ශ්‍රී ලංකා ක්‍රිකට් නිලවරණයක් පැවැත්වෙන තෙක් ක්‍රීඩා අමාත්‍යවරයා විසින් පස් දෙනෙකුගෙන් යුත් ක්‍රිකට් කළමනාකරණ කමිටුවක් පත්කෙරේ.
මෙම කමිටුවේ සභාපතිත්වය දරන්නේ මහාචාර්ය අර්ජුන ද සිල්වා ය.
එහි සෙසු සාමාජිකයන් වන්නේ ඈෂ්ලි ද සිල්වා (ලේකම්), සුජීව මුදලිගේ (භාණ්ඩාගාරික), නීතිඥ උචිත වික්‍රමසිංහ (කමිටු සාමාජික) සහ අමල් එදිරිසූරිය (නිරීක්ෂක) යන අයයි.
ෆයිසර්‌ – බයෝඑන්ටෙක්‌ කොරෝනා වෛරස්‌ එන්නත ලබාදී මාස හයකට පසුවත් 91.3% ක ඉහළ ක්‍රියාකාරීත්වයක්‌ පෙන්නුම්‌ කරන බව නවතම අධ්‍යයනයකින් හෙළිවෙයි.
එන්නතේ දෙවන මාත්‍රාව ලබාදුන් පුද්ගලයන් 46,307 දෙනෙකුගේ අවසන් අදියරයේ සායනික වාර්තාවලට අනුව අදාළ නිගමනයට එළඹී ඇත.
ෆයිසර්‌ එන්නත දකුණු අප්‍රිකානු ප්‍රභේදය ඇතුළු විකෘති කොරෝනා ප්‍රභේදවලට ද
ප්‍රතිචාර දක්වන බව තහවුරු වී ඇත.
බාල කරන ලද පොල් තෙල් සහිත බවට සැකපිට කන්ටේනරයක් දඹුල්ලේ දී තවත් බැරල්වලට පුරවමින් සිටියදී පොලිස් භාරයට ගෙන තිබේ.
දඹුල්ල පොලිස් ස්ථානයට ලද දුරකථන ඇමතුමකින් ලද තොරතුරක් මත ඊයේ මෙම වැටලීම සිදුකර ඇත.
මෙම පොලිස් ඉල් කන්ටේනරය නවතා තිබී ඇත්තේ දඹුල්ල ආර්ථික මධ්‍යස්ථානයේ ගබඩාවක් අසලදීය.
මෙම කන්ටේනරය අත්අඩංගුවට ගෙන ඇත්තේ බාල කරන ලද පොල්තෙල් එහි ඇතැයි යන සැකය මත බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහන මහතා පැවසීය.
මෙම පොල්තෙල් සම්බන්ධයෙන් විමර්ශනයක් සිදු කර අධිකරණයට කරුණු වාර්තා කරන බව හෙතෙම කීය.
ඒ ඔස්සේ ඉදිරි විමර්ශන කිරීමට දඹුල්ල පොලීසිය කටයුතු කරමින් සිටී.
සතොස වෙළඳසැල් හරහා දුඹුරු සීනි රුපියල් 115ක මිලකට අලෙවි කිරීමට රජය පියවර ගෙන තිබේ.
වෙළඳ අමාත්‍ය බන්දුල ගුණවර්ධන මහතා පවසන්නේ ලබන සතියේ සිට මෙම මිල ගණන් බලපැවැත්වෙන බවයි.
කොළඹ පැවති මාධ්‍ය හමුවකට එක්වෙමින්‌ අමාත්‍යවරයා මේබව කියාසිටියේය.
ආනයනය කොට ගබඩාකර තිබූ පොල් තෙල් අතුරින් සමාගම් 3කින් ගෙන්වූ පොල්තෙල් තොගවල “ඇෆලටොක්සීන්” නැමැති පිළිකා කාරකය අඩංගු බව තහවුරු වූ බවත් ඒවා වහාම ප්‍රතිඅපනයනය කිරීමට උපදෙස් දුන් බවත් පාරිභෝගික ආරක්ෂණ රාජ්‍ය අමාත්‍ය ලසන්ත අලගියවන්න මහතා පවසයි.
අදාළ සමාගම්වලට අයත් ගුදම්වල ගබඩා කර තිබූ පොල් තෙල් සාම්පල කාර්මික තාක්ෂණ ආයතනය මඟින් ද පරීක්ෂණයට ලක්කර අතර එහි ප්‍රථිපල ඊයේ (01) පාරිභෝගික අධිකාරියට ලබාදී තිබේ.
සෞඛ්‍ය අමාත්‍යංශයේ ආහාර ආරක්ෂණ ඒකකය හා ශ්‍රී ලංකා ප්‍රමිති ආයතනය කළ පරීක්ෂණවලදී පෞද්ගලික සමාගම් තුනකින් මෙරටට ආනයනය කළ පොල් තෙල්වල පිළිකා කාරක අඩංගු බවට පළමුව තහවුරු විය.
සිංහල හින්දු අලුත් අවුරුදු සමරන මේ සමයේ කොළඹින් පිටවන වෙළඳ කලාප
හා ආර්ථික ප්‍රවර්ධන කලාපවල
රැකියාවල නියුතු පිරිස්‌ ඉලක්ක
කර කොවිඩ්-19 ආසාදිතයින්‌ හඳුනා ගැනීමේ පරීක්ෂණ සිදුකිරීමට පියවර ගෙන තිබේ.
සෞඛ්‍ය අමාත්‍යාංශයේ වසංගත රෝග විද්‍යා අංශය පවසන්නේ කොවිඩ් පැතිරීම වැළැක්වීමේ අරමුණින් මෙය සිදුකරන බවයි.
ඊයේ දිනයේදීත්‌ මෙරටින්‌ කොරෝනා ආසාදිතයින්‌ 211 ක්වාර්තා වූ අතර ඒ අනුව මෙරට සමස්ත කොරෝනා ආසාදිත සංඛ්‍යාව 92,917ක්දක්වා ඉහළ ගොස් තිබේ.
තව දුරටත්‌ දිවයිනේ රෝහල්‌ කිහිපයක ආසාදිතයින්‌ 2939 ක් ප්රතිකාර ලබයි.
සුවය ලැබූ ගණන 89,407 කි.
සිංහල හා දෙමළ අලුත් අවුරුද්ද සඳහා වන සෞඛ්‍ය මාර්ගෝපදේශ මාලාව අද නිකුත් කිරීමට නියමිතය.
කරන බව සෞඛ්‍ය අමාත්‍යංශය
පවසන්නේ ඒ විශේෂ සාකච්ඡාවක් ද පවත්වා ඇති බවයි.
එහිදී ඉදිරිපත් වී ඇති යෝජනා පිළිබඳ තවදුරටත් සලකා බලන බව ද අමාත්‍යාංශය පැවසී ය.
