ශ්‍රී ලංකා මහ බැංකු පනතට නව සංශෝධන එක්කරමින් සකස් කරන ලද නව කෙටුම්පතට අමාත්‍ය මණ්ඩල අනුමැතිය ලැබී තිබේ.
එය ඊයේ පැවති රැස්වීමේදී මෙලෙස අනුමැතිය හිමිව ඇති අතර එය ඉදිරිපත් කර ඇත්තේ ආර්ථික ස්ථායීකරණ සහ ජාතික ප්‍රතිපත්ති අමාත්‍යතුමා වශයෙන් ජනාධිපති රනිල් වික්‍රමසිංහ මහතායි.
වර්තමාන අවශ්‍යතාවන්ට ගැළපෙන පරිදි ශ්‍රී ලංකා මහ බැංකුවේ කටයුතු වඩාත් කාර්යක්ෂමව හා ඵලදායීව ඉටු කිරීමට හැකි වන අයුරින් මුල් පනත් කෙටුම්පතට නව සංශෝධන ඇතුළත් කරමින් නව කෙටුම්පත වැඩිදියුණු කර තිබේ.
2019.10.29 දින පැවති අමාත්‍ය මණ්ඩල රැස්වීමේදී ශ්‍රී ලංකා මහ බැංකු පනත් කෙටුම්පත සකස් කිරීම සඳහා අනුමැතිය ලබා දී තිබේ.
ඒ අනුව සකස් කරන ලද ශ්‍රී ලංකා මහ බැංකු පනත් කෙටුම්පත 2019.11.01 දින රජයේ ගැසට් පත්‍රයේ පළ කර ඇත.
එය අනුමැතිය ලබාගැනීම සඳහා පාර්ලිමේන්තුවට ඉදිරිපත් කර තිබුණ ද න්‍යාය පුස්ථකයට එය ඇතුළත් කර නොමැත.
ඒ අනුව, නීති කෙටුම්පත් සම්පාදක විසින් සකස් කර ඇති පනත් කෙටුම්පත, අමාත්‍ය මණ්ඩලය වෙත ඉදිරිපත් කරන ලදුව, එකී පනත් කෙටුම්පත සඳහා මෙලෙස අනුමැතිය ලබා දෙන ලදී.
