නැගෙනහිර පළාතේ සියලුම රාජ්‍ය ආයතනවල මේ මාසයේ සිට විදුලි භාවිතය 20%ත් 50%ත් අතර ප්‍රමාණයකින් අඩු කිරීමට පියවර ගන්නැයි නැගෙනහිර පළාත් ආණ්ඩුකාර අනුරාධා යහම්පත් මහත්මිය ඊයේ පස්වරුවේ සියලුම රාජ්‍ය ආයතන ප්‍රධානීන්ට දැනුම් දුන්නාය.

මුදල් අමාත්‍ය බැසිල් රාජපක්ෂ මහතා සමග පැවති විශේෂ සාකච්ඡාවකින් අනතුරුව ආණ්ඩුකාරවරිය රාජ්‍ය ආයතන ප්‍රධානීන්ට එම නියෝගය කළාය.

ඒ අනුව මේ මාසයේ සිට නැගෙනහිර පළාතේ සියලුම රාජ්‍ය ආයතනවල විදුලි බිල 20%ත් 50%ත් අතර ප්‍රමාණයකින් අඩු විය යුතු බව ද ආණ්ඩුකාරවරිය රාජ්‍ය ආයතන ප්‍රධානීන්ට දැනුම් දුන්නාය.

ගුදම් පහසුකම්, බහළුම් අංගන, වරාය සැපයුම් පහසුකම් සහ බෝට්ටු හා නැව් කර්මාන්ත සංවර්ධන රාජ්‍ය අමාත්‍ය ජයන්ත සමරවීර මහතා එම අමාත්‍යධූරයෙන් ඉල්ලා අස්වීමේ ලිපිය ජනාධිපති ගෝඨාභය රාජපක්ෂ මහතාට යොමුකර තිබේ.

ජයන්ත සමරවීර මහතා නියෝජනය කරනුයේ හිටපු අමාත්‍ය විමල් වීරවංශ මහතා නියෝජනය කරන ජාතික නිදහස් පෙරමුණ පක්ෂයයි.

සිය ඉල්ලා අස්වීමේ ලිපිය ඊයේ දාතමින් ජයන්ත සමරවීර මහතා ජනාධිපතිවරයා වෙත යොමු කර තිබේ.

තමාගේ ඉල්ලා අස්වීමට බලපෑ කරුණු ඔහු සිය ලිපිය මගින් ජනාධිපතිවරයාව දැනුවත් කර ඇත.

එතනෝල් නිෂ්පාදනයට බාධා පැමිණීම හේතුවෙන් මෙම මස 22 වැනිදා සිට මත්පැන් නිෂ්පාදනය සම්පූර්ණයෙන්ම නත රවන බවට සමාජ මාධ්‍යයන්හි පළවන ප්‍රවෘත්තිය සම්පූර්ණයෙන්ම අසත්‍ය බව සුරාබදු දෙපාර්තමේන්තුව නිවේදනය කරයි.

අරක්කු ඇතුළු දේශීය මත්පැන් නිපදවන සුරාබදු බලපත්‍ර ලත් මත්පැන් නිෂ්පාදනාගාර 23ක් මෙරට ක්‍රියාත්මක වන බවත් ඒවාට අවශ්‍ය එතනෝල් ඇතුළු අමුද්‍රව්‍ය තවමත් දේශීය වෙළෙඳපොළන් ලබා ගත හැකි බවත් අදාළ නිවේදනයේ සදහන් වේ.

පාර්ලිමේන්තුවේ සම්මත කර ගැනීම සඳහා නැවත ඉදිරිපත් කර තිබෙන සංශෝධිත කොතලාවල විශ්වවිද්‍යාල පනත් කෙටුම්පත කොන්දේසි විරහිතව ප්‍රතික්ෂේප කරන බව විශ්වවිද්‍යාල ආචාර්යවරුන්ගේ සමිති සම්මේලනය සඳහන් කරයි.

