පවතින ඩීසල් අර්බුදය හමුවේ පෞද්ගලික බස් රථ ධාවනය හෙට (06) සිට 50%ක් දක්වා අඩු කරන බව බස් සංගම් පවසයි.
ලංකා පෞද්ගලික බස් හිමියන්ගේ සංගමයේ සභාපති, ගැමුණු විජේරත්න මහතා සඳහන් කළේ ලංගම ඩිපෝ හරහා ඩීසල් ලබාදෙන බව පැවසුවද එය ප්‍රායෝගික තත්ත්වයක් නොවන බවයි.
එබැවින් මෙම තීරණය ගන්නා බවද හෙතෙම සඳහන් කළේය.
අන්තර් පළාත් පෞද්ගලික බස් සංමයේ සභාපති සරත් විජිත කුමාර මහතා පවසන්නේ බස්රථ ධාවනය අඩාලවීම හේතුවෙන් දුරගමන් සේවා බස්රථ ද ධාවනය අඩාලවන බවයි.
මේ අතර මගී ප්‍රවාහන බස් රථ ඇතුළු පොදු ප්‍රවාහන සේවා සඳහා ඉන්ධන ලබාදීමේ වැඩපිළි‌වෙළක් සකස් කරන බව ප්‍රවාහන අමාත්‍යාංශය සඳහන් කරයි.
එහි ලේකම්, ආර්.ඩබ්ලිව්.ආර් පේමසිරි මහතා පැවසුවේ, විදුලි බල හා බලශක්ති අමාත්‍යවරයා සමග සාකච්ජා කර මේ සඳහා අවශ්‍ය පියවර ගැනීමට තීරණය කර ඇති බවයි.
