නිරෝධායන නීති උල්ලංඝනය කරමින් කටයුතු කළ බස්නාහිර පළාතේ ආයතන 2023 ක් ඊයේ (30) සවස 3.00 සිට 6.00 දක්වා පැය තුනක මෙහෙයුමකදී හදුනා ගැනීමට පොලීසිය සමත්ව ඇත.
බස්නාහිර පළාත කේන්ද්‍රකරගත් මෙම මෙහෙයුමේදී ආයතන 2891 ක් පරීක්ෂාවට ලක්වුණු බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහන මහතා සදහන් කළේය. එම මෙහෙයුමේදී පුද්ගලයින් 6320 දෙනෙක් පරීක්ෂාවට ලක්කෙරුණු බවත් නිරෝධායන නීති උල්ලංඝනය කරමින් කටයුතු කළ 26 දෙනෙක් අත්අඩංගුවට ගත් බවත් අජිත් රෝහන මහතා කීය.
ආර්ථික මධ්‍යස්ථාන, බේකරි නිෂ්පාදන ස්ථාන, ඇදුම් මසන ස්ථාන, ජංගම ආහාර අලෙවි ස්ථාන ඇතුළු ආයතන ව්‍යාපාරික ස්ථාන සහ ආයතන රැසක් පරීක්ෂාවට ලක්වුණු බවද අජිත් රෝහන මහතා සදහන් කළේය.
නිරෝධායන නීතිවට අනුව ආයතන සහ ව්‍යාපාරික ස්ථාන පවත්වාගෙන නොගිය එම ව්‍යාපාරික ස්ථාන සහ ආයතන ව හිමිකරුවන්ටත් පරිපාලකයන්ටත් එරෙහිව නීතිමය පියවර ගන්නා බවද අජිත් රෝහන මහතා වැඩිදුරටත් සදහන් කළේය.