පාර්ලිමේන්තුවේ විවාද කිරීම සඳහා ඉදිරිපත් කරනු ලැබ එහෙත් දැවැන්ත මහජන විරෝධතාවයක් සහ ආණ්ඩුව තුළින්ම විරෝධතාවක් මතුව ආ හෙයින් හකුළාගත් කොතලාවල ජාතික ආරක්ෂක විශ්වවිද්‍යාල පනත් කෙටුම්පත සංශෝධන පනතක් ලෙස යළි ඉදිරිපත් වී තිබීම බරපතළ කරුණක් ලෙස සලකන බවද එම සමිති සම්මේලනය කියයි.

එම නිසා මෙම පනත හකුළා හකුලා ගන්නැයි බල කරන බවද විශ්වවිද්‍යාල ආචාර්ය සමිති සම්මේලනය සඳහන් කරයි.

කෙටුම්පත සංශෝධනය කර ඇතැයි පැවසුවද සිදුකර ඇත්තේ හුදු සැරසිලිමය වෙනස්කම් පමණක් බවද කලින් ඉදිරිපත් කර තිබූ පනත කෙටුම්පත් ඒ හරය කිසි ලෙසකින් හෝ සංශෝධිත පනත් කෙටුම්පතෙහි වෙනස් කර නැතැයිද විශ්වවිද්‍යාල ආචාර්යවරුන්ගේ සමිති සම්මේලනය කියයි.

ගල් අඟුරු ආනයනය කිරීමට වෙන් කර තිබූ මුදල් ඉන්ධන ආනයනය කිරීම සඳහා යොදාගැනීම ඊට හේතුවෙන් ඉදිරියේදි ගල් අඟුරු හිඟයක් ඇති වීමේ අවදානමක් පවතින බව ලංකා විදුලිබල මණ්ඩලය පවසයි.

යම් හෙයකින් ගල් අඟුරු හිඟයත් ඇතිවුවහොත් එමඟින් විදුලිය නිෂ්පාදනය කරන බලාගාර අක්‍රිය වී පැය 15 ක පමණ කාලයක් විදුලිය විසන්ධි කිරීමේ අවධානමක් මතුවනු ඇතැයි ඔවුන් සඳහන් කරයි.

ඉදිරි වාරකන් කාලයේදී මුහුදු රළුවන බැවින් අප්‍රේල් මාසය අවසන් වීමට පෙර ගල් අඟුරු ආනයනය කිරීම අනිවාර්යය බව ඔවුහු පෙන්වා දෙති.

මුහුද රළු කාලයේදී කිසිඳු ගල් අඟුරු නෞකාවක් මෙරටට ගෙන්වා ගැනීමට නොහැකි වනු ඇතැයිද ලංකා විදුලි බල මණ්ඩලය වැඩිදුරටත් සදහන් කරයි.

ශ්‍රී ලංකා මහ බැංකුවේ අවසරයකින් තොරව විදේශ මුදල් විකිණීම හෝ හුවමාරු කිරීමේ නිරත වීම තහනම් වන බව ශ්‍රී ලංකා මහ බැංකුව සඳහන් කරයි.

ඒ අනුව එවැනි අනවසර විදේශ මුදල් හුවමාරු කරන්නන් පිළිබඳව තොරතුරු ඇත්නම් ඒ පිළිබඳව ශ්‍රී ලංකා මහ බැංකුවේ විදේශ වෙනුවෙන් දෙපාර්තමේන්තුවේ 0112398827 හෝ 0112477375 දුරකතන අංකවලට දැනුම් දෙන ලෙස ද ශ්‍රී ලංකා මහ බැංකුව කියයි.

ශ්‍රී ලංකාව තුළ විදේශ මුදල් මිලදී ගැනීම, අලෙවි කිරීම, හුවමාරුව සඳහා අවසර ඇත්තේ ශ්‍රී ලංකා මහ බැංකුවේ අනුමත බලපත්‍රලාභී බැංකු හා බලයලත් මුදල් හුවමාරු කිරීමේ ආයතන සදහා පමණි.

වෙළෙඳපලේ මේ වනවිට පවතින උග්‍ර ගෑස් හිඟය රෝහල් කටයුතුවලට දැඩි බලපෑමක් එල්ලවී ඇතැයි රජයේ වෛද්‍ය නිලධාරීන්ගේ සංසඳය පවසයි.

