fbpx
තවත්
    මුල් පිටුවඋණුසුම් පුවත්විශිෂ්ටතම ජාත්‍යන්තර භාණ්ඩ ප්‍රවාහන ගුවන් සේවය ‘ශ්‍රීලංකන් කාගෝ’

    විශිෂ්ටතම ජාත්‍යන්තර භාණ්ඩ ප්‍රවාහන ගුවන් සේවය ‘ශ්‍රීලංකන් කාගෝ’

    ශ්‍රීලංකන් ගුවන් සමාගමේ ගුවන් භාණ්ඩ ප්‍රවාහන සේවා අංශය වන ‘ශ්‍රීලංකන් කාගෝ’ (SriLankan Cargo), පසුගියදා පැවති 2023 ‘ඉන්දියා කාගෝ අවෝඩ්ස්’ (India Cargo Awards) හිදී විශිෂ්ටතම ජාත්‍යන්තර ගුවන් භාණ්ඩ ප්‍රවාහන සේවාව ලෙස සම්මානයෙන් පිදුම් ලැබීමට සමත් විය.

    ගුවන් භාණ්ඩ ප්‍රවාහන ක්ෂේත්‍රයේ ඔස්කාර් සම්මාන උළෙල යන විරුදාවලිය ලත් මෙම සම්මාන උළෙලේ ජයග්‍රාහකයන් තෝරාගනු ලබන්නේ පැහැදිලි විනිවිදභාවයකින් යුත් ඡන්ද ප්‍රකාශ කිරීමේ ක්‍රමවේදයක් තුළිනි.

    ඉන්දියාවෙන් පිටතට වැඩිම ගුවන් ගමන් වාර ගණනක් ක්‍රියාත්මක කරන ජාත්‍යන්තර ගුවන් සේවා සමාගමක් වශයෙන්, ප්‍රධාන කාර්යසාධන දර්ශක අතින් අනෙකුත් ජාත්‍යන්තර ගුවන් සේවාවන් අභිභවා යමින් මෙම සම්මානයට හිමිකම් කීමට ශ්‍රීලංකන් කාගෝ සමත් විය.

    ශ්‍රීලංකන් කාගෝ මේ වනවිට ඉන්දියාවේ දිල්ලි, මුම්බායි, බැංගලෝර්, හයිද්‍රාබාද්, කොචි, ත්‍රිවේන්ද්‍රම්, චෙන්නායි, ට්‍රිචි සහ මදුරෙයි යන නගරවල සිට, කොළඹ ඇතුළු විදෙස් නගර රැසක් වෙත ගුවන් ගමන් ක්‍රියාත්මක කරයි.

    මේ ආකාරයට සතියකට ගුවන් ගමන් වාර 70 කට අධික සංඛ්‍යාවක් ක්‍රියාත්මක කරන ශ්‍රීලංකන් කාගෝ, ජාත්‍යන්තර හවුල්කරුවන් සමග එක් වී වෙනත් කාර්ය සම්පාදන සේවාවන්ද පිරිනමන බැවින්, එය ඉන්දියාවේ භාණ්ඩ සැපයුම්කරුවන්ගේ ප්‍රමුඛතම තේරීමක් බවට පත් වී තිබේ.

    පසුගිය මූල්‍ය වර්ෂය තුළ පමණක් ශ්‍රීලංකන් කාගෝ ඉන්දියාවේ සිට විදේශ රටවලට ප්‍රවාහනය කළ භාණ්ඩවල මුළු බර මෙට්‍රික් ටොන් 10,000 කට ආසන්න ය.

    “ඉන්දියාවේ ගුවන් භාණ්ඩ ප්‍රවාහන ක්ෂේත්‍රයෙන් ලැබුණු මෙම ඇගයීම අපට මහත් ගෞරවයක්. එහෙත් මෙය පුදුමයක් නොවෙයි. අපගේ කණ්ඩායම ඉන්දියාවේ වෙළඳපොළ වෙත විශ්වාසනීය සේවාවක් සැපයීමට කෙතරම් උනන්දුවකින් හා කැපවීමකින් කටයුතු කරනවාද යන්න මා හොඳින් දන්නවා. ඉන්දියාව යනු අපට අතිශයින් වැදගත් වෙළඳපොළක්. මෙම සාර්ථකත්වයේ ප්‍රවණතාව අඛණ්ඩව පවත්වා ගනිමින්, ඉදිරියේදී මීටත් වඩා හොඳ සේවාවක් ඉන්දියාවේ පාරිභෝගිකයන් වෙත ලබාදීම අපගේ අරමුණයි.” ශ්‍රීලංකන් ගුවන් සමාගමේ ගුවන් භාණ්ඩ ප්‍රවාහන අංශයේ සාමාන්‍යාධිකාරී චමින්ද පෙරේරා මහතා පැවසී ය.

    ශ්‍රීලංකන් කාගෝ මේ වනවිට යුරෝපය, මැදපෙරදිග, දකුණු ආසියාව, අග්නිදිග ආසියාව, ඈත පෙරදිග සහ ඕස්ට්‍රේලියාව ඇතුළු කලාප රාශියක් වෙත ගුවන් භාණ්ඩ ප්‍රවාහන සේවාවන් සපයයි. තම හවුල්කරුවන් සමග එක් වී මාර්ගස්ථ ප්‍රවාහන පහසුකම්ද පිරිනමමින්, ශ්‍රීලංකන් ගුවන් සේවාවේ සෘජු ගුවන් ගමන් ක්‍රියාත්මක වන රටවලින් ඔබ්බට පවා භාණ්ඩ ප්‍රවාහන සේවාවන් සැපයීමට ශ්‍රීලංකන් කාගෝ සමත් වී ඇත.

    එමෙන්ම විශිෂ්ට තලයේ ගබඩා පහසුකම් සහ අතිනවීන භාණ්ඩ හැසිරවීමේ යන්ත්‍රෝපකරණද සමගින් ශ්‍රීලංකන් කාගෝ, ගුවන් භාණ්ඩ ප්‍රවාහනයට අදාළ සියලුම සේවාවන් එකම ස්ථානයකින් ලබාදෙන සේවා සම්පාදකයෙකු ලෙස ඇගයීමට ලක් වී තිබේ.

    සංජීවනී එදිරිසිංහ

    මෙවන් පුවත් එසැනින් දැන ගන්න අපේ WhatsApp News සේවාවට එකතු වන්න.

    ඔබේ අදහස් දක්වන්න.