දක්ෂිණ අධිවේගී මාර්ගගයේ බැදිගම පිවිසුමේදී පොලිස් නිලධාරීන්ගේ රාජකාරියට බාධාකරමින් අසභ්‍ය වචනවලින් නිලධාරීන්ට බැන වැදී මේ වන විට සැඟවී සිටින පාර්ලිමේන්තු මන්ත්‍රී දිලිප් වෙදආරච්චි මහතාගේ පුතා සහ ලේලියට රැකවරණය ලබාදුන් බව කියන කාන්තාවක් මාතර විශේෂ අපරාධ විමර්ශන ඒකකයේ නිලධාරීන් විසින් අද (03) අත්අඩංගුවට ගෙන තිබේ.
එම කාන්තාව මාතර බතලවත්තේ පදිංචිකාරියක් වන 31 වියැති තැනැත්තියකි.
එදින පොලිස් නිලධාරීන් සමඟ ඔවුන් දෙදෙනා ගැටෙන්නේ අන්තරාකාර ලෙස ශීතිකරණයක් සිය කැබ් රථයේ පිටුපස කොටසේ තබාගෙන අධිවේගී මාර්ගයට ඇතුළුවීමට සූදානම් වීමේදී පොලිස් නිලධාරීන් ඊට ඉඩ නොදීම නිසා බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතීඥ නිහාල් තල්දූව මහතා සඳහන් කළේය.
ඔවුන් එදා ශීතකරනය රැගෙන අධිවේගී පිවිසුමට පැමිණි කැබ් රථයද මාතර කඹුරුගමුව ප්‍රදේශයේ හෝටලයක සගවා තිබියදී සොයාගත් බවද නිහාල් තල්දූව මහතා පැවසීය.
මෙම සිදුවීමට අදාලව රවිදු වෙදආරච්චි සහ නෙත්මි හරින්දිද සිල්වා යන සැකකරු සහ සැකකාරිය අත්අඩංගුවට ගැනීමට පොලිස් කණ්ඩායම් කිහිපයක් යොදවා පරීක්ෂණ පවත්වන බව නිහාල් තල්දූව මහතා සඳහන් කළේය. මොවුන් දෙදෙනා කැබ් රථය සඟවා තිබුණු හෝටලයේ දිනක් නවාතැන් ගෙන සිට කොළඹ බලා ගමන් කර ඇති බවට තොරතුරු පොලීසියට ලැබී තිබේ.
මෙම පුද්ගලයන්ට රැකවරණය දෙන ඕනෑම පුද්ගලයෙක්ට එරෙහිව තරාතිරම නොබලා නීතිය තදින්ම ක්‍රියාත්මක කරන බව ද නිහාල් තල්දූව මහතා වැඩිදුරටත් සඳහන් කළේය.