යම් යම් සීමාවන්ට යටත්ව මෙවර අලුත් අවුරුදු උත්සව පැවැත්වීම සඳහා අවස්ථාව ලබා දෙන බව සෞඛ්‍ය ප්‍රවර්ධන කාර්යාංශය පැවසීය.
මහ සිකුරාදා දිනය යෙදෙන අද සිට කතෝලික හා කිතුණු දේවස්ථානවලට පොලීසියට අමතරව ත්‍රිවිධ හමුදාව යොදා ආරක්ෂාව තර කර ඇතැයි යුධ හමුදාපති ශවේන්ද්‍ර සිල්වා මහතා පවසයි.
යුධ හමුදාපතිවරයා පෙන්වා දෙන්නේ දේවස්ථානවලට පමණක් නොව සමස්ත ප්‍රදේශයම ආරක්ෂා වන පරිදි සකස් කරන ලද ආරක්ෂක වැඩපිළිවෙළක් මෙලෙස ක්‍රියාත්මක කර ඇති බවයි.
අද පෙරවරුවේ පෞද්ගලික රූපවාහිනී නාළිකාවක සම්මුඛ සාකච්ඡාවකට සහභාගි වෙමින් යුධ හමුදාපතිවරයා මේ බව පැවසීය.
“සෑම දේවස්ථානයකට ම ආරක්ෂාව සැපයීම ඉතාමත් අපහසු වෙන්නට පුළුවන්. දේවස්ථානවල විතරක් නෙමෙයි මීට අවුරුදු දෙකකට පෙර පාස්කු ප්‍රහාරය හමුවේ ඇතැම් හෝටල්වලටත් ප්‍රහාර එල්ලවුණා. ඒ හෝටල්වලින් හමුදා ආරක්ෂාව ඉල්ලනවා නමුත් පොදුවේ පොලීසිය විසින් මේ සැබැඳිව ක්‍රියාකරලා තියෙනවා.
ඊට අමතරව අතිගරු ජනාධිපතිවරයා විසින්, ගරු අග්‍රාමාත්‍යතුමා, ආරක්ෂක කවුන්සිලයේදී මේ පිළිබඳ උපදෙස් දීලා තියෙනවා. මේ අනුව පොලීසියට අමතරව ත්‍රිවිධ හමුදාව විසින් ජනතාවට අවශ්‍ය සුදුසුම ආරක්ෂාව ලබාදීලා තියෙනවා.
සමහර වෙලාවට එම ස්ථානයේම ආරක්ෂාවට හමුදාවේ හෝ පොලීසියේ අය සිටියේ නැති වුණත් හැකිතාක් දුරට අපි උත්සහ කරනවා ලබාදෙන්න. සෑම ස්ථානයකටම දාන්න බැරි වුණාත් පොදුවේ ප්‍රදේශයේ ආරක්ෂාව සපයන ක්‍රමවේදයක් යටතේ අපි සැලසුම් සකස් කරලා තියෙන්නේ. මේ සතිය පටන් ගද්දිම මේ සැලසුම් ක්‍රියාත්මක කරලා තියෙනවා. ඉදිරි දින දෙකෙත් මේ ආකාරයෙන්ම ක්‍රියා කරනවා.”
අති උත්තම ජේසුස් ක්‍රිස්තුස් වහන්සේගේ දුක්ප්‍රාප්තිය සිහිගන්වන මහ සිකුරාදා දිනය අදයි.
ජේසුස් ක්‍රිස්තුස් වහන්සේ කුරුසය මත දිවිපිදිම අද දිනයේ දී සිහිපත් කරන අතර උන්වහන්සේ මරණයෙන් උත්ථානය වීම සිහිපත් කිරීම හෙවත් පාස්කු ඉරිදා දින එළැඹෙන ඉරිදාට යෙදී තිබේ.
ජේසුස් වහන්සේගේ දුක් ප්‍රාප්තිය සිහිකරමින් කිතුනුවන් අළු බදාදා දිනයෙන් ඇරඹුණු දින 40ක් පුරා නිරාහාර ශීලය, දාන මාන, කිතු සමිදානන්ගේ කුරුස ගමන සිහිපත් කරන පාද නමස්කාරය යෙදීම ආදි ආගමික වත්පිළිවෙත්වල නිතර වේ.
දෙව් පුත් කිතු සමිදානන් මිනිසා පවින් මුදාගැනීම වෙනුවෙන් සිය දිවිපිදීම කිතුණු බැතිමත්හු දුක්ප්‍රාප්ති දේව මෙහෙයන්වලට එක් වෙමින් සමරති.
සෞඛ්‍යයට හිතකර ලෙස මැටිවලින් මුහුණු ආලේපන ආදිය සකසා ගත හැකි බවට ජයවර්ධනපුර විශ්ව විද්‍යාලය
විසින් සිදුකළ පරීක්ෂණයකදී සොයාගෙන තිබේ.
වේවැල්‌, පිත්තල, මැටි, ලී බඩු සහ
ග්‍රාමීය කර්මාන්ත ප්‍රවර්ධන රාජ්‍ය
අමාත්‍ය ප්‍රසන්න රණවීර මහතා මේ බව පැවසීය.
මෙරටට අවශ්‍ය විදේශ මුදල් ලබාගෙන ජාතික ආර්ථිකය නගාසිටුවීමට මෙමගින් හැකියාව ලැබෙන බව අමත්‍යවරයා පෙන්වා දෙයි.
මෙරට සාම්ප්‍රදායික කර්මාන්තකරුවන්ට ගෝලීය ඉලක්ක සපුරා ගැනීම සඳහා
අවශ්‍ය දැනුම ලබාදීම අවශ්‍ය බවත් නව නිර්මාණ සිදුකිරීම තුලින්‌ ලෝකය ජයගත හැකි බවත් රාජ්‍ය අමාත්‍යවරයා සඳහන් කර සිටී.
පිළිකාකාරක අඩංගු වේදැයි සොයාබැලීමට දිවයින පුරා විවිධ ස්ථානවලින් ලබාගත් පොල්තෙල් සාම්පල 55කම “ඇෆලටොක්සීන්“ නමැති ප්‍රබල පිළිකා කාරකය ඇතුළත් නොවන බවට තහවුරු වී ඇතැයි පොල් සංවර්ධන අධිකාරිය පවසයි.
එම පරීක්ෂණ සඳහා පාරිභෝගික අධිකාරිය සමස්ත දිවයිනම අවරණය වන පරිදි ප්‍රසිද්ධ වෙළෙඳ නාම ඇතුළත් පොල් තෙල් සාම්පලද ඇතුළුව වෙළෙඳපොළෙන් පොල්තෙල් සාම්පල 125ක් ලබාගෙන තිබුණි.
එම සියලුම සාම්පල පරීක්ෂා කිරීම සඳහා පේරාදෙණිය විශ්වවිද්‍යාලයට හා පොල් සංවර්ධන මණ්ඩලයට යොමුකිරීම්මෙන් අනතුරුව මෙම ප්‍රතිඵල ලබාදී ඇත.
