හෙළයේ නිලි රැජිණ නිදහස් චතුරශ්‍රයේ දී සමුගෙන ගියාය. ඇය වෙනුවෙන් බොහෝ කවි කතා සමාජ මාධ්‍යයේ ලියැවිණි. බොහෝ දෙනෙකුට ඇය දැන හඳුනන බව කීමට අවශ්‍ය වූහ. තවත් බොහෝ දෙනෙක් මාලිනි ෆොන්සේකා නමැති ඒ අසහාය නිලි රැජිණගේ අභාවයෙන් වුවද විරාජමානවීමට උත්සාහ කළහ.
දශක හයකට අධික කාලයක් ජන හදවත් තුළ රැජිණක් වීම පහසු නැත. තමන්ගෙ කිරුළ දරා සිටීමට තරම් නිහතමානී වීම ද සුළු පටු නොවේ. මාලිනි සමාජය ට දුන්නේ එවැනි විසල් ප්‍රතිභාවකි. රිදී තිරයෙත් සමාන්‍ය සමාජයෙත් එවැනි ආකස කුසුමක් වීමට හැමෝටම බැරිය.
ජනාධිපති අනුර කුමාර දිසානායක මහතා නිළි රැජිනගේ අවසන් මෙහොත වෙනුවෙන් නිකුත් කළ ශෝක ප්‍රකාශය ඉදිරිපත් කරනු ලැබුවේ අගමැතිනි හරිනි අමරසූරියයි. මාලිනිගේ සමුගැනීම සිරිලක සිනමා ක්ෂේත්‍රයේ සදාකාලික හිස්තැනක් වනු ඇති බව ඔහුගේ පණිවිඩයෙන් කියැවිණි.
එය මෙසේය. ඇතැම් අහිමිවීම් නැවත පුරවාලිය හැකි ආදේශ සහිත ඒවාය. ඇතැම් ඒවා දුෂ්කරය. එමෙන්ම ඇතැම් ඒවා යළි කිසි දිනෙක සම්පූර්ණ කළ නොහැකි ඒවාය. සමුගත් නිළි රැජිණගෙන් හිස්වූ අසුන සිරිලක සිනමා ක්ෂේත්‍රෙය් සදාකාලික හිස්තැනක් වනු ඇත.
දහස් ගණන් ජනතා සෝ සුසුම් මැද මාලිනි ෆොන්සේකා නැමැති ඒ අසහාය නිලිය සමුගෙන ගියාය. ඇය ජිවන රඟ මඩලට සමුදුන්නේ උවද ඇයගේ ප්‍රතිභාපූර්ණ රංග කුසලතාව මෙරට නොමැකෙන සිහිවටනයක් වනවා නොඅනුමානය.
