නියමිත කාලසීමාව තුළ ගල් අඟුරු නැවි නියමිත පරිදි ගෙන්වාගැනීමට නොහැකි වුවහොත් ජනවාරියේ සිට විදුලි කප්පාදු කාලයේ වැඩිවීමක් සිදුවිය හැකි බව මහජන උපයෝගීතා කොමිසමේ සභාපති ජනක රත්නායක මහතා පවසයි.
නොරොච්චෝලයේ බලාගාරයේ ජනන යන්ත්‍ර 3ම භාවිත නොකොට 2ක් පමණක් භාවිත කරමින් විදුලිය නිපදවීම කරන ලෙස දැනුම් දුන් බවත් ඊළඟ නැව එනතුරු එලෙස කළමනාකරණය කරගෙන යාමට සිදුවන බවත් හෙතෙම මාධ්‍ය වෙත අදහස් දක්වමින් පවසා තිබේ.
“ලබන අවුරුද්දේ අනිවාර්යෙන්ම ගල්අඟුරු අවශ්‍ය සංචිත ප්‍රමාණය නැතිවීමේ අවදානමකට අපි ලක්වෙලා තියෙනවා. ඒ අවදානම නිසා තමයි ගල් අඟුරු නැති වුණොත් එහෙම, නැවතත් මේ අවුරුද්දේ අර ජනවාරි මාසයේ තිබුණා වගේ දිර්ඝ කාලීන විදුලි කප්පාදුවකට යනවා කියන එකේ පදනමක් තියෙනවා.”
ගල් අඟුරු නෞකා සම්බන්ධයෙන් කරුණු ඉදිරිපත් කළ සභාපතිවරයා මෙසේ ද කීය.
“ගල්අඟුරු අගෝස්තු මාසයේ සිට අද දක්වා අපිට ඇවිල්ලා තියෙන්නේ ගල්අඟුරු නැව් 5යි. තව එකක් එන්නට තියෙනව තව සුමාන දෙකක් ඇතුළත. ඒ නිසා තමයි අපි නිර්දේශයක් නිකුත් කළේ, ලංකා විදුලි බලමණ්ඩලයට නොරොච්චෝලයේ බලාගාර 3ම පාවිච්චි නොකර දෙකක් පමණක් පාවිච්චි කරලා ඊළඟ නැව එනතුරු මේ කළමනාකරණය කරගෙන යන්න ඕනේ කියලා. දැන් ප්‍රශ්නය තියෙන්නේ ඉතිරි නැව් 32ක.. අපිට අවුරුද්දකට නැවු 38ක් ඕනේ. දැනට 6ක් ඇවිල්ලා තියෙනවා. ඉතිරි 30ක් හරි 31ක් හරි ගෙන්න ගන්නවානම් එහෙම අපිට තියෙන ප්‍රශ්නය තමයි ජනවාරි මාසයේ සිට අප්‍රේල් මාසයේ 15 වනදා වෙනතුරු විතරයි අපිට ගෙන්න ගන්න පුළුවන්. අපිට දවස් 5කට සැරයක් නැවක් ගෙන්න ගත්තොත් අපිට නැවු 20කට වඩා ගෙන්න ගන්න බැහැ. මොකද අපිට තියෙන කාලය මාස 4කට සීමා වෙලා තියෙන්නේ.”
