මෙරට රිය අනතුරු වැඩියෙන්ම සිදුවන අප්‍රේල් 14 සහ 15 යන දින දෙකතුළ මෙවරත් රිය අනතුරුවලින් පුද්ගලයින් 30 දෙනෙක් මිය ගොස් තිබේ.
පොලිස් මාධ්‍ය ප්‍රකාශක නියෝජ්‍ය පොලිස්පති නීතීඥ අජිත් රෝහන මහතා සදහන් කරනු ලැබුවේ ඊයේ (16) අලුයම 6.00 අවසන් වූ පැය 24ක කාලය තුළ පමණක් රිය අනතුරුවලින් පුද්ගල මරණ 16ක් වාර්තා වී ඇති බවය. අප්‍රේල් 14 වන දින රිය අනතුරුවලින් සිදුවූ මරණ ගණන 14 කි.
ඒ අනුව අද (16) අලුයම 6.00 න් අවසන් වූ පැය 48 තුළ රිය අනතුරුවලින් ජීවිත 30ක් පමණ අහිමිව ඇති බවත් ඉන් 12 දෙනෙකුම යතුරුපැදිකරුවන් වන බවත් අජිත් රෝහන මහතා කීය.
රිය අනතුරු පාලනය කිරීම සදහා ගෙවී ගිය දින කිහිපය තුළ පොලීසිය මහ මග නිරන්තරයෙන් රැදී සිටිමින් මාර්ග නීති උල්ලංඝණය කරන රියදුරන් නීතියේ රැහැනට හසුකර ගැනීමේ මෙහෙයුමක්ද දියත් කළ බව අජිත් රෝහන මහතා පැවැසීය.
ඒ අනුව අප්‍රේල් 14 සහ 15 යන දින දෙක තුළදීී පමණක් රථවාහන වැරදි සම්බන්ධයෙන් රියදුරන් 2844 දෙනෙක්ට එරෙහිව නඩු ලබාගගෙන ඇතැයිද අජිත් රෝහන මහතා සදහන් කළේය.
එම කාලය තුළ බීමත් රියදුරන් 783 දෙනෙක් අත්අඩංගුවට ගෙන තිබේ. ඒ අය අතර යතුරුපැදිකරුවන් 534 දෙනෙක්, මෝටර් රථ රියදුරන් 433 දෙනෙක්, ත්‍රි රෝද රථ රියදුරන් 180 දෙනෙක්, බස් රථ රියදුරන් 02 දෙනෙක්, ඩබල්කැබ් රියදුරන් 11 දෙනෙක්, ලොරි රථ රියදුරන් 10 දෙනෙක් සහ වෙනත් රථ රියදුරන් 03 දෙනෙක් සිටින බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහන මහතා වැඩිදුරටත් සදහන් කළේය.
