නිපුණතා සංවර්ධන, වෘත්තීය අධ්‍යාපන, පර්යේෂණ හා නව නිපැයුම් රාජ්‍ය අමාත්‍යාංශයේ වෘත්තීය පුහුණු අධිකාරිය (VTA) සහ බැරිස්ටා කොෆි ලංකා පුද්ගලික සමාගම අතර “ Barista Training Programme” නව පාඨමාලාවක් ආරම්භ කිරිම සඳහා අවබෝධතා ගිවිසුම් අත්සන් කිරිම සහ එම ගිවිසුම නිපුණතා සංවර්ධන, වෘත්තීය අධ්‍යාපන, පර්යේෂණ හා නව නිපැයුම් රාජ්‍ය අමාත්‍ය, විශේෂඥ වෛද්‍ය සීතා අරඹේපොල මහත්මිය වෙත ලබාදීම අද (5) දින අමාත්‍යාංශ පරිශ්‍රයේදී සිදුකෙරිණි.
බැරිස්ටා කොෆි ලංකා පුද්ගලික සමාගම යනු කෝපි පානයෙන් ලොව පිළිගත් Barista ජාත්‍යන්තර අවන්හල් ජාලයේ මෙරට ක්‍රියාත්මක අවන්හල් ජාලය වන අතර වඩාත් ගුණාත්මක සේවයක් ලබාදීම වෙනුවෙන් නිපුණත්වයෙන් යුත් ශිල්පීන් බිහිකිරිම මෙම නව පාඨමාලාව ආරම්භයේ අරමුණයි.
ප්‍රායෝගික සහ න්‍යායික දැනුම ලබාදෙමින් මාස 06 ක කාලසීමාවක් තුළ පැවැත්වෙන ‘Barista Training’ පාඨමාලාව සඳහා ප්‍රථම කණ්ඩායම ලෙස සිසුන් 20 දෙනෙකු සම්බන්ධ කරගැනීමට නියමිතයි. ‘Barista Training’ පාඨමාලාව අතරතුරදි ප්‍රයෝගික පුහුණුව දීමනාවක් සහිතව රැකියාගතව ලබාදීමට කටයුතු කෙරේ.
පුහුණු පාඨමාලාව සඳහා බඳවා ගන්නා සිසු සිසුවියන් හට මෙරට සහ Barista ජාත්‍යන්තර අවන්හල් ජාලය සමග සම්බවන්ධ වීමටද අවකාශය සැලසෙනු ඇත.
