්වාගෙන යන්න ඕනකරන ඩීසල් දැවිතෙල් අපි ලබාදෙන්න කටයුතු කරලා තියෙනවා. ඒ හින්දා මේ විදුලිය කැපීම ක්‍රමානුකූලව අඩුකරන්න පුළුවන් වෙයි. ලබන සදුදා අඟහරුවාදා වන විට රට යථා තත්ත්වයට පත්කිරීමට විදුලිය හා ඛණිජ තෙල්වලින් හැකියාව ලැබෙයි කියලා මං විශ්වාස කරනවා.

ඒ සඳහා අපිට මුදල් අමාත්‍යාංශයේ ඉතාමත් ශක්තිමත් සහයෝගයක් දෙනවා. තෙල් නැවක් ආවහම ඒ නැව නිදහස් කරනවා. අපි දැන් බලාපොරොත්තු වෙන්නේ අපේ refinery එක දැන් අඩු ධාරිතාවක ක්‍රියාත්මක වෙන්නේ ඒක සීයට සීයක ධාරිතාවකින් ක්‍රියාත්මක කරන්න. ඒ සඳහා අවශ්‍ය කරන crude oil ලබාගැනීම සඳහා මේ මොහොත වන විටත් සමාගම් කීපයක් අපිත් එක්ක සාකච්ඡා කළා. ටොන් 40000, 90000 නැව් කීපයක් දෙන්න, එක නැවක් අපි එල්සී අරින්නත් කටයුත කරලා තියෙනවා. යම් යම් කොන්දේසි ගැන සාකච්ඡාවක් තියෙනවා එක අද හවස කතා කරනවා. ඊට අමතරව 90000 ගානෙත් නැව් දෙකක් ගෙන්න ගන්න අපි කතා කරලා තියනවා.

ඊට අමතරව මාර්තු 15 පහු වෙනකොට අපිට ඉන්දියානු ණය ආධාර යටතේ ඩීසල් පෙට්රල් ගුවන්යානා තෙල් නැව් 7-8 ක් අපිට එන්න තියනවා. නමුත් අපිට පොඩි ප්‍රශ්නයක් තියෙනවා. අපි ඇණවුම් කරපු ප්‍රමාණයේ පොඩි අඩුවක් වෙනවා. මොකද ලෝක වෙළඳපොලේ බොරතෙල් බර්නට් කියන වර්ගයේ බොරතෙල් බැරල් එකක් ඩොලර් 230ක් දක්වා ඉහළ ගිහින් තියෙනවා. අද අපි ගොඩබාන තෙල් නමට මුලින් අපේ ඇස්තමේන්තු කළේ ඩොලර් මිලියන 32යි. දැන් අද අපි බලනකොට සිංගප්පූරු මිලත් එක්ක සංසන්දනය කරනකොට අපිට ඩොලර් මිලියන 52ක් යනවා. ඉතිං විශාල වැඩිවීමක්. අපිට ඩීසල් ගැලුමකට රුපියල් අසූ එකක් විතර පාඩු වෙනවා. අනෙක් හැම ඉන්ධනකින්මත් පාඩු වෙනවා. අපි වැඩි කිරීමක් ගැන කල්පනා කරන්නෙ නෑ. රටේ ජනතාවට උවමනා කරන තෙල් ටික ලබා දීමේ කටයුත්ත අපි කරන්නේ. අපිට මේ සතිය පහුවෙනකොට ප්‍රශ්නයක් නැතුව ජනතාවට ඒවා ලබා ගන්න කටයුතු කරන්න පුළුවන්.”

රට පුරා තවදුරටත් ඖෂධ බෙදාහැරීම දැඩි ලෙස සීමා වී ඇතැයි ඖෂධ සමාගම් ආරංචිමාර්ග සඳහන් කරයි.

ඩොලර් හිඟය සහ ණයවර ලිපි විවෘත කර ගැනීමේ අපහසුතාවය නිසා ඖෂධවල මිල ඉහළ යාම නිසා ඇතැම් ඖෂධවල ආනයනය අතහැර දැමීමට සිදුව ඇතැයි ද එම ආරංචිමාර්ග සඳහන් කරයි.