එහි සභාපති වෛද්‍ය රුක්ෂාන් බෙල්ලන මහතා සඳහන් කළේ මේ හේතුවෙන් ඇතැම් රසායනාගර පරීක්ෂණ කටයුතුවලටද දැඩි බලපෑම් එල්ලවන බවයි.

එමෙන්ම රෝගීන්ට ආහාර සැපයීම ඇතුළු සත්කාර සේවා සැපයීමද අර්බුදකාරී තත්ත්වයට පත්වෙමින් තිබෙන බවද ඔහු සඳහන් කළේය.

සාමාන්‍යයෙන් රෝහල් කටයුතු සඳහා කිලෝග්‍රෑම් 37 යි දශම 5 වර්ගයේ විශාල ප්‍රමාණයේ ගෑස් සිලින්ඩර් භාවිත කෙරේ.

එහෙත් ලිට්‍රෝ සමාගම පැවසුවේ පවතින ගෑස් හිගය හේතුවෙන් කිලෝග්‍රෑම් 37 යි දශම 5 වර්ගයේ ගෑස් සිලින්ඩර ඉකුත් 04 වනදා සිට නිකුත් කිරීම සිදුනොවූ බවයි.

කින්නියා මහමාරු නඩඋත්තු සුනාමි ගම්මානයේදී යතුරු පැදියකින් ගමන් කරමින් සිටි දෙදෙනෙකුට ඊයේ රාත්‍රිෙය් ටී 56 අවියකින් වෙඩිතබා යතුරුපැදියකින් පළාගිය තිදෙනෙක් කින්නියා පොලීසියේ නිලධාරීන් විසින් දැඩි පරීශ්‍රමයකින් අනතුරුව අත්අඩංගුවට ගෙන තිබේ.

කින්නියා ප්‍රදේශයේම පදිංචිකරුවන් වන එම සැකකරුවන්ගෙන් කළ ප්‍රශ්න කිරීම්වලින් හෙළිවූ තොරතුරු මත වෙඩි තැබීමට යොදාගත් ටී 56 අවිය පතොරම්ද සමඟ නන්ඩුකුඩා කලපුව අසල සඟවා තිබියදී පොලීසිය සොයාගෙන ඇත.

මෙම සැකකරුවන් අවුරුදු 30 ,43 සහ 54 වයස්වල පසුවන්නන්ය.

මොවුන් තැබූ වෙඩි පහරවලින් අනෙත් යතුරු පැදියේ ගමන් කළ පුද්ගලයින් දෙදෙනාගේ ජීවිතයට හානියක් වී නැත. එහෙත් වෙඩි වැදීමෙන් බරපතල ලෙස තුවාල ලැබූ ඔවුන් කින්නියා රෝහලට ඇතුලත් කිරීමෙන් අනතුරුව වැඩිදුර ප්‍රතිකාර සඳහා ත්‍රිකුණාමලය රෝහලට මාරුකර යවා තිබේ.

පොලීසිය සදහන් කරනුයේ මෙම වෙඩි තැබීම දෙපාර්ශවයක් අතර ඇති පුද්ගලික ආරවුලක් මත සිදුව ඇති බවය. තුවාල කරුවන් කින්නියා කුටිටකරච්චි හී පදිංචි අවුරුදු 30ත් 33ත් අතර වයස්වල පසුවන්නන්ය.

සැකකරුවන් අද අධිකරණයට ඉදිරිපත් කිරීමට නියමිතය.

විදේශගත ශ්‍රමිකයන් අලුත් අවුරුදු සමයේ මෙරටට එවනු ලබන විනිමය ආදායම වෙනුවෙන් ඇමරිකානු ඩොලරයකට රුපියල් 38 බැගින් විගමන ප්‍රේෂණ ප්‍රවර්ධනය කිරීමට දිරිගැන්වීමක් ලබාදීමට කැබිනට් මණ්ඩලය තීරණය කර ඇත.

ඒ මෙතෙක් ගෙවන ලද රුපියල් 10 දීමනාව ඉහළ නන්වමිනි.

එ් සම්බන්ධයෙන් අමාත්‍ය මණ්ඩල කාර්යාලය විසින් නිකුත් කළ නිවේදනය මෙසේය.