පොල් සංවර්ධන අධිකාරිය වැඩිදුරටත් පෙන්වා දෙන්නේ ඇෆලටොක්සීන් අඩංගු තත්ත්වයක් ගැන විශේෂිත බියක් ඇති කර ගැනීමට අවශ්‍ය නොවන තත්ත්වයට මෙරට වෙළෙඳපොළේ පොල් තෙල් තත්ත්වය තවමත් පවතින බව පරීක්ෂණවල දී පෙනී ගිය බවයි.
පිළිකාකාරක ඇතුළත් කල් ඉකුත් වූ පරිප්පු කිලෝ ග්‍රෑම් 3000ට අධික ප්රමාණයක් අද (01) විනාශ කර ඇතැයි වාර්තා වේ.
ඒ වැලිගම කසළ ප්‍රතිචක්ක්‍රීකරණ මධ්‍යස්ථානයේදීය.
මාතර වැලිගම සමූපකාර සමිති වෙළෙඳසැලක තිබී මෙම තොගය හමුවී තිබුණේ පසුගිය වසරේ ජූලි මාසයේදී ය.
අංජනා මල්ලවාරච්චි
බ්‍රිතාන්‍ය දෙමළ සංසදය, කැනේඩියානු දෙමළ කොංග්‍රසය, ඕස්ට්‍රේලියානු දෙමළ කොංග්‍රසය, ගෝලීය දෙමළ සංසදය, කැනේඩියානු දෙමළ ද්‍රවිඩ ජාතික කවුන්සිලය ඇතුළු දෙමළ ඩයස්පෝරා සංවිධාන හතක් සහ ඒවායේ ක්‍රියාකාරීන් ලෙස කටයුතු කළ පුද්ගලයින් 388 දෙනෙකු මෙරට තහනම් ලැයිස්තුවට එක් කරමින් ආරක්ෂක ලේකම්වරයා අති විශේෂ ගැසට් නිවේදනයක් නිකුත් කර තිබේ.
ශ්‍රී ලංකාවේ එල්ටීටීඊ ක්‍රියාකාරකම්වලට සෘජුව වක්‍රව හෝ වෙනත් ආකාරවලට සම්බන්ධව සිට මේ වනවිට ලොව විවිධ රටවල වෙසෙන පුද්ගලයින් 388 දෙනා තහනම් ලැයිස්තුවට එක් කරමින් ආරක්ෂක ලේකම්වරයා එම ගැසට් නිවේදනය නිකුත් කර ඇත.
බ්‍රිතාන්‍යය, කැනඩාව, ස්විට්සර්ලන්තය, ඩෙන්මාර්කය, තායිලන්තයේ ඇතුළු රටවල් ගණනාවක එම ඩයස්පෝරා ක්‍රියාකාරිකයින් ජීවත් වෙති.
ඔවුන්ගේ බහුතරය යුද්ධය පැවති සමයේදී මෙරට ජීවත් වූ ශ්‍රී ලාංකිකයන් වන අතර විවිධ රටවල රැකවරණය පතා ගොස් සිටියෝ වෙති.
දෙමළ ඩයස්පෝරාවට සම්බන්ධ සංවිධාන සහ පුද්ගලයින්ගේ තහනම් ලැයිස්තුවක් 2014 වසරේ දී ශ්‍රී ලංකා රජය නිකුත් කළ අතර 2016 වසරේදීද එම ලැයිස්තුව සංශෝධනය කෙරිණ.
මෙවරද එම තහනම් ලැයිස්තුව සංශෝධනය කරමින් ඊට අලුත් නම් හා සංවිධාන එකතු කර තිබීම විශේෂත්වයකි.
නුගවෙල පාසලක ප්‍රධාන දොරටුව අසලදී හෙරොයින් ග්‍රෑම් 201 ක් සන්තකයේ තබාගත් පුද්ගලයකු අත්අඩංගුවට ගෙන තිබේ.
යතුරු පැදියෙන් මේවා ප්‍රවාහනය කරමින් සිටි සැකකරු මහවැලි තැන්තේගම, පල්ලෙකැලේ, කුණ්ඩසාලේ අවුරුදු 26ක් වයසැති අයෙකි.
පොලිස් මත්ද්‍රව්‍ය නාශක කාර්යංශයේ මඟින් මෙම වැටලීම සිදුකර තිබුණි.
නුවරඑළිය – හග්ගල ප්‍රදේශයේදී ත්‍රීරෝද රථයක් හා ලොරි රථයක් ගැටීමෙන්, කාන්තාවන් 03දෙනෙකු මියගොස් තිබේ.
අනතුරින් තවත් අයෙකු තුවාල ලබා ඇත.
අනතුර සිදු කර පලාගිය ලොරි රථ රියදුරා සොයා විමර්ශන අරඹා ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහන මහතා කීය.
ශ්‍රී ලංකාවේ රිය අනතුරු වැඩිම
ප්රමාණයක් සිදුවන්නේ අප්රේල් මාසයේ බැවින් ඉදිරි දිනවලදී මාර්ග ආරක්ෂාව පිළිබඳ වැඩි අවධානයක්‌ යොමුකරන ලෙස පොලිසිය පදිකයන් මෙන්ම රියදුරන්ගෙන් ද ඉල්ලීමක් කරයි.
අද(01) පැවති මාධ්‍ය හමුවකට එක්
වෙමින් පොලිස් මාධ්‍ය ප්‍රකාශක, නියෝජ්‍ය
පොලිස්පති අපිත්‌ රෝහණ පැවසුවේ අප්රේල් 10 වනදා සහ 20 වනදා අතර
කාලය මෙරට වැඩිම රිය අනතුරු
වාර්තා වන කාලය බවයි.
මන්නාරම හිටපු රදගුරු රායප්පු ජෝශප් පියතුමන් ස්වර්ගස්ත වී තිබේ.
යාපනයේ පෞද්ගලික රෝහලක ප්රතිකාර ලබමින් සිටියදී අද (01) අලුයම ජෝශප් උන්වහන්සේ ස්වර්ගස්ත වී ඇත.
සති කිහිපයක සිට රෝහල්ගතව ප්රතිකාර ලබමින් සිටි රායප්පු ජෝශප් පියතුමන් 2016 ජනවාරි 16 වන දින දක්වා මන්නාරම රදගුරුවරයා ලෙස කටයුතු කරනු ලැබීය.
1940 අප්රේල් 16 වන දින ඩෙල්ෆ්හිදී උපත ලැබූ ජෝසප් පියතුමන් ස්වර්ගස්ත වන විට 80 වන වියෙහි පසු විය.
බන්ධනාගාරවල සිරකරුවන් හොරරහසේ භාවිතා කරන ජංගම දුරකතන ඇතුළු ඉලෙක්ට්‍රෝනික් උපකරණ හදුනා ගැනීම සදහා අවශ්‍ය තාක්ෂණික මෙවලම් මිලදී ගැනීමට බන්ධනාගාර බලධාරීන් තීරණය කර තිිබේ.