ඇතැම් ඖෂධ ආනයන සමාගම් රෝහල්වලට සහ ඔසුසැල්වලට ඖෂධ සැපයීම සීමා කර ඇතැයිද එම නිසා ඖෂධ හිඟය තවදුරටත් උග්‍ර වී ඇතැයි ද ඇතැයිද වාර්තා වේ.

හෘද රෝග වැනි රෝග සඳහා භාවිත කරන ඖෂධ මෙන්ම දියවැඩියාව ලබාදෙන ඖෂධ වර්ග ද වර්ගද පැරසිටමෝල් ද මේ දිනවල දැඩි හිඟයක් පවතින බව බවද වාර්තාවේ.

මේ වනවිට රටේ පවතින ඉන්ධන සහ ගැස් අර්බුදය හේතුවෙන් එළවලු වෙළඳාම සියයට 40 කින් පහල බැස ඇති බව සමස්ථ ලංකා ආර්ථික මධ්‍යස්ථාන එකමුතුව පවසනවා. 

එහි සභාපති අරුණ ශාන්ත හෙටිටිආරච්චි පවසන්නේ පවතින ඩිසල් හිගය හේතුවෙන් වාහන වලින් ගොවිපොලට ගොස් ගොවින්ගේ එළවලු අස්වැන්න මිලදි ගැනිමට හෝ ගෝවින්ට තම අස්වැන්න වෙළදපොල වෙත රැගෙන ඒමට නොහැකි තත්වයක් උද්ගත වි ඇති බවයි. 

පවතින ගැස් හිගය හේතුවෙන් සංචාරක ආපන ශාලා, සංචාරක නිවාඩු නිකේතන ඇතුළු ආපන ශාලා තාවකාලිකව වසා දමා ඇති බැවින් දිවයිනේ සියලුම ආර්ථික මධ්‍යස්ථානවල එලවලු වෙළදාම පහල වැටි ඇති බව ඔහු පැවසුවා.

නිල රථ හිමි අමාත්‍යවරුන් සහ රාජ්‍ය නිලධාරීන්ට අතිරේකව ඉන්ධන නිකුත් කිරීම වහාම ක්‍රියාතත්මක වන පරිදි අත්හිටුවා තිබේ.

ඒ අනුව ඔවුන් මාසිකව හිමි ඉන්ධන පමණක් නිකුත් කිරීම ඇතුළු රාජ්‍ය ආයතනවල ඉන්ධන සහ විදුලිය අරපිරිමැස්මෙන් භාවිතා කිරීම සඳහා රාජ්‍ය සේවා, පළාත් සභා හා පළාත් පාලන අමාත්‍යාංශය විසින් නව චක්‍රලේඛය නිකුත් කර තිබේ.

ඒ අනුව පස්වරු 2.30 වන විට රජයේ ආයතනවල වායුසමීකරණ යන්ත්‍ර අක්‍රීය කළ යුතු බව එහි සඳහන් කර ඇත.

අදාළ චක්‍රලේඛය පහතින්

1646802592-04-2022-s

දූෂණයකර මරා දැමූ කාන්තාවකගේ මළ සිරුරක් කිරිබත්ගොඩ මුදියන්සේ වත්තේ පිහිටි ඉදිකිරීමේ කටයුත්තක් සිදුකරන නිවසක ටයිල් ගොඩකින් වසා තිබියදී සොයාගෙන තිබේ.

එම නිවස දෙසින් හැමූ දුඟදක් හේතුවෙන් අසල්වාසී නිවසකින් 119 පොලිස් හදිසි ඇමතුම් අංශයට ලද තොරතුරකට අනුව මෙම මළ සිරුර ඊයේ සවස සොයාගෙන ඇත.