• ශ්‍රී ලංකාවට විදේශ විනිමය ලැබෙන ප්‍රධාන මුලාශ්‍රයක් වන විදේශ රැකියා ක්ෂේත්‍රය මඟින් වාර්ෂිකව ඇමෙරිකානු ඩොලර් බිලියන 7-8කට ආසන්න විදේශ විනිමය ප්‍රමාණයක් මෙරටට ප්‍රේෂණය කරනු ලබයි.

එලෙස විගමනික ශ්‍රමිකයින් විසින් එතෙරදී උපයනු ලබන විදේශ විනිමය එළඹෙන අවුරුදු සමයේදී මෙරටට ප්‍රේෂණය දිරිමත් කිරීම, විගමනික ශ්‍රමිකයින් ඇගයීම සහ ඔවුන්ගේ යැපෙන්නන්ට හා පවුල්වල සාමාජිකයින්ට වැඩි ආර්ථික ප්‍රතිලාභ ලබා දීම පිණිස විගමනික ශ්‍රමිකයින් විසින් මෙරටට ප්‍රේෂණය කරනු ලබන ඇමෙරිකානු එක්සත් ජනපද ඩොලරයක් වෙනුවෙන් දැනට ගෙවනු ලබන රුපියල් 10/-ක දිරි දීමනාව රුපියල් 38/-ක් දක්වා වැඩි කිරීම පිණිස කම්කරු අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.

ශ්‍රී ලංකා ඉඩම් සංවර්ධනය කිරීමේ සංස්ථාව සතු මුතුරාජවෙල කර්මාන්ත කලාපයේ පිහිටි ඉඩම් කොටසක් 30 වසරක බදු පදනමින් පුද්ගලික සමාගමකට ලබාදීමට කැබිනට් අනුමැතිය.

ශ්‍රී ලංකා ඉඩම් සංවර්ධනය කිරීමේ සංස්ථාව සතු මුතුරාජවෙල පිහිටි අක්කර 400ක භූමි ප්‍රදේශයක් මුහුදු වැලි පොම්ප කර සංවර්ධනය කර ඇත.

එකී ඉඩමෙන් ඉඩම් කොටස් ගණනාවක් ජාතික වශයෙන් වැදගත් ව්‍යාපෘති සඳහා රජයේ සහ පෞද්ගලික ආයෝජකයින් වෙත පවරා දී තිබේ.

ශීතාගාර පහසුකම් සඳහා එකී ඉඩමෙන් ඉඩම් කොටසක් ලබා දෙන ලෙස ඉමර්ජන්ට් කෝල්ඩ් (පෞද්ගලික) සමාගම විසින් ඉල්ලීමක් කර ඇති අතර එම ආයතනය අදාළ ඉඩම් කොටස ලබා ගැනීම සඳහා ශ්‍රී ලංකා ආයෝජන මණ්ඩල පනතේ 17 වන වගන්තිය යටතේ මූලික සුදුසුකම් සපුරා ඇති බවට ශ්‍රී ලංකා ආයෝජන මණ්ඩලය විසින් දැනුම් දී ඇත.

ඒ අනුව, යෝජිත ව්‍යාපෘතිය සඳහා යෝග්‍ය බවට හඳුනාගෙන ඇති අක්කර 04 රූඩ් 02 ක් වූ ඉඩම් කොටසක් වසර 30ක කාලයක් සඳහා දිගුකාලීන බදු පදනම මත එකී සමාගම වෙත ලබා දීම පිණිස නාගරික සංවර්ධන හා නිවාස අමාත්‍ය වශයෙන් ගරු අග්‍රාමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.

අද (08) දිනයේදීත් ඇතැම් ප්‍රදේශවලට පැය 7 1/2ක විදුලි කප්පාදුවක් සිදුවන බව මහජන උපයෝගීතා කොමිසම පවසයි.

රට පුරා විදුලි කප්පාදු කාලසටහන පහත දැක්වේ.

ප්‍රාදේශීය මාධ්‍යවේදී මුරුගුපිල්ලේ කොකුලතාසන් අද ඇප මත මුදාහැර ඇතැයි වාර්තා වේ.