එම උපකරණ මිලදී ගැනීමට අදාල ප්‍රසම්පාදන කටයුතු පවා මේ වන විට ආරම්භ වී ඇත. එම උපකරණ මිලදී ගැනීමෙන් පසු ඒ සම්බනධයෙන් බන්ධනාගාර නිලධාරීන් කණ්ඩායමකට පුහුණුව ලබාදී වැටලීම් ආරම්භකරන බව බන්ධනාගාර උසස් නිලධාරියෙක් සදහන් කළේය.
සහල් මාෆියාව බිද දැමීමට අද 01 සිට අඩු මිලට සහල් ලබාදීමට ආණ්ඩුව විධිමත් වැඩ පිළිවෙලකි දියත්කර ඇතැයි කෘෂිකර්ම ඇමති මහින්දානන්ද අලුත්ගමගේ මහතා සදහන් කරයි.
ඒ අනුව අද සිට නාඩු සහල් කිලෝවක් රුපියල් 97 කටත්, සුදු සහ කැකුළු සහල් කිලෝවක් රුපියල් 93 බැගින්ද සතොස ඇතුළු දිවයිනේ පිහිටි ඕනෑම සුපිරි වෙළද සැලකින්ම මිලදී ගැනීමට පාරිභෝගිකයන්ට අවස්ථාව ඇතැයිද ඇමතිවරයා සදහන් කළේය.
එසේම සිල්ලර වෙළෙන්දාට පවා අඩු මිලට හාල් පාරිභෝකයාට අලෙවි කිරීමට හැකියාව ලබාදෙමින් වී අලෙවි මණ්ඩලය හරහා සහල්තොග වෙළද පොළට නිකුත් කිරීමට පියවර ගෙන ඇතැයිද ඇමතිවරයා වැඩිදුරටත් පවසයි.
සිංහල හින්දු අලුත් අවුරුදු උත්සව සමය වෙනුවෙන් සාප්පු සවාරි යන ශ්‍රී ලාංකික ජනතාවට ලෝක සෞඛ්‍ය සංවිධානයේ ශ්‍රී ලංකා කාර්යාලය මගින් විශේෂ දැනුම්දීමක් කරයි.
සාප්පු සවාරි යන අතරතුරදී වුවද කෝවිඩ්-19 වසංගතයෙන් සුරක්ෂිත වීම සඳහා පහත දැක්වෙන කරුණු අනුගමනය කරන ලෙස එම සංවිධානය නිවේදනය කරයි.
රක්ෂිත බන්ධනාගාර ගත කර සිටී හිටපු මුදල් අමාත්‍ය රවී කරුණානයක මහතා ඇතුළු හය දෙනකුට අධිකරණය මගින් අද ඇප ලබා දී තිබේ.
2016 වසරේ මාර්තු මස 31 වනදා ශ්‍රී ලංකා මහ බැංකුව විසින් සිදුකළ බැඳුම්කර වෙන්දේසියේදී රුපියල් බිලියන 15 ක් වටිනා බැඳුම්කර සම්බන්ධයෙන් සාපරාධී සාවද්‍ය පරිහරණය කළේ යැයි චෝදනා මත මොවුන් අත්අඩංගුවට ගෙන රක්ෂිත බන්ධනාගාර ගත කර තිබුණි.
අමල් රණරාජා, නාමල් බලල්ලේ සහ ආදිත්‍ය පටබැඳිගේ යන මහත්වරුන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල විසින් එම නියෝගය කරනු ලැබීය.
ඒ අනුව එක් එක් විත්තිකරු රුපියල් ලක්ෂ 10 බැගින්වූ මුදල් ඇප සහ රුපියල් ලක්ෂ 100 බැගින් වූ ශරීර ඇප දෙකක් මත මුදා හැරීමට නියෝග කළ ත්‍රිපුද්ගල විනිසුරු මඩුල්ල විත්තිකරුවන්ගේ විදේශ ගමන් තහනම් කරන බව ද නියෝග කළේය.
එම නියෝගය ආගමන විගමන පාලකවරයා ඇතුළු ගුවන්තොටුපල බලධාරීන් වෙත දැනුම් දීමට පියවර ගන්නා ලෙසද විනිසුරු මඩුල්ල නියෝග කර සිටියේය.
විත්තිකරුවන් නඩු විභාග සඳහා අඛණ්ඩව පෙනී සිටීම අත්‍යාවශ්‍ය කරුණක් යැයි පෙන්වා දුන් ත්‍රිපුද්ගල විනිසුරු මඩුල්ල එසේ නඩු විභාගයට පෙනී සිටීම මඟහරිනු ලැබූවොත් ඇප අවලංගු කොට නඩු විභාග අවසන් වනතුරු රක්ෂිත බන්ධනාගාර ගත කරන බව ද නියම කළේය.
තීන්දුව ප්‍රකාශයට පත් කරමින් ත්‍රිපුද්ගල මහාධිකරණ විනිසුරු මඩුල්ලේ සාමාජික විනිසුරු ආදිත්‍ය පටබැඳිගේ මහතා සඳහන් කළේ විත්තිකරුවන්ට එරෙහිව පවතින නඩුකරය ඉතා සංකීර්ණ නඩු කටයුත්තක් බවය.
එබැවින් විත්තිකරුවන්ට සාධාරණ නඩු විභාගයක් ලබා ගැනීමට තිබෙන අයිතිය සුවිශේෂී කරුණක් සේ සලකා ඔවුන් ඇප මත මුදාහැරීමට තීන්දු කරන බව ත්‍රිපුද්ගල විනිසුරු මඩුල්ල සඳහන් කළේය.
අනතුරුව නඩුව යළි අප්රේල් මස 29 වනදා කැඳවීමට ද නියම කෙරුණි.
ආන්දෝලනයකට තුඩු දුන් පිලිකාකාරක පොල් තෙල් බවුසර් දෙකක් අධිකරණයට ඉදිරිපත් කර තිබියදී එය රේගුව භාරයට පත් කිරීම කර ඇත්තේ පොලිස් නීති අංශයේ ඉහළ නිලධාරියකු විසින් දන්කොටුව පොලිසියට ලබාදුන් නියෝගයකට අනුව බව හෙළිවී තිබේ.
එම අධිකරණ භාරයේ තිබූ පිළිකාකාරක පොල් තෙල් බවුසර් දෙක සම්බන්ධයෙන් විමර්ශනයක් පවත්වන ලෙස මේ වන විට වනවිට පොලිස්පතිවරයාට මාරවිල මහේස්ත්‍රාත්වරයා විසින් මහේස්ත්‍රාත් වරයා විසින් නියෝග කර තිබේ.
