මෙරට සංචාරයක නිරතව සිටි පිලිපීන ජාතිකයෙකුට වැලිගම දී පහරදෙන අයුරු දැක්වෙන සමාජ මාධ්‍ය ඔස්සේ හුවමාරුවන වීඩියෝව 2024 වසරේ පෙබරවාරි මාසයේදී සිදුවූවකට අදාල එකක් බවත් එම පහරදීමට සම්බන්ධ සැකකරු අත්අඩංගුවට ගෙන අධිකරණයට පවා එකල ඉදිරිපත්කර ඇති බවත් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිතිවේදී බුද්ධික මනතුංග මහතා සඳහන් කරයි.
තමාට කළ පහරදීම සම්බන්ධයෙන් මෙරට සංචාරයකට පැමිණ සිටි එම පිලිපීන ජාතිකයා විසින් වැලිගම පොලිසියට 2024 වසරේ පෙබරවාරි 14 වෙනිදා පැමිණිල්ලක්ද කර ඇති බව පොලිස් මාධ්‍ය ප්‍රකාශකවරයා පවසයි.
එම පැමිණිල්ලට අනුව කළ විමර්ශනයේදි පෙනි ගොස් ඇත්කේ මෙම විදේශිකයා සංචාරයක් සඳහා මෙරටට පැමිණ කැමරාවකින් ඔහු සිදුකරන ක්‍රියාකාරකම් පටිගත කරමින් වැලිගම ප්‍රදේශයේ සංචාරය කරමින් සිට ඇති බව යැයිද බුද්ධික මනතුංග මහතා සඳහන් කරයි.
එබැවින් පෙර සිදුවිම් නැවත නැවත සමාජ මාධ්‍ය ජාල ඔස්සේ සංසරණය කරවීමට කටයුතු කරන පුද්ගලයින් හෝ කණ්ඩායම් විසින් රට අපකීර්තියට පත් කිරිමට හෝ වෙනත් අරමුණකින් එසේ සිදුකරන්නේ ද යන්න සම්බන්ධයෙන් විමර්ශන සිදුකර ඔවුනට එරෙහිව නෛතික ක්‍රියාමාර්ග ගැනීමට කටයුතු කරනු ඇතැයිද බුද්ධික මනතුංග මහතා අවධාරණය කළේය.
එසේ ඔහු සිදුකරන ක්‍රියාකාරකම් පටිගත කරමින් වැලිගම පැලෑන වෙරළ තිරයේ පිහිටි දිය මත ලිස්සායාම පුහුණුකරනු ලබන ස්ථානයකට ගොස් දර්ශන පටිගත කිරීමේදී එම ස්ථානයේ සේවකයෙකු ඊට විරුද්ධත්වය ප්‍රකාශ කර ඇති බවත් බුද්ධික මනතුංග මහතා පැවසීය. එහිදී ඇතිවූ ආරවුලක් මත මෙම විදේශීය ජාතිකයාට එම සේවකයා විසින් අතින් පයින් පහරදිමක් සිදුකර ඇතැයි අනාවරණය වී තිබෙන බවද ඔහු පැවසීය.
මෙම පහරදීම සම්බන්ධයෙන් වැලිගම පොලිසියේ නිලධාරීන් විසින් 24 හැවිරිදි පැලෑනේ පදිංචිකරුවෙක් වූ සේවකයා අත්අඩංගුවට ගෙන මාතර මහේස්ත්‍රාත් අධිකරණයට ද ඉදිරිපත් කර ඇත. ඊට අදාල නඩු විභාගය ලබන සැප්තැම්බර් 11 වෙනිදා නැවත කැදවීමටද නියමිත බව බුද්ධික මනතුංග මහතා සඳහන් කළේය.
මෙසේ සැකකරු අත්අඩංගුවට ගෙන අධිකරණමය ක්‍රියාමාර්ග පවා ගෙන තිබියදී මෙන්ම පොලිසිය විසින් විමර්ශන පවත්වා නීතිමය පියවර පවා ගෙන තිබියදී පවා පැරණි වීඩියෝවත් මෑතකදී සිදුවූවක් ලෙස හුවා දක්වමින් යම් පුද්ගලයෙක් හෝ පුද්ගල කණ්ඩායමක් නැවත නැවත සංසරණය කරවීමට ක්‍රියාකර ඇති බව එම වීඩියෝව සම්බන්ධයෙන් කළ නිරික්ෂණයේදී පෙනී ගොස් ඇතැයි ද බුද්ධික මනතුංග මහතා පැවසීය.