ඒ වාලච්චේන මහේස්ත්‍රාත් අධිකරණය විසිනි.

ඔහු ත්‍රස්තවාදය වැළැක්වීමේ පනත යටතේ දින 470කට අධික කාලයක් රැඳවුම් භාරයේ සිට ඇත.

ප්‍රාදේශීය මාධ්‍යවේදී මුරුගුපිල්ලේ කොකුලතාසන් 2020 නොවැම්බර් මාසයේ සිට රඳවා තබාගෙන තිබුණේ හිටපු එල්ටීටීඊ නායකයාගේ ඡායාරූප සිය සමාජ මාධ්‍ය ගිණුම් ඔස්සේ මුදාහැරීම බව පැවසිණ.

මේ සම්බන්ධයෙන් මේ දිනවල පැවැත්වෙන ජගත් මානව හිමිකම් කවුන්සිලයේ දී ශ්‍රී ලංකාව පිළිබඳ මානව හිමිකම් මහකොමසාරිස් මිචෙල් බැචලේගේ වාර්තාවේදී සඳහන් වී තිබුණි.

අතිඋතුම්‌ මැල්කම්‌ රංජිත්‌ කාදිනල්‌ හිමිපාණන්‌ වහන්සේ ස්විස්ටර්ලන්තයේ ජිනීවාහි එක්සත්‌ ජාතීන්ගේ මානව හිමිකම්‌ කවුන්සිලයෙන්‌ ඉල්ලීමක්‌ කර තිබේ.

ඒ පාස්කු ප්‍රහාරයෙන්‌ අගතියට පත්‌ වින්දිතයින්ට සාධාරණයක්‌ ඉටු කිරීම සඳහා සහය දෙන ලෙසය.

එක්සත්‌ ජාතීන්ගේ මානව හිමිකම්‌ කවුන්සිලයේ දී 49 වන සැසිවාරය අතරතුර දී විශේෂ ප්‍රකාශයක්‌ සිදුකරමින්‌ උන්වහන්සේ මේ බව ප්‍රකාශ කර ඇත.

එහිදී වැඩිදුරටත්‌ අදහස්‌ දක්වමින්‌ අතිඋතුම්‌ මැල්කම්‌ රංජිත්‌ කාදිනල්‌ හිමිපාණන්‌ වහන්සේ ප්‍රකාශ කර ඇත්තේ සත්‍ය සොයාගැනීමට අපක්ෂපාතී විමර්ශනයක්‌ පැවත්වීම සහතික කිරීම සඳහා ක්‍රමවේදයක්‌ සැලසුම්‌ කිරීමට සහයෝගය දක්වන ලෙසයි.

අඛණ්ඩව විදුලිය සැපයීම මේ වන විට අර්බුදයකට ලක්ව ඇති නිසා වැඩි කාලයක් විදුලිය කපා හැරීමට සිදු වන බව ලංකා විදුලිබල මණ්ඩලය සඳහන් කරයි.

හැකි සෑම අවස්ථාවකම විදුලි ඉතා අරපිරිමැස්මෙන් භාවිත කරන්නැයි ලංකා විදුලිබල මණ්ඩලය ජනතාවගෙන් ඉල්ලීමක් කරයි.

එම නිසා ඉතා අරපිරිමැස්මෙන් විදුලි භාවිත කරන ලෙස ජනතාවගෙන් ඉල්ලා සිටින බවද ලංකා විදුලිබල මණ්ඩලයේ වැඩබලන අතිරේක සාමාන්‍යාධිකාරි සෙනජිත් දසනායක මහතා පැවැසීය.

ජලාශවල ජල මට්ටම සීඝ්‍රයෙන් පහත යෑම, ඉන්ධන සැපයීම සීමා වීම, විදුලි ඉල්ලුම ඉහළ යාම ආදී ලංකා විදුලිබල මණ්ඩලය අභියෝග රැසකට මුහුණ දී ඇතැයි ද දසනායක මහතා සඳහන් කළේය.

