දෙදාහස වර්ෂයේ සිට මේ දක්වා පාර්ලිමේන්තුවට ඉදිරිපත් නොකළ 1988/89 බටලන්ද වධකාගාරයට අදාළ ජනාධිපති කොමිෂන් සභා වාර්තාව අද (14) පාර්ලිමේන්තුවේ සභාගත කෙරිණි.
සභානායක, අමාත්‍ය බිමල් රත්නායක මහතා බටලන්ද කොමිෂන් සභා වාර්තාව සභාගත කරමින් ජනාධිපති කාර්යාලයේ අඳුරු කාමරයක සිරගත වූ බටලන්ද අද හිරු එළිය දුටු බව කියා සිටියේය.
ජනාධිපති චන්ද්‍රිකා බණ්ඩාරනායක මහත්මිය විසින් 1995 දෙසැම්බර් 15 වැනිදා එවකට මහාධිකරණ විනිසුරු ධර්මසිරි ජයවික්‍රම (කොමිසමේ සභාපති) ,මහාධිකරණ විනිසුරු නිමල් එඩ්වඩ් දිසානායක (කොමසාරිස්) ප්‍රධානත්වයෙන් පත්කළ මෙම ජනාධිපති කොමිෂන් සභා වාර්තාව 2000 වර්ෂයේ දී වාර්තාව ඉදිරිපත් කළේය.
එසේ වුවද වසර 25 ගතවුවද එම වාර්තාව පාර්ලිමේන්තුවේ සභාගත නොකිරිණි.
මෙම මාතෘකාවට නැවත කරළියට පැමිණියේ හිටපු ජනාධිපති රනිල් වික්‍රමසිංහ මහතා අල්ජසීරා මාධ්‍ය සමඟ පසුගියදා කළ සම්මුඛ සාකච්ඡාවකි. එහිදී රනිල් වික්‍රමසිංහ මහතා බටලන්ද වධකාගාරයට අදාළ චෝදනා ප්‍රතික්ෂේප කරමින් එකී ජනාධිපති කොමිෂන් සභා වාර්තාවක් පාර්ලිමේන්තුවට ඉදිරිපත් නොවූ බව පැවසීය.
එවිට වාර්තාව අතැතිව සිටි බීබීසී මාධ්‍යවේදිනිය එම වාර්තාව සභාවට පෙන්වමින් එම කොමිෂමේ නිර්දේශ ක්‍රියාත්මක නොකළේ ඇයි දැයි ප්‍රශ්න කළේය.
ආණ්ඩුව බටලන්ද කොමිෂන් සභා වාර්තාව පාර්ලිමේන්තුවට ඉදිරිපත් කරනු ලැබුවේ එවැනි පරිසරයකයි.
ඒ අනුව එම වාර්තාව නීතිපතිවරයාට යොමු කරන අතර කොමිෂන් වාර්තා පිළිබඳව ඉදිරි තීරණය ගැනීම සඳහා ජනාධිපති කමිටුවක් පත් කොට, දෙදින විවාදයක් පැවැත්වීමටත් තීරණය කළ බව සභානායකයා බිමල් රත්නායක මහතා පාර්ලිමේන්තුවට දැනුම් දුන්නේය.
