සංවිධානාත්මක අපරාධකරුවෙක් වූ අංගොඩ ලොක්කාට පාතාලයේ අතපොත් තැබූ බව කියන සරත් කුමාර නොහොත් චීටි නැමැත්තාව පොලිස් විශේෂ කාර්ය බලකායේ විශේෂ පොලිස් කණ්ඩායමක් ඊයේ (08) රාත්‍රියේ අත්අඩංගුවට ගෙන තිබේ.
චිටී නැමැත්තා මුල් කාලයේ අංගොඩ පැත්තේ පිහිටි වෙල්වල කසිප්පු පෙරා බෙදා හැරීමේ ඡාවාරමක නිරතවූවෙකි. එකල අංගොඩ ලොක්කා පාසල් ගමන හමාර කිරීමෙන් පසු චිටී නැමැති මෙම පුද්ගලයාගේ කසිප්පු වාඩියේ වැඩට ගොස් ඒ හරහා දේශපාලනඥයෙක් සමග සම්බන්ධවීමෙන් අනතුරුව පාතාලයට වැටුණු බව සදහන්ය.
අංගොඩ ලොක්කාගේ පාතාලයේ අපරාධ සියල්ලකම පිටුපස චිටී නැමැත්තා සිට ඇති අතර මුදල් බෙදී යාමේදී ඇතිවුණු ආරවුල්මත ඔහු අංගොඩ ලොක්කාගෙන් කැඩී වෙන්වී ඇතැයිද පැවසේ. අනතුරුව අංගොඩ ලොක්කාගේ කල්ලිය පිළිබදව පොලීසියට ඔත්තු සපයන්නෙක් ලෙසද මොහු කටයුතුකර ඇත.
අංගොඩ ලොක්කාව ඉන්දියාවේදී ඝාතනය කිරීම සදහා සැළසුමක් සකස්කර අංගොඩ ලොක්කා අතින් ඝාතනය වූ රත්තරන් නැමැත්තාගේ බිරිද ඉන්දියාවට යවා අංගොඩ ලොක්කාගේ අනියම් බිරිදක් බවට පත්කර ඇත්තේද චීටි ය. අංගොඩ ලොක්කාගේ විශ්වාසය ඇය දිනා ගැනීමෙන් පසු ඔහු සිය සිරුර වර්ධනය කර ගැනීමට භාවිතා කරන ශක්ති ජනක පානයක් අධිමාත්‍රාවෙන් ලබාදී ඇති බවත් ඒ තුලින් හටගත් අතුරුආබාධයක් ලෙස හෘද රෝගයෙන් ඔහු මියගොස් ඇති බවත් සදහන්ය. එම සැළසුම චීටි ගේ බව පසුව හෙළිවිය. අංගොඩ ලොක්කා මිය ගිය පසු රෝහලේ බිම දමා තිබුණු ඔහුගේ ඡායාරූපය මෙරට ආරක්ෂක අංශ වෙත ලබාදෙන්නේද චීටි ය.
පොලිස් විශේෂ කාර්ය බලකාගේ ගෝනහේන කදවුරේ නිලධාරීන් පසුගිය නොවැම්බර් මස වැලිගමදී අල්ලාගත් හෙරොයින් කිලෝ 112 පිටුපසද චීටි සිටින බව පොලීසිය සදහන් කරයි.
චීටි නැමැති මෙම අපරාධකරු පදිංචිව සිටියේ අංගොඩ දෙල්ගහවත්තේය. ඔහුගේ නිවසේ සැගවීමට භූගත බංකරයක් පවා ඉදිකර තිබී ඇත. විශේෂ කාර්ය පගකාය එම භූගත බංගකර සොයාගෙන තිබේ.
