රාජ්‍ය ආයතන සඳහා සකස් කර දුන් මෘදුකාංග, උපදේශකත්වය ලබාදුන් රාජ්‍ය ආයතන සහ ඒවායේ වර්තමාන තත්ත්වය පිළිබඳව වාර්තාවක් ජූලි මස 1 දින වනවිට ලබාදෙන ලෙස කෝපා කමිටුව ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයට (ICTA) නිර්දේශ කර තිබේ.
ඒ රජයේ ගිණුම් පිළිබඳ කාරක සභාව පාර්ලිමේන්තු මන්ත්‍රී ලසන්ත අලගියවන්න මහතාගේ ප්‍රධානත්වයෙන් පසුගියදා (16) පාර්ලිමේන්තුවේදී රැස් වූ අවස්ථාවේදීය.
ආනයන හා අපනයන පාලන දෙපාර්තමේන්තුව සහ රාජ්‍ය ආදායමට වැඩි දායකත්වයක් ලබාදෙන රාජ්‍ය ආයතනවලට තොරතුරු තාක්ෂණය යොදාගැනීම පිළිබඳවද කෝපා කමිටුවේ අවධානය යොමු වී තිබේ.
මෙම කාරක සභාව සඳහා මෙදින මුදල්, ආර්ථික ස්ථායිකරණ සහ ජාතික ප්‍රතිපත්ති අමාත්‍යංශය, ශ්‍රී ලංකා සුරාබදු දෙපාර්තමේන්තුව, විදේශ සම්පත් දෙපාර්තමේන්තුව, ආනයන හා අපනයන පාලන දෙපාර්තමේන්තුව සහ ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) නියෝජනය කරන නිලධාරීන් කැඳවා තිබුණි.
මෙහිදී ICTA ආයතනය මෙම අනෙකුත් දෙපාර්තමේන්තු සහ අමාත්‍යාංශ සඳහා අවශ්‍ය මෘදුකාංග සකස් කිරීමේදී සහ උපදේශනය ලබාදීම පිළිබඳව සාකච්ඡා කෙරුණි.
විශේෂයෙන්ම මෙම සාකච්ඡාවේදී ප්‍රධාන වශයෙන් අවධානය යොමු වූයේ ආනයන හා අපනයන දෙපාර්තමේන්තුවේ බලපත්‍ර නිකුත්කිරීමේ ක්‍රියාවලිය හා සම්බන්ධ ආයතන ඒකාබද්ධ කිරීමේ පරිගණක වැඩසටහන සහ ආදායම් පරිපාලන කළමනාකරණ පද්ධතිය සකස් කිරීමේදී ICTA ආයතනයේ සම්බන්ධවීම පිළිබඳවයි.
මෙහිදී ආනයන හා අපනයන දෙපාර්තමේන්තුවේ බලපත්‍ර නිකුත්කිරීමේ ක්‍රියාවලිය හා සම්බන්ධ ආයතන ඒකාබද්ධ කිරීමේ පරිගණක වැඩසටහන 2015 ආරම්භ කොට තවමත් අසාර්ථක තත්ත්වයේ පැවතීම පිළිබඳ සාකච්ඡා විය.
මෙහිදී පාර්ලිමේන්තු මන්ත්‍රී ලසන්ත අලගියවන්න මහතා පෙන්වා දුන්නේ මෙම මෘදුකාංගය සකස්කිරීම සම්බන්ධයෙන් ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ (ICTA) ක්‍රියාකලාපය පිළිබඳව සෑහීමකට පත්විය නොහැකි බවයි.
විශේෂයෙන්ම රාජ්‍ය ආයතනවලට පරිගණක වැඩසටහන් සකස්කිරීම පිළිබඳ දැනුමක් නොමැති හෙයින් ICTA ආයතනයෙන් සහය ඉල්ලා සිටින විට ඒ සම්බන්ධයෙන් නිසි මැදිහත්වීමක් හෝ සහයෝගයක් ලබාදීමට මෙම ආයතනය කටයුතු නොකරන බවද ඒ මහතා වැඩිදුරටත් පෙන්වා දුන්නේය. එසේම රාජ්‍ය ආයතන තොරතුරු තාක්ෂණයෙන් සන්නද්ධ කර නව තාක්ෂණය සමග මුසු කිරීමේ වගකීමද මෙම ආයතනය සතු බව හෙතෙම සඳහන් කළේය.
එසේම දේශීය ආදායම් දෙපාර්තමේන්තුව හා සම්බන්ධ බදු අයකරගැනීමට අදාළ සියලු රාජ්‍ය ආයතන ඒකාබද්ධ කිරීමේ පරිගණක වැඩසටහන (RAMIS) නිවැරදිව සකස්කරගැනීමට තවමත් නොහැකි වීම පිළිබඳව ද මෙහිදී සාකච්ඡා විය.
මීට අමතරව ශ්‍රී ලංකා සුරාබදු දෙපාර්තමේන්තුව සහ විදේශ සම්පත් දෙපාර්තමේන්තුව හා සම්බන්ධ වී ICTA ආයතනය විසින් සකස්කරන ව්‍යාපෘති පිළිබඳවද මෙහිදී සාකච්ඡා විය.
මෙම කාරක සභාවේ සභාපතිත්වය දරන්නේ පාර්ලිමේන්තු මන්ත්‍රී (මහාචාර්ය) තිස්ස විතාරණ මහතායි.
මෙම කාරක සභාව සඳහා පාර්ලිමේන්තු මන්ත්‍රීවරුන් වන (වෛද්‍ය) සුදර්ශනී ප්‍රනාන්දුපුල්ලේ, තිස්ස අත්තනායක, මොහොමඩ් මුසම්මිල්, දුමින්ද දිසානායක, නිරෝෂන් පෙරේරා, (වෛද්‍ය) උපුල් ගලප්පත්ති සහ වීරසුමන වීරසිංහ යන මහත්ම මහත්මීහු සහභාගී වූහ.
