රජයේ වෛද්‍ය නිලධාරීන්ගේ සංගමය ආයුර්වේද වෛද්‍යවරුන්ට හා දේශීය ප්‍රතිකාර ක්‍රමවලට දිගින් දිගටම අකුල්හෙලන බවට දේශීය හා ආයුර්වේද වෛද්‍යවරුන්ගේ ස්වාධීන එකමුතුව චෝදනා කරයි.
රජයේ වෛද්‍ය නිලධාරින්ගේ සංගමයේ ක්‍රියාකලාපයන්ට එරෙහිව ඉදිරියේදී නීති මගින් කටයුතු කරන බව ද දේශීය හා ආයුර්වේද වෛද්‍යවරුන්ගේ ස්වාධීන එකමුතුවේ කැඳවුම්කරු දේශීය වෛද්‍ය සුමුදු ලියනආරච්චි මහත්මිය පැවසුවාය.
රජයේ වෛද්‍ය නිලධාරීන්ගේ සංගමයේ සභාපති අනුරුද්ධ පාදෙණිය මහතා ජනමාධ්‍යය ඉදිරියේ දේශීයත්ත්වය අගය කරමින් කතා කළ ද ඔහුගේ දෙබිඩි පිළිවෙත මෙම කටයුතුවලින් හෙළිවන බව ද ලියනාරච්චි මහත්මිය පැවසුවාය.
කොවිඩ් මර්දන එන්නත් ලබාගත් පුද්ගලයින්ට ඇතිවන අතුරු ආබාධවලට දේශීය වෛද්‍ය ක්‍රමයෙන් ප්‍රතිකාර ලබාදීම සඳහා ස්ථාන කීපයක ඉකුත් දිනවල පැවැත්වූ ආයුර්වේද වෛද්‍ය සායනවලට රජයේ වෛද්‍ය නිලධාරීන්ගේ සංගමය විවිධ බාධා පැමිණ වූ බවද සුමුදු ලියනආරච්චි මහත්මිය කීවාය.