ඝාතනයට ලක්ව ඇති කාන්තාව වයස අවුරුදු 35 ක් පමණ වන තැනැත්තියක් බවත් ඇගේ අනන්‍යතාව මෙතෙක් හෙළිවී නැති බවත් කිරිබත්ගොඩ පොලීසිය සඳහන් කරයි. එම කාන්තාව කිරිබත්ගොඩ නගරයේ සැරිසරන තැනැත්තියක් බව අනාවරණය වී ඇති බවද පොලීසිය කියයි.

මෙම ඝාතනය සම්බන්ධයෙන් සැකය එල්ලවී ඇත්තේ එම නිවසේ ඉදිකිරීම්වලට සම්බන්ධ සේවකයෙක් කෙරෙහිය. එම සේවකයා එම නිවසේ රැදී සිටියෙකි. නුවරඑළියේ පදිංචිකරුවෙක් වන ඔහු ඉකුත් 05 වෙනිදා හදිසියේම සිය දියණිය වලිප්පුවෙන් මියගොස් ඇතැයි සඳහන් කරමින් නුවරඑළියට බලා පිටත්ව ගොස් ඇති බවද විමර්ශනවලින් අනාවරණය වී ඇත. ඒ සම්බන්ධයෙන් පොලීසිය සොයා බැලීමක් කර තිබේ. එහිදී හෙළිවී ඇත්තේ එම පුද්ගලයාගේ දරුවෙක් මිය ගොස් නැති බවත් බොරුවක් පවසමින් ඔහු පිටව ගොස් ඇති බවත්ය.

ඒ අනුව පොලීසිය ඔහුව මේ වන විට සිය භාරයට ගෙන තිබේ. ප්‍රශ්න කිරීම්වලදී ඔහු පවසා ඇත්තේ කිරිබත්ගොඩ නගරයේ සැරිසැරූ එම කාන්තාව නිවසට කැදවාගෙන ගොස් දූෂණය කළ බවය. අනතුරුව ඇය මුදල් ඉල්ලා කරදර කළ බවත් දැලි පිහියක් වැනි කුඩා පිහියක් පෙන්වා ඇය තමාට තර්ජනය කළ බවත් ඔහු සදහන් කර තිබේ. එහිදී තමා ආරක්ෂාව සඳහා ඇයව මරා දැමූ බවද සැකකරු සඳහන් කර ඇත. මෙම අපරාධය ඉකුත් 04 වෙනිදාත් 05 වෙනිදාත් අතර සිදුව තිබේ.

මෙම සැකකරු තමා විසින් එම ඝාතනය කළේ යැයි සඳහන් කළද විද්‍යාත්මක සාක්ෂි රැස්කිරීමක්ද සිදුකරන බව උසස් පොලිස් නිලධාරියෙක් සදහන් කළේය. ඒ සඳහා ආරක්ෂක කැමරා පරීක්ෂාවක්ද සිදුකරන බව එම නිලධාරියා වැඩිදුරටත් සඳහන් කළේය.

විලම්භීත කතා කියන්න එපා යැයි සභානායක අමාත්‍ය දිනේෂ් ගුණවර්ධන මහතා අද (09) පාර්ලිමේන්තුවේ දී මන්ත්‍රී ලක්ෂ්මන් කිරිඇල්ල මහතාට පැවසීය.

රජය 13 වැනි සංශෝධනය ක්‍රියාත්මක කිරීමට ඉන්දියාවට පොරොන්දුවී තිබියදී පළාත් සභා පාසල් ජාතික පාසල් කළ හැකි දැයි සමගි ජනබලවේගයේ මන්ත්‍රී ලක්ෂ්මන් කිරිඇල්ල මහතා ඉදිරිපත් කළ ප්‍රශ්නයට පිළිතුරු දෙමින් අමාත්‍ය දිනේෂ් ගුණවර්ධන මහතා මේ බව සඳහන් කළේය.

අපි අපේ රටේ අවුරුදු 24ක් තිබුණු විදුහල්පති ගුරු වැටුප් විෂමතාව ඉවත් කරන්න කටයුතු කළා. කිසිදු ආණ්ඩුවක් අවධානය යොමු නොකරපු ඒ ගැටලුව අපි විසඳුවා. පසුගිය කාලේ ඇතිකරපු ප්‍රශ්න රාශියක් අපි දැන් නිරාකරණය කරමින් සිටිනවා.

