ගාල්ල මකුලුව ප්‍රදේශයේ ඉදිකරමින් පවතින තෙමහල් ගොඩනැගිල්ලක ඉහළ මහලේ සිට සරුංගල් යවමින් සිටි පියපුතු යුවලක් ඇතුළු තිදෙනෙක් අද (14) සවස ඉහළ මහලෙන් බිමට ඇද වැටී මියගොස් තිබේ.
වයස අවුරුදු 05 දරුවත් වයස අවුරුදු 41 ක පියාත් 43 වියැති අසල්වාසියෙකුත් එසේ මරණයට පත්ව ඇතැයි ගාල්ල පොලීිසිය සදහන් කළේය.
එම ගොඩනැගිල්ල හිමිකරු 05 හැවරදි දරුවාගේ මහප්පාට අයත් බවත් ගොඩනැගිල්ලෙහි ඉදිකිරීම් කටයුතු භාරව සිටින්නේ දරුවාගේ පියා බවත් පොලීසිය කියයි.
ගොඩනැගිල්ලෙහි පහළ මහලේ මැද මිදුලක් ඇති බවත් එම මැද මිදුල ඉහළ මහළ දක්වාම නිරාවරණය වී ඇති බවත් පොලීසිය සදහන් කරයි. තවමත් ගොඩනැගිල්ලෙහි වැඩ අවසන්ව නැති බැවින් වැසි ජලය ඒ නිරාවරණය කර ඇති කොටසින් ගොඩනැගිල්ල තුළට වැටෙන බැවින් ඇස්බැස්ටොස් දමා තාවකාලිිකව වසා දමා තිබී ඇත. සරුංගල් අරිමින් සිටින විට ඔවුන් තිදෙනා එම ඇස්බැස්ටෝස් සෙවිලි තහඩු මත රැදී සිට ඇති බවත් තිදෙනාගේ බර උසුලා ගැනීමට නොහැකිව සෙවිලි තහඩුව කඩාගෙන ඒ අයත් සමග බිමට ඇද වැටී තිබෙන බවත් පොලීසිය කියයි.
