නීති විරෝධි ලෙස මුහුදු මාර්ග ඔස්සේ ඕස්ට්‍රේලියාව බලා ගමන් කිරීමට සූදානම් වූ 91 දෙනෙක් නාවික හමුදාව විසින් අත්අඩංගුවට ගෙන තිබේ.
ඒ ඊයේ දිනයේ කළ මෙහෙයුම් දෙකකදීය.
බටහිර නාවික විධානයට අනුයුක්ත නාවික හමුදා කණ්ඩායමක් මාරවිල පොලිසිය හා එක්ව පළමු වැටලීම කර ඇත්තේ ඊයේ අලුයම් කාලයේදීය. මාරවිල පොලීසියේද සහය ඇතිව කළ එම මෙහෙයුමේදී ඕස්ට්‍රේලියාවට යාමට බෝට්ටුව පැමිණෙන තුරු මාරවිල ළැගුම්හලක රැඳී සිටි පිරිමි පුද්ගලයන් 14 දෙනෙක් සහ මෙම ඡාවාරම මෙහෙයවූ පුද්ගලයා අත්අඩංගුවට ගෙන තිබේ. අත්අඩංගුවටගත් අය අතර දරුවෙක්ද සිටින බව නාවික හමුදාව සඳහන් කරයි. එම දරුවා අවුරුදු 09ක් වයසැතිය.
මෙම පිරිස මෙම ළැගුම්හල වෙත රැගෙන පැමිණි වෑන් රථයක් සහ මෝටර් රථයක්ද නාවික හමුදාව සහ පොලීසිය මෙම මෙහෙයුමේදී සිය භාරයට ගෙන ඇත.
ළැගුම්හලේදී අත් අඩංගුවට ගත් මෙම පිරිස යාපනය, ත්‍රිකුණාමලය, මුලතිව් සහ මාරවිල යන ප්‍රදේශයන්හී පදිංචිකරුවන් බවට හඳුනා ගන්නා ගෙන තිබේ. එම පිරිස ඉදිරි විමර්ශන කටයුතු සඳහා මාරවිල පොලීසිය වෙත භාර දී ඇත.
බටහිර නාවික විධානයට අනුයුක්ත හතරවන වේග ප්‍රහාරක යාත්‍රා බලඝණයට අයත් පි 481 යාත්‍රාව මේ අතර මෙදින දහවල් කාලයේ හලාවතට ඔබ්බෙන් වූ මුහුදු ප්‍රදේශයේ සිදුකල මුර සංචාරයකදී සැකකටයුතු මෙරට බහුදින ධීවර යාත්‍රාවක් නිරීක්‍ෂණය කර පරීක්‍ෂාවට ලක් කර තිබේ.
එහිදී, එම බහුදින ධීවර යාත්‍රාවේ සිටි නීති විරෝධී ලෙස මුහුදු මාර්ග ඔස්සේ ඕස්ට්‍රේලියාව බලා ගමන් කරමින් සිටි පිරිමි පුද්ගලයන් 58ක්, කාත්තාවන් 05ක්, ළමුන් 07ක් සමඟ ජාවාරමට සම්බන්ධ පුද්ගලයන් හය දෙනෙකු ඇතුළුව පුද්ගලයින් 76 දෙනෙක් අත්අඩංගුවට ගෙන ඇත. ඔවුන් වයස අවුරුදු 01ත් 62ත් අතර වයසේ පසුවන්නන්ය.
මෙම පිරිස, මීගමුව, හලාවත, පුත්තලම, කල්පිටිය, මාරවිල, මුලතිව්, කිලිනොච්චිය සහ ත්‍රිකුණාමලය යන ප්‍රදේශයන්හී පදිංචිකරුවන් බවට හඳුනා ගන්නාගෙන තිබේ. ඉදිරි නීතිමය කටයුතු සඳහා ඔවුන්ව බෝට්ටුව සමග රැගෙන විත් කොළඹ වරාය පොලිසිය වෙත භාරදී ඇත.
නීති විරෝධී සහ ඉතා අවධානම් සහගත ලෙස මෙරටින් සංක්‍රමණය වීමට උත්සහ කර ජාවාරම් කරුවන්ගේ කූට උපක්‍රම වලට හසුවී තම ජීවිත හා දේපල විනාශ කර ගැනීමෙන් වළකින ලෙස නාවික හමුදාව මහජනතාව වෙත අවධාරණය කරනු ලබයි. එසේම, මේ සඳහා යොදාගනු ලබන්නේ භාවිතයෙන් ඉවත් කිරීමට ආසන්න පැරණි ධීවර යාත්‍රා බවට නිරීක්‍ෂණය වන අතර, එම යාත්‍රා මඟින් නීති විරෝධීව සංක්‍රමණය වීමට උත්සාහ කිරීමෙන් ඉතා ඉහළ ජීවිත අවදානමකටද ලක්විය හැකි බව නාවික හමුදාව අනතුරු අඟවා සිටී.