අපි නෙමෙයි එක ගැසට්ටුවකින් පාසල් පවරාගත්තෙ. අපි පළාත් සභා එක්ක සාකච්ඡා මාර්ගයෙන් ගමේ දරුවන්ගෙ අධ්‍යාපනය ගැන තීන්දු තීරණ ගන්න අවශ්‍යයයි. ඒ නිසා විලම්භීත කතා කියන්න එපා. ප්‍රාදේශීය ලේකම් කොට්ඨාශයට එක් ජාතික පාසලක් හඳුන්වාදීම හොඳ වැඩක් යැයි ඇමතිවරයා කියා සිටියේය.

එක් අමාත්‍යාංශයක සහ රාජ්‍ය අමාත්‍යාංශ දෙකක ආයතනික සහ නීතිමය රාමුව සංශෝධනය කරමින් ජනාධිපති ගෝඨාභය රාජපක්ෂ මහතා විසින් අතිවිශේෂ ගැසට් නිවේදනයක් නිකුත් කර තිබේ.

ජනාධිපතිවරයා වෙත පැවරී ඇති බලතල අනුව ඊයේ (08) දිනයේදී එම නිවේදනය ප්‍රකාශයට පත් කර ඇත.

ඒ අනුව වනජීවී හා වන සම්පත් සංරක්ෂණ අමාත්‍යාංශය, රාජ්ය ආරක්ෂක අමාත්යාංශය, ආපදා කළමනාකරණ රාජ්‍ය අමාත්‍යාංශය යන අමාත්‍යාංශවල සහ රාජ්‍ය අමාත්‍යාංශවල ආයතනික හා නීතිමය රාමුව සහ විශේෂ ප්‍රමුඛතා නව ගැසට් නිවේදනය මගින් සංශෝධනය කර ඇත.

අදාල ගැසට් පත්‍රය පහත දැක්වේ.

2270-14_S

සිලෝන් ටී (Ceylon Tea), සිලෝන් සිනමන් (Ceylon Cinnamon) යනාදී මෙරටට භූගෝලීය පරිසරයට ආවේණික වටිනාකමකින් යුතුව සිදුකරන නිෂ්පාදනවල ව්‍යාජ අනුකරණයන් නැවැත්වීමේ අරමුණින් ඉදිරිපත්කළ බුද්ධිමය දේපළ (සංශෝධන) පනත පාර්ලිමේන්තුවේදී සම්මත වී තිබේ.

වෙළද අමාත්‍ය (ආචාර්ය) බන්දුල ගුණවර්ධන මහතා පනත් කෙටුම්පත දෙවැනිවර කියවීම සදහා පාර්ලිමේන්තුවට ඉදිරිපත් කළේය.

ශ්‍රී ලංකාවේ ආර්ථිකයට වැදගත් දායකත්වයක් දැක්වූ භූගෝලීය දර්ශක ලෙස මෙම නිෂ්පාදන එනයින්ම ලියාපදිංචි කිරීමට නිශ්චිත ක්‍රමවේදයක් බුද්ධිමය දේපළ පනතෙහි ඇතුළත්ව නොතිබූ බැවින් ඒවා මෙතෙක් ලියාපදිංචිය සිදුවූයේ වෙළද ලකුණු විෂය යටතේ සහතික ලකුණු (Certificate marks) ලෙසය.

මේ අනුව සිලෝන් ටී (Ceylon Tea), සිලෝන් සිනමන් (Ceylon Cinnamon) , සිලෝන් පෙපර් ( Ceylon Pepper), සිලෝන් කැෂු ( Ceylon Cashew) වැනි නිෂ්පාදන ඉදිරියේදී ශ්‍රී ලාංකික භූගෝලීය දර්ශක ලෙස ලියාපදිංචි කිරීමට හැකියාවක් ලැබෙන අතර එමගින් මෙම නාමයන් යටතේ ව්‍යාජ අනුකරණ නැවැත්වීමට නීතිමය රාමුවක් ස්ථාපනය වීමද සිදුවේ.