එම නිසා හැකි සෑම අවස්ථාවකම විදුලිබලය අරපිරිමැස්මෙන් භාවිත කර සංරක්ෂණය කරන ජනතාවගෙන් ඉල්ලා සිටින බවද ඔහු සඳහන් කළේය .

සියලුම පළාත් පාලන ආයතන බල ප්‍රදේශ තුළ අද සිට ලබන 31 වනදා දක්වා වීථි ලාම්පු අක්‍රිය කර තබන ලෙස අමාත්‍ය බැසිල් රාජපක්ෂ සියලුම පළාත් පාලන ආයතන ප්‍රධානීන්ට සහ කණ්ඩායම් නායකයින්ට දැනුම් දෙයි.

විදුලිය ඉතිරි කර ගැනීම සදහා දෛනික ජන ජීවිතයට අවම බලපෑම වන පරිදි ක්‍රියාත්මක කළ හැකි වෙනත් විකල්ප වේනම් ඒවා ක්‍රියාවට නංවා තමා වෙත දැනුම් දෙන ලෙසද අමාත්‍යවරයා නිවේදනයේ සදහන් කර ඇත.

තවත් පාසල් දහයක් ශ්‍රී ලංකාවේ ජාතික පාසල් ලැයිස්තුවට ඇතුළත් කර තිබේ.

ජාත්‍යන්තර කාන්තා දිනයට සමගාමීව මෙම පියවර ගෙන ඇත.

හෙට (08) අරලියගහ මන්දිරයේදී අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් පැවැත්වෙන උත්සවයකදී සූම් ඔස්සේ නව ජාතික පාසල් දහය නිල වශයෙන් ප්‍රකාශයට පත්කිරීමට නියමිතය.

ජනාධිපති ගෝඨාභය රාජපක්ෂ මහතාගේ ජාතික පාසල් 1000ක් ස්ථාපිත කිරීමේ ජාතික ප්‍රතිපත්තියේ කොටසක් ලෙස මෙම පාසල් එකතු කර ඇති බව අධ්‍යාපන අමාත්‍යාංශය පවසයි.

මේ සමඟ ශ්‍රී ලංකාවේ මුළු ජාතික පාසල් සංඛ්‍යාව 495 දක්වා ඉහළ යනු ඇත.

ඒ අනුව නව ජාතික පාසල් 10 වන්නේ, බෙලිඅත්ත පුවක්දණ්ඩාව ධම්මපාල බාලිකා විද්‍යාලය, බිබිල යශෝධරා බාලිකා විද්‍යාලය, දොම්පේ දේවි බාලිකා විද්‍යාලය, කල්මුණේ මහමුද්‌ කාන්තා විද්‍යාලය, කැකිරාව විද්‍යාර්ථ මහා විද්‍යාලය, කෑගල්ල ස්වර්ණ ජයන්ති මහා විද්‍යාලය, හැටන්‌ ශාන්ත ගේබ්‍රියල්‌ බාලිකා විද්‍යාලය, පේදුරුතුඩුව මෙතෝදිස්ත උසස්‌ බාලිකා විද්‍යාලය, දංකොටුව බෞද්ධ බාලිකා විද්‍යාලය, වලහන්දූව ජනාධිපති බාලිකා විද්‍යාලය යි.

ශ්‍රී දළදා වහන්සේ වැඩසිටින කරඬුව වැඩම කර වූ මියගිය නැදුන්ගමුවේ රාජා හස්තිරාජයා ජාතික වස්තුවක් ලෙස නම් කරන ලෙස ජනාධිපති ගෝඨාභය රාප්පක්ෂ විසින් උපදෙස් ලබාදී තිබේ.

ජනාධිපති මාධ්‍ය අංශය සඳහන් කළේ,බුද්ධශාසන, ආගමික හා සංස්කෘතික කටයුතු අමාත්‍යාංශයේ ලේකම් මහාචාර්ය කපිල ගුණවර්ධන වෙත අදාළ උපදෙස් ලබාදුන් බවයි.

අනාගත පරපුරට දැකගැනීම සඳහා නැදුන්ගමුවේ හස්තිරාජයාගේ සිරුර සංරක්ෂණය කරන ලෙස ජනාධිපතිවරයා එහිදී උපදෙස් දී තිබේ.