හැරී කුමරුට බ්‍රිතාන්‍ය රාජකීය පවුල සමඟ ආරවුල් තිබියදී, ලොව පුරා ආන්දෝලනයකට තුඩුදුන් ඔප්රා වින්ෆ්‍රි සමග පැවැති රජ පවුල විවේචනයට ලක්කළ සම්මුඛ සාකච්ඡාවෙන් පසු වුවද මිත්තණිය වන දෙවැනි එළිසෙබෙත් රැජිණගේ සැමියා වූ එඩින්බරෝ ආදිපාද පිලිප් කුමරුගේ මරණය මෙම පවුල ශෝකයෙන් එක්සත් කර ඇතැයි එරට මාධ්‍ය පවසයි.
පවුල හැරගිය ද සසෙක්ස් ආදිපාද හැරී කුමරු ඔහුගේ ඥාති සහෝදරියන් වන බියට්‍රිස් කුමරිය සහ ඉයුජීනී කුමරිය මෙන්ම ඔහුගේ පියා වන චාල්ස් කුමරු සමඟ ද සම්බන්ධ වී ඇති බවට වාර්තා ඇත.
අපේ‍්‍රල් 17 වන සෙනසුරාදා සිය සීයාගේ අවමංගල්‍ය උත්සවයට සහභාගී වීම සඳහා එක්සත් රාජධානියට ආපසු ඒම ගැන හැරී සිය පවුලේ අය සමඟ සාකච්ඡා කළ බව ආරංචි මාර්ග පවසයි.
ඔහු පවසා ඇත්තේ සෑම කෙනෙකු සමඟම සිටීමට තමාට අවශ්‍ය බවත් ඒ වන විටත් ඔහු නිවසට පැමිණීමට කටයුතු සූදානම් කරමින් සිටින බවත්ය.
COVID-19 පැතිරීම මැඩපැවැත්වීම සඳහා ගමන් සීමාවන් සහ දැඩි නිරෝධායන නීති ක්‍රියාත්මක වන විට, ආදිපාදවරයාට දින පහක් ස්වයං හුදකලා වී පීසීආර් පරීක්ෂණයක් කිරීමට සිදුවනු ඇත.
පීසීආර් වාර්තා ඍණාත්මක නම්, නිරෝධායනය බිඳ දමා ඔහුගේ පවුලේ අය සමඟ සිටීමට ඔහුට ඉඩ සලසනු ඇත.
ගැබ්ගෙන සිටින මේගන් මාකෙල් වෛද්‍යවරුන්ගේ උපදෙස් පරිදි එඩින්බරෝ ආදිපාදවරයාගේ අවමංගල්‍යයට සහභාගී නොවන බව බකිංහැම් මාලිගයේ ප්‍රකාශකයෙක් සෙනසුරාදා තහවුරු කළේය.