නිධානයකින් ලබාගත් රත්තරං බව පවසමින් ව්‍යාජ ලෙස සකස් කළ රන් කැබිලි ලබාදී රුපියල් ලක්ෂ 20 ක මුදලක් වංචා කළ පුද්ගලයින් දෙදෙනෙක් වරකාපොල පොලීසියේ නිලධාරීන් විසින් වාරියගොඩ දී ඊයේ (08) අත්අඩංගුවට ගෙන තිබේ.

අවුරුදු 25 හා 38 වයස්වල පසුවන එම සැකකරුවන් දෙදෙනා අලව්ව සහ යක්කල පදිංචිකරුවන්ය.

මෙම සැකකරුවන් සතුව තිබී යකඩකැබලි පාට ගල්වා රන් ආකාරයට ව්‍යාජ ලෙස සකස් කළ කැබලි ග්‍රෑම් 731යි මිලි ග්‍රෑම් 240 ක්ද පොලීසිය සොයාගෙන ඇත.

මෙම සැකකරුවන් දිවයිනේ ප්‍රදේශ රැසක පුද්ගලයින් මේ ආකාරයට රැවටීමට ලක්කර ඇති බව විමර්ශන වලින් පෙනී ගොස් තිබේ. එහෙත් ඔවුන්ට එරෙහිව පැමිණිලි නොලැබී ඇති බැවින් මෙම වංචාව දිඟටම කරගෙන යාමට හැකියාව ලැබී ඇතැයි පොලීසිය සඳහන් කරයි.

අත්අඩංගුවට ගත් එක් සැකකරුවෙකුට එරෙහිව රඹුක්කන පොලිස් වසමේ සිදුවූ මිනිස් ඝාතනයක් ඇතුළු අපරාධ 06ක් සම්බන්ධයෙන් චෝදනා එල්ලවී ඇතැයි පොලිසීය වැඩිදුරටත් සඳහන් කළේය.

අද (9) දිනයේ සිදුවන විදුලි කප්පාදුව පැය 4කට පමණ සීමා කර තිබේ.

ඒ අනුව අවස්ථා දෙකකදී පැය 2 1/2ක් සහ පැය 1 යි මිනිත්තු 15 ආදී වශයෙන් විදුලි කප්පාදුව සිදුවිය හැකිය.

අද විදුලිය කප්පාදු වන කාලසටහන පහත දැක්වේ.

E-09-03-2022-Power-Interruption-Schedule-full

විදුලි කප්පාදුව නිදහස් කෙරෙන ස්ථාන පහත දැක්වේ.

Exempted-Feeders-from-Load-Shedding-R8_2022-3(1)

ජනපති ආර්යා අයෝමා රාජපක්ෂ මහත්මියගේ දයාබර මෑණියන් පද්මාදේවි පීරිස් මහත්මිය අභාවප්‍රාප්ත වී ඇත.

ඒ අමෙරිකාවේ කැළිෆෝනියා ප්‍රාන්තයේ ෆ්‍රෙස්නෝ හීදීය.

මිය යන විට පද්මා දේවි පීරිස් මහත්මිය 89 වන වියේ පසුවූවාය.

ලූකස් පීරිස් මහතාගේ දයාබර බිරිඳවන පද්මාදේවි මහත්මිය දරුවන් දෙදෙනෙකුගේ මාතාවකි.

ශ්‍රී ලංකා ඛනිජ තෙල් තොග ගබඩා පර්යන්තයේ නව සභාපතිවරයා ලෙස විශ්‍රාමික මේජර් ජෙනරාල් එම්.ආර්.ඩබ්ලිව්. ද සොයිසා මහතා පත්කර තිබේ.
‍
ශ්‍රී ලංකා ඉඩම් සංවර්ධනය කිරීමේ සංස්ථාවේ සභාපත‍ිවරයා ලෙස 2019 වසරේ දෙසැම්බරයේ සිට මෙතෙක් ඒ මහතා කටයුතුකරමින් සිටියේය.

