ශ්‍රී ලංකාවේ පළමු නියෝජ්‍ය පොලිස්පතිනිය ලෙස මේ වන විට ඉතිහාසයට එක්ව සිටින බිම්ෂානි ජාසිංහආරච්චි මහත්මියට ඉහළ පොලිස් නිලධාරීන්ගෙන් දිගින් දිගටම තවමත් කෙනහිලි සිදුවෙමින් ඇතැයි පොලිස් මූලස්ථානයේම තොරතුරු අනාවරණය කළේය.
බිම්ෂානි ජාසිංහආරච්චි මහත්මිය නියෝජ්‍ය පොලිස්පතිධුරයට උසස් කිරීමෙන් අනතුරුව පොලීසියේ දුග්ගැනවිලි අංශයේ ප්‍රධානියා ලෙස පත්කිරීමට පොලිස්පතිවරයා පියවර ගත්තේය.
එහෙත් හිටි හැටියේම ඉකුත් 01 වෙනිදා ඇය යටතේ සේවයේ නිරතව සිටි සියළුම පොලිස් නිලධාරීන් පොලිස්පති මාණ්ඩලික නියෝජ්‍ය පොලිස්පති බුද්ධික සිරිවර්ධන මහතා යටතට පත්කර තිබේ. එහෙත් නියෝජ්‍ය පොලිස්පති බිම්ෂානි මහත්මියට නව වගකීමක් පැවරීමට කිසිදු පියවරක් ගෙන නැත.
ඒ සම්බන්ධයෙන් ඇය පොලිස් ප්‍රධානීන්ගෙන් කළ විමසීමේදී ලැබී ඇති පිළිතුර වී ඇත්තේ පොලීසිය ප්‍රතිව්‍යූහගත කිරීමේ වැඩපිළිවෙල අනුව එම කටයුත්ත සිදුවූ බවය. ඇය යටතේ සිටි නිලධාරීන් ඇයටත් නොදන්වා මෙසේ වෙනත් නියෝජ්‍ය පොලිස්පතිවරයෙක් යටතට පත්කර ඇත්තේ ඇගේ නියෝජ්‍ය පොලිස්පති ධුරය අභියෝගයට ලක්කරමින් පොලීසියේ උසස් පොලිස් නිලධාරීන් පිරිසක් අධිකරණයට ගොස් තිබියදීය.
ඒ සම්බන්ධයෙන් මේ වන විට සමාජයේ දැඩි ආන්දෝලනයක්ද ඇතිවී තිබෙන අතර ඇගේ උසස්වීමට එරෙහිව සිටින්නේ පොලිස්පතිවරයාට සමීපව සිටින පොලීසිය තුළ සුදු පුතා සහ කළුපුතා යනුවෙන් හදුන්වන නිලධාරීන් දෙදෙනෙක් බවද පොලීසිය තුළ ප්‍රසිද්ධ රහසකි.
පොලීසිය තුළ කථාබහට ලක්වන ආකාරයට අනුව ඇය යටතේ සිටි නිලධාරීන් වෙනත් නියෝජ්‍ය පොලිස්පතිවරයෙක් යටතට පත්කිරීමේත් ඇයට නිසි ස්ථානයක් ලබා නොදීමේත් පිටුපස සිටින්නේද සුදුපුතා සහ කළු පුතාය.
නියෝජ්‍ය පොලිස්පති බිම්ෂානි මේ ගැන මහජන ආරක්ෂක අමාත්‍යාංශයේ ලේකම්වරයාව දැනුවත්කර ඇත්තේ මෙවන් පසුබිමක් තුලදීය. බිමිෂානිට සාධාරණයක් ඉටුකරන ලෙස අමාත්‍යාංශ ලේකම්වරයා විසින් ද පොලිස් බලධාරීන්ට යම් දැනුම්දීමක් කර ඇතත් එය මෙතෙක් සිදුවී නැත. අමාත්‍යාංශයේ ලේකම්වරයා පොලිස් බලධාරීන්ව අමාත්‍යාංශයට අද දිනයේ කැදවා ඇත්තේ මෙවන් පසුබිමක් තුළදීය.