අධිකරණය විසින් මේ රේගුවට භාරදීමට අවශ්‍යතාවයක් තිබුණේ නම් අධිකරණයට බාර දුන්නේ ඇයි දැයි මෙහිදී මහේස්ත්‍රාත්වරයා දැඩිව පොලිසියෙන් ප්‍රශ්න කර තිබේ.
මෙහිදී මහේස්ත්‍රාත්වරයා වැඩිදුරටත් පවසා ඇත්තේ මෙම පොල් තෙල් බවුසර් රේගු භාරයේ තිබූ ඒවා බවත් එතනින් කෙසේ හෝ මේවා පන්නා ඇති බැවින් රේගුවට ආරක්ෂා කර ගැනීමට නොහැකි නම් යළිත් මෙම බවුසර රේගුවට භාරදීමේ ඇති පලක් තිබේදැයි යනුවෙනි.
පාස්කු ප්‍රහාරය එල්ල කර පැය ගණනකට පසුව සහරාන් හෂීම් සෙසු මරාගෙන මැරෙන බෝම්බකරුවන් සමඟ ප්‍රතිඥාවක් ලබාදෙන වීඩියෝව අන්තර්ජාලයට මුදාහැරි පුද්ගලයා ඊයේ (31) අත්අඩංගුවට ගෙන තිබේ.
ඒ ත්‍රස්තක්‍රියා විමර්ශන කොට්ඨාසය විසිනි.
සහරාන් හෂීම්ගේ අන්තවාදී මතවාදයන් අන්තර්ජාලය හරහා විකාශනය කිරීම සම්බන්ධයෙන් ඊයේ සැකකරුවන් දෙදෙනෙක් අත්අඩංගුවට ගෙන තිබුණි.
එක් සැකකරුවෙක් වැල්ලම්පිටිය ප්‍රදේශයේ පදිංචි 31 හැවිරිදි අයෙක් වන අතර, අනෙක් පුද්ගලයා 32 හැවිරිදි තිහාරියේ පදිංචි අයෙකි.
මේ පිළිබඳ අදහස් දැක්වු පොලිස් මාධ්‍ය ප්‍රකාශකවරයා,
“මොවුන් විසින් ‘වන් උම්මා‘ නමින් වට්ස්ඇප් කණ්ඩායමක් නිර්මාණය කරමින් අන්තවාදී මතවාද කටාර් රාජ්‍යයේ සිට විවිධ ආකාරයෙන් ප්‍රචාරය කර තිබෙන බවට වාර්තා වෙනවා. මේ පුද්ගලයින් ශ්‍රී ලංකාවෙන් පිටව ගොස් කටාර් රාජ්‍යයේ රැකියා කරමින් සිට තිබෙනවා. පසුව අප විසින් කරන ලද දැනුම්දීමක් අනුව නොවැම්බර් 21 වන දින ඔවුන් කටාර් රාජ්‍යයෙන් පිටුවහල් කර ලංකාවට එවා තිබුණා. “ යැයි පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා කීය.
2018 වසරේ අවසන් කාලයේ දී මූතූර් ප්‍රදේශයේ දී අන්තවාදී පන්ති පවත්වාගෙන යෑමට පහසුකම් ලබාදීමේ චෝදනාව මත ඊයේ (31) දිනයේ දී තවත් පුද්ගලයින් දෙදෙනෙක් අත්අඩංගුවට ගෙන තිබේ.
ඒ ත්‍රස්තක්‍රියා විමර්ශන ඒකකය විසිනි.
ඔවුන් මූතූර් ප්‍රදේශයේ පදිංචි 37 හැවිරිදි හා 38 හැවිරිදි පුද්ගලයින් ය.
සහරාන් හෂීම්ගේ අනුගාමිකයින් විසින් 2018 දී සාමාන්‍ය පෙළ අවසන් කළ මුස්ලිම් දරුවන් සඳහා එලෙස පන්ති පවත්වා ඇත
අත්අඩංගුවට පත් පුද්ගලයින් සිව්දෙනා ම ත්‍රස්තවාදය වැළැක්වීමේ පනත යටතේ රඳවා තබාගෙන ප්‍රශ්න කෙරේ.
මාධ්‍ය වෙත කළ ප්‍රකාශයක් හරහා තමාට අගතියක් සිදුවූ බව බවසමින් ආමාත්‍ය මහින්දානන්ද අලුත්ගමගේ මහතා රංජන් රාමනායක මහතාට එරෙහිව ගොනු කර තිබූ නඩුව අද (31) ඉල්ලා අස්කරගෙන තිබේ.
“මම මේ නඩුව ඉල්ලා අස්කරගත්තා. මම දැක්ක රංජන් අහිංසක මනුස්සයෙක්. ඔහුව නොමඟ යැව්වා. රන්ජන් දැන් අසරණ වෙලා ඉන්නේ. ජනපති කිව්වා පළිගන්න එපා කියලා. රන්ජන් වැඩියෙන්ම මඩ ගහපු කෙනා රංජන්ට සමාව දුන්නා. රන්ජන් ගැන මම කනගාටු වෙනවා. රන්ජන්ට සාධාරණයක් ඉටුවිය යුතුයි. “ යැයි අමාත්‍යවරයා මාධ්‍ය වෙත පැවසීය.
2016 දී මාදිවෙල පාර්ලිමේන්තු මන්ත්‍රි නිවාස සංකීර්ණයේදී පැවැත්වූ මාධ්‍ය හමුවක දී කළ ප්‍රකාශයක් සම්බන්ධයෙන් මහින්දානන්ද අලුත්ගමගේ මහතා එම නඩුව ගොනු කර තිබුණි.
එම චෝදනාව සම්බන්ධයෙන් මහින්දානන්ද අලුත්ගමගේ මහතා 2016 වසරේ දී එම ප්‍රකාශයෙන් තමන්ට සිදුවූ හානිය වෙනුවෙන් රන්ජන් රාමනායක මහතාගෙන් රුපියල් මිලියන 500ක වන්දි මුදලක් ඉල්ලමින් ගංගොඩවිල මහෙස්ත්‍රාත් අධිකරණයේ හමුවේ නඩුවක් ගොනු කළේය.
සිව් වසරක් පුරා විභාගයට ගැනෙන එම නඩුව ගංගොඩවිල මහෙස්ත්‍රාත් අධිකරණය හමුවේ අද (31) යළි කැඳවනු ලැබීය.
අධිකරණයට අපහාස කිරීමේ චෝදනාවට වරදකරු වී මේ වනවිට බන්ධනාගාරගතව සිටින රංජන් රාමනායක මහතා ද නඩු කටයුත්තට පැමිණ සිටි බව මහින්දානන්ද අලුත්ගම මහතා පැවසීය.