ඊට පෙර ඒ මහතා සේවය කරනු ලැබුවේ ශ්‍රී ලංකා ඛනිජ තෙල් තොග හා බෙදාහැරීමේ පර්යන්තයේ සභාපතිවරයා ලෙසිනි. නැවතත් ඒ මහතාට පෙර තනතුරම හිමිව ඇත.

සොයිසා මහතා කොළඹ ආනන්ද විද්‍යාලයේ ආදි ශිෂ්‍යයෙකි. එසේම ඔහු දකුණු පළාත් හිටපු කම්කරු නිවාස හා සමාජසේවා අමාත්‍යවර එම.පි.සොයිසා මහතාගේ පුත්‍රයා ද වෙයි.

ජනාධිපති ගෝඨාභය රාජපක්ෂ මහතා සහ ශ්‍රී ලංකා නිදහස් පක්ෂය නියෝජනය කරන පාර්ලිමේන්තු මන්ත්‍රීවරුන් අතර හමුවක් අද (08) පස්වරුවේ පැවැත්විණ.

ඒ ජනාධිපති කාර්යාලයේදී ය.

ශ්‍රී ලංකා නිදහස් පක්ෂය විසින් ඉදිරිපත් කළ කරුණු 15ක් පිළිබඳ මෙහිදී සාකච්ඡාවට ලක් විය.

මෙම අවස්ථාව සඳහා ශ්‍රී ලංකා පොදුජන පෙරමුණ නියෝජනය කරන අග්‍රාමාත්‍ය මහින්ද රාජපක්ෂ මහතා, අමාත්‍ය බැසිල් රාජපක්ෂ, දිනේෂ් ගුණවර්ධන, පාර්ලිමේන්තු මන්ත්‍රී සාගර කාරියවසම් ද සහභාගි වී තිබුණි.

ශ්‍රී ලංකා නිදහස් පක්ෂය නියෝජනය කරමින් හිටපු ජනාධිපති මෛත්‍රීපාල සිරිසේන, අමාත්‍ය නිමල් සිරිපාල ද සිල්වා, මහින්ද අමරවීර, රාජ්‍ය අමාත්‍ය දුමින්ද දිසානායක, දයාසිරි ජයසේකර, ලසන්ත අලගියවන්න, නියෝජ්‍ය කථානායක රංජිත් සියඹලාපිටිය, පාර්ලිමේන්තු මන්ත්‍රී අන්ගජන් රාමනාදන්, ජගත් පුෂ්පකුමාර, ශාන්ත බණ්ඩාර, සාරතී දුෂ්මන්ත, ශාන් විජයලාල් ද සිල්වා, චාමර සම්පත්, සුරේන් රාඝවන් යන මහත්වරු සාකච්ඡාවට එක් ව සිටියහ.

ආපදා කළමනාකරණ රාජ්‍ය අමාත්‍යාංශයේ ලේකම් ධුරයට මේජර් ජෙනරාල් (විශ්‍රාමික) ඩබ්.පී.පාලිත ප්‍රනාන්දු මහතා පත් කෙරේ.

ජනාධිපති ලේකම් ගාමිණී සෙනරත් මහතා විසින් ඊට අදාළ ලිපිය අද (08) පස්වරුවේ ජනාධිපති කාර්යාලයේදී පාලිත ප්‍රනාන්දු මහතා වෙත භාර දී ඇත.

පාසල නිමවී නිවස බලා ගමන් කරමින් සිටි උසස් පෙළ ශිෂ්‍යාවකට අද දහවල් පොරවකින් කොටා ඝාතනය කර තිබේ.

මෙම අමානුෂික ඝාතනය සිදුව ඇත්තේ හාලි ඇල උඩුවර ඉහළ කොටසේදීය.

හාලි ඇල උඩුවර වත්තේ පදිංචිව සිටි 18 හැවරදි ශිෂ්‍යාවක් මෙසේ ඝාතනයට ලක්ව ඇති බව හැලි ඇල පොලීසිය සඳහන් කළේය.

