මුහුණු පොත හරහා මත්ද්‍රව්‍ය සාදයක් සංවිධානය කළ පොලිස් විශේෂ කාර්ය බලකායේ ජයවර්ධනපුර කඳවුරේ සේවයේ නිරත උප පොලිස් පරීක්ෂකවරයෙක් සහ එම සාදයට සහභාගිවී සිටි තරුණයන් පස් දෙනෙක් මත්ද්‍රව්‍ය සමඟ මහවෙල පොලිසියේ නිලධාරීන් විසින් ඊයේ (01) අත්අඩංගුවට ගෙන ඇත.
මහවෙල පොලිස් වසමේ පිහිටි හෝලයක පැවති මෙම සාදයට 40ක පමණ පිරිසක් සහභාගිවී සිට ඇතැයි පොලිසිය සඳහන් කරයි.
මුහුණු පොත හරහා දැනුවත් කරමින් සංවිධානය කළ මෙම සාදයට විවිධ ප්‍රදේශවලින් තරුණ තරුණියන් සහභාගිවී සිට ඇත.
මෙම සාදය සම්බන්ධයෙන් පොලිසියට ලද තොරතුරකට අනුව කළ පරීක්ෂාවේදී මත්ද්‍රව්‍ය සන්තකයේ තබාගෙන සිටි තරුණයන් පස් දෙනා අත්අඩංගුවට ගෙන තිබේ. සාදය සංවිධානය කළ බව කියන විශේෂ කාර්ය බලකායේ උප පොලිස් පරීක්ෂකවරයා සතුව තිබියදී ගංජා මිශ්‍ර මදන මෝදක මිලිග්‍රෑම් 22100ක් හෑෂ් මිලි ග්‍රෑම් 620ක් සහ මත්පෙති තොගයක්ද සොයාගත් බව මහවෙල පොලිසිය සඳහන් කරයි.
මෙම උප පොලිස් පරීක්ෂක මෙම සාදය සංවිධානය කර එහි පැමිණෙන තරුණ තරුණියන්ට මත්ද්‍රව්‍ය අලෙවිකර ඇති බවට පොලිසිය සැකකරයි.