සමාජ මාධ්‍ය අද සමාජයේ නැතිවම බැරි අංගයක් වෙලා තිබෙනවා. අද අපි හැමදෙනාම ඊට ඇබ්බැහි වෙලායි ඉන්නේ. සමහර අය නොකා නොබී සමාජ මාධ්‍ය වල ඇලී ගැලී ඉන්නේ. ඒනිසා ජීවිතය අඳුරු වුන අයත් අඳුරු කරගත් අයත් නිතරම අපි දකිනවා.
ඒ වගේමයි අද ජනතාව මුලාවේ හෙලන්න සමාජ මාධ්‍ය හේතුවී තිබෙනවා. සමහර අය සමාජ මාධ්‍යවල ඇති කරුණු දේව භාෂිතයක් තරම් විස්වාස කරනවා. බලන්න ඒ අය ආමන්ත්‍රණය කරන්නේ අපගේ තිබෙන සිතීමේ අඩුපාඩුවට ය. අපගේ තිබෙන මතවාදවලට ය. අපේ මොල සේදීමත්, ඔවුන්ගේ මතවාදය වක්‍රාකාරයෙන් අපේ සිතට එබ්බවීමත් වන බව නිදහස් මනසකින් සමාජ මාධ්‍ය දෙස බලන විට අපට පෙනී යයි.
විවිධාකාර වෙළඳ අරමුණු දේශපාලන අරමුණු සඳහා වූ සමහර සමාජ මාධ්‍ය පේජ් වලින් ප්‍රේක්ෂක ජනතාව අනිසි ලෙස, අවනීතික සහ සදාචාර විරෝධී ක්‍රියාමාර්ග ගන්නා බව අපට පෙනී යයි. සමහර විද්‍යුත් සහ මුද්‍රිත මාධ්‍ය ද සමාජ මාධ්‍ය මෙන්ම තම පටු අරමුණු සඳහා ක්‍රියාත්මක වනවා. එහෙත් යම් මාධ්‍ය ආයතනයකින් ප්‍රකාශයට පත් කරන මාධ්‍යයක දී යම්තාක් දුරට සමාජ ආචාර ධර්ම රැකෙන සේ එම කාර්යය සිදු වෙනවා. ඒත් සමාජ මාධ්‍ය වල දී සමහරුන් විසින් ව්‍යාජ මුහුණුවරකින් තොරතුරු බෙදා හරින බව පොදුවේ දක්නට තිබෙන කාරණයක්. පුද්ගලයෙක් අපහසුතාවයට පත් කිරීමට හෝ ජන සමාජයක් හෝ සංවිධානයක් අපහසුතාවයට පත් කිරීමේ අරමුණෙන් අවනීතික සහ සදාචාර විරෝධී කටයුතු සමාජ මාධ්‍ය තුළ දකින්නට ලැබෙන අවස්ථා බොහොමයකි.
ත්‍රස්තවාදී සංවිධාන මෙන්ම අන්තවාදී සංවිධාන ද සමාජ මාධ්‍ය හරහා ඔවුන්ගේ ක්‍රියාකාරීත්වය සිදුකරනු ලබති. එලෙසම යම් සංවිධානයක ව්‍යාපාර අරමුණු සඳහා ද සමාජ මාධ්‍ය අනිසි ලෙස යොදා ගනු ලැබේ. සමහර කණ්ඩායම් සමාජ මාධ්‍ය භාවිතා කරන අයගේ තොරතුරු සදාචාර විරෝධී ලෙස එක්රැස් කරනු ලැබේ. එසේ එක් රැස් කරගන්නා තොරතුරු අනිසි භාවිතය කිරීම නීති විරෝධීය. විවිධාකාර තරග සහ වෙනත් සමූහ හරහා ඔවුන් මේ පටු පරමාර්ථ ඉටු කර ගනිති.
තවත් එක දෙයක් වන්නේ මිනිසුන් විවිධාකාර අනියම් සබඳතා සහ මත්ද්‍රව්‍ය ප්‍රචාරය සඳහාත් සමාජ මාධ්‍ය අනිසි ලෙස යොදා ගනී. සමාජ මාධ්‍ය සබුද්ධිකව භාවිතා කිරීම අප සැම සිතේ තබා ගත යුතු කාරණයක්.
සතියකට වරක් විවිධාකාර ට්‍රෙන්ඩ් සකසන සමාජ මාධ්‍ය මෙහෙයවන්නෝ ජනතාවගේ සිත තුළ එක්කෝ වීරයන් බිහි කරයි. එසේත් නැත්නම් ද්‍රෝහීන් බිහිකරයි. සතියකින් පසු තවත් වීරයෙක් හෝ ද්‍රෝහියෙක් බිහිකර පරිශීලකයාගේ මනස ඔවුන්ගේ පටු අරමුණ ට හරවා ගනිති. හොඳම උදාහරණය වන්නේ පාස්කු ප්‍රහාරය එල්ල කළ ත්‍රස්තවාදීන් ද, අරාබි වසන්තය ඇතිකළ දේශපාලන ප්‍රවාහයත් ඔවුන්ගේ අරමුණු සඳහා යොදාගත්තේ සමාජ මාධ්‍යයයි.
සමාජ මාධ්‍ය ජාලාවල පළ කෙරෙන විවිධ ආකාර පෝස්ටු විමසුම් ඇසකින් නිරීක්ෂණය කළ විට තේරුම් යන්නේ බහුතරයක් පෝස්ටු සැකසී පවතින්නේ අසත්‍ය තොරතුරු වලිනි. එම තොරතුරු දේව භාෂිතයක් කොටගත් අහිංසක පරිශීලකයෝ එම තොරතුරු පතුරුවා හරිති. එයින් සමාජයට සිදු වන්නේ අවැඩක් පමණි. ඉතින් අපි බුද්ධිමත්ව සමාජ මාධ්‍ය පරිශීලනය කරමු. එය අපේත් අපේ සමාජයේ ත් යහපත සඳහාම විය යුතුය.
එඤ්ඤං
මම
සත්‍යගවේෂී