මෙරට සුපිරි වෙළඳසැල් අතර විප්ලවීය මෙන්ම නව්‍යකරණ සිල්ලර වෙළෙඳ සන්නාමයක් ලෙස ග්ලෝමාර්ක් ශ්‍රී ලංකාවේ නවීන වෙළඳ ක්ෂේත්‍රය තුළ සිය පැවැත්ම තවදුරටත් පුළුල් කරමින්
කොළඹ නගරයේ කේන්ද්‍රය වන CR & FC හි සිය 10වන ග්ලෝමාර්ක් සුපිරි වෙළදසැලේ ප්‍රධාන ශාඛාව අද (31) පෙරවරුවේ සුබ මොහොතින් විවෘත කළේය.
ග්ලෝමාර්ක් සුපිරි වෙළෙඳසැල් ජාලයේ මෙම නවතම ශාඛාව අංක 24, මලලසේකර මාවත, කොළඹ 7 හි පිහිටා ඇත.
බේකරි නිෂ්පාදන, උණුසුම් ආහාර ගණනාවක එකතුවක්, වියළි ආහාර, කාබනික නිෂ්පාදන, ගෘහ භාණ්ඩ, බිම් මහල තුළ ආසිරි ඖෂධ හලක් සහ සොෆ්ට්ලොජික් මැක්ස් ශාඛාවක් ද නව ශාඛාව තුළම පිහිටා තිබීමෙන් සියල්ල එකම වහළක් යටින් මිලට ගැනීමේ පහසුකම් සලසා තිබේ. පාරිභෝගික භාණ්ඩ මෙන්ම ඉලෙක්ට්‍රොනික හා ගෘහ භාණ්ඩ සඳහා ද පුළුල් ප්‍රදේශයක් මෙහි වෙන්කර ඇත.
සොෆ්ට්ලොජික් හෝල්ඩින්ග්ස් පීඑල්සී හි සභාපති / කළමණාකාර අධ්‍යක්ෂ අශෝක් පතිරගේ මහතා මේ පිළිබඳ මෙසේ අදහස් පළකළේය.
“ ගෝලීය වෙළෙඳ අත්දැකීමක් සහිත අපගේ සුපිරි වෙළඳසැල් ජාලය මෙමගින් තවදුරටත් පුළුල් කිරීමට හැකිවීම ඉතාම සතුටුදායක අවස්ථාවක්.
මෙම ප්‍රධාන වෙළඳසැල සමඟ සොෆ්ට්ලොජික් ග්ලෝමාර්ක් නිෂ්පාදන රැසක් සමගින් පාරිභෝගිකයන්ගේ ජීවන රටාව වැඩිදියුණු කරන ආශ්වාදජනක සාප්පු සවාරි අත්දැකීමක් ලබා දෙයි.
තවද, සොෆ්ට්ලොජික් මැක්ස් විසින් බලගැන්වෙන අංගසම්පූර්ණ පාරිභෝගික ඉලෙක්ට්‍රොනික් භාණ්ඩ පරාසයක්, ආසිරි ඖෂධහලක් සමඟ ගුණාත්මක ඖෂධ නිෂ්පාදන මාලාවක්, සොෆ්ට්ලොජික් ගෘහ භාණ්ඩ රැසක්, බේකරි නිෂ්පාදන හා උණුසුම් ආහාර වර්ග ඇතුළත් කිරීම මගින් පාරිභෝගික අත්දැකීම් මෙහිදී තවදුරටත් ඉහළ නංවනවා.
නව සුපිරි වෙළඳසැල සාමාන්‍ය සුපිරි වෙළඳසැල් වලට වඩා වෙනස් අත්දැකීම් ලබා දෙන බව පාරිභෝගික ඔබට ලබාදෙන පොරොන්දුවක් බව හෙතම කියා සිටියේය.
සොෆ්ට්ලොජික් සුපර්මාකට් ප්‍රයිවට් ලිමිටඩ් හි ප්‍රධාන විධායක නිලධාරි ඇන්ඩෲ ඩැල්බි මහතා එහිදී මෙසේ අදහස් දැක්වීය.
“ග්ලෝමාර්ක් විසින් අසමසම පාරිභෝගික අත්දැකීමක් සඳහා පුළුල් පරාසයක අයිතම සහ හොඳම සේවාවක් සපයනු ලබනවා. සොෆ්ට්ලොජික් ඔබට ලබා දෙන්නේ නවීන වෙළඳ ලෝකය පුරා විසිරී ඇති පුළුල්ම තේරීමයි. එමගින් පාරිභෝගිකයාට නැවුම් සහ උසස්ම ප්‍රමිතියෙන් යුත් දේ ලබාදෙනවා.
මෙහිදී දේශීය නිෂ්පාදන, කාබනික ආහාර වර්ග බොහොමයක් මෙන්ම දේශීය පාරිභෝගිකයන්ට ග්ලෝමාර්ක් වෙතින් පමණක් හමුවන සුවිශේෂී නිෂ්පාදන බොහොමයක් ද ඉදිරිපත් කර තිබෙනවා.
තවද, සෑම කෙනෙකුම ඉතා සෞඛ්‍ය සම්පන්නව සිටිය යුතු අතර පශ්චාත් වසංගත නව සාමාන්‍ය තත්වයට, ග්ලෝමාර්ක් අනුගත කිරීම සඳහා සෞඛ්‍ය රෙගුලාසි වලට අනුව අපි සියලු සෞඛ්‍යාරක්ෂිත පියවර ගෙන තිබෙනවා.
CR & FC වෙත එන අපගේ සියලුම ගනුදෙනුකරුවන් සඳහා ආරක්ෂිත ඉඩක් GLOMARK CR & FC මඟින් ලබාදෙන්නේ සියලුම අවශ්‍යතා එකම තැනකින් මිලදී ගැනීම පහසු කරමින්. ඒ නිසාම ඔබට අවශ්‍ය භාණ්ඩ මිල දී ගැනීම සඳහා වෙළඳසැල් කිහිපයකට යාමට, වාහන තදබදවල සිරවීමට සහ සාප්පු වෙත පිවිසෙන හැමවිටම අත් සේදීම ආදී දේ මෙහිදී අවම වෙන්නේ සියල්ල එකම වහළක් යටින් ඔබට ලබාගත හැකි පහසුකමින් යුක්ත නිසයි. ”
සොෆ්ට්ලොජික් හෝල්ඩින්ග්ස් පීඑල්සී හි සභාපති/ කළමනාකාර අධ්‍යක්ෂ අශෝක් පතිරගේ මහතා තවදුරටත් අදහස් දක්වමින් මෙසේ කීය.
