fbpx
තවත්
    මුල් පිටුවඋණුසුම් පුවත්ලංකාවට මුදල් ආධාර නොදෙන කතාවට ඉන්දියාවෙන් ප්‍රතිචාර

    ලංකාවට මුදල් ආධාර නොදෙන කතාවට ඉන්දියාවෙන් ප්‍රතිචාර

    ඉන්දියාව විසින් තවදුරටත් මූල්‍ය සහයෝගය ලබා නොදන බවට පළවූ වාර්තා සම්බන්ධයෙන් වූ මාධ්‍ය විමසුම්වලට ප්‍රතිචාර වශයෙන් මෙරට ඉන්දීය මහ කොමසාරිස් කාර්යාලය අද (20) ප්‍රකාශයක් නිකුත් කළේය.

    මාධ්‍ය ප්‍රකාශක විසින් නිකුත් කළ එම නිවේදනය මෙසේය.

    උක්ත කරුණ සම්බන්ධයෙන් වන මාධ්‍ය වාර්තා අපි දුටුවෙමු. ශ්‍රී ලාංකික ජනතාව විසින් මුහුණ දෙන දුෂ්කරතා මඟහරවා ගැනීම සඳහා ඉන්දියාව විසින් ශ්‍රී ලංකාවට මෙම වසරේදී ඇමරිකානු ඩොලර් බිලියන 4කට ආසන්න ද්විපාර්ශවික සහයෝගයක් ලබා දී ඇති බව මෙහි ලා අපි අවධාරණය කිරීමට කැමැත්තෙමු. එය පෙර නොවූ විරූ සහයෝගයකි.

    එසේම, ඉන්දියාව කඩිනමින් වර්තමාන ආර්ථික දුෂ්කරතා සමනය කිරීම සඳහා ශ්‍රී ලංකාවට සහය දෙමින් අනෙකුත් ද්විපාර්ශවික සහ බහුපාර්ශවික සහකරුවන් සමඟ ද ශ්‍රී ලංකාවට පක්ෂව කටයුතු කර ඇත. ජාත්‍යන්තර මූල්‍ය අරමුදල සහ ශ්‍රී ලංකා රජය අතර කාර්ය මණ්ඩල මට්ටමේ එකඟතාවයක් ඇතිකර ගත් බව ද අපි දුටුවෙමු. එහි ඉදිරි එකඟතාවයන් ශ්‍රී ලංකාවේ ණය තිරසාරභාවය ඇතුළු කරණු මත තීරණය වනු ඇත. කඩිනමින් ශ්‍රී ලංකා ආර්ථිකය යථා තත්වයට පත් කිරීම සහ ආර්ථික වර්ධනය ළඟා කර ගැනීම උදෙසා අපි විශේෂයෙන්ම ශ්‍රී ලංකාවේ ප්‍රධාන ආර්ථික ක්ෂේත්‍රයන්හි දිගු කාලීන ඉන්දියානු ආයෝජන ප්‍රවර්ධනය කිරීම ඇතුළු හැකි සෑම අයුරකින්ම තවදුරටත් ශ්‍රී ලංකාවට සහයෝගය ලබා දෙන්නෙමු.

    මෙයට අමතරව, ශ්‍රී ලංකාව තුළ අපගේ ද්විපාර්ශවික සහයෝගීතා ව්‍යාපෘතීන් රැසක් ද ක්‍රියාත්මක අතර ඒවායේ සමස්ත වටිනාකම ඇමරිකානු ඩොලර් බිලියන 3.5ක් පමණ වේ. ශ්‍රී ලාංකිකයන්ට ප්‍රමුඛ පෙළේ ඉන්දියානු ආයතනයන්හි උසස් අධ්‍යාපනය හැදෑරීම සහ කුසලතා සංවර්ධන වැඩසටහන් සඳහා ශිෂ්‍යත්ව ද පිරිනැමේ. ශ්‍රී ලංකාව සමඟ පවතින අපගේ සමීප සහ දිගුකාලීන සහයෝගීතාවයේ මෙවන් පැතිකඩ ද ශ්‍රී ලංකාවේ වර්තමාන ආර්ථික දුෂ්කරතා ජයගැනීම සඳහා දායකත්වය ලබා දෙයි.

    මෙවන් පුවත් එසැනින් දැන ගන්න අපේ WhatsApp News සේවාවට එකතු වන්න.

    ඔබේ අදහස් දක්වන්න.