මෙම ශිෂ්‍යාව සමඟ ප්‍රේම සම්බන්ධයක් ගොඩනගා ගැනීමට කාලයක් තිස්සේ උත්සහගත් 33 හැවරදි පුද්ගලයෙක් විසින් මෙම ඝාතනය කර ඇති බව පොලීසිය සඳහන් කරයි.

නිසි රැකියාවක් නොමැතිව සිටින එම පුද්ගලයා මේ වන විට පළාගොස් සැඟව සිටින බවත් ඔහුව අත්අඩංගුවට ගැනීමට මෙහෙයුමක් ආරම්භකර ඇති බවත් පොලීීසිය සඳහන් කළේය.

මෙම සැකකාර පුද්ගලයාගේ සහ ඝාතනයට ලක්වූ ශිෂ්‍යාවගේ පවුල් දෙක අතරද කාලයක් තිස්සේ ආරවුලක් පවතින බව පොලීසිය කියයි.

හිටපු ජනාධිපති මෛත්‍රීපාල සිරිසේන මහතා ඊයේ රාත්‍රියේ පෞද්ගලික රූපවාහිනී ආයතනයක වැඩසටහනකට සහභාගිවීමට එම රූපවාහිනී ආයතනයට අයත් පැලවත්තේ පිහිටි චිත්‍රාගාරයට පැමිණ සිටියදී බීමත් පිරිසක් විසින් හිටපු ජනාධිපතිවරයාගේ ආරක්ෂාවට යොදවා සිටි ප්‍රභූ ආරක්ෂක අංශයේ නිලධාරියෙකුට පහරදී තිබේ.

පහරකෑමෙන් එම ආරක්ෂක නිලධාරියා තුවාල ලබා කොළඹ ජාතික රෝහලට ඇතුලත් කර ඇත.

එම අවස්ථාවේදී සෙසු ප්‍රභූ ආරක්ෂකයින් පහරදුන් කිහිප දෙනා අතර සිටි දෙදෙනෙක් අල්ලා තලංගම පොලිස් ස්ථානයට භාරදී තිබේ. එම අවස්ථාවේදී පළාගිය තිදෙනෙක් අද සවස තලංගම පොලීසියේ නිලධාරීන් විසින් අත්අඩංගුවට ගත් බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතීඥ නිහාල් තල්දූව මහතා සඳහන් කළේය.

ඊයේ රාත්‍රියේ අත්අඩංගුවට ගත් සැකකරුවන් දෙදෙනා ඩුවෙල අධිකරණයට ඉදිරිපත් කිරීමෙන් පසු හෙට දක්වා රක්ෂිත බන්ධනාගාරගත කර තිබේ. අද අත්අඩංගුවට ගත් සැකකරුවන් හෙට අධිකරණයට ඉදිරිපත්කරන බව නිහාල් තල්දූව මහතා කීය.

අත්අඩංගුවට ගත් සැකකරුවන් වයස අවුරුදු 23ත් 26ත් අතර පසුවන්නන්ය. ඔවුන් බත්තරමුල්ල, කොස්වත්ත, මත්තේගොඩ, මරදාන හා කොළොන්නාව ප්‍රදේශවල පදිංචිකරුවන්ය. ඒ අය අතර පළාත් පාලන ආයතනයක මන්ත්‍රීවරයෙකුගේ පුතෙක්ද සිටින බව පොලිස් තොරතුරු අනාවරණය කළේය.

හිටපු ජනාධිපති මෛත්‍රීපාල සිරිසේන මහතා වැඩසටහනට සහභාගිවීමට චිත්‍රාගාරය තුළට ගොස් සිටියදී මෙම පහරදීම සිදුවී ඇත. එම අවස්ථාවේදී ප්‍රභු ආරක්ෂක රථ පෙල නතර කර තිබී ඇත්තේ මාර්ගයේය. පහරකෑමට ලක්ව ඇත්තේ එසේ මාර්ගය අයිනේ නතරකර තිබුණු වාහනයක ප්‍රභූ ආරක්ෂක රියදුරෙකි.