“සොෆ්ට්ලොජික් සමූහ ව්‍යාපාරය සියලු ශ්‍රී ලාංකිකයන්ගේ ජීවන තත්ත්වය නගා සිටුවීම වෙනුවෙන් කටයුතු කරනවා. ඒ නිසා ඔබට අපගේ ව්‍යාපාරය තුළ තාක්ෂණය, සෞඛ්‍යය, සිල්ලර වෙළඳාම, මූල්‍ය සේවා, මෝටර් රථ සහ විනෝදාත්මක යන සියලු අංශ ආවරණය වන ලෙස සේවා සැපයිම සඳහා අපව පොළඹවා තිබෙනවා. මෙම ප්‍රධානතම සහ 10 වන ග්ලෝමාර්ක් ශාඛාව ඔස්සේ අපගේ සිල්ලර වෙළදාම් ක්ෂේත්‍රය තවදුරටත් පුළුල් වෙනවා. වසර දෙක හමාරක් වැනි සුළු කාලයක් තුළ සොෆ්ට්ලොජික් ග්ලෝමාර්ක් සන්නාමය සුවිශේෂී වර්ධනයක් අත්පත් කර ගැනීම පිළිබඳ අපගේ කාර්ය මණ්ඩලයට මම සුබ පතන්න කැමතියි. ඔබට සිත්ගන්නාසුලු, අද්විතීය ගෝලීය සාප්පු සවාරි අත්දැකීමක් ලබාගන්නට CR & FCහි පිහිටි සොෆ්ට්ලොජික් ග්ලෝමාර්ක් වෙත පිවිසෙන ලෙස අපි ආරාධනා කරනවා”යැයි හෙතම කියා සිටියේය.
සොෆ්ට්ලොජික් සමූහය තුළ 11,000 කට අධික පිරිසක් සේවය කරන අතර ශ්‍රී
ලංකාව සහ ඕස්ට්‍රේලියාව තුළ වාර්ෂිකව උත්පාදනය කරන ඇ.ඩො. මි. 750 ට වැඩි වත්කම් එහි පදනම වේ.
ඇමරිකානු ඩොලර් මිලියන 420 ට වැඩි පිරිවැටුමක් ඇති සොෆ්ට්ලොජික් හි කීර්තිමත් ගෝලීය ආයතන සහ විශාල බහුජාතික සමාගම් සමඟ සමූහයේ නිරූපණයන් සහ උපායමාර්ගික සන්ධාන එහි අසමසම දේශීය තත්ත්වය තහවුරු කරයි.
දිස්ත්‍රික්ක 6 කට දැඩි උණුසුම් කාලගුණය සම්බන්ධයෙන් අවවාදාත්මක නිවේදනයක් කාලගුණ විද්‍යා දෙපාර්තමේන්තුව විසින් නිකුත් කර තිබේ.
ඒ අනුව අනුරාධපුර, පොළොන්නරුව, ත්‍රිකුණාමලය, මඩකලපුව, මුලතිව් සහ වවුනියාව යන දිස්ත්‍රික්වල ජනතාවට මෙම අනතුරු ඇඟවීම නිකුත්කර ඇත.
එම දිස්ත්‍රික්කවල ඇතැම් ස්ථානවල උණුසුම් දර්ශක එනම් මිනිස් සිරුරට දැනෙන උණුසුම “වැඩි අවධානය“ යොමුකළ යුතු මට්ටමක පවතිනු ඇතැයි අපේක්ෂා කෙරේ.
ඒ අනුව එම දිස්ත්‍රික්කවල උෂ්ණත්වය සෙල්සියස් අංශක 32ත් 41ක් අතර දක්වා ඉහළ යා හැකි බව සඳහන්ය.
මේ හේතුවෙන් වැඩබිම්වල සිටින පුද්ගලයින් ප්‍රමාණවත් ලෙස ජලය පානය කළ යුතු අතර අධික වෙහෙසකාරී කටයුතු සීමා කළ යුතු බව කාලගුණ විද්‍යාඥයන්ගේ දැනුම් දීමයි.
නිවෙස්වල සිටින වැඩිහිටි හා රෝගී පුද්ගලයින් පිළිබඳ සැලකිලිමත් විය යුතු බව ද එම දෙපාර්තමේන්තුව දැනුම්දෙයි.
චීන රජය ප්‍රදානය කළ කොවිඩ් මර්දන එන්නත් තොගය චීන තානාපති චී.ජෙන්හොන් (Qi Zhenhong) මහතා විසින් අද (31) දහවල් කොළඹ බණ්ඩාරනායක අන්තර් ජාතික ගුවන් තොටුපොළේ දී ජනාධිපති ගෝඨාභය රාජපක්ෂ මහතා වෙත නිල වශයෙන් භාරදී තිබේ.
අද දිවයිනට ගෙන එනු ලැබූ චීනයේ නිෂ්පාදනය කරන ලද සිනෝෆාම් එන්නත මෙරට සිටින චීන ජාතිකයන්ට එන්නත දීම ලබන සඳුදා සිට ආරම්භ කළද ශ්‍රී ලාංකීය ජනතාවට එන්නත් ලබාදීම විශේෂඥ කමිටුවක අධ්‍යයනයෙන් පසු සිදු කෙරෙන බව ඖෂධ නියාමන අධිකාරිය පවසයි.
ජනාධිපතිවරයා චීන ජනාධිපති ෂී ජිං පින් මහතාගෙන් කළ ඉල්ලීම අනුව එන්නත් තොගය ශ්‍රී ලංකාවට ප්‍රදානය කෙරිණ.
චීනයේ බීජිං අගනුවර ජාතික බයෝටෙක් ඖෂධ සමාගම “සිනොෆාම්” කොවිඩ් මර්ධන එන්නත නිෂ්පාදනය කර තිබේ.
එන්නත් මාත්‍රා ලක්ෂ 06 රැගත් ශ්‍රී ලන්කන් ගුවන් සේවයට අයත් යූ.එල් 869 දරණ ගුවන් යානය අද (31) පෙ.ව 11.28 ට බණ්ඩාරනායක අන්තර්ජාතික ගුවන් තොටුපොළට ළගා විය.
ගුවන් යානයේ විශේෂ ශීතාගාරයක් තුළ ගබඩාකර, රැගෙන ආ එන්නත් තොගය ගුවන්තොටුපොළ ගුවන් ගැල් ගම්මානයේ ශීතාගාර තුළ ගබඩා කෙරේ. අනතුරුව ශීතාගාර සහිත වාහනවලින් සෞඛ්‍ය අමාත්‍යාංශයේ මධ්‍යම එන්නත් ගබඩා සංකීර්ණය වෙත රැගෙන යාමට සැලසුම් කර ඇත.
එන්නත් ලක්ෂ 06 භාරදීමට අදාළ ලියකියවිලිවලට චීන තානාපති චී.ජෙන්හොන් (Qi Zhenhong) මහතා සහ රාජ්‍ය අමාත්‍ය මහාචාර්ය චන්න ජයසුමන මහතා අත්සන් තැබූහ.
