මේ දිනවල සමාජයේ දැඩි කථාබහකට ලක්ව ඇති සිංහරාජ වනාන්තර විනාශය ගැන ඇත්ත නැත්ත සිය දෑසින්ම දැක බලා ගන්නට ආණ්ඩු පක්ෂයේ පසු පෙළ මන්ත්‍රීවරු 11 දෙනෙක් අද (25) රක්වාන ප්‍රදේශයෙන් සිංහරාජයට ඇතුළු විය.
ප‍්‍රමිත බණ්ඩාර තෙන්නකෝන් ,යූ .කේ. එස් .සුමිත්, මිලාන් ජයතිලක ,අකිල එල්ලාවල, සමන්ප‍්‍රිය හේරත්, ලලිත් එල්ලාවල, ගුණතිලක රාජපක්ෂ, ඞී.වීරසිංහ, අමරකීර්ති අතුකෝරල,වසන්ත යාපා බණ්ඩාර සහ මේජර් සුදර්ශනදෙනිපිටිය යන පාර්ලිමේන්තු මන්ත්‍රීවරුන් එම කණ්ඩායමට ඇතුලත්ව සිටියහ.
සිංහරාජය හෙළි පෙහෙළිකරමින් හෝටලයක් ඉදිකරන බව කියන භූමිය පවා එහිදී මන්ත්‍රී කණ්ඩායමේ නිරීක්ෂණයට ප්‍රධාන වශයෙන් ලක්ව ඇත. එම ඉඩමේ වත්මන් හිමිකරුවන්, අඩවි වන නිලධාරීන්, ග්‍රාම සේවක මෙන්ම රජයේ නිලදාරීන් කිහිප දෙනෙක්ම එහිදී හමුවෙමින් තොරතුරු ගවේෂණයකද ඔවුන් නිරතව තිබේ.
මෙම ගවේෂණයේදී රැස්කරගත් තොරතුරු විශ්ලේෂණය කරමින් ඉදිරියේදී සිංහරාජ වනාන්තර විනාශයේ ඇත්ත නැත්ත ගැන ජනතාව දැනුවත් කිරීමටද මෙම මන්ත්‍රී කණ්ඩායම සූදානමින් සිටිති.
