නීතිවිරෝධි මත්පැන් ජාවාරමක් වැටලීමට ගිය අවිස්සාවේල්ල පොලීසියේ නිලධාරීන් කණ්ඩායමක් පස්සේ වල් ඌරෙක් පහරදීමට පැන්නීම හේතුවෙන් දිව යන්නට ගොස් පොලිස් නිලධාරියෙක් ඇද වැටීමකින් තුවාල ලබා කොළඹ ජාතික රෝහලට ඇතුලත් කර ඇත.
මෙම අනතුර සිදුව ඇත්තේ පසුගිය 18 වෙනිදා සවස් කාලයේදී බව අවිස්සාවේල්ල පොලීසිය කියයි.
අවිස්සාවේල්ල සෙලුවකන්දේ ඇතැයි කියනු ලැබූ නීති විරෝධි මත්පැන් පෙරීමේ ස්ථානයක් වැටලීමට ගිය අවස්ථාවේදී මෙම අනතුර සිදුව ඇත.
මෙම අනතුරින් තුවාල ලබා ඇත්තේ පොලිස් සැරයන්වරයෙකි. ඔහුගේ දකුණු පාදයට හානි සිදුව ඇති බව පොලීසිය කියයි.
අවිස්සාවේල්ල රෝහලට ඇතුලත් කිරීමෙන් අනතුරුව මෙම නිලධාරියාව වැඩිදුර ප්‍රතිකාර සඳහා කොළඹ ජාතික රෝහලට මාරුකර යවා ඇත.