අමාත්‍ය දිනේෂ් ගුණවර්ධන, ප්‍රසන්න රණතුංග, රාජ්‍ය අමාත්‍යවරුන් වන සුදර්ශනී ප්‍රනාන්දුපුල්ලේ, තාරක බාලසූරිය යන මහත්වරු ද, චීන විශේෂ දූත පිරිස, ජනාධිපති ප්‍රධාන උපදේශක ලලිත් වීරතුංග, විදේශ ලේකම් අද්මිරාල් මහාචාර්ය ජයනාත් කොළඹගේ, සෞඛ්‍ය ලේකම් විශ්‍රාමික මේජර් ජනරාල් විශේෂඥ වෛද්‍ය සංජීව මුණසිංහ, ගුවන් තොටුපොළ හා ගුවන් සේවා සමාගමේ සභාපති මේජර් ජනරාල් ජී.ඒ. චන්ද්‍රසිරි යන මහත්ම මහත්මීහු සහ අමාත්‍යාංශ ලේකම්වරු, සෞඛ්‍ය අංශ ප්‍රධානීහූ ඇතුළු පිරිසක් මේ අවස්ථාවට එක්ව සිටියහ.
සිංහල දෙමළ අළුත් අවුරුද්දට ගම් බිම් බලා ගමන් කරන ජනතාවගේ පහසුව සදහා ලබන 04 වෙනිදා සිට 13 වෙනිදා දක්වා අමතර බස් සේවාවක් යෙදවීමට බස්නාහිර පළාත් මාර්ගස්ථ මගී ප්‍රවාහන අධිකාරිය තීරණය කර තිබේ.
දුරගමන් සදහා අමතර බස් රථ 200 ක් ඒ සදහා යෙදවෙන බව බස්නාහිර පළාත් මාර්ගස්ථ මගී ප්‍රවාහන අධිකාරියේ සභාපති ප්‍රසන්න සංජීව මහතා සදහන් කරයි.
පිටකොටුව, කළුතර,බැස්ටියන් මාවත, කොට්ටාව, ගම්පහ, පානදුර, මොරටුව, කඩුවෙල ආදී නගරවලින් එම බස් රථ ගමන් ආරම්භ කෙරෙන බවත් ඒවා දිවයිනේ සියළුම දුරබැහැර නගර වෙත ධාවනය වන බවත් ප්‍රසන්න සංජීව මහතා සදහන් කළේය.
ගම්බිම් බලා ගමන් කරන මගීන්ට අලුත් අවුරුද්දෙන් පසු නැවත පැමිණීමටද විශේෂ බස් රථ සේවාවන් යෙදවෙන බවද ඔහු වැඩිදුරටත් සදහන් කළේය.
‘වෙස්ට් කරීනා’ සහ ‘වෙස්ට් පොලාරිස්’ නැමැති පැනමා ධජය යටතේ යාත්‍රා වන තෙල් ගවේෂණ නෞකා පසුගියදා, දිගු කාලීන ආම්පන්න සැකසීමකට හා අලුත්වැඩියා සේවා සඳහා හම්බන්තොට ජාත්‍යන්තර වරායේ නැංගුරම් ලෑවේය. මෙම වසරේ ජනවාරි මාසයේදී පැමිණි මෙම නෞකා පිළිවෙලින් වසරක් සහ හය මසක කාලයක් වරායේ රැඳෙනු ඇත.
හම්බන්තොට ජාත්‍යන්තර වරාය සමූහයේ වාණිජ හා අලෙවිකරණ සාමාන්‍යාධිකාරී ලාන්ස් සූඕ මහතා පවසන්නේ මෙසේ දීර්ඝකාලීනව රැදී සිටින නෞකා සඳහා අවශ්‍ය වන ප්‍රතිපාදන සැපයීම් සහ අනෙකුත් සේවාවන් ලබා දීම සඳහා දේශීය සේවා සපයන්නන්ට මෙය කදිම අවස්ථාවක් වන බවයි. ‘නඩත්තු කිරීම්, කාර්ය මණ්ඩල වෙනස් කිරීම සඳහා අවශ්‍ය සහාය, සමීක්ෂණ පැවැත්වීම, අපද්‍රව්‍ය ඉවත් කිරීම් වැනි සේවාවන් මේ අතර සුවිශේෂි වේ’ යැයි ඔහු ප්‍රකාශ කරයි.
සේවාවන් පිළිබඳව අදහස් දක්වමින් හේලීස් බලශක්ති සේවා ලංකා (පුද්ගලික) සමාගමේ අධ්‍යක්ෂක සහ උපායමාර්ගික ව්‍යාපාර ඒකක ප්‍රධානි රිකී බානට් මහතා සඳහන් කරන්නේ මෙම නෞකා දෙකෙහි පැමිණීම, හම්බන්තොට වරායේද සහය සහිතව පවත්වාගෙන යන ව්‍යාපාරය තුළ ලැබූ තවත් එක් ජයග්‍රණයක් බවයි.
වරාය සතු ව්‍යාපාරික දැනුම, නැව් සඳහා පහසුකම් සැපයීම සඳහා දැක් වූ සහයෝගය සහ වර්තමාන අභියෝගයන්ට මුහුණ දීම සඳහා ඔවුන්ගේ මෙහෙයුම් යථා වැඩිදියුණු කිරිම, මෙම සාර්ථකත්වයට හේතු වූ බව, අධ්‍යක්ෂකවරයා වැඩිදුරටත් කියා සිටී.
මේ වසරේ මේ දක්වා කාලය තුළ මාර්ගයේ රාජකාරි කරමින් සිටියදී පොලිස් නිලධාරින් 72 නෙකු අනතුරට ලක්වී ඇති අතර ඉන් 18 දෙනෙකු ජීවිතක්ෂයට පත්ව ඇති බව මහජන ආරක්ෂක අමාත්‍ය සරත් වීරසේකර මහතා පවසයි.
පසුගිය වසර තුළ රාජකාරියේ නිරතව සිටි පොලිස් නිලධාරීන් 293ක් අනතුරට ලක්ව ඇති බව ඇතිබව අමාත්‍යවරයා ඇති බව අමාත්‍යවරයා පෙන්වා දෙයි. ඉන් 28 දෙනෙකු මියගොස් තිබේ.
එබැවින් පොලිස් නිලධාරින් කටයුතු කරනුයේ දැඩි පීඩනයක වන නමුත් කුමන තත්වයක් යටතේ වුවත් පොලිස් නිලධාරියෙකුට සිවිල් පුද්ගලයෙකුට පහර දීමේ හැකියාවක් නැතැයි ඔහු කීය.
සමාජයේ දැඩි විවේචනයට ලක්වූ පන්නිපිටියේ සිදුවීම පිළිබඳ අදහස් දක්වමින් මහජන ආරක්ෂක අමාත්‍ය සරත් වීරසේකර මහතා පැවසුවේ කිසිදු පොලිස් නිලධාරියෙකුට සිවිල් පුද්ගලයකුට අමානුෂික ලෙස පහර දීමේ අයිතියක් නැති බවය.
එබැවින් එම සිද්ධියට අදාළ පොලිස් නිලධාරියා අත්අඩංගුවට ගෙන රක්ෂිත බන්ධනාගාර ගත කර ඇති බව අමාත්‍යවරයා සිහිපත් කළේය.
