ශ්‍රීලංකන් ගුවන් සමාගමේ ගයනිකා ගුණසේකරගේ ප්‍රධානත්වයෙන් යුත් තොරතුරු තාක්ෂණ කණ්ඩායම පසුගියදා පැවති ‘Women in IT Awards Asia 2023’ සම්මාන උළෙලේදී වසරේ විශිෂ්ටතම තොරතුරු තාක්ෂණ කණ්ඩායම ලෙස ඇගයීමට ලක් විය.
මෙම සම්මාන උළෙල 2023 ජූනි 28 වන දින සිංගප්පූරුවේදී පැවැත්වුණු අතර, එහිදී ආසියාව සහ ඔස්ට්‍රලේසියාව යන කලාපවල කණ්ඩායම් රැසක් අභිභවා යමින් මෙම ජයග්‍රහණය හිමිකර ගැනීමට ශ්‍රීලංකන් කණ්ඩායමට හැකියාව ලැබිණි.
ප්‍රවීණ විනිශ්චය මණ්ඩලයක් විසින් සම්මාන උළෙලේ ජයග්‍රාහක ජයග්‍රාහිකාවන් තෝරාගන්නා ලද අතර, නවීන ඩිජිටල් තාක්ෂණය ඔස්සේ සමාගමට විශාල මුදලක් ඉතිරි කරදීමට සමත් වීම, ගයනිකා ගුණසේකර ප්‍රමුඛ කණ්ඩායමට මෙම සම්මානය හිමි වීමට ප්‍රධානතම හේතුවක් විය.
තොරතුරු හා සන්නිවේදන තාක්ෂණ ක්ෂේත්‍රයේ විශිෂ්ටතම දක්ෂතා පෙන්නුම් කරන කාන්තාවන් ඇගයීමට ලක්කිරීමේ අරමුණින් මෙම සම්මාන උළෙල වාර්ෂිකව සංවිධානය කෙරේ.
එහිදී සමාගම් හා ආයතනවලට පැහැදිලි ප්‍රතිලාභ ගෙනෙන ව්‍යාපෘති, ජයග්‍රහණ සහ නායකත්ව කුසලතා ආදිය සැලකිල්ලට ගනිමින් විවිධ කාණ්ඩ යටතේ සම්මාන පිරිනමනු ලබයි.
මෙම ජයග්‍රහණය සම්බන්ධයෙන් තමන් බෙහෙවින් සතුටට හා ආඩම්බරයට පත් වන බවත්, ඒ වෙනුවෙන් ගයනිකා ගුණසේකර ඇතුළු කණ්ඩායමට සුභ ප්‍රර්ථනා කරන බවත්, ශ්‍රීලංකන් ගුවන් සමාගමේ තොරතුරු තාක්ෂණ සමූහ ප්‍රධානී චාමර පෙරේරා මහතා පැවසී ය.
“මෙය ගයනිකාගේ නායකත්වයේ සාර්ථකත්වයට මෙන්ම, ඇයගේ කණ්ඩායමේ හැකියාවන්ට සහ තාක්ෂණය ඔස්සේ සැබෑ වෙනසක් ඇතිකිරීමට ඔවුන් දක්වන උනන්දුවට මනා සාක්ෂියක්. එමෙන්ම එය ඩිජිටල් පරිවර්තනය බලගැන්වීම සහ රැකියා ස්ථානයේ සාර්ථකත්වය උදෙසා කාන්තාවන්ගේ හා ස්ත්‍රී පුරුෂ සමානත්වයේ වැදගත්කම කියාපාන සාධකයක් ලෙසත් හැඳින්විය හැකියි.” චාමර පෙරේරා මහතා වැඩිදුරටත් පැවසී ය.
COVID-19 රෝග ව්‍යාප්තිය හේතුවෙන් ශ්‍රීලංකන් ගුවන් සේවයේ මෙහෙයුම්වලට බරපතළ බලපෑම් එල්ල වූ අවස්ථාවේදී, සමාගමේ පිරිවැය අවම කිරීම සහ ආදායම ඉහළ නැංවීම සඳහා ගයනිකා ගුණසේකර ප්‍රමුඛ කණ්ඩායම කැපීපෙනෙන කාර්යභාරයක් ඉටුකළේ ය.
සමාගමේ ගුවන් ගමන් මෙහෙයුම් කටයුතු, ඉංජිනේරු සේවාවන් සහ ගුවන් තොටුපළ මෙහෙයුම් කටයුතු සඳහා නවීන තාක්ෂණික ක්‍රම හඳුන්වා දීමට ඔවුන් පියවර ගත් අතර, ඒ ඔස්සේ සමාගමට ඇමරිකානු ඩොලර් මිලියන 2.5 කට වැඩි මුදලක් ඉතිරි කරගැනීමට හැකියාව ලැබිණි. එමෙන්ම පාරිභෝගිකයන්ට ඩිජිටල් නාලිකා ඔස්සේ ශ්‍රීලංකන් ගුවන් සේවය සමග සම්බන්ධ වීම පහසු කිරීම සඳහා Business intelligence (BI) පද්ධතියක් නිර්මාණය කිරීමටද ඔවුන් පියවර ගත් අතර, එය සමාගමට අතිරේක ආදායම් උපයා දෙන විසඳුමක් බවට පත් විය.
