fbpx
තවත්
    මුල් පිටුවඋණුසුම් පුවත්ආපදාව නොතකා ආපදා මඬින්න ත්‍රිවිධ හමුදාවෙන් අඛණ්ඩ මෙහෙයුම්

    ආපදාව නොතකා ආපදා මඬින්න ත්‍රිවිධ හමුදාවෙන් අඛණ්ඩ මෙහෙයුම්

    දිවයිනට බලපා ඇති අයහපත් කාලගුණික තත්වය හේතුවෙන් නිල්වලා ගංගා ආශ්‍රිතව මාතර නගරයට ගංවතුර තත්වයන් ඇති වීම වැලැක්වීම සඳහා මාතර අත්තුඩාව ප්‍රදේශයේ ඉදි කරන ලද ගල් බැම්ම බිඳී යාමේ අවදානමක් ඇති වී තිබේ.

    එබැවින් ශ්‍රී ලංකා යුද හමුදා 61 වන බල සේනාවේ සෙබළුන් 100කට අධික ප්‍රමාණයකගේ සහභාගිත්වයෙන් ඊයේ (ඔක් 06) දින රාත්‍රිය මුළුල්ලේ සිට අද පෙරවරුව දක්වාම අඛණ්ඩව එම බැම්ම ශක්තිමත් කිරීමේ මෙහෙයුමක් දියත් කරන ලදි.

    මේ වනවිට මාතර දිස්ත්‍රික්කයේ මාලිම්බඩ, අකුරැස්ස, කඹුරුපිටිය, තිහගොඩ, අත්තුඩුව, මාතර කොටුව සහ ගල් බැම්ම යන ප්‍රදේශවල පවුල් 2500කට අධික ප්‍රමාණයක් අවතැන්ව සිටින අතර ඔවුන්ට කඩිනම් සහන සැලසීම සඳහා යුධ හමුදාපති ප්‍රමුඛ ශ්‍රී ලංකා යුද හමුදාව, නාවික හමුදාව හා ආපදා සහන සැලසීමේ කණ්ඩායම් ක්‍රියාත්මක වෙමින් පවතී.

    ආපදා සහන ක්‍රියාවළියේ ප්‍රධානතම අභියෝගය වී ඇති අවතැන් වූ පුද්ගලයන්ට ආහාර පාන සැපයීම සඳහා ශ්‍රී ලංකා යුධ හමුදාව විසින් මාලිම්බඩ, අකුරැස්ස, තිහගොඩ හා මාතර කොටුව යන ස්ථානවල ආහාර සැකසුම් මධ්‍යස්ථාන හතරක් පිහිටුවා ඇති අතර, යුධ හමුදා WMZ සන්නද්ධ රථ, යුනිකෝන් (Unicorn) රථ හා බර වාහන යොදාගනිමින් ජලයෙන් යටවී ඇති ප්‍රදේශවල පුද්ගලයින්ට අවශ්‍ය ආහාර පාන බෙදා හැරීම සිදුකරනු ලබයි.

    මේ අතර ගාල්ල, මාතර හා කළුතර දිස්ත්‍රික්කවල ආපදා අවදානම් සහිත සෑම ප්‍රාදේශීය ලේකම් කොට්ඨාශයකටම අවශ්‍ය සහාය සඳහා ශ්‍රී ලංකා යුධ හමුදා වෛද්‍ය කණ්ඩායම් සූදානම් කර ඇති අතර, සෙබලුන් 500කට අධික යුධ හමුදා බලඇණි 2 බැගින් මාතර හා ගාල්ල දිස්ත්‍රික්ක සඳහා අනුයුක්ත කර ඇත.

    කළුතර දිස්ත්‍රික්කයේ ආපදා සහන කටයුතු සඳහා අතිරේක 58 සේනාංකය හා ගැමුණු හේවා බලකාය සූදානම් කර ඇති අතර, අවශ්‍ය වූ විට යෙදවීම සඳහා ශ්‍රී ලංකා යුධ හමුදාවට අයත් WMZ රථ 3ක් හා මෝටර් බෝට්ටු 6ක් සූදානම් කර ඇත.

    තවද ශ්‍රී ලංකා යුධ හමුදා විශේෂ බලකායේ හා කොමාණ්ඩෝ බලකායේ කිමිඳුම් කණ්ඩායම් කෙටි දැනුම්දීමකින් අවශ්‍ය කටයුතු සඳහා කැඳවීමට කටයුතු සූදානම් කර ඇත.

    කළුගඟ, නිල්වලා ගඟ, ගිං ගඟ ඇතුළු දකුණු පළාතේ අනෙකුත් ගංගා ආශ්‍රිත පදිංචිකරුවන් හදිසි ජල ගැලීම් හෝ ගංවතුර තත්වයන් පිළිබඳ අවධානයෙන් පසුවන ලෙස දැනුම් දෙනු ලබයි.

    ශ්‍රී ලංකා යුධ හමුදා 61 වන බලසේනාවේ මූලිකත්වයෙන් දකුණු පළාතේ ප්‍රාදේශීය ලේකම් කොට්ඨාශ ඇතුළු අනෙකුත් වගකිවයුතු රාජ්‍ය ආයතන සමග සම්බන්ධව ආපදා සහන මෙහෙයුම් දියත් කරනු ලබන අතර අවශ්‍ය වූවහොත් සේවයට යෙදවීම සඳහා 58 වන බලසේනාවේ සෙබළුන්ද මේ වන විට සූදානම් කර ඇත. තවද, නාවික හමුදා භට පිරිස් හා බෝට්ටු මෙන්ම අවශ්‍ය වූවහොත් සේවයේ යෙදවීම සඳහා ගුවන් හමුදා භට පිරිස් ද සූදානම් කර ඇත.

    ආරක්‍ෂක ලේකම් ජෙනරල් කමල් ගුණරත්න සහ ආරක්ෂක මාණ්ඩලික ප්‍රධානි ජෙනරල් ශවේන්ද්‍ර සිල්වා විසින් යුධ හමුදාපති ප්‍රමුඛ ත්‍රිවිධ හමුදාපතිවරුන් සහ පළාත් පාලන ආයතන ප්‍රධානීන් වෙත නිරන්තරයෙන් අවශ්‍ය මේ සඳහා අවශ්‍ය උපදෙස් ලබා දේ. එම නිලධාරීන්ගේ පූර්ණ අධීක්ෂණය යටතේ මෙම සහන සැලසුම් කටයුතු අඛණ්ඩව සිදු වෙමින් පවතී.

    සංජීවනී එදිරිසිංහ

    මෙවන් පුවත් එසැනින් දැන ගන්න අපේ WhatsApp News සේවාවට එකතු වන්න.

    ඔබේ අදහස් දක්වන්න.