2011 වසරේ පැවති ජාත්‍යන්තර සමූපාකාර දින සැමරුම් උත්සවයේදී රුපියල් මිලියන 183ක් වැය කිරීම සම්බන්ධයෙන් වූ විමර්ශනයකට අදාලව අපරාධ පරීක්ෂණ දෙපාර්තමේන්තුව විසින් එවකට සමූපාකාර හා අභ්‍යන්තර වෙළඳ අමාත්‍යාංශයේ ලේකම්වරයා ලෙස කටයුතු කළ ප්‍රියන්ත කුමාර මායාදුන්න මහතා අද අත්අඩංගුවට ගත්තේය.
ඉසුරු සවිය නමින් මෙම උත්සවය එකළ පවත්වා ඇත්තේ කුරුණෑගලදීය.
මේ සම්බන්ධයෙන් කළ විමර්ශන උදෘතයන් අපරාධ පරීක්ෂණ දෙපාර්තමේන්තුව විසින් වසර කිහිපයකට පෙර නීතිපතිවරයා වෙත යොමුකර තිබී ඇත. නීතිපති දෙපාර්තමේන්තුව ඒ සම්බන්ධයෙන් නීති උපදෙස් පසුගිය දා ලබාදෙමින් අපරාධ පරීක්ෂණ දෙපාර්තමේන්තුවට දැනුම්දී ඇත්තේ දණ්ඩනීති සංග්‍රහයේ 389 චෝදනාව ගොනු කිරීමට ප්‍රමාණවත් කරුණු ඇති බවය. ඒ අනුව අපරාධ පරීක්ෂණ දෙපාර්තමේන්තුව ඔහුව අත්අඩංගුවටගත් බව පොලිස් මාධ්‍ය ප්‍රකාශක නීතිවේදී බුද්ධික මනතුංග මහතා සඳහන් කළේය.
