ශ්‍රී ලංකාවේ වාණිජ ගුවන් සේවා ක්ෂේත්‍රයේ ආරම්භය සනිටුහන් කරමින් මීට වසර 43 කට පෙර අද වැනි දිනක ශ්‍රී ලංකන් ගුවන් සේවය ආරම්භය විය. වර්ෂ 1979 සැප්තැම්බර් මස 1 වන දින දියත් කරන ලද ගුවන් සේවය අද වන විට ශ්‍රී ලංකා සංචාරක ක්ෂේත්‍රයේ විශිෂ්ට සන්ධිස්ථාන පසු කරමින් ඇත. ජාතික ගුවන් සේවය ලෙස ශ්‍රී ලංකන් ගුවන් සේවය ශ්‍රී ලංකාවේ ජාතික ආර්ථිකයටත් සංචාරක ක්ෂේත්‍රයේ උන්නතියටත් ලබාදෙන දායකත්වය කිසිසේත් අවතක්සේරු කළ නොහැකි වී තිබේ.
ගුවන් සමාගම ශ්‍රී ලංකාවත් ලෝකයත් යාකරන ප්‍රධානතම දොරටුව වන අතර දැනට ගුවන් යානා 24 කින් සමන්විත එයාර්බස් ගුවන් යානා ඇණියක් සමඟින්, සෘජු සහ සංකේත හුවමාරු මෙහෙයුම් හරහා මහාද්වීප පුරා රටවල් 60 ක නගර 119 කට ශ්‍රී ලාංකිකයන් සම්බන්ධ කර ඇත. එපමණක් නොව, කොළඹ සිට පැරීසිය, ෆ්රැන්ක්ෆර්ට්, මෙල්බර්න්, සිඩ්නි, ටෝකියෝ සහ ලන්ඩන් ඇතුළු ගෝලීය ප්‍රධාන නගර කිහිපයක් අතර සෘජු ගුවන් ගමන් ක්‍රියාත්මක කරන එකම ගුවන් සමාගම වන්නේ ද ශ්‍රී ලංකන් ගුවන් සමාගමයි. එම මෙහෙයුම් හරහා ශ්‍රී ලංකා වෙළඳපල සමඟ අදාල ගමනාන්තවල සමාජ-ආර්ථික සබඳතා සක්‍රීය කරලීමට ද ගුවන් සේවය කැපවී සිටියි.
ජාත්‍යන්තර සංචාරකයින්ට ශ්‍රී ලංකාව සහ රටේ දර්ශනීය උරුමය හඳුන්වා දීම සඳහා ශ්‍රී ලංකන් ප්‍රධාන භූමිකාවක් ද ඉටු කර ඇත. අඩසියවසකට ආසන්න කාලයක සිට ශ්‍රී ලංකන් ගුවන් සේවය ශ්‍රී ලංකාව වඩාත් කැමති නිවාඩු ගමනාන්තයක් ලෙස ස්ථානගත කිරීම සඳහා කොළඹ, දකුණු ඉන්දියාව සහ මාලදිවයින වෙත මිලියන ගණනක් මගී සම්බන්ධතා පවත්වා ඇත. බණ්ඩාරනායක ජාත්‍යන්තර ගුවන් තොටුපළ හරහා සංක්‍රමණය වන මගීන්ගෙන් සියයට 95කට වැඩි ප්‍රමාණයක් රැගෙන යන්නේ ශ්‍රී ලංකන් ගුවන් සේවයයි. එසේම ලොවපුරා සංචාරකයින් ශ්‍රී ලංකාවට ගමන් කිරීම සඳහා වැඩි පුරම තෝරාගන්නා ගුවන් සේවය වන්නේ ද ශ්‍රී ලංකන් ගුවන් සේවයයි.
1979 සිට මේ දක්වා කාලය තුළ දෙස් විදෙස් මගීන් සඳහා මගී ගමන් මිලියන 89 කට අධික සංඛ්‍යාවක් සඳහා ශ්‍රී ලංකන් මෙහෙයුම් සිදු කර ඇත. එය ශ්‍රී ලංකාවේ ජනගහනයට සමාන සංඛ්‍යාව මෙන් සිව් ගුණයකි. ගුවන් සමාගම ශ්‍රී ලංකාවට විදේශ මුදල් උපයාදෙන අතර එහි ආදායමෙන් සියයට 85 කට වඩා වැඩි ප්‍රමාණයක් ජාත්‍යන්තර වෙළඳපොල තුළ විදේශ මුදල් වලින් උපයනු ලැබේ.
ශ්‍රී ලංකන් ගුවන් සමාගම ශ්‍රී ලංකාවේ සංචාරක සහ සංචාරක වෙළඳාමේ සැපයුම් දාමය හරහා ආර්ථික ක්‍රියාකාරකම් ද බලගන්වා ඇත. මෙම අංශයේ රැකියා කරන දහස් ගණනකට වක්‍රව වුවද රැකියා උත්පාදනය කිරීම සහ ජීවනෝපාය සංවර්ධනය සඳහා ගුවන් සේවය සහාය වී තිබේ. එහි ප්‍රතිඵලයක් ලෙස ශ්‍රී ලංකන් ගුවන් සමාගම ශ්‍රී ලංකාවේ දළ දේශීය නිෂ්පාදිතයට සැලකිය යුතු දායකත්වයක් සපයන බවට ඇස්තමේන්තු කර ඇත.
