උස්සන්ගොඩ වෙරළ පාගමින් සිටි පිරිසක් රැල්ලකට හසුවීමෙන් එකම පවුලේ තිදෙනෙක් අතුරුදන්ව ඇතැයි අම්බලන්තොට පොලීසිය සඳහන් කරයි.
උස්සන්ගොඩ පිහිටි විහාරස්ථානයකට පැමිණි පිරිසක් වන්දනාමාන කර අනතුරුව රැල්ල පෑගීමට වෙරළට ගොස් සිටියදී මෙම අනපේක්ෂිත අනතුර සිදුව තිබේ.
මවක්, පුතෙක් සහ එම මවගේ නැගණියගේ පුතා මෙසේ රැල්ලට ගසාගෙන ගොස් ඇත. මව 55 වන වියේ පසුවන්නියකි. පුතා 16 හැවරදිය. නැගණියගේ පුතා 22 හැවරදිය. ඔහු දෙණියාගේ පදිචිකරුවෙක් වන අතර සෙසු අය ඒ කිට්ටුව ප්‍රදේශයක පදිංචිකරුවන් බව පොලීසිය සඳහන් කරයි.
විහාරස්ථානයට පැමිණ කණ්ඩායම් දෙකක් රැල්ල පාගමින් සිටියදී රැල්ලට ගසාගෙන ගොස් ඇත්තේ එක කණ්ඩායමකි. විශාල රැල්ලක් ඔවුන් සිටි ස්ථානයට පැමිණ මුහුදට ගසාගෙන ගොස් ඇති බවත් සිව් දෙනෙක් එම අවස්ථාවේදී ගසාගෙන ගොස් ඇති බවත් පොලීසිය කියයි. ඒ අයගෙන් දිවි ගලවාගෙන ඇත්තේ එක් අයෙක් පමණි. සෙසු තිදෙනා ගොඩබිමට එන අතර තුර දෙවැනි රැල්ල විසින් ඔවුන්ව මුහුදට ගසාගෙන ගොස් ඇති බව සෙසු අය පවසන බව පොලීසිය සඳහන් කරයි.
රැල්ලට ගසාගෙන ගිය තිදෙනා සොයා නාවික හමුදාව මේ වන විටත් මෙහෙයුමත් දියත්කර ඇත.
