ජා-ඇලින් සොයාගත් මත්කුඩු ජාවාරම පිටුපස සිටින්නේ අවසන් යුද සමයේ මෙරටින් පළාගොස් ප්‍රංශයේ රැදී සිටින රූබන් නැමැති එල්.ටී.ටී.ඊ.යේ ප්‍රබලයෙක් සහ ඩුබායිහී සිටින ජූඩ් ප්‍රියන්ත යන මත්කුඩු ජාවාරම්කරු බවට සැකකරන තොරතුරු රැසක් පොලිස් මත්ද්‍රව්‍ය කාර්යාංශයට ලැබී තිබේ.
පොලිස් මත්ද්‍රව්‍ය කාර්යාංශයත් මීගමුව කොට්ඨාශ අපරාධ විමර්ශන ඒකකයත් නාවික හමුදාවත් ඉකුත් ජනවාරි 04 වෙනිදා කළ ඒකාබන්ධ මත්කුඩු වැටලීමේදී මහා මුහුදේදී බෝට්ටුවක් සමග අල්ලාගත් අයිස් නැමැති මත්කුඩු කිලෝ 126 සහ හෂිස් කිලෝ 88 ටද රූබන්ගේ නම කියැවිණි.
ඉකුත් වසරේ දෙසැම්බර් 06 වෙනිදා සුරාබදු නිලධාරීන් විසින් ඉරණවිලදී අල්ලාගන්නා මත්කුඩු කිලෝ 200 යේ හිමිකරවා වූයේ ජූඩ් ප්‍රියන්තය. ඒ පිටුපසද රූබන් සිටින බව පොලිස් තොරතුරුවල සදහන්ය. එසේම පොලිස් විශේෂ කාර්ය බලකායේ ගෝනහේන කදවුරේ නිලධාරීන් කණ්ඩායමක් ඉකුත් නොවැම්බර් 21 වෙනිදා වැලිගමින් අල්ලාගන්නා හෙරොයින් කිලෝ 111 පිටුපසද සිටියේ රූබන්ය.
මේ වන විට එංගලන්තයේ රැදී සිටින කුඩු ලාල් යැයි කුප්‍රකට පුද්ගලයාගේ ප්‍රධාන ගෝලයා වන්නේ රූබන් බව පොලිස් තොරතුරුවල සදහන්ය. රූබන් සිදුකරන්නේ මත්කුඩු ජාවාරම පමණක් නොව, ඉන්දියාව සහ මෙරට අතර සිදුවන කේරල ගංජා ජාවාරමටද සම්බන්ධ බව හෙළිවී තිබේ. මෙම ඡාවාරම්කරුව ප්‍රංශ රූබන් යැයි කියාද හදුන්වනු ලබයි.
