ප්‍රවීණ සිනමා නිළියක මෙන්ම, විත්‍රපට නිෂ්පාදිකාවකද වූ සුමනා අමරසිංහ මහත්මිය අද (5)අභාවප්‍රාප්ත වී තිබෙනවා.
70 දශකයේදී මෙරට සිනමාවේ ජනප්‍රිය නිළියකව සිටි ඇය විවාහයෙන් පසුව රංගනයට වඩා චිත්‍රපට නිෂ්පාදනයට ප්‍රමුඛතාව දී කටකළාය.
සිංහල සිනමාවේ ජනප්‍රිය නළුවකු මෙන්ම චිත්‍රපට අධ්‍යක්ෂකවරයකු ද වූ රෝයි ද සිල්වා සමඟ විවාහ වී සිට ඇය මිය යනවිට 74වැනි වියේ පසුවිය.
60 දශකයේදී ජනතා පුවත්පත විසින් සංවිධාන කරනලද “ලස්සන මුහුණ “නැමැති තරඟයේ දෙවැනි ස්ථානය ලද ඇය ඒ ඔස්සේ සිනමා වරම් ලැබීය.
පිපෙන කුමුදු චිත්‍රපටයෙන් සිනමා වරම් හිමිකරගත් සුමනා අමරසිංහ අනතුරුව සූකිරි කෙල්ල,ඔබයි මමයි,සුනේත්‍රා, රෑන ගිරවු,මේ දෑස කුමකටද,දැන් මතකද,ටොම් පචයා, රෑ දැනියෙල් දවල් මිගෙල්,ලොකුම හිනාව,ගෙදර බුදුන් අම්මා,තණ ගිරවි,චෙරියෝ ඩොක්ටර්,චෙරියෝ සාජන්ට්,කඩවුණු පොරොන්දුව (නව නිෂ්පාදනය) ,හතර පෙරළිය,මිහිඳුම් සිහින වැනි චිත්‍රපට රාශියකට රංගනයෙන් දායකවිය.
සිය සැමියා වූ අභාවප්‍රාප්ත රෝයි ද සිල්වා අධ්‍යක්ෂනය කළ බොහොමයක් චිත්‍රපට නිෂ්පාදන කරනු ලැබුවේ ද ඇය විසිනි.
අභාවප්‍රාප්ත සුමනා අමරසිංහ මහත්මියගේ දේහය පිළිබඳ අවසන් කටයුතු පසුව දැනුම් දීමට නියමිතය.
