රාගම සහ මහබාගේ පිහිටි වෙළද සැල්වලින් සහ මහමග වෙළදාමේ නිරත වෙළෙන්දන්ගෙන් කප්පම් ගැනීම්වල නිරතව සිටි නැගී එන පාතාල සාමාජිකයෙක් අත්අඩංගුවට ගෙන තිබේ.
විශේෂ කාර්ය බලකාය පෙරේදා (18) දිනේෂ් කුමාර නොහොත් සබීත නැමැති මෙම සැකකරු අත්අඩංගුවට ගෙන ඇත.
රාගම හොරපෙ දුම්රිය පොල ආසන්නයේදී ඔහු මෝටර් රථයකින් ගමන් කරමින් සිට ඇති අතර ඔහු සන්තකයේ තිබී අත්බෝම්බයක්ද, කිනිස්සක්ද,කේරල ගංජා මිලි ග්රෑම් 150 ක්ද තිබුණු බව පොලිස් විශේෂ කාර්ය බලකාය සදහන් කරයි.
අත්අඩංගුවට ගන්නා අවස්තාවේදී ඔහු පදවමින් සිටි මෝටර් රථය පළාත්පාලන ආයතනයක මන්ත්‍රීවරයෙක් විසින් කුළි පදනම මත ලබාගෙන එය මෙම පාතාල අපරාධකරුට භාවිතා කිරීමට ලබාදී ඇති බව හෙළිවී ඇත.
වයස අවුරුදු 34 ක් වන මෙම සැකකරුට එරෙහිව ගම්පහ අධිකරණළුය විසින් විවෘත වරෙන්තුවක්ද නිකුත්කර ඇත
මොහුට එරෙහිව වෙඩි තැබීම් සහ මංකොල්ලකෑම් සම්බන්ධයෙන් නඩු කිහිපයක්ද අධිකරණවල විභාග වන බව විශේෂ කාර්ය බලකාය සදහන් කරයි.
විශේෂ කාර්ය බලකායේ සේනාවිධායක නියෝජ්‍ය පොලිස්පති වරුණ ජයසුන්දර මහතාගේ උපදෙසින් විශේෂ කාර්ය බලකායේ බුද්ධි අංශ ස්ථානාධිපති ප්‍රධාන පොලිස් පරීක්ෂක නදීක සිල්වා මහතා ප්‍රමුඛ නිලධාරීන් කණ්ඩායමක් විසින් සැකකරු අත්අඩංගුවට ගැනීමේ මෙහෙයුම දියත්කර තිබුණි.