ඊශ්‍රායල-පලස්තීන කලාපය තුළ ඇති වී තිබෙන නවතම ගැටුම්කාරී තත්ත්වය පිළිබඳව තමා දැඩි ලෙස කනස්සල්ලට පත්ව සිටින බවත් එය අසල්වැසි කලාප තුළට ද ඇතුළු වී ලොවටම විනාශකාරී ප්‍රතිවිපාක ඇති කළ හැකි දෙයක් බව අගමැති මහින්ද රාජපක්ෂ මහතා පවසයි.
ඊශ්‍රායල-පලස්තීන අර්බුදය සම්බන්ධයෙන් නිවේදනයක් නිකුත් කරමින් අගමැතිවරයා වැඩිදුරටත් පෙන්වා දෙන්නේ ඇතිවී තිබෙන ගැටුම හේතුවෙන් බොහෝ දරුවන්ගේ මියයාම ඇතුළුව අදාළ භූමි ප්‍රදේශවල වෙසෙන ජනතාවට බොහෝ හානියක් හා දුක්ඛිත තත්වයක් ඇති කර ඇති බවයි.
පලස්තීන ජනතාවගේ ප්‍රශ්නය නිර්මාණය කිරීම යටත් විජිතවාදයේ ඍජු ප්‍රතිඵලයක් වූ අතර අද අත්විඳින ගැටුමට බීජ වපුරන විට මෙම කලාපයේ ජනතාවට තමන්ගේ ඉරණම පාලනය කර ගත නොහැකි වූ බවත් ඔහු පෙන්වා දෙයි.
පලස්තීන අරමුණු සඳහා දීර්ඝ කාලීන ආධාරකරුවෙකු ලෙස සහ පලස්තීනය සමඟ සහයෝගීතාව සඳහා වූ ශ්‍රී ලංකා කමිටුවේ ආරම්භක සභාපතිවරයා වශයෙන්, පලස්තීන ජනතාවට රාජ්‍යත්වයට ඇති නීත්‍යානුකූල අයිතිය තහවුරු කළ යුතුය යන ස්ථාවරය තමා සැමවිටම දරන බව අගමැතිවරයා අවධාරණය කරයි.
සුවිශේෂී ජනතාවක් ලෙස ඔවුන්ගේ අනන්‍යතාවය තහවුරු කිරීම සඳහා ජනතාවගේ අයිතිවාසිකම් ආරක්ෂා කිරීම වැදගත් ය. පලස්තීන ප්‍රශ්නයට කල් පවත්නා විසඳුමක් සඳහා පලස්තීන සහ ඊශ්‍රායල් ජනයාගේ නීත්‍යානුකූල හා සංවේදී ආරක්ෂක අවශ්‍යතා හඳුනා ගැනීම අත්‍යවශ්‍ය බව ද අගමැතිවරයා සඳහන් කරයි.
සියලු කාරණා සාකච්ඡා මාර්ගයෙන් ස්ථිරවම විසඳා ගැනීමත් සමඟ දෙපාර්ශවයේම නීත්‍යානුකූල අභිලාෂයන් සහ තිරසාර සාමය ඇති කළ හැක්කේ සාමය, ආරක්ෂාව සහ අන්‍යෝන්‍ය පිළිගැනීම තුළ ඊශ්‍රායලයේ හා පලස්තීනයේ ජනතාව පැත්තෙන් ජීවත්වන අයට පමණක් බව ශ්‍රී ලංකාව ස්ථාවරය දරයි.
ඊස්රායල්-පලස්තීන කලාපය ශුද්ධ භූමියක් බව තම අවංක විශ්වාසය බවත් එය ලොව පුරා විවිධ ආගම්වලට අයත් මිනිසුන්ට සැබවින්ම පූජනීය බවත් අගමැතිවරයා කියා සිටී.
එනිසා සංයමයෙන් කටයුතු කිරීම සහ සතුරුකම් අවසන් කිරීම මෙන්ම සටන් විරාමයක් සඳහා සාකච්ඡා ආරම්භ කරන ලෙස තමා දෙපාර්ශ්වයම උනන්දු කරන බවද අගමැති මහින්ද රාජපක්ෂ මහතා අවධාරණය කර සිටී.
