පාස්කු ප්‍රහාරය සම්බන්ධයෙන් කරුණු සොයා බැලීමට පත්කල විශේෂ ජනාධිපති කොමිෂන් සභා වාර්තාවේ නිර්දේශ ක්‍රියාත්මක කිරීම සම්බන්ධයෙන් කරුණු අධ්‍යනයට පත් කළ අමාත්‍යාංශ අනු කමිටුවේ වාර්තාව හෙට (05) ජනාධිපති ගෝඨාභය රාජපක්ෂ මහතාට භාරදීමෙන් අනතුරුව කැබිනට් මණ්ඩලයට ඉදිරිපත් කිරීමට නියමිතය.
කමිටු වාර්තාව මේ වන විට සකස්කර අවසන් බව එම කමිටුවේ ලේකම් ජනාධිපති නීති අධ්‍යක්ෂ ජනරාල් නීතීඥ හරිගුප්තා රෝහණධීර මහතා සදහන් කරයි.
පාස්කු ප්‍රහාරය සම්බන්ධයෙන් කරුණු අධ්‍යනය කළ පාර්ලිමේන්තු ආංශික අධීක්ෂණ කමිටුව විසින් රටේ ආරක්ෂාව සම්බන්ධයෙන් කළ නිර්දේශ ගැනද මෙම අනුකමිටුවේ අවධානයට යොමුවූ තිබේ.
චමල් රාජපක්ෂ ඇමතිවරයාගේ සභාපතිත්වයෙන් යුත් අමාත්‍යාංශ අනු කමිටුව උදය ගම්මන්පිල, ප්‍රසන්න රණතුංග, ජොන්ස්ටන් ප්‍රනාන්දු හා රෝහිත අබේගුණවර්ධන මහත්වරුන්ගෙන් සමන්විතය.
කමිටුවේ වාර්තාව භාරදීමට මුලින් නියමිතව තිබුණේ පසුගිය 15වැනිදා ය. එහෙත් වැඩි දුර විමර්ශනය කිරීම සඳහා කමිටුව විසින් තවත් සති දෙකක කාලයක් ඒ සදහා ලබා
ගත්තේය. එම කාලසීමාව පසුගිය 30 වැනිදායින් අවසන් විය.