මගී සේවා හැරුණු විට, ශ්‍රී ලංකන් කාගෝ සහ ශ්‍රී ලංකන් ඉංජිනේරු අංශය වැනි ගුවන් සමාගමේ උපාය මාර්ගික ව්‍යාපාරික ඒකක සියල්ල රටට ප්‍රගතිශීලී දායකත්වයක් ලබා දී ඇත. ශ්‍රී ලංකන් කාගෝ, අත්‍යාවශ්‍ය භාණ්ඩ පියාසර කිරීම සඳහා සිය මෙහෙයුම් වේගවත් කළ අතර, කොවිඩ් වසංගත තත්ත්වය තුළ අනෙකුත් ගුවන් සේවා ක්‍රියාත්මක නොවූ පසුබිමක ශ්‍රී ලංකාවට සහ ඉන් පිටතට ව්‍යාපාර කටයුතු සඳහා පහසුකම් සලසන ලදී. මගී ගුවන් ගමන් නතර වීමත් සමඟ ගුවන් සමාගමේ පැවැත්ම සහතික කිරීම සඳහා භාණ්ඩ මෙහෙයුම් සඳහා සිය සම්පත් නැවත යෙදවීමට ගුවන් සමාගම ඵලදායී ලෙස කටයුතු කරන ලදී.
ශ්‍රීලංකන් කාගෝ විසින් පසුගිය වසර දහය තුළ පමණක් මෙට්‍රික් ටොන් මිලියනයකට අධික ප්‍රමාණයක් ගුවන් භාණ්ඩ ප්‍රවාහනය කර ඇත. ඒ හා සමානව, අනෙකුත් ගුවන් සමාගම් සඳහා කැපීපෙනෙන තෙවන පාර්ශවීය නඩත්තු සේවා සැපයීම සඳහා ශ්‍රී ලංකන් ඉන්ජිනේරු අංශය කටයුතු සලසා තිබේ. ඔවුන් කලාපයේ සහ ඉන් ඔබ්බටත් සිය ඉංජිනේරු දැනුම පුළුල් කර ඇත. මේ වසරේ අත්සන් කරන ලද නව ගිවිසුම් ක්‍රියාවලිය හරහා ඩොලර් මිලියන ගණනක් ගුවන් සමාගමට උපයා ගත හැකි වනු ඇත.
එසේ වුවද, ජාතික ගුවන් සේවයේ අද දින සිය 43 වැනි සංවත්සරයට එළඹෙන අවස්ථාවේ දී බොහෝ අභියෝග වලට මුහුණ දීමට සිදුව තිබේ. කෙසේ වෙතත්, ශ්‍රීලංකන් ගුවන් සේවය වසර ගණනාවක් පුරා විවිධ අභියෝග ජය ගනිමින් ශ්‍රී ලංකාවට අත්‍යාවශ්‍ය මොහොතේ සිය කැපවීමත් ශ්‍රමයත් ලබා දීමට කටයුතු කර ඇත. විශේෂයෙන්ම ගෙවී ගිය ජාතික අර්බුදකාරී අවස්ථාවල දී එය මනාවට පැහැදිලි වී ඇත.
මෙරටට ගුවන් සේවයේ වැදගත්කම පිළිබඳව සිහිපත් කරමින් ශ්‍රී ලංකන් ගුවන් සේවයේ සභාපති අශෝක් පතිරගේ මහතා සඳහන් කළේ ශ්‍රීලංකන් ගුවන් සේවය පසුගිය දශක හතරක කාලය තුළ ගෝලීය ගුවන් අවකාශ තුළ ශ්‍රී ලංකාව නියෝජනය කරමින් ඉතා භාරදූර වගකීමක් ඉටු කර ඇති බවයි. “ශ්‍රීලංකන් ගුවන් සමාගම රටට මුහුණ දීමට සිදු වූ අභියෝගාත්මක අවස්ථාවල ඒවා ජයග්‍රහණය කිරීමට සහය ලබාදුන්නා පමණක් නොව, රට නැවතත් දෙපයින් හිට ගැනීමටත් උපකාර කර තිබෙනවා. රටේ පවතින ආර්ථික අර්බුදය හේතුවෙන් ශ්‍රී ලංකාව සහ ලෝකය අතර සංචාර සහ වෙළඳ සබඳතා පවත්වාගෙන යාමටත් ගුවන් සේවය සහය ලබාදෙනවා. විශේෂයෙන්ම කොවිඩ් වසංගත හේතුවෙන් අනෙකුත් ගුවන් සමාගම් ශ්‍රී ලංකාවට ගුවන් ගමන් නවතා දැමීමේ දී ලොව පුරා අතරමංව සිටි ශ්‍රී ලාංකිකයන් නැවත රටට ගෙන්වා ගැනීමට ශ්‍රී ලංකන් සැමවිටම ශක්තියක් වුණා . එම දුෂ්කර කාලවලදී ගුවන් සේවය වෙනුවෙන් කැපවීම් සිදුකළ ශ්‍රී ලංකන් ගුවන් සේවයේ සෑම සේවකයෙකුටම මම ස්තූතිවන්ත වෙමි”. යනුවෙන් ඒ මහතා වැඩිදුරටත් සඳහන් කළේය.
ශ්‍රීලංකන් ගුවන් සමාගම මෙරටට ගෙන එන සෑම ජාත්‍යන්තර සම්මානයකින්ම රටට අභිමානයක් ගෙන දී ඇත. 1979 වසරේ සිට ශ්‍රී ලංකන් විසින් දිනාගත් සම්මාන ලැයිස්තුගත කිරීමට නොහැකි තරම් වන අතර, පසුගිය දශකය තුළ පමණක් ගුවන් සමාගම කීර්තිමත් ජාත්‍යන්තර සම්මාන 50කට ආසන්න ප්‍රමාණයක් දිනාගෙන ඇත.
