නිල්වලා ගඟ, ගිං ගඟ සහ කළු ගඟට නිකුත් කර තිබූ ගංවතුර අනතුරු ඇඟවීම ඉවත් කර තිබේ.
වාරිමාර්ග දෙපාර්තමේන්තුවේ ජලවිද්‍යා හා ආපදා කළමනාකරණ අංශය පවසන්නේ පසුගිය පැය 24 තුළ එම ගංගා ද්‍රෝණිවලට සැලකිය යුතු වර්ෂාපතනයක් වාර්තා නොවීම නිසා එම ජල මට්ටම් පහළ බැසයමින් පවතින බැවින් ගංවතුර අනතුරු ඇඟවීම් ඉවත් කරන බවයි.
පසුගිය දිනවල නිල්වලා ගංඟාවේ තල්ගහගොඩ, පානදුගම, පිටබැද්දර හා ඌරව ජලමිනුම් ස්ථානවලින් වාර්තා වූ තරමක් ඉහල ජල මට්ටම් මේ වන විට සැලකිය යුතු ලෙස පහල යමින් පවති. එම ගංඟාවේ ගංවතුර සම්බන්ධයෙන් වූ අවදානම් සහගත තත්ත්වය මේ වන විට පහව යමින් පවතී.
ඒ අනුව නිල්වලා ගඟ ද්‍රෝණියේ පහල ධාරා ප්‍රදේශයේ පහත් බිම්වල තවදුරටත් පිටාර ජලය රැඳී ඇත්නම් එම ජලයද ඉක්මනින් ක්‍රමයෙන් බැස යනු ඇතැයි වාරිමාර්ග දෙපාර්තමේන්තුවේ ජලවිද්‍යා හා ආපදා කළමනාකරණ අංශය පවසයි.
පසුගිය දිනවල ගිං ගංඟාවේ තවලම හා බද්දේගම ජලමිනුම් ස්ථානවලින් වාර්තා වූ තරමක් ඉහල ජල මට්ටම් මේ වන විට සැලකිය යුතු ලෙස පහල යමින් පවති.
ඒ අනුව ගිං ගඟ ද්‍රෝණියේ පහල ධාරා ප්‍රදේශයේ පහත් බිම්වල තවදුරටත් පිටාර ජලය රැඳී ඇත්නම් එම ජලයද ඉක්මනින් ක්‍රමයෙන් බැස යනු ඇත.
කළු ගඟ ද්‍රෝණියට සැලකිය යුතු වර්ෂාපතනයක් වාර්තා නොවීම නිසාත්, පසුගිය දිනවල එම ගංඟාවේ පුටුපාවුල, ඇල්ලගාව, රත්නපුර, මගුර හා කලවැල්ලෑව(මිල්ලකන්ද) ජලමිනුම් ස්ථානවලින් වාර්තා වූ තරමක් ඉහල ජල මට්ටම් මේ වන විට සැලකිය යුතු ලෙස පහල යමින් පවතින නිසාත් එම ගංඟාවේ ගංවතුර සම්බන්ධයෙන් වූ අවදානම් සහගත තත්ත්වය මේ වන විට පහව යමින් පවතී.
ඒ අනුව කළු ගඟ ද්‍රෝණියේ පහල ධාරා ප්‍රදේශයේ පහත් බිම්වල තවදුරටත් පිටාර ජලය රැඳී ඇත්නම් එම ජලයද ඉක්මනින් ක්‍රමයෙන් බැස යනු ඇති බව වාරිමාර්ග දෙපාර්තමේන්තුව පවසයි